1. Weh Jehoava invait wi fi du? (Koment pahn di picha.)

 HOO wi ku aks fi help wen wi need komfert er advais? Wee noa di ansa, noh chroo? Wi ku pray tu Jehoava, ahn hihn waahn mek wi du dat. Hihn waahn mek wi “pray aal di taim.” (1 Tes. 5:17) Wi ku pray tu hihn enitaim an aks ahn fi help wi mek gud disizhanz eena evriting weh wi du. (Prov. 3:5, 6) Bikaaz Jehoava soh kain, wi ku pray tu ahn az moch az wi waahn.

2. Weh wi wahn laan eena dis aatikl?

² Wi soh hapi dat Jehoava gi wi di privilij fi pray tu ahn. Bot sohntaim laif geh soh bizi dat ih haad fi fain taim fi pray. Ahn wi mait feel laik wi haftu werk haada fi poar owt wi haat tu Jehoava. Da wahn gud ting wi ga di Baibl fi inkorij wi ahn gi wi gud advais. Eena dis aatikl, wi wahn si how Jeezas egzampl ku teech wi fi mek di taim fi pray. Ahn wi wahn taak bowt faiv impoatant tingz weh ku help wi fi pray beta.

3. Weh Jeezas mi laan bowt pryaa?

³ Jeezas andastan dat wi pryaaz preshos tu Jehoava. Bifoa hihn mi kohn pahn ert, ih geh fi si how ih Pa mi ansa di pryaaz a ih faytful servants. Fi egzampl, Jeezas mi deh rait bisaid ih Pa wen Hihn ansa Hana, Dayvid,  Ilaija, ahn sohn ada faytful servant wen dehn mi-di poar owt dehn haat tu ahn. (1 Sam. 1:10, 11, 20; 1 Ki. 19:4-6; Ps. 32:5) Dat da wai Jeezas mi teech ih disaiplz fi pray aal di taim ahn fahn dehn haat!—Mach. 7:7-11.

4. Weh wi ku laan fahn Jeezas pryaaz?

⁴ Jeezas mi set wahn gud egzampl fi mek ih disaiplz fala bai di way ih pray tu Jehoava. Joorin ih minischri pahn ert, hihn mi pray wahn lat. Jeezas mi haftu mek taim fi pray bikaaz hihn mi aalwayz bizi ahn ga lata peepl rong ahn. (Maak 6:31, 45, 46) Hihn wuda get op erli da maanin soh dat ih ku deh bai ihself wen ih pray. (Maak 1:35) Wahn taim, hihn mi stay op aal nait fi pray bifoa ih mek wahn impoatant disizhan. (Look 6:12, 13) Pahn di nait bifoa Jeezas ded hihn mi pray oava ahn oava agen, bikaaz dat da-mi di haadis paat a ih asainment pahn ert.—Mach. 26:39, 42, 44.

5. How wi ku kapi Jeezas egzampl wen wi pray?

⁵ Jeezas egzampl teech wi dat ih noh mata how bizi wi bizi, wi haftu mek taim fi pray. Maybi wi ku get op erli da maanin er stay op wahn lee bit layta da nait fi pray tu Jehoava. Wen wi du dat, wi shoa Jehoava how tankful wi tankful fi da speshal gif. Wahn sista weh naym Lynne memba how tankful shee mi feel wen shee mi fers laan bowt di privilij fi pray. Shee seh: “Wen Ah mi laan dat Ah ku taak tu Jehoava enitaim, dat mi help mi fi si ahn az wahn kloas fren ahn fi du beta eena mi pryaaz.” Fi shoar, wahn lata wi mi feel da way. Soh mek wi diskos faiv impoatant tingz weh wi ku taak tu Jehoava bowt wen wi pray.

6. Akaadn tu Revilayshan 4:10, 11, weh Jehoava dizerv?

⁶ Prayz Jehoava. Eena wahn amayzin vizhan, di apasl Jan mi si 24 eldaz di wership Jehoava da hevn. Dehn mi prayz Gaad ahn seh dat hihn “dizerv aala di gloari ahn di aana.” (Reed Revilayshan 4:10, 11.) Di faytful aynjel dehn aalso ga wahn lata gud reezn fi gi Jehoava di prayz an aana weh hihn dizerv. Dehn liv da hevn wid ahn, an dehn  geh fi noa ahn gud. Dehn geh fi laan bowt aala ih kwalitiz wen dehn si di tingz weh ih du. Wen dehn wach di tingz weh Jehoava du, dat moov dehn fi prayz ahn eevn moa.—Job 38:4-7.

7. Weh wi ku prayz Jehoava fa?

⁷ Wee shuda aalso prayz Jehoava wen wi di pray tu ahn. Wi ku du dis wen wi tel ahn weh wi lov bowt ahn, an wai wi rispek ahn. Wen yu reed ahn stodi di Baibl, chrai fi si wich kwalitiz yu lov di moas bowt Jehoava. (Job 37:23; Roam. 11:33) Den tel Jehoava how yu feel bowt dehndeh kwalitiz. Wi ku aalso prayz Jehoava bikaaz hihn help wee an aala wi bradaz ahn sistaz. Hihn aalwayz di tek kayr a wi ahn protek wi.—1 Sam. 1:27; 2:1, 2.

8. Wat da sohn tingz wi ku tank Jehoava fa? (1 Tesaloanyanz 5:18)

⁸ Gi tanks tu Jehoava. Wi ga lata tingz weh wi ku tank Jehoava fa wen wi pray. (Reed 1 Tesaloanyanz 5:18.) Wi ku tank Jehoava fi eni gud ting weh wi gat bikaaz evri gud gif kohn fahn hihn. (Jay. 1:17) Fi egzampl, wi ku tel ahn humoch wi apreeshiayt di byootiful an amayzin tingz weh hihn mek pahn di ert. Wi ku aalso tel ahn tanks fi wi laif, wi famili, wi frenz, ahn wi hoap. Ahn wi waahn tank Jehoava fi di privilij weh wi ga fi bee wahn kloas fren wid ahn.

9. Wai wi need fi werk haad fi aalwayz bee tankful tu Jehoava?

⁹ Sohntaim wi mait haftu reeli werk haad fi tink bowt sohnting weh wi ku tank Jehoava fa bikaaz wi liv eena wahn werl weh peepl onli tink bowt dehnself. Wahn lata taimz, peepl onli foakos pahn weh dehn waahn ahn ferget fi si how dehn ku shoa dat dehn tankful. If wi staat tu tink laik how peepl eena di werl tink, wi ku en op di onli aks Jehoava fi tingz, insteda di tank ahn fi aal weh ih gi wi. Soh fi mek dis noh hapm tu wee, mek wi kantinyu laan how wi ku shoa dat wi tankful fi evriting weh Jehoava du fi wi.—Look 6:45.

10. Weh mi help sista Kyung-sook fi bayr op, ahn how dat mi help ahn? (Koment pahn di picha.)

¹⁰ Wen wi aalwayz lukowt fi tingz wi ku bee tankful fa, dat wahn help wi fi bayr op wen wi di goh chroo wahn rof sichuwayshan. Mek wi luk pahn Kyung-sook ekspeeryens, weh deh eena di Janiweri 15, 2015, kapi a The Watchtower. Shee mi fain owt dat ih mi ga long kyansa ahn dat ih mi don deh da wahn seeryos stayj. Shee seh: “Dis helt prablem mi mek Ah feel reeli sad. Ah mi feel laik Ah looz evriting, an Ah mi frayd.” Weh mi help shee fi bayr op? Shee seh dat evri nait bifoa ih goh sleep, ih wuda goh pahn ih rooftap fi taak tu Jehoava owt lowd. Shee wuda tank ahn  fi faiv tingz weh mi hapm joorin da day. Dis mi komfert shee wahn lat an ih mi moov ahn fi shoa Jehoava humoch ih lov ahn. Shee mi geh fi si how Jehoava tek kayr a ih servants wen dehn di goh chroo wahn rof sichuwayshan, ahn dat eena laif dehn aalwayz ga moa blesinz weh wi ku bee tankful fa dan bad tingz. Jos laik Kyung-sook, eevn fi wi di goh chroo wahn rof taim, dehn ga wahn lata tingz weh wi ku bee tankful tu Jehoava fa. Wen wi pray ahn tel Jehoava tanks fi di tingz weh ih gi wi, dat wahn help wi fi bayr op ahn ga pees ahn jai.

11. Afta Jeezas mi gaahn bak da hevn, wai fi hihn disaiplz mi need fi ga korij?

¹¹ Aks Jehoava fi gi yu korij fi preech. Bifoa Jeezas mi gaahn bak da hevn, hihn mi rimain ih disaiplz dat dehn need fi gi wahn witnis bowt ahn “da Jeroosalem, eena aala Judeeya ahn Samayrya, an aal oava di ert.” (Aks 1:8; Look 24:46-48) Wahn lee wail afta dat, di Jooish leedaz mi ares Peeta ahn Jan ahn kehr dehn da di Jooish Sopreem koat. Dehn mi koman dehn fi stap preech, ahn dehn mi eevn chretn dehn. (Aks 4:18, 21) Weh Peeta ahn Jan mi du?

12. Akaadn tu Aks 4:29, 31, weh di disaiplz mi du?

¹² Afta di Jooish rilijos leedaz mi chretn Peeta ahn Jan, dehn seh: “Wel, if unu bileev dat Gaad tink ih raichos fi lisn tu unu insteda hihn, dat op tu unu. Bot az tu wee, wi kyaahn stap taak bowt di tingz weh wi mi si ahn hyaa.” (Aks 4:19, 20) Wen Peeta ahn Jan mi kom owta jayl, dehn mi pray tu Jehoava. Dehn mi pray haad tu Jehoava an aks ahn fi help dehn du fi hihn wil. Ahn dehn seh: “Gi yu slayv dehn di korij fi neva stap taak bowt yu werd tu adaz.” Jehoava mi ansa fi dehn pryaa.—Reed Aks 4:29, 31.

13. Weh wi ku laan fahn Jin-hyuk egzampl?

¹³ Wee fala di egzampl a di disaiplz wen wi kantinyu fi preech eevn if di govament chrai stap wi. Tink bowt brada Jin-hyuk egzampl. Dehn mi put hihn eena prizn bikaaz a ih fayt. Wail hihn mi deh eena prizn, dehn mi asain ahn fi tek kayr a sohn priznaz weh mi deh lak op bai dehnself ahn kyaahn ga kantak wid enibadi. Dehn neva alow ahn fi taak tu dehn bowt eniting, nat eevn di Baibl, anles da mi bowt sohnting weh dehn need. Hihn mi pray tu Jehoava fi giv ahn di korij weh ih mi need ahn fi help ahn fi yooz eni chaans weh ih get fi preech tu di priznaz, eevn doa ih mi haftu bee kyaaful. (Aks 5:29) Hihn seh: “Jehoava mi ansa mi pryaaz ahn gi mi di korij ahn wizdom weh Ah mi need fi staat sohn faiv-minit Baibl stodi rait bai eech prizna sel doa. Den da nait Ah wuda rait letaz ahn gi dehn tu di priznaz di neks day.” Wee ku bee shoar dat hihn wahn help wi preech. Jos laik Jin-hyuk, wee ku pray tu Jehoava fi gi wi di korij ahn wizdom weh wi need.

14. Bays pahn Psalm 37:3, 5, weh ku help wi fi bayr op wen wi ga prablemz?

¹⁴ Aks Jehoava fi help yu bayr op wen yu ga prablemz. Wahn lata wi mait ga fizikal er imoashanal prablemz, wi mait di fays famili prablemz, di goh chroo persikyooshan, di sofa bikaaz sombadi weh wi lov ded, er eni ada prablemz. Ahn tingz laik pandemik er waar ku mek dehnya prablemz feel eevn haada fi deel wid. Soh poar owt yu haat tu Jehoava. Tel ahn how yu feel jos laik how yu wuda  taak tu wahn kloas fren. Yu ku chros dat if yu pen pahn hihn, “ih wahn help yu.”—Reed Psalm 37:3, 5. b

15. How pryaa ku help wi bayr op anda chribyulayshan? Yooz di egzampl eena di paragraaf.

¹⁵ If wi pray aal di taim, dat wahn help wi fi “bayr op anda chribyulayshan.” (Roam. 12:12) Jehoava noa weh eech wan a ih servant di goh chroo ahn “hihn hyaa wen dehn krai fi help.” (Ps. 145:18, 19) Kristie, wahn painyaa weh 29 yaaz oal, mi geh fi ekspeeryens dis ihself wen aal af a sodn shee mi staat tu ga sohn seeryos helt prablemz. Dis mi mek shee gaan eena wahn bad dipreshan. Lee wail afta, shee fain owt dat ih ma mi reeli sik ahn dat ih kuda mi ded enitaim. Kristie seh: “Ah mi pray haad ahn bayg Jehoava fi gi mi di schrent fi bayr op eech day. Ah chrai mi bes fi stik tu mi skejul ahn goh da aala di meetinz ahn du mi persnal stodi. Pryaa mi help mi fi goh chroo dehndeh reeli haad taimz. Ah mi noa dat Jehoava aalwayz dehdeh fi mi ahn dat hihn mi wahn help mi feel beta. Eevn doa mi helt prablemz neva geh fiks, Jehoava mi ansa mi pryaaz ahn mek Ah feel kaam ahn ga pees.” Wi neva waahn ferget dat “Jehoava noa how fi sayv peepl weh wership ahn; hihn sayv dehn fan owta dehn chraiyalz.”—2 Peet. 2:9.

16. Wai wi need Jehoava fi help wi noh giv een tu temtayshan?

¹⁶ Aks Jehoava fi help yu noh giv een tu temtayshan. Bikaaz wi noh perfek, wi haftu kip aan di fait gens temtayshan. Saytan di chrai ih bes fi temp wi fi du weh rang. Wan a di wayz how hihn du dat da wid bad entataynment. Bad entataynment ku mek wi tink bowt tingz  weh noh kleen tu Jehoava, ahn wen dat hapm wi ku en op di komit wahn seeryos sin.—Maak 7:21-23; Jay. 1:14, 15.

17. Wen wi aks Jehoava fi help wi noh giv een tu temtayshan, how wee ku du wi paat? (Koment pahn di picha.)

¹⁷ Wi need Jehoava fi help wi noh giv een tu temtayshan. Wen Jeezas mi-di teech ih disaiplz how fi pray, dis da weh hihn mi tel dehn fi aks fa: “Pleez help wi soh dat wi noh giv een tu temtayshan, bot reskyu wi fahn di wikid wan.” (Mach. 6:13) Jehoava waahn help wi, bot wee haftu aks ahn fi help. Afta wi pray tu Jehoava, wi aalso haftu werk lang wid wi pryaa ahn stay weh fahn eniting weh ku temp wi. Wi ku chrai wi bes fi noh reed er lisn tu eni rang aidyaaz weh kaman eena Saytan werl. (Ps. 97:10) Wen wi reed ahn stodi di Baibl, dis ku help wi fi tink bowt gud ahn kleen tingz. Wi ku aalso protek wi main fahn rang tinkin wen wi goh da meetin ahn tek paat eena di preechin werk. Bot Jehoava pramis dat hihn noh wahn mek di temtayshan weh wi di fays geh soh bad dat wi kyaahn bayr it.—1 Kor. 10:12, 13.

18. Wen ih kohn tu pryaa, weh eech wan a wi need fi du?

¹⁸ Joorin dehnya laas dayz, wi haftu pray tu Jehoava eevn moa soh dat wi ku stay faytful tu ahn. Mek taim evri day fi pray tu Jehoava fahn yu haat. Jehoava waahn wi ‘poar owt wi haat tu ahn.ʼ(Ps. 62:8) Prayz Jehoava ahn tank ahn fi evriting weh ih du fi yu. Aks Jehoava fi help yu ga korij fi preech. Bayg ahn fi help yu bayr op wen yu di goh chroo eni tof sichuwayshan an aks ahn fi help yu noh giv een tu temtayshan. Noh mek notn ahn nobadi stap yu fahn pray tu Jehoava. Bot how Jehoava ansa wi pryaaz? Wi wahn taak bowt dat eena di neks aatikl.