1-2. Wat da wan reezn wai wi shuda inchrestid eena di buk a Revilayshan?

 SOHNBADI eva invait yu fi luk chroo dehn picha album? Az yu di luk chroo di pichaz, yu si wahn lata peepl weh yu noh noa. Den wan picha kech yu atenshan. Wai? Bikaaz yoo deh eena da picha. Az yu di luk pan it, yu chrai memba wen ahn wehpaat dehn tek di picha. Yu aalso chrai si if yu rekonaiz enibadi els weh deh eena da picha. Da picha reeli speshal tu yoo.

² Di buk a Revilayshan da laik da picha fi too reezn. Fers, da Gaad mek dehn rait dis Baibl buk fi wee. Eena di fers vers, ih seh: “Dis da wahn revilayshan weh Gaad mi giv Jeezas Krais fi giv tu Jan. Jeezas mi geh dis revilayshan fi mek ih ku shoa ih slayv dehn di tingz weh wahn soon hapm.” (Rev. 1:1) Weh rait dong eena dis buk da noh fi evribadi, bot da fi wee az Gaad servants. Bikaaz wi da Gaad peepl, wi noh sopraiz wen wi fain owt dat wi di help mek dehnya prafesi eena di buk a Revilayshan kohn chroo. Soh wen wi reed di buk a Revilayshan, wi di reed bowt tingz weh afek wi persnali. In ada werdz, da laik wi di si wiself “eena di picha.”

3-4. Akaadn tu di buk a Revilayshan, da wen dehnya prafesi wahn kohn chroo, ahn weh dat shuda moov wi fi du?

³ Di sekant reezn wai wi shuda bee inchrestid eena di buk a Revilayshan da bikaaz ih taak bowt wen dehnya prafesi wahn kohn chroo. Di apasl Jan mi-di taak bowt da taim wen hihn mi seh: “Ahn chroo di hoali spirit, Ah fain miself eena di Laad day.” (Rev. 1:10) Wen Jan mi rait  bowt da prafesi rong 96 C.E., “di Laad day” neva staat yet. Ih mi wahn staat yaaz layta. (Mach. 25:14, 19; Look 19:12) Akaadn tu Baibl prafesi, da day mi staat eena 1914 wen Jeezas mi staat rool az King da hevn. Fahn da yaa til now, di Baibl prafesi dehn weh deh eena di buk a Revilayshan ahn weh involv Gaad peepl staat kohn chroo. Yes, wee di liv joorin di taim weh di Baibl kaal “di Laad day”!

⁴ Bikaaz wi di liv eena dehnya eksaitin taimz, wi need fi pay kloas atenshan tu di lovin kongsl weh deh eena Revilayshan 1:3: “Di persn weh reed dis prafesi owt lowd ahn di wan dehn weh lisn an obay dehnya tingz wahn bee hapi, kaaz di set taim fi mek dehnya tingz hapm deh kloas.” Yes, wi need fi “reed dis prafesi owt lowd,” lisn tu di werdz, an “obay” dehn. Wat da som a dehnya werdz weh wi need fi obay?

5. How di buk a Revilayshan shoa wai ih impoatant fi wership Jehoava di rait way?

⁵ Fahn di fers chapta a Revilayshan, wi laan dat Jeezas noa evriting weh di hapm eena di kangrigayshan dehn. (Rev. 1:12-16, 20; 2:1) Wi ku si dat eena di mesij dehn weh hihn mi sen tu di sevn kangrigayshanz da Aysha Maina. Eena dehndeh mesij, hihn mi gi di fers-senchri Kristyanz spesifik inschrokshanz weh help dehn fi wership Jehoava eena di rait way. Ahn dehndeh inschrokshanz aalso aplai tu Gaad peepl tudeh. Weh wi ku laan fan dis? Wi Leeda, Krais Jeezas, noa if wi ga wahn schrang rilayshanship wid Jehoava. Hihn di leed ahn protek wi ahn hihn si evriting. Hihn noa weh wi need fi du soh dat wi ku kantinyu mek Jehoava hapi. Weh inschrokshanz hihn gi wi weh wi need fi obay tudeh?

6. (a) Akaadn tu weh Jeezas mi seh da Revilayshan 2:3, 4, weh prablem di kangrigayshan da Efisos mi gat? (b) Weh lesn wi laan fan dis?

⁶ Reed Revilayshan 2:3, 4. Noh looz di lov fi Jehoava weh yu mi gat eena di biginin. Di mesij weh Jeezas mi sen fi di Kristyanz da Efisos mi taak bowt humoch dehn bayr op ahn how dehn neva stap serv Jehoava, eevn doa dehn mi-di goh chroo chraiyalz. Bot dehn lov fi Jehoava neva az schrang az di lov weh dehn mi gat eena di biginin. Soh, if dehn mi waahn Jehoava aksep dehn wership, dehn mi need fi mek dehn lov fi Jehoava schrang agen. Sayhn way soh, wi need fi du moa dan jos bayr op. Gaad noh onli inchrestid eena weh wi du bot aalso wai wi du it. Soh wi need fi bayr op fi di rait reezn. Jehoava kay bowt di reezn wai wi wership hihn. Hihn waahn wi wership ahn owta lov ahn bikaaz wi tankful tu hihn.—Prov. 16:2; Maak 12:29, 30.

7. (a) Akaadn tu Revilayshan 3:1-3, weh prablem di kangrigayshan da Sardis mi gat? (b) Weh wi need fi du?

⁷ Reed Revilayshan 3:1-3. Wi need fi kip pan di wach. Di kangrigayshan da Sardis mi ga wahn difrent prablem. Eevn doa dehn mi serv Jehoava eena di paas, dehn mi stap du dat afta wahn wail. Jeezas mi tel dehn fi “wayk op.” Wat da di waanin fi wee? Af koars, Jehoava noh wahn ferget di werk weh wi du. (Heeb. 6:10) Bot wi shuda neva tink dat wi noh haftu serv Jehoava now jos bikaaz wi mi serv ahn eena di paas. Eevn doa wi mait kyaahn du az moch az wi yoostu, wi need fi stay bizi di du “di werk weh di Laad gi  wi fi du.” Wi need fi kip pahn di wach dong tu di en.—1 Kor. 15:58; Mach. 24:13; Maak 13:33.

8. Akaadn tu Revilayshan 3:15-17, weh wi laan fahn weh Jeezas mi seh tu di bradaz da Layodiseeya?

⁸ Reed Revilayshan 3:15-17. Wi need fi bee eega ahn serv Jehoava wid aala wi haat. Di mesij weh Jeezas sen tu di bradaz da Layodiseeya mi taak bowt wahn difrent prablem weh dehn mi gat. Dehn mi “waam” eena dehn wership. Bikaaz dehn neva eega fi serv Jehoava, Jeezas tel dehn dat dehn mi deh eena wahn “mizarabl” ahn pitiful kandishan. Dehn mi need fi shoa dat dehn mi reeli eega fi wership Jehoava. (Rev. 3:19) Wat da di lesn fi wee? If wi feel laik wi noh az eega az bifoa, wi need fi bee tankful fi aala di gud tingz weh Jehoava an ih aaganaizayshan gi wi. (Rev. 3:18) Wi noh waahn chrai soh haad fi ga wahn komfatabl laif now dat wi wership tu Jehoava en op di bee les impoatant eena wi laif.

9. Akaadn tu di mesij dehn weh Jeezas mi sen fi di Kristyanz da Pergamom ahn Taiyataira, weh daynja wi need fi avoid?

⁹ Wi haftu rijek apastayt teechinz. Jeezas mi gi di bradaz da Pergamom schrang kongsl bikaaz dehn mi-di brok op di yooniti eena di kangrigayshan. (Rev. 2:14-16) Hihn mi komen dehn wan da Taiyataira weh mi stay weh fahn di “deep tingz a Saytan,” an ih mi inkorij dehn fi “hoal aan” tu di chroot. (Rev. 2:24-26) Di Kristyanz bak den weh mi week ahn staat fala faals teechinz mi need fi ripent. How bowt wee tudeh? Wi need fi stay weh fahn eni teechin weh goh gens Jehoava standadz. Apastayts wahn “play laik dehn di wership Gaad wid aala dehn haat,” bot “dehn noh wahn liv dehn laif akaadn tu weh dehn seh dehn bileev.” (2 Tim. 3:5) If wi stodi di Baibl evri day, ih wahn bee eeziya fi mek wi rekonaiz ahn rijek faals teechinz.—2 Tim. 3:14-17; Jood 3, 4.

10. Wat da wahn nada lesn weh wi ku laan fahn weh Jeezas mi tel di kangrigayshan dehn da Pergamom ahn Taiyataira?

¹⁰ Wi need fi rijek eni kaina imoraliti. Di bradaz da Pergamom ahn Taiyataira mi ga wahn nada prablem. Jeezas mi kandem dehn wan eena di kangrigayshan weh neva rijek imoraliti. (Rev. 2:14, 20) Weh wee ku laan fahn dis? Eevn if wi  ga wahn lata rispansabiliti er wi di serv Jehoava fi wahn lata yaaz, wi kyaahn bihayv eena wahn imoaral way an ekspek Jehoava fi talarayt it. (1 Sam. 15:22; 1 Peet. 2:16) Hihn ekspek wi fi kip ih hai standadz noh mata how bad di standadz a dis werl get.—Ifee. 6:11-13.

11. Weh wi laan soh faar? (Si di baks “ Sohn Lesn fi Wee Tudeh.”)

¹¹ Weh aal wi don laan soh faar? Wi don si wai ih impoatant fi mek wi wership Jehoava eena di rait way. If Jehoava noh di aksep wi wership rait now bikaaz wi di du sohnting weh rang, den wi need fi mek chaynjiz soh dat wi ku mek tingz rait wid hihn. (Rev. 2:5, 16; 3:3, 16) Bot wat els Jeezas mi menshan eena ih mesij dehn weh ih mi sen tu di kangrigayshanz?

12. Weh wi ku laan fahn di mesij weh Jeezas mi sen tu di bradaz da Smerna ahn Filadelfya? (Revilayshan 2:10)

¹² Mek wi kansida di mesij weh Jeezas mi sen da Smerna ahn Filadelfya. Hihn mi tel dehn fi noh bee frayd fi persikyooshan bikaaz Jehoava mi wahn bles dehn if dehn mi stay faytful. (Reed Revilayshan 2:10; 3:10) Wi fi ekspek dat wi wahn goh chroo persikyooshan, soh wi need fi bee wilin fi bayr op wen dat hapm. (Mach. 24:9, 13; 2 Kor. 12:10) Wai ih impoatant fi mek wi memba dis?

13-14. How di prafesi weh geh menshan eena Revilayshan chapta 12 afek Gaad peepl?

¹³ Di buk a Revilayshan tel wi dat Gaad peepl gwehn chroo persikyooshan joorin “di Laad day.” Dat da di taim weh wee di liv eena rait now. Revilayshan chapta 12 tel wi dat wahn waar mi brok owt da hevn rait afta Jeezas mi staat rool az King. Maikl, hoo da Jeezas Krais weh gaahn bak da hevn, an ih aynjel dehn mi fait gens Saytan an ih deemonz. (Rev. 12:7, 8) Jeezas mi win da waar an ih mi chroa Saytan an ih deemon dehn dong tu di ert. Sins den, hihn an ih deemonz di kaaz wahn lata chrobl ahn dehn di mek peepl sofa. (Rev. 12:9, 12) Bot weh hapm tu Gaad peepl bikaaz a dis?

¹⁴ Neks, di buk a Revilayshan tel wi how Saytan mi riyak. Hihn kyaahn goh bak da hevn, soh ih atak Gaad anointid servants pahn ert. Dehn da di wan weh reprizent Gaad Kingdom ahn ‘weh taak di chroot bowt Jeezas.’ (Rev. 12:17; 2 Kor. 5:20; Ifee. 6:19, 20) How dis prafesi kohn chroo?

15. Hoo di “too witnis” eena Revilayshan chapta 11 reprizent, ahn weh mi hapm tu dehn?

¹⁵ Saytan mi mek Gaad enimiz atak di anointid bradaz weh mi-di tek di leed eena di Kingdom preechin werk. Di “too  witnis” eena di buk a Revilayshan weh mi geh kil reprizent dehndeh man. * (Rev. 11:3, 7-11) Eena 1918, ayt a di bradaz weh mi-di tek di leed eena di aaganaizayshan geh put eena jayl bikaaz dehn mi akyooz dehn a sohnting weh dehn neva du. Wahn lata peepl mi tink dat di werk weh dehnya anointid bradaz mi-di du mi stap er, “geh kil.”

16. Wat da sohnting amayzin weh mi hapm eena 1919, bot weh Saytan mi kantinyu fi du sins da taim?

¹⁶ Di prafesi eena Revilayshan chapta 11 mi aalso seh dat di “too witnis” mi wahn kohn bak tu laif eena wahn lee wail. Da prafesi mi kohn chroo eena wahn amayzin way eena les dan wahn yaa afta dehndeh bradaz gaahn da jayl. Eena Maach 1919, dehndeh anointid bradaz mi kom owt fahn prizn ahn dehn mi jrap di chaajiz gens dehn. Rait away dehn mi staat tek di leed agen fi preech ahn teech. Bot dat neva stap Saytan fahn atak Gaad peepl. Sins da taim, Saytan kaaz “wahn riva” a persikyooshan fi atak Gaad peepl. (Rev. 12:15) Yes, aala wi “need fi bayr op ahn ga fayt.”—Rev. 13:10.

17. Eevn doa Saytan mi-di atak Gaad peepl, weh kaina help dehn mi get?

¹⁷ Revilayshan chapta 12 mi taak bowt how Gaad peepl mi wahn geh help fahn sohnweh weh dehn neva ekspek. Ih wuda mi bee laik di ert swala op “di riva” a persikyooshan. (Rev. 12:16) Dat da egzakli weh hapm. Sohntaim tingz laik di koat sistem dehn help Gaad peepl. Wahn lata taim Jehoava Witnisiz win sohn koat kays weh gi dehn sohn freedom. How dehn yooz di freedom weh dehn get? Dehn yooz dehn taim eena wahn waiz way fi du di werk weh Jehoava gi dehn fi du. (1 Kor. 16:9) Wat da di werk weh dehn du?

18. Wat da di mayn werk weh wi di du joorin dehnya laas dayz?

¹⁸ Jeezas mi seh dat ih peepl mi wahn preech di “gud nyooz bowt [Gaad] Kingdom” oava di hoal ert bifoa di en kom. (Mach. 24:14) Wen dehn preech, dehn geh help fahn wahn aynjel er wahn groop a aynjelz weh ga “gud nyooz weh wahn  laas fareva an eva. [Dehn] mi-di anonks da gud nyooz tu peepl a di ert, tu peepl fahn evri nayshan ahn chraib, ahn tu peepl fahn difrent rays, ahn tu peepl weh taak aal difrent kaina langwij.”—Rev. 14:6.

19. Wat da wahn nada mesij weh peepl weh lov Jehoava need fi preech bowt?

¹⁹ Di gud nyooz a Gaad Kingdom da noh di onli mesij weh Gaad peepl need fi preech bowt. Dehn aalso need fi sopoat di werk weh di aynjelz di du weh Revilayshan chapta 8 tu 10 taak bowt. Di aynjel dehn taak bowt sohn bad tingz weh wahn hapm tu dehn wan weh rijek Gaad Kingdom. Soh, Jehoava Witnisiz di preech wahn mesij weh da laik “hayl ahn faiya” ahn da mesij eksplayn Gaad jojment pahn difrent paats a Saytan wikid werl. (Rev. 8:7, 13) Peepl need fi noa dat di en deh kloas soh dat dehn ku mek chaynjiz eena dehn laif. Da way deh, dehn wahn ku servaiv wen Jehoava dischrai dis werl. (Zeph. 2:2, 3) Bot wahn lata peepl noh laik hyaa dis mesij. Wi need korij fi preech dis mesij. Joorin di grayt chribyulayshan, di jojment mesij weh wi wahn preech wahn mek wahn lat moa peepl geh beks.—Rev. 16:21.

20. Weh wi wahn taak bowt eena di neks too aatikl?

²⁰ Wi need fi mek shoar dat wi obay dis prafesi eena di buk a Revilayshan bikaaz wee da paat a it an ih wahn kohn chroo. (Rev. 1:3) Bot how wi ku stay faytful ahn bayr op anda persikyooshan ahn kantinyu du wi paat fi preech wid lata korij? Too tingz wahn schrentn wi fayt. Di fers ting weh wahn schrentn wi da weh di buk a Revilayshan seh wahn hapm tu Gaad enimi dehn. Di sekant ting da di blesinz weh wi wahn get eena di fyoocha if wi stay faytful. Wi wahn taak bowt dehndeh tapik eena di neks too aatikl.