1. How di Baibl diskraib chroo lov?

 LOV “da wahn faiya weh bon hat, di faiya a Jah. No amonk a waata kyaahn owt di faiya a lov, ahn no riva ku wash it weh.” b (Song of Sol. 8:6, 7) Dat da wahn byootiful way fi diskraib chroo lov! Dehnya da sohn inkorijin werdz fi marid koplz, weh shoa dat unu kud ga schrang lov fi eech ada.

2. Weh wahn kopl need fi du fi mek shoar dat dehn lov noh kool aaf?

² Fi mek wahn marid kopl injai chroo lov, dehn haftu werk haad fi mek dat hapm. Fi egzampl, wahn faiya ku bon fi az lang az yu waahnt if yu kip di put faiyawud pan it. Bot ih wahn owt if nobadi di ten tu it. Saym way soh, di lov bitween wahn hozban ahn wahn waif ku stay schrang fi az lang az dehn liv if dehn kantinyu fi werk haad fi kip dehn rilayshanship schrang. Sohntaim wahn kopl mait feel laik dehn lov fi eech ada mait di kool aaf, maybi bikaaz dehn ga moni prablemz, helt prablemz, er di chalenjiz fi rayz chiljren. Soh if yoo marid, how yu ku kip di “faiya a Jah” eena yu marij schrang? Eena dis aatikl, wi wahn taak bowt chree wayz how yu ku kip yu rilayshanship schrang ahn how yu ku injai wahn hapi marij. c

3. How wahn schrang rilayshanship wid Jehoava ku help wahn kopl fi kip dehn lov fi eech ada schrang? (Ecclesiastes 4:12) (Koment pahn di picha.)

³ Fi kip “di faiya a Jah” schrang, wahn hozban ahn waif  haftu werk haad fi ga wahn schrang rilayshanship wid Jehoava. How fi dehn rilayshanship wid Jehoava ku help dehn marij? Wen wahn kopl cherish dehn frenship wid dehn hevnli Faada, dehn wilin fi fala Fi Hihn advais. Dis help dehn fi avoid prablemz, an ih help dehn fi werk owt prablemz weh kuda mi kaaz dehn lov fi eech ada fi kool aaf. (Reed Ecclesiastes 4:12.) d Wahn persn weh ga wahn schrang rilayshanship wid Jehoava wahn chrai haad fi kapi fi hihn kwalitiz, laik kainis, payshens, ahn fergivnis. (Ifee. 4:32–5:1) Wen wahn kopl shoa dehnya kwalitiz, dat mek it eeziya fi mek dehn lov fi eech ada groa. Wahn sista weh naym Lena, weh marid fi moa dan 25 yaaz, seh: “Ih eezi fi lov ahn rispek sohnbadi weh ga wahn schrang rilayshanship wid Jehoava.”

4. Wai Jehoava mi chooz Joazef ahn Mayri fi rayz di fyoocha Mesaiya?

⁴ Mek wi luk pahn wahn Baibl egzampl. Wen Jehoava mi chooz di kopl weh mi wahn rayz di fyoocha Mesaiya, Hihn mi chooz Joazef ahn Mayri owta aala Dayvid disendant dehn. Wai? Too a dehn mi ga dehn oan rilayshanship wid Jehoava, ahn hihn mi noa dat dehn mi wahn put hihn fers eena dehn marij. If yoo marid, weh yu ku laan fahn Joazef ahn Mayri egzampl?

5. Weh wahn hozban ku laan fahn Joazef?

⁵ Joazef mi wilin fi fala Jehoava dairekshan, ahn bikaaz a dat, hihn da-mi wahn beta hozban. At lees chree taim hihn mi geh dairek inschrokshanz fahn Gaad weh mi ga fi du wid ih famili. Evri taim ih mi redi fi obay, eevn if ih neva eezi far ahn. (Mach. 1:20, 24; 2:13-15, 19-21) Joazef mi protek Mayri ahn tek kayr a ahn bikaaz hihn mi fala Gaad dairekshan. Fi shoar, dis mi mek Mayri lov ahn rispek Joazef eevn moa! Unu weh da hozban, unu ku kapi Joazef wen unu luk fi gaidans fahn di Baibl fi help unu tek kayr a unu famili. e Eevn if ih meenz dat yu haftu mek sohn chaynjiz, wen yu fala dehnya advais yu shoa dat yu lov yu waif ahn yu mek yu marij schranga. Wahn sista fahn Vanuatu weh marid fi oava 20 yaaz seh: “Wen mi hozban luk fi Jehoava dairekshan ahn fala weh ih seh, dat mek Ah rispek ahn moa. Ih mek Ah feel sayf, an Ah ku chros di disizhan dehn weh ih mek.”

6. Weh wahn waif ku laan fahn Mayri?

 ⁶ Mayri mi ga fi shee oan rilayshanship wid Jehoava. Fi shee fayt neva dipen pahn Joazef. Shee mi noa di Skripchaz gud. (Si di stodi noat pahn Look 1:46.) Ahn shee mi mek shoar dat ih tek owt di taim fi meditayt pahn weh ih laan. (Look 2:19, 51) Wi ku bee shoar dat di frenship weh Mayri mi ga wid Jehoava mi mek shee wahn ekselent waif. Tudeh, lata waif chrai fala Mayri egzampl. Noatis weh sista Emiko seh: “Wen Ah mi singl, Ah mi ga mi oan spirichwal skejul. Bot afta wi geh marid, mi hozban wuda bee di wan fi pray fi wi ahn tek di leed eena famili wership. Ah noatis dat Ah staat tu pen pahn hihn fi du dehnya tingz fi mee. Bot Ah mi riyalaiz dat Ah mi need fi kip mi persnal rilayshanship wid Jehoava schrang. Soh now Ah set taim wan said fi jos mee ahn mi Gaad. Ah wuda pray, reed di Baibl, ahn meditayt pahn weh Ah reed.” (Gal. 6:5) Unu weh da waif, az unu kantinyu mek unu rilayshanship wid Jehoava schranga, unu hozban wahn ga moa reezn fi prayz unu ahn lov unu.—Prov. 31:30.

7. Weh Joazef ahn Mayri egzampl ku teech wahn hozban ahn waif bowt how ih impoatant fi wership Jehoava tugeda?

⁷ Joazef ahn Mayri mi aalso werk az wahn kopl fi kip dehn rilayshanship wid Jehoava schrang. Dehn mi andastan dat ih impoatant fi wership Jehoava tugeda az wahn famili. (Look 2:22-24, 41; 4:16) Az dehn mi ga moa pikni, ih mosi mi haad fi mek dehn du dat. Bot dehn mi manij fi du it. Dat da wahn ekselent egzampl fi marid peepl tudeh! If yoo ga chiljren, ih mait noh bee eezi fi goh da meetin er mek taim fi famili wership. An ih mait bee haada fi fain taim fi pray ahn stodi di Baibl az wahn kopl. Bot memba, wen yu wership Jehoava az wahn kopl, yu jraa kloasa tu hihn ahn tu eech ada. Soh aalwayz mek unu wership tu Jehoava kohn fers eena unu laif.

8. How famili wership ku help wahn kopl weh ga marij prablemz?

⁸ Weh yoo ku du if yu ga prablemz eena yu marij? Yu mait noh eevn waahn du famili wership az wahn kopl. If dat da di kays, staat aaf wid wahn tapik weh too a unu laik, ahn weh unu waahn diskos. Dis ku help unu fi lov eech ada moa, ahn mek unu waahn wership Jehoava tugeda.

9. Wai wahn hozban ahn waif need fi spen taim wid eech ada?

⁹ Unu ku kip unu lov schrang wen unu spen taim tugeda. Wen unu du dat, ih wahn help unu fi andastan weh unu hozban er waif tink er feel. (Jen. 2:24) Lilia ahn Ruslan mi geh marid oava 15 yaaz agoa. Noatis weh dehn mi fain owt lee bit afta dehn geh marid. Shee seh: “Wee mi riyalaiz dat wi neva mi wahn spen az moch taim tugeda az wi mi tink. Wi mi soh bizi wid werk, howswerk, ahn den laytaraan wid wi chiljren. Bot wi riyalaiz dat wi kuda mi jrif weh fahn eech ada if wi neva mek taim fi spen tugeda.”

10. How di prinsipl da Ifeezhanz 5:15, 16 ku help marid koplz?

¹⁰ Weh koplz ku du fi mek shoar dat dehn spen taim tugeda? Yu mait haftu plan wahn taim fi bee tugeda. (Reed Ifeezhanz 5:15, 16.) Wahn brada fahn Nigeria weh naym Uzondu seh: “Wen Ah di plan owt mi skejul, Ah inklood di taim  weh mee ahn mi waif wahn spen tugeda, an Ah mek shoar Ah dehdeh fi da taim.” (Fil. 1:10) Noatis how Anastasia, hoo marid tu wahn serkit oavaseeya da Moldova, mek di bes yoos a fi shee taim. Shee seh: “Ah chrai du di tingz weh Ah need fi du wen mi hozban bizi wid ih difrent rispansabiliti. Da way deh, wen hihn finish wi ku spen taim tugeda.” Bot wat if yu skejul mek it haad fi fain taim fi eech ada?

11. Wat da sohn tingz weh Akwila ahn Prisila mi du tugeda?

¹¹ Koplz ku laan fahn Akwila ahn Prisila egzampl, wahn kopl weh lata Kristyanz bak den mi lov. (Roam. 16:3, 4) Di Baibl noh tel wi wahn lata deetaylz bowt dehn marij, bot ih doo seh dat dehn mi werk, preech, ahn help adaz tugeda. (Aks 18:2, 3, 24-26) In fak, wen di Baibl taak bowt Akwila ahn Prisila, ih aalwayz menshan dehn tugeda.

12. Wat da sohn tingz weh wahn hozban ahn waif ku du fi spen moa taim tugeda? (Koment pahn di picha.)

¹² How wahn kopl ku fala Akwila ahn Prisila egzampl? Tink bowt aal weh yoo ahn yu marij mayt need fi du. Yu tink yu ku du som a di werk tugeda insteda pahn yu oan? Akwila ahn Prisila mi preech tugeda. Yoo ahn yu marij mayt naamali mek planz fi preech tugeda? Akwila ahn Prisila mi aalso werk tugeda. Yoo ahn yu marij mayt mait noh gat di saym jab, bot yu tink unu ku werk rong di hows tugeda? (Eccl. 4:9) If unu du dat, unu wahn werk az wahn teem wen unu help eech ada di du werk rong di hows, ahn dis wahn gi unu di chaans fi taak tu eech ada. Robert ahn Linda marid fi oava 50 yaaz. Hihn seh: “Ah wahn bee aanis, wi noh ga lata taim fi spen tugeda di du fon tingz. Bot wen Ah di wash op ahn mi waif di jrai op di dishiz, er wen Ah di werk rong di gyaadn ahn shee jain mi, Ah feel soh hapi. Wen wi du dehndeh kaina tingz tugeda, ih mek wi jraa kloasa tu eech ada an ih mek wi lov geh schranga.”

13. Weh wahn hozban ahn waif need fi du fi bee yoonaitid?

¹³ Memba, doh, jos bikaaz wahn hozban ahn wahn waif liv tugeda noh meenz dat dehn wahn bee yoonaitid. Wahn waif fahn Brazil seh: “Wi ga soh moch dischrakshan nowadayz dat eevn eena di saym hows wi mait feel laik wi di du tingz tugeda jos bikaaz wi di liv tugeda. Bot Ah laan dat fi deh tugeda da jos haaf a it. Di neks haaf da fi gi mi hozban di atenshan weh ih need.” Noatis how Bruno an ih waif, Tays, mek shoar fi giv eech ada atenshan. Hihn seh: “Joorin wi taim tugeda, wi put op wi foan an injai di taim wi spen wid eech ada.”

14. Weh wahn hozban ahn wahn waif ku du if dehn noh laik spen taim tugeda?

 ¹⁴ Bot, wat if yoo ahn yu marij mayt noh laik spen taim tugeda? Maybi unu noh inchrestid eena di saym tingz, er maybi unu jos get pahn eech ada nervz. Weh unu ku du? Tink bowt di egzampl a di faiya weh wi mi taak bowt erliya. Ih neva staat blayz op az soon az ih staat tu bon. Ih mi need fi mek sohnbadi put moa ahn moa faiyawud pan it fi mek ih ku akchwali blayz op. Jos laik dat, unu tink unu kuda staat tu spen wahn lee bit a taim tugeda evri day? Insteda du sohnting weh ku mek eeda wan a unu geh beks, chrai du sohnting weh too a unu laik du. (Jay. 3:18) If unu du dat, unu ku mek unu lov fi eech ada groa agen.

15. Wai rispek impoatant eena wahn marij?

¹⁵ Rispek veri impoatant eena wahn marij. Da laik di ayaa weh mek wahn faiya kip di bon. Widowt ayaa, wahn faiya ku owt faas. Saym way soh, widowt rispek, wahn kopl wahn noatis dat dehn lov wahn kool aaf faas tu. Pahn di ada han, wahn hozban ahn waif weh werk haad fi shoa rispek fi eech ada di du dehn bes fi kip dehn lov schrang. Memba, da noh if yoo tink yu di shoa rispek, bot da if yu marij mayt feel dat yu di rispek ahn. Penny an Aret marid fi oava 25 yaaz. Penny seh: “Bikaaz wi rispek eech ada, wi hoam ful a lov. Wi feel free fi tel eech ada how wi feel bikaaz wi noa dat wi noh wahn joj weh eech ada ga fi seh.” Soh, weh yoo ku du fi help yu hozban er yu waif feel dat yu reeli rispek ahn? Mek wi luk pahn Aybraham ahn Saara egzampl.

16. Weh wahn hozban ku laan fahn Aybraham egzampl? (1 Peeta 3:7) (Koment pahn di picha.)

¹⁶ Aybraham mi chreet Saara wid rispek. Hihn mi lisn tu Saara an ih mi rispek ih feelinz. Wahn taim, Saara mi schres owt ahn beks bad, an ih tel Aybraham how shee mi feel an eevn blaym hihn fi di prablem. Yu tink Aybraham mi hala aata ahn an tel ahn sohnting weh ih shudn a mi tel ahn? No. Hihn mi noa dat Saara da-mi wahn gud waif weh rispek ahn an sopoat ih disizhanz. Hihn mi lisn tu shee ahn chrai solv di prablem. (Jen. 16:5, 6) Weh wi ku laan? If yoo da wahn hozban, yu ga di atariti fi mek disizhanz fi yu famili. (1 Kor. 11:3) Bot stilyet, da wahn lovin ting fi tink bowt yu waif opinyan bifoa yu mek wahn disizhan, espeshali if da disizhan involv shee. (1 Kor. 13:4, 5) Ahn sohn ada taim, yu waif mait feel schres owt an ih mait need fi tel yu how ih feel. Wen dat hapm, yoo rispek fi shee feelinz ahn reeli lisn tu ahn? (Reed  1 Peeta 3:7.) Angela ahn Dmitry marid fi nayli 30 yaaz. Shee eksplayn how fi shee hozban mek shee feel laik hihn rispek ahn: “Dmitry aalwayz wilin fi lisn tu mi wen Ah beks er wen Ah jos waahn taak. Hihn payshent wid mi, eevn wen Ah noh ekspres miself eena wahn kaam way.”

17. Weh wahn waif ku laan fahn Saara egzampl? (1 Peeta 3:5, 6)

¹⁷ Saara mi shoa Aybraham dat ih rispek ahn wen ih mi sopoat fi hihn disizhanz. (Jen. 12:5) Wahn taim, Aybraham mi disaid fi shoa haspitaliti tu sohn vizitaz weh dehn neva ekspek. Hihn mi aks Saara fi jrap weh shee mi-di du ahn hori goh mek sohn bred. (Jen. 18:6) Saara neva ways no taim an ih du weh Aybraham aks ahn fi du. If yoo da wahn waif, yoo ku kapi Saara egzampl wen yu sopoat yu hozban disizhanz. Wen yu du dat, yu mek yu marij geh schranga. (Reed 1 Peeta 3:5, 6.) Dmitry seh dat hihn feel dat ih waif rispek ahn. Hihn seh: “Ai apreeshiayt how Angela sopoat mi disizhanz, eevn if shee noh aalwayz agree. If tingz noh werk owt di way wi mi ekspek, shee noh kritisaiz mi.” Ih soh eezi fi lov sohnbadi weh rispek yu!

18. Weh blesinz wahn marid kopl geh wen dehn werk haad fi kip dehn lov schrang?

¹⁸ Tudeh, Saytan waahn Kristyan koplz fi stap lov eech ada. Hihn noa dat if dehn stap lov eech ada, dehn wahn staat fi jraa weh fahn Jehoava. Bot, chroo lov da wahn faiya weh kyaahn owt! Werk haad fi mek di lov weh yu gat eena yu marij bee di saym kaina lov weh wi reed bowt eena di Song of Solomon. Mek op yu main fi put Jehoava fers eena yu marij, mek taim fi eech ada, ahn rispek weh eech ada feel ahn need. An az yu du dat, yu marij wahn aana Jehoava, di Wan weh chroo lov kohn fram. Ahn jos laik wahn faiya weh ga plenti faiyawud, yu lov wahn stay schrang fi az lang az yu liv.