1. Weh impoatant disizhan evribadi need fi mek?

 TUDEH, evribadi haftu mek wahn impoatant disizhan. Dehn haftu disaid if dehn wahn sopoat Jehoava az dehn Roola, er if dehn wahn sopoat ih kruwil enimi, Saytan di Devl. Dehn haftu chooz wahn said; dehn kyaahn stay nyoochral. Bays pahn di disizhan weh dehn mek, dehn wahn eeda liv fareva er geh dischrai. (Mach. 25:31-33, 46) Joorin “di grayt chribyulayshan,” dehn wahn geh wahn maak weh wahn shoa if dehn wahn liv er if dehn wahn geh dischrai.—Rev. 7:14; 14:9-11; Ezek. 9:4, 6.

2. (a) Weh Heebrooz 10:35-39 inkorij wi fi du? (b) How di buk a Revilayshan ku help wi?

² Reed Heebrooz 10:35-39. If yu chooz fi sopoat Jehoava roolaship, yu mek wahn waiz disizhan. Now, fi shoar dis mek yu waahn help adaz mek di rait disizhan. Yu ku yooz di infamayshan weh deh eena di buk a Revilayshan fi help dehn mek di rait disizhan. Dis amayzin buk wahn shoa weh wahn hapm tu dehn wan weh goh gens Jehoava, bot ih wahn aalso shoa how Jehoava wahn bles dehn wan weh stay faytful tu fi hihn roolaship. Soh ih impoatant fi mek wi stodi dehnya impoatant Baibl chroots. Wen wi du dat, ih wahn schrentn wi dizaiya fi kantinyu serv Jehoava. Pahn tap a dat, wi ku yooz weh wi laan fi help adaz mek op dehn main fi serv Jehoava ahn fi kantinyu serv ahn.

3. Weh wi wahn diskos eena dis aatikl?

³ Eena dis aatikl, wi wahn ansa dehnya kweschan: Weh wahn hapm eena di fyoocha tu faytful peepl weh sopoat Gaad roolaship? Pahn di ada han, weh wahn hapm tu dehn wan weh sopoat di bees weh brait red weh di buk a Revilayshan taak bowt?

4. Wich groop a peepl di apasl Jan mi si wid Jeezas da hevn?

⁴ Eena wahn vizhan, di apasl Jan mi si too groop a peepl weh sopoat Jehoava roolaship ahn weh mi geh di blesin a evalastin laif. Di fers groop gat een 144,000 peepl. (Rev. 7:4) Dehn da di wanz weh mek op di Kingdom, er govament, ahn dehn kohn fahn di ert. Dehn wahn rool lang wid Jeezas da hevn oava di hoal ert. (Rev. 5:9, 10; 14:3, 4) Eena di vizhan, Jan si dehn di stan op wid Jeezas da hevn pahn Mongt Zaiyan.—Rev. 14:1.

5. Weh wahn soon hapm tu di anointid wanz weh stil alaiv pahn ert?

⁵ Fahn di taim a di apasl dehn til now, Jehoava pik towznz a peepl fi bee paat a di groop weh mek op di 144,000. (Look 12:32; Roam. 8:17) Bot Jan mi fain owt eena di vizhan dat fahn di 144,000, onli wahn lee bit a dehn mi wahn stil alaiv pahn ert joorin di laas dayz. Bifoa di grayt chribyulayshan staat, dehndeh lee bit a peepl wahn geh di fainal seel weh shoa dat Jehoava aproov a dehn. (Rev. 7:2, 3; 12:17) Den, sohntaim joorin di grayt chribyulayshan, di lee bit a peepl weh lef pahn ert weh da paat a di 144,000, wahn jain di res weh don deh da hevn. Dehn wan weh mi don deh da hevn, mi ded faytful tu Jehoava. Aala dehn wahn rool lang wid Jeezas eena Gaad Kingdom.—Mach. 24:31; Rev. 5:9, 10.

6-7. (a) Wich ada groop Jan mi si, ahn weh wi laan bowt dehn? (b) Wai di res a di anointid wanz weh stil liv pahn di ert ahn di “big krowd a peepl” shuda waahn andastan weh deh eena Revilayshan chapta 7?

⁶ Afta Jan mi si di groop weh gwehn da hevn, hihn mi si wahn nada groop; ih si “wahn big krowd a peepl.” Dis groop da noh laik di 144,000 bikaaz di Baibl noh seh humoch peepl wahn bee paat a dis groop. (Rev. 7:9, 10) Weh wi laan bowt dehn? Dis da weh dehn tel Jan eena di vizhan: “Di wan dehn weh gat aan di wait roab da di wan dehn weh mi paas chroo di grayt chribyulayshan, ahn dehn mi wash dehn roab eena di blod a di Lam ahn dehn roab geh wait.” (Rev. 7:14) Afta dis “big krowd a peepl” servaiv di grayt chribyulayshan, dehn wahn liv pahn di ert ahn dehn wahn injai wahn lata amayzin blesinz.—Ps. 37:9-11, 27-29; Prov. 2:21, 22; Rev. 7:16, 17.

⁷ Weda wi hoap da fi liv da hevn er fi liv ya pahn ert, wi shuda bileev dat weh Revilayshan chapta 7 taak bowt wahn kohn chroo. Dat wahn bee wahn veri eksaitin taim fi dehn wan weh wahn liv da hevn ahn dehn wan weh wahn liv pahn ert. Wi wahn ga wahn lata jai bikaaz wi mi chooz fi sopoat Jehoava roolaship. Wat els wi ku laan bowt di grayt chribyulayshan fahn di buk a Revilayshan?—Mach. 24:21.

8. How di grayt chribyulayshan wahn staat, ahn how moas peepl wahn rispan?

⁸ Laik weh wi mi diskos eena di laas aatikl, soon di politikal paat a dis werl wahn atak Babilan di Grayt, weh stan fi aala faals rilijan. (Rev. 17:16, 17) Wen dat hapm, dat da wen di grayt chribyulayshan wahn staat. Soh yu tink dis wahn mek wahn lata peepl staat serv Jehoava? No. Insted, Revilayshan chapta 6 shoa wi dat joorin da taim, peepl weh noh serv Jehoava wahn ton tu di bizniz ahn di politikal paat a dis werl, weh da laik mongtinz,  fi geh protekshan. Sins dehndeh peepl noh sopoat Gaad Kingdom, Jehoava wahn si dehn az fi hihn enimi dehn.—Look 11:23; Rev. 6:15-17.

9. How peepl wahn noatis dat Jehoava peepl difrent fahn adaz weh noh serv Gaad joorin di grayt chribyulayshan, ahn weh wahn hapm tu Jehoava peepl?

⁹ Joorin di grayt chribyulayshan, weh wahn bee wahn reeli tof taim, peepl wahn si dat Jehoava faytful servant dehn difrent fahn peepl weh noh serv hihn. Dehn wahn stil bee di onli groop a peepl pahn ert weh kantinyu fi serv Gaad, ahn dehn wahn rifyooz fi sopoat “di wail bees.” (Rev. 13:14-17) Jehoava enimiz wahn geh beks bad bikaaz fi hihn peepl stay faytful tu ahn. Dis wahn kaaz wahn groop a nayshanz fi atak Gaad peepl aal oava di ert. Dis da weh di Baibl seh wahn bee di atak a Gag a Maygag.—Ezek. 38:14-16.

10. Laik weh Revilayshan 19:19-21 seh, weh Jehoava wahn du wen dehn atak fi hihn peepl?

¹⁰ Weh Jehoava wahn du wen dehn atak fi hihn peepl? Hihn tel wi: “Ah wahn geh beks bad.” (Ezek. 38:18, 21-23) Revilayshan chapta 19 tel wi weh wahn hapm neks. Jehoava sen ih Son fi protek Ih peepl ahn fi dischrai dehn enimiz. Di faytful aynjelz ahn di 144,000, weh mek op di hevnli aamiz, wahn jain Jeezas an atak dehn enimiz. (Rev. 17:14; 19:11-15) How dis waar wahn en? Aala di peepl ahn di aaganaizayshan dehn weh goh gens Jehoava wahn geh dischrai.—Reed Revilayshan 19:19-21.

11. Wat da di moas impoatant ivent eena di buk a Revilayshan?

¹¹ Jos imajin how aal di faytful wanz pahn ert wahn feel wen dehn servaiv Armagedon! Evribadi pahn ert wahn bee reeli hapi. Eevn doa evribadi da hevn wahn bee reeli hapi wen Babilan di Grayt geh dischrai, dehn ga sohnting els weh wahn mek dehn hapiya. Dat da wen “di marij a di Lam” wahn tek plays. Dat da di moas impoatant ivent eena di buk a Revilayshan.—Rev. 19:6-9.

12. Laik weh wi laan da Revilayshan 21:1, 2, wen di marij a di Lam wahn tek plays?

¹² Wen di marij wahn tek plays? Jos bifoa di waar a Armagedon staat, aala di 144,000 wahn deh da hevn, bot dis noh wahn bee di taim fi di marij a di Lam. (Reed Revilayshan 21:1, 2.) Ih wahn tek plays til afta di waar a Armagedon finish an aala Gaad enimiz geh dischrai.—Ps. 45:3, 4, 13-17.

13. Weh wahn hapm wen di Lam geh marid?

¹³ Weh wahn hapm wen di Lam geh marid? Jos laik how wahn man ahn uman jain az wan wen dehn geh marid, eena wahn simbolik way dis marij wahn mek di King, Jeezas Krais, jain op az wan wid ih “braid,” di 144,000. Dis impoatant ivent wahn bee di staat a di nyoo govament weh wahn rool oava di ert fi 1,000 yaaz.—Rev. 20:6.

14-15. Eena Revilayshan chapta 21, weh di 144,000 mi geh kompyaa wid? (Koment pahn di picha pahn di kova.)

¹⁴ Revilayshan chapta 21 kompyaa di 144,000 tu wahn veri byootiful siti weh naym “Nyoo Jeroosalem.” (Rev. 21:2, 9) Dis siti mi ga 12 fongdayshan stoan, “ahn wahn naym mi deh pahn eech wan a dehndeh stoan—di naym a di 12 apasl a di Lam.” Wai dis mi kech Jan atenshan? Bikaaz hihn mi si fi hihn naym pahn wan  a di stoan. Dis da-mi wahn grayt privilij!—Rev. 21:10-14; Ifee. 2:20.

¹⁵ Dis siti noh luk laik no ada siti. Di mayn schreet a di siti da-mi pyoar goal. Di siti mi ga 12 gayt an eech wan a di gayt da-mi wan big perl. Di waal ahn di fongdayshan dehn mek owta aal kaina preshos stoan. Di lent, di wit, ahn di hait a di siti mi ga di saym mezhament. (Rev. 21:15-21) Bot Jan noatis dat sohnting mi stil misn! Dis da weh Jan mi seh: “Ah neva si eni templ eena di siti, kaaz Jehoava Gaad di Almaiti, ahn di Lam, da di templ. Di siti mi soh brait dat ih neva need di son ner di moon fi shain een deh, kaaz di gloari a Gaad lait op di siti, ahn di lamp da-mi di Lam.” (Rev. 21:22, 23) Evribadi hoo da paat a di Nyoo Jeroosalem wahn deh wid Jehoava an dehn wahn si ih fays. (Heeb. 7:27; Rev. 22:3, 4) Soh Jehoava ahn Jeezas wahn bee di templ eena da siti.

16. Weh ih wahn bee laik fi hyoomanz joorin di Towzn-Yaa Rool a Gaad Kingdom?

¹⁶ Ih eksaitin fi mek di anointid tink bowt dis siti. Bot dehn wan weh ga di hoap fi liv pahn di ert aalso ga wahn gud reezn fi waahn noa bowt it. Joorin di Towzn-Yaa Rool a Gaad Kingdom, di Nyoo Jeroosalem wahn bring wahn lata blesinz. Jan si dehndeh blesinz di kohn fahn sohnting weh luk laik “wahn riva weh di waata gi laif.” An eech said a di riva mi ga “sohn chree weh gi laif” ahn weh ga leef weh “heel di peepl a di nayshan dehn.” (Rev. 22:1, 2) Evribadi weh wahn di liv pahn di ert joorin da taim wahn injai dehndeh blesinz. Lee bit bai lee bit, evribadi weh obay Jehoava wahn geh perfek. Peepl noh wahn geh sik nohmoh ner feel payn nohmoh ner krai bikaaz a sadnis.—Rev. 21:3-5.

17. Hoo wahn benifit fahn di Towzn-Yaa Rool a Gaad Kingdom laik weh Revilayshan 20:11-13 shoa?

¹⁷ Hoo wahn benifit fahn dehnya blesinz? Di big krowd a peepl weh servaiv Armagedon wahn bee di fers set a peepl fi benifit fahn dis, lang wid eni pikni weh baan eena di nyoo werl. Bot Revilayshan chapta 20 aalso pramis dat peepl weh ded wahn kohn bak tu laif. (Reed Revilayshan 20:11-13.) “Peepl weh mi raichos” lang wid “peepl weh neva raichos” wahn kohn bak tu laif pahn ert. Peepl  weh noh raichos rifaa tu peepl weh neva geh di chaans fi laan bowt Jehoava. (Aks 24:15; Jan 5:28, 29) Yu tink dis meenz dat evribadi weh don ded wahn kohn bak tu laif joorin di Towzn-Yaa Rool a Gaad Kingdom? No. Di peepl weh mi wikid ahn weh mi rijek di apachooniti fi serv Jehoava bifoa dehn mi ded noh wahn kohn bak tu laif. Dehn mi ga di chaans, bot bikaaz dehn neva chooz fi serv hihn, dehn proov dat dehn noh dizerv fi liv eena Paradais pahn ert.—Mach. 25:46; 2 Tes. 1:9; Rev. 17:8; 20:15.

18. Weh wahn hapm tu hyoomanz pahn di ert bai di en a di 1,000 yaaz?

¹⁸ Bai di en a di 1,000 yaaz, evribadi weh di liv pahn ert wahn bee perfek. Joorin da taim, di sin weh wi inherit fahn Adam noh wahn afek wi nohmoh. (Roam. 5:12) Di kers weh Adam sin kaaz noh wahn egzis nohmoh. Soh dat meenz dat di peepl pahn ert wahn “kohn bak tu laif” az perfek hyoomanz da di en a di 1,000 yaaz.—Rev. 20:5.

19. Wai wi need fi geh wahn fainal tes?

¹⁹ Wee noa dat Jeezas mi stay faytful tu Gaad eevn wen Saytan mi tes ahn. Bot yu tink dat aal perfek hyoomanz wahn waahn bee laik Jeezas ahn stay faytful tu Jehoava wen Saytan chrai tes dehn? Eech persn wahn geh di chaans fi proov dat dehn laayal tu Jehoava wen di aynjel loos Saytan fahn prizn da di en a 1,000 yaaz. (Rev. 20:7) Dehn wan weh faytful joorin di tes wahn geh fi liv fareva ahn dehn wahn injai chroo freedom. (Roam. 8:21) Dehn wan weh fala Saytan ahn goh gens Jehoava wahn geh dischrai fareva, lang wid di Devl an ih deemon dehn.—Rev. 20:8-10.

20. How yoo feel bowt aal di eksaitin prafesi weh deh eena di buk a Revilayshan?

²⁰ Weh yoo tink bowt dis rivyoo a di buk a Revilayshan? Yoo noh eksaitid fi imajin yuself di liv fi si wen dehnya prafesi kohn chroo? Fi shoar dis mosi mek yoo waahn invait adaz fi jain wi fi gi wi Gaad chroo wership. (Rev. 22:17) Now dat wi diskos dehnya tingz weh wahn hapm eena di fyoocha, wi eksaitid ahn wi waahn seh di saym ting laik weh di apasl Jan mi seh. Dis da weh ih mi seh: “Aymen! Kohn, Laad Jeezas.”—Rev. 22:20.