1. Wai aala wi need wizdom weh kohn fahn Gaad? (Proverbs 4:7)

 IF YOO mi eva haftu mek wahn impoatant disizhan, moa dan laikli yu mi pray an aks fi wizdom bikaaz yu mi noa dat yu mi wahn need it. (Jay. 1:5) Dis da weh King Salaman mi rait: “Wizdom da di moas impoatant ting.” (Reed Proverbs 4:7.) * Af koars, Salaman neva di taak bowt jos eni kaina wizdom. Hihn mi-di taak bowt wizdom weh kohn fahn Jehoava Gaad. (Prov. 2:6) Bot yu tink wizdom fahn Gaad ku help wi deel wid di kaina prablemz weh wee fays tudeh? Yes, eena dis aatikl wi wahn si how ih ku help wi.

2. Wat da wan way wee ku geh wizdom?

² Wan way how wee ku bee waiz da if wi stodi ahn yooz weh wi laan fahn di egzampl a too man weh wahn lata peepl mi noa fi bee waiz. Fers, wi wahn laan bowt Salaman. Di Baibl seh dat “Gaad mi gi Salaman wizdom an ih mi help ahn fi andastan lata tingz.” (1 Ki. 4:29) Sekant, wi wahn laan bowt Jeezas. Nobadi mi waiza dan hihn. (Mach. 12:42) Dis da weh Aizaiya mi prafesai bowt Jeezas: “Di spirit a Jehoava wahn kohn dong pahn ahn, di spirit a wizdom an andastandin.”—Isa. 11:2.

3. Weh wi wahn laan eena dis aatikl?

³ Gaad mi gi Salaman ahn Jeezas wahn lata wizdom, ahn dehn mi yooz da wizdom fi gi gud advais bowt impoatant tingz. Eena dis aatikl, wi wahn taak bowt chree  gud advais weh wi ku laan fahn Salaman ahn Jeezas. Wi wahn laan wai wi shuda ga di karek vyoo a moni, wi jab, ahn wiself.

4. Wen ih kohn tu moni ahn mateeryal tingz, eena weh way Salaman ahn Jeezas mi difrent?

⁴ Salaman mi reeli rich, ahn hihn mi liv eena wahn fansi hows. (1 Ki. 10:7, 14, 15) Bot Jeezas neva ga wahn lata tingz, ahn hihn neva ga wahn hows. (Mach. 8:20) Stilyet, di too a dehn mi ga di karek vyoo a mateeryal tingz, bikaaz di too a dehn mi geh wizdom fahn Jehoava Gaad.

5. How Salaman mi shoa dat ih mi ga di karek vyoo a moni?

⁵ Salaman mi noa dat moni “ku protek wi.” (Eccl. 7:12) Moni ku help wi bai di tingz weh wi mait need ahn di tingz wi mait waahn tu. Eevn doa Salaman mi rich, hihn mi noa dat moni da noh di moas impoatant ting. Hihn mi seh: “Ih beta fi chooz wahn gud naym [er, “wahn gud repyutayshan,” ftn.] insteda richiz.” (Prov. 22:1) Salaman mi aalso noatis dat peepl weh lov moni neva aalwayz hapi wid weh dehn gat. (Eccl. 5:10, 12) Ahn hihn waan wi fi noh put wi chros eena moni, bikaaz ih eezi fi looz di moni weh wi gat.—Prov. 23:4, 5.

6. How Jeezas mi shoa dat ih ga di karek vyoo a mateeryal tingz? (Machyu 6:31-33)

⁶ Jeezas mi shoa dat ih mi ga di karek vyoo a mateeryal tingz. Hihn mi injai di eet ahn spen taim wid ih frenz. (Look 19:2, 6, 7) Wahn taim, hihn mi eevn mek gud wain. Dat da-mi ih fers mirakl. (Jan 2:10, 11) Ahn pahn di day wen hihn mi ded, ih mi-di wayr ekspensiv kloaz. (Jan 19:23, 24) Bot Jeezas neva mek mateeryal tingz bee di moas impoatant ting eena ih laif. Hihn mi tel ih falowaz: “Nobadi ku slayv fi too maasta . . . Unu kyaahn slayv fi Gaad ahn fi Richiz saym taim.” (Mach. 6:24) Jeezas mi teech dehn dat Jehoava wahn mek shoar dehn ga weh dehn need if dehn aalwayz  put Gaad Kingdom fers eena dehn laif.—Reed Machyu 6:31-33.

7. How wahn brada mi benifit bikaaz hihn mi ga di karek vyoo a moni?

⁷ Wahn lata bradaz ahn sistaz benifit wen dehn aplai Jehoava waiz kongsl bowt moni. Tink bowt di egzampl a wahn singl brada weh naym Daniel. Hihn seh: “Wen Ai da-mi wahn teenayja, Ai mi disaid dat di moas impoatant ting eena mai laif wuda bee fi serv Jehoava.” Bikaaz Daniel mi aalwayz liv wahn simpl laif, hihn kuda mi du wahn lata difrent tingz fi Jehoava. Hihn aalso seh: “Fi bee aanis, Ah noh rigret di disizhan weh Ah mek. Ai noa dat Ah kuda mi mek wahn lata moni if Ah mi mek dat di moas impoatant ting eena mi laif, bot moni kyaahn bai di frenz weh Ah mek. If Ai mi foakos pahn moni, Ah neva mi wahn bee hapi, bikaaz mai hapinis kohn fahn di tingz weh Ah du fi Jehoava. No amonk a moni kuda gi mee di blesinz weh Ai geh fahn serv Jehoava.” Ih klyaa fi si dat wi benifit wen wi foakos pahn spirichwal tingz insteda moni.

8. How wi noa dat Salaman mi ga di karek vyoo a werk? (Ecclesiastes 5:18, 19)

⁸ Salaman mi kaal di jai weh wi feel wen wi werk haad “di gif weh kohn fahn Gaad.” (Reed Ecclesiastes 5:18, 19.) * Hihn mi rait: “Gud kohn fahn evri kaina haad werk.” (Prov. 14:23) Salaman mi noa weh ih mi-di seh bikaaz hihn mi werk haad. Hihn mi bil sohn hows, plaant sohn grayp aachad, ahn mek sohn pool ahn gyaadn. Hihn mi aalso bil sohn siti. (1 Ki. 9:19; Eccl. 2:4-6) Dat da-mi haad werk, ahn hihn mi feel gud bowt di werk weh ih mi du. Bot Salaman mi noa dat jos dehndeh tingz neva mi wahn mek hihn hapi. Hihn mi need fi du moa. Hihn mi aalso du wahn lata tingz fi Jehoava. Fi egzampl, fi sevn yaaz hihn mi soopavaiz di kanschrokshan a Jehoava byootiful templ weh dehn mi wahn yooz fi wership ahn. (1 Ki. 6:38; 9:1) Afta Salaman mi don du aala dehndeh tingz, hihn mi riyalaiz dat di moas impoatant ting da fi serv Jehoava. Dis da weh hihn mi rait: “Afta wi don kansida di hoal sichuwayshan, di rizolt da dis: Fyaa di chroo Gaad ahn kip ih komanment dehn.”—Eccl. 12:13.

9. How Jeezas mi kip ih werk eena di prapa plays?

⁹ Jeezas mi werk haad. Wen hihn da-mi wahn yong man, hihn da-mi wahn kyaapenta. (Maak 6:3) Fi shoar, fi hihn ma ahn pa mi reeli tankful fi di help weh hihn mi gi dehn bikaaz dehn mi haftu werk haad fi provaid fi wahn big famili. Jeezas mi perfek, soh evriting weh hihn du mi perfek. Bikaaz a dat, wahn lata peepl mosi mi waahn bai di tingz weh hihn mi mek. An eevn doa Jeezas mi werk haad fi sopoat ih famili, hihn mi aalwayz mek shoar dat ih ga taim fi serv Jehoava. (Jan 7:15) Laytaraan, wen hihn mi-di preech ful taim, hihn tel di peepl weh mi-di lisn tu ahn: “Noh werk fi food weh wahn spail; insteda dat, werk fi food weh wahn giv unu evalastin laif.” (Jan 6:27) An eena di Sermon pahn di  Mongt, Jeezas mi seh: “Put op yu chrezhaz da hevn.”—Mach. 6:20.

10. Wat da wahn prablem weh ku kom op bikaaz wi da wahn gud werka?

¹⁰ If wi aplai Jehoava waiz advais, dat wahn help wi fi kip werk eena ih prapa plays. Az Kristyanz, wi laan dat wi fi werk haad ahn du gud werk. (Ifee. 4:28) Soh wi baas dehn mait noatis dat wi aanis ahn werk haad, ahn dehn mait tel wi humoch dehn laik how wi werk. Dis ku mek wi waahn werk moa owaz, bikaaz wi waahn mek wi baas tink gud bowt Jehoava Witnisiz. Bot if wi du dat, wi mait noh ga inof taim fi deh wid wi famili er fi du tingz fi Jehoava. Wi mait need fi mek chaynjiz soh dat wi ku ga moa taim fi du di moas impoatant tingz.

11. Weh wahn brada mi laan bowt di prapa vyoo a werk?

¹¹ Wahn yong brada weh naym William mi laan wahn lat fahn wahn brada weh hihn yoostu werk fa. Hihn mi laan dat ih impoatant fi put werk eena ih prapa plays. William seh: “[Dis brada] da wahn gud egzampl a sombadi weh kip werk eena ih prapa plays. Hihn werk haad an ih kostoma dehn chros ahn bikaaz ih werk gud. Bot da di en a di day, hihn stap du aala ih werk an ih yooz ih taim an enerji fi ih famili ahn fi Jehoava. Ahn yu noa wat? Hihn da wan a di hapiyis peepl weh Ai noa!” *

12. How Salaman mi shoa dat hihn mi ga di prapa vyoo a ihself, ahn how hihn mi geh prowd?

¹² Wen Salaman da-mi wahn faytful servant a Jehoava, hihn mi ga di prapa vyoo a ihself. Wen hihn da-mi wahn yong man, hihn mi noa weh hihn kud ahn kudn du, an ih mi aks Jehoava fi help. (1 Ki. 3:7-9) Wen Salaman mi jos staat tu rool az king, hihn mi noa weh ku hapm if wahn persn geh prowd. Hihn mi rait: “Praid leed tu dischrokshan, ahn  wahn prowd atichood mek yu stombl.” (Prov. 16:18) Bot sad fi seh, laytaraan Salaman neva lisn tu ih oan advais. Afta sohn taim, Salaman mi geh prowd ahn hihn staat tu disobay Jehoava laa dehn. Fi egzampl, wan a di laa dehn mi seh dat wahn Heebroo king “noh fi tek wahn lata waif fi ihself, soh dat ih haat noh schray weh.” (Deut. 17:17) Salaman neva obay da laa. Hihn mi ga 700 waif weh da-mi prinses ahn wahn nada 300 waif weh da neva prinses. Ahn wahn lata dehn mi wership faals gaadz! (1 Ki. 11:1-3) Salaman mosi mi feel laik hihn mi gat “evriting anda kanchroal.” Bot laytaraan, Salaman mi haftu pay fi di bad disizhan weh ih mi mek wen ih disobay Jehoava.—1 Ki. 11:9-13.

13. Weh wi ku laan wen wi meditayt pahn Jeezas hombl atichood?

¹³ Jeezas mi kip wahn prapa vyoo a ihself; hihn neva tink tu moch a ihself. Bifoa Jeezas mi kohn pahn di ert, hihn mi du wahn lata wandaful tingz wail ih mi-di werk wid Jehoava. Jehoava mi yooz Jeezas “fi mek di res a tingz eena di hevn ahn pahn di ert.” (Kol. 1:16) Wen Jeezas mi geh baptaiz, hihn mi memba wahn lata di tingz weh ih mi du wen ih mi deh wid ih Pa. (Mach. 3:16; Jan 17:5) Bot Jeezas neva geh prowd wen hihn mi memba dehndeh tingz. Pahn tap a dat, hihn neva ak eena wahn way weh shoa dat ih mi tink ih beta dan adaz. Hihn mi tel ih disaipl dehn dat hihn kohn pahn di ert “fi serv adaz ahn noh fi serv ihself. Ih kohn fi giv ih laif az wahn ransom fi sayv lata peepl.” (Mach. 20:28) Hihn mi aalso seh dat hihn kyaahn du wahn singl ting pan ih oan. (Jan 5:19) Dis shoa dat hihn mi veri hombl. Jeezas set wahn perfek egzampl weh aala wi ku fala.

14. Weh wi ku laan fahn Jeezas bowt how fi ga wahn prapa vyoo a wiself?

¹⁴ Jeezas mi teech ih disaipl dehn fi ga di karek vyoo a dehnself. Wahn taim hihn mi tel dehn dat Gaad eevn noa di nomba a hyaa weh deh pahn dehn hed.  (Mach. 10:30) If wi aalwayz tink bowt wiself eena wahn negitiv way, den weh Jeezas seh ku gi wi komfert. Weh Jeezas seh shoa wi dat wi Pa weh deh da hevn reeli kay bowt wi ahn dat wee preshos tu hihn. If Jehoava alow wi fi wership ahn an if hihn tink dat wi dizerv fi liv fareva eena fi hihn nyoo werl, den wi shuda neva tink dat hihn rang.

15. (a) Wat balans vyoo a wiself The Watchtower seh wee shuda ga? (b) Laik weh di picha shoa pahn payj 24, wat da sohn blesin weh wi ku mis owt pan if wi foakos onli pahn wiself?

¹⁵ Bowt 15 yaaz agoa, The Watchtower mi seh dat wee shuda ga dis balans vyoo a wiself: “Wi noh waahn tink soh moch a wiself dat wi geh tu prowd, ahn wi noh waahn tink wahn lata negitiv tingz bowt wiself needa. Insteda dat, wi shuda chrai ga di karek vyoo a wiself. Dis meenz dat wi andastan dat aala wi ga schrent ahn weeknis. Wahn laydi seh: ‘Ai da noh wahn bad persn, bot Ai da noh di bes persn needa. Ai ga gud kwalitiz ahn bad kwalitiz, an evribadi da laik dat.ʼ” * Ih klyaa fi si wai ih gud fi ga di karek vyoo a wiself.

16. Wai Jehoava gi wi gud advais?

¹⁶ Jehoava gi wi gud advais eena ih Werd di Baibl. Hihn lov wi an ih waahn mek wi bee hapi. (Isa. 48:17, 18) Di bes chois weh wee ku mek da fi put Jehoava fers eena wi laif. If wi du dat, den wi wahn bee hapi ahn wi wahn avoid wahn lata di prablem dehn weh peepl ekspeeryens wen dehn foakos tu moch pahn moni, werk, er dehnself. Eech wan a wi shuda mek it wahn goal fi bee waiz ahn mek Jehoava haat rijais!—Prov. 23:15.