1. Wat da sohnting lata wi fain haad fi du?

 YU EVA set wahn spirichwal goal bot den yu fain it haad fi reech? b If dat da di kays, yu noh deh pahn yu oan. Fi egzampl, Philip mi waahn poar owt ih haat tu Jehoava eevn moa, bot ih mi-di fain it haad fi fain taim fi pray tu ahn. Erika goal da-mi fi reech erli fi di meetin fi feel servis, bot shee stil mi-di reech layt nayli evri singl taim. Tomáš mi chrai reed di Baibl fahn kova tu kova lata taimz. Hihn seh: “Fi tel yu di chroot, Ai neva injai reed di Baibl. Ah mi staat reed it chree taim, bot eech taim Ah onli mek it az far az Leviticus.”

2. If wi set spirichwal goalz bot noh reech dehn, wai wi noh fi geh diskorij?

² If yu set wahn goal weh yu noh reech yet, pleez noh feel diskorij. Noh mata if yu goal big er smaal, ih stil tek lata werk. Wen yu shoa dat yu waahn reech yu goal, yu proov dat yu rilayshanship wid Jehoava preshos tu yu ahn dat yu waahn giv ahn yu bes. Jehoava apreeshiayt aala yu haad werk, an ih noh ekspek moa dan weh yu ku giv ahn. (Ps. 103:14; Mic. 6:8) Soh wen yu set wahn goal fi yuself, mek shoar da wahn goal weh yu ku reech. Afta yu don chooz wahn goal, weh yu need fi du fi reech it? Mek wi luk pahn sohn wayz how wi ku du dat.

3. Wai ih impoatant fi ga wahn schrang dizaiya fi werk pahn wi goalz?

³ Ih impoatant fi ga wahn schrang dizaiya fi reech yu  goal. Sohnbadi weh reeli waahn reech wahn goal wahn werk reeli haad fi reech da goal. Laik di breez weh push wahn saylboat eena di waata tu wehpaat ih gwehn, saym way soh wahn schrang dizaiya ku push wi fi reech wi goalz. Soh if di breez kip di bloa, di sayla wahn ku reech wehpaat ih gwehn. An if di breez bloa haada, ih wahn reech faasa. Saym way soh, wi ku reech wi goalz faasa if wi ga wahn schrang dizaiya fi werk pahn dehn. Wahn brada fahn El Salvador weh naym David seh, “Da schrang dizaiya moov yu fi chrai yu bes, ahn yu noh wahn mek notn stap yu fahn reech da goal.” Soh, weh yu ku du fi mek yu dizaiya moa schranga?

4. Weh wi ku pray fa? (Filipiyanz 2:13) (Koment pahn di picha.)

⁴ Pray fi wahn schrang dizaiya fi du moa. Jehoava ku yooz ih hoali spirit fi help yu ga da schrang dizaiya fi reech yu goal. (Reed Filipiyanz 2:13.) Sohntaim wi set wahn goal bikaaz wi noa dat ih gud fi wi. Bot wi mait noh ga di schrang dizaiya fi reech da goal. Dat da egzakli weh mi hapm tu wahn sista fahn Uganda weh naym Norina. Shee mi set wahn goal fi ga wahn Baibl stodi, bot shee neva ga wahn schrang dizaiya bikaaz shee mi tink dat ih da neva wahn gud teecha. Weh mi help ahn? Shee seh: “Ah aks Jehoava evri day fi help mi fi ga da schrang dizaiya fi fain sohnbadi fi stodi di Baibl wid. Lang wid mi pryaaz, Ah mi haftu werk haad fi laan how fi teech beta. Sohn monts layta, Ah mi noatis dat mi dizaiya fi kandok wahn Baibl stodi mi geh schranga. Da saym yaa, Ah staat too Baibl stodi.”

5. Wat da sohn tingz wi ku tink bowt weh wahn help wi fi ga wahn schrang dizaiya fi du moa?

⁵ Tink bowt weh aal Jehoava don du fi yu. (Ps. 143:5) Di apasl Paal mi tink bowt di grayt kainis weh Jehoava mi shoa ahn, an dis mi help ahn fi du moa fi Jehoava. (1 Kor. 15:9, 10; 1 Tim. 1:12-14) Saym way soh, if yu kip aan di tink bowt weh aal Jehoava don du fi yu, yu dizaiya fi reech yu goal wahn bee schranga. (Ps. 116:12) Noatis weh mi help wahn sista fahn Honduras fi reech ih goal fi bee wahn regyula painyaa. Shee seh: “Ah mi tink wahn lat bowt humoch Jehoava lov mi. Hihn help mi fi fain ih peepl, ih tek kayr Ah mi, an ih protek mi. Wen Ah tek di taim fi tink bowt weh aal hihn don du fi mi, dis mek Ah ga gud reezn fi waahn du moa far ahn.”

6. Weh ku help wi fi mek wi dizaiya groa eevn schranga?

⁶ Foakos pahn di blesinz yu wahn get wen yu reech yu goal. Noatis weh mi help Erika, hoo wi menshan erliya, fi reech ih goal fi deh da di servis meetin pahn taim. Shee seh: “Wen Ah wuda reech layt fi di servis meetin, Ah geh fi si dat Ah mis owt  pahn wahn lat. Bot if Ah reech erli, Ah ku spen taim di taak wid mi bradaz ahn sistaz. Ah ku lisn tu dehn gud advais, ahn dat ku help mi fi du beta eena di preechin werk.” Erika mi foakos pahn how shee wuda benifit if ih mi reech di servis meetin pahn taim, ahn dat mi help ahn fi reech ih goal. Weh blesinz yoo ku foakos pan? If yu goal da fi du beta eena yu Baibl reedin er eena yu pryaaz, tink bowt how yu frenship wid Jehoava wahn geh schranga. (Ps. 145:18, 19) If yu goal da fi werk pahn wahn Kristyan kwaliti, foakos pahn how ih wahn mek yu rilayshanship wid adaz beta. (Kol. 3:14) Maybi yu ku chrai mek wahn lis a aala di wayz yu ku benifit if yu reech yu goal. Ahn goh bak tu da lis fahn taim tu taim. Tomáš, weh wi menshan erliya, seh: “If Ah noa dat Ah wahn benifit wahn lat if Ah reech wahn goal, den Ah noh wahn giv op pan it.”

7. Weh mi help Julio an ih waif fi reech dehn goal?

⁷ Spen taim wid peepl weh wahn inkorij yu fi reech yu goal. (Prov. 13:20) Luk pahn weh mi help Julio an ih waif fi reech dehn goal fi du moa eena di preechin werk. Hihn seh: “Wi mi pik frenz weh mi inkorij wi fi chrai reech wi goal. Ahn wi wuda taak bowt aala di tingz weh wi wuda waahn du eena Jehoava servis. Wahn lata dehn mi don reech simila goalz, soh dehn mi gi wi gud advais. Ahn dehn wuda kohn aks wi how wi planz di goh an inkorij wi wen wi mi need it di moas.”

8. Weh ku hapm if wi onli werk pahn wi goalz wen wi feel laik it? (Koment pahn di picha.)

⁸ Dehn ga dayz wen wi mait noh ga di dizaiya fi du eniting. Yu tink dat meen dat wi jos kyaahn reech wi goal? No. Fi egzampl: Wahn schrang breez ku help wahn saylboat fi get wehpaat ih need fi goh. Bot, memba dat dehn ga dayz wen di breez schrang, ahn dehn ga ada taimz wen ih bayli di bloa, er sohntaim no breez ataal. Yu tink dis meen dat di saylboat noh wahn kantinyu moov non ataal? Noh reeli. Bikaaz sohn saylboat ga wahn injin ahn som ga padl. Soh di sayla ku yooz eeda wan a dehnya fi kantinyu moov soh dat ih ku reech wehpaat ih need fi goh. Eena wahn sens, wi dizaiya fi reech wahn goal da laik da breez. Sohntaim wi mait reeli waahn reech wi goal, bot ada dayz wi mait feel laik wi noh ga no dizaiya ataal. Soh if wi wuda onli werk pahn wi goal wen wi feel laik it, den wi wuda praabli neva reech it non ataal. Jos laik how di sayla ku kantinyu moov eevn wid owt di breez, saym way soh wi kantinyu werk pahn wi goalz eevn if wi noh ga di dizaiya. Fi du dat, yu mait haftu werk reeli haad, bot yu wahn bee hapi wen yu reech yu goal. Bifoa wi diskos weh wi ku du wen wi  noh ga di dizaiya, mek wi taak bowt sohnting els weh mait kom op.

9. Ih rang fi mek yu kantinyu werk pahn wahn goal eevn wen yu noh ga di dizaiya fi du it? Pleez eksplayn yu ansa.

⁹ Jehoava waahn mek wi bee wilin ahn hapi fi serv ahn. (Ps. 100:2; 2 Kor. 9:7) Yu tink wi shuda kantinyu werk pahn wahn spirichwal goal eevn wen wi noh ga di dizaiya? Tink bowt di apasl Paal egzampl. Hihn mi seh: “Ah ponish mi badi ahn kanchroal it laik wahn slayv.” (1 Kor. 9:25-27, stodi noat pahn vers 27) Paal mi foas ihself fi du weh rait eevn wen ih neva ga di dizaiya fi du it. Jehoava mi hapi wid weh Paal mi du far ahn? Yes! Ahn Hihn mi bles ahn far it.—2 Tim. 4:7, 8.

10. How wi benifit wen wi kantinyu werk pahn wi goal eevn if wi noh ga di dizaiya?

¹⁰ Saym way soh, Jehoava hapi fi si wen wi di werk haad fi reech wi goal eevn if wi noh reeli feel laik du it. Hihn hapi bikaaz eevn doa wi mait noh lov weh wi di du, hihn noa dat wi di du it owta lov fi hihn. Jehoava wahn bles wi fi aal weh wi du, jos laik how Ih mi bles Paal. (Ps. 126:5) An az wi geh fi si how Jehoava di bles wi, dat mait gi wi di dizaiya weh wi need fi kantinyu werk pahn wi goal. Wahn sista fahn Poland weh naym Lucyna seh: “Sohntaim Ah noh feel laik goh pahn servis; wers wen Ah feel taiyad. Bot di jai weh Ah feel afta Ah kohn bak fahn servis da wahn amayzin gif.” Soh mek wi si weh wee ku du wen wi noh ga di dizaiya.

11. How Jehoava ku help yu ga moa self-kanchroal?

¹¹ Pray fi self-kanchroal. Self-kanchroal ku help wahn persn kanchroal ih feelinz ahn di tingz weh ih du. Wahn lata taimz peepl tink dat fi ga self-kanchroal meenz yu ku hoal bak yuself fahn du sohnting bad. Bot self-kanchroal ku aalso moov yu fi du sohnting gud, espeshali if yu feel laik da sohnting haad fi du er if yu noh feel laik du it. Memba dat self-kanchroal da paat a di froot weh hoali spirit bayr eena peepl. Soh aks Jehoava fi hoali spirit fi help yu laan fi shoa da impoatant kwaliti. (Look 11:13; Gal. 5:22, 23) David, weh wi menshan erliya, seh dat pryaa mi help ahn wahn lat. Hihn mi waahn du persnal stodi moa regyula. Hihn seh: “Ah mi aks Jehoava fi help mi ga self-kanchroal. Ahn wid fi hihn help, Ah mi staat tu du moa persnal stodi widowt mis.”

12. How di prinsipl da Ecclesiastes 11:4 ku help wi reech wi goalz?

¹² Tingz eena dis werl wahn neva bee perfek, soh noh wayt fi di perfek taim. If wi chrai wayt fi di perfek taim, wi mait neva reech wi goal. (Reed Ecclesiastes 11:4.) c Wahn brada weh naym Dayniel seh: “Di perfek taim wahn neva kom. Soh ih beta fi noh wayt, jos du it.” Wahn brada fahn Uganda weh naym Paul seh wahn nada reezn wai wi noh fi du tingz laas minit: “Wi gi Jehoava sohnting fi bles wen wi staat tu werk pahn wi goal eevn doa wi di goh chroo wahn rof taim.”—Mal. 3:10.

13. Wai ih gud fi staat aaf wid smaala goalz?

¹³ Set smaal goalz. If yu feel laik yu goal tu haad fi reech, den yu mait noh eevn waahn werk pan it. If dis da how yoo feel, den maybi yu ku set sohn smaala goalz. If yu goal da fi werk pahn wahn spesifik kwaliti, den chrai fain sohn lee wayz how yu ku staat shoa it. If yu goal da fi reed di  hoal Baibl, den maybi yu ku chrai staat aaf di reed jos wahn fyoo vers evri day. Tomáš, weh wi menshan erliya, mi fain it haad fi reech ih goal fi reed di Baibl eena wahn yaa. Ih seh: “Ah riyalaiz dat Ah kudn kip op wid di goal weh Ah set fi miself. Soh Ah disaid fi chrai agen, bot dis taim, Ah mi wahn reed les dan wahn chapta ahn tek mi taim fi tink bowt weh Ah reed. Afta Ah mi du dis, Ah mi staat tu injai mi Baibl reedin.” Bikaaz Tomáš mi geh fi injai ih Baibl reedin wahn lat, ih mi staat reed moa vers eech day. Laytaraan, hihn mi en op di reed di hoal Baibl. d

14. Weh ku hoal wi bak fahn reech wi goal?

¹⁴ Eevn if wi ga gud self-kanchroal er wahn schrang dizaiya fi reech wi goal, sohntaim tingz ku stil hoal wi bak. Fi egzampl, ‘tingz weh wi noh ekspekʼ ku hapm ahn stap wi fahn reech wi goal. (Eccl. 9:11) Maybi da sohnting weh mek wi feel diskorij er week. (Prov. 24:10) Bikaaz wi noh perfek, wee mait du tingz weh mek it haada fi reech wi goal. (Roam. 7:23) Er maybi wi jos feel taiyad. (Mach. 26:43) Weh ku help wi fi noh du eniting weh ku hoal wi bak fahn reech wi goal?

15. If sohnting hoal yu bak fahn reech yu goal, den yu tink dat meenz dat yu fayl? Pleez eksplayn yu ansa. (Psalm 145:14)

¹⁵ Memba dat if yu noh reech wahn goal bikaaz sohnting hoal yu bak, dat noh meenz dat yu fayl. Di Baibl seh dat wi wahn kip di ga prablemz weh ku hoal wi bak oava ahn oava agen. Bot ih aalso tel wi dat if sohnting doo hapm, wi ku stil reech wi goal, bikaaz Jehoava wahn help wi. (Reed Psalm 145:14.) e Philip,  wahn brada weh wi menshan erliya, seh: “Ih noh mata humoch taimz Ai fayl, bikaaz dat noh meenz dat Ah wahn neva reech mi goal. Weh moa impoatant da fi mek Ah get bak pahn chrak fi reech mi goal.” David, weh wi mi taak bowt erliya, seh: “Wen sohnting hoal mi bak fahn reech mi goal, Ah chrai seeʼt az jos wahn bad day insteda sohnting weh ku stap mi fahn reech mi goal. Ah aalso chrai seeʼt az wahn way fi shoa Jehoava humoch Ah lov ahn.” If yoo kantinyu werk haad pahn wahn goal eevn wen sohnting hoal yu bak, yu proov dat yu waahn mek Jehoava hapi. Wen Jehoava si how haad yu di werk fi kantinyu reech yu goal, hihn onli hapi!

16. Weh wi ku laan fahn di tingz weh hoal wi bak?

¹⁶ Laan fahn di tingz weh hoal yu bak. Tink bowt weh mi hoal yu bak, an aks yuself, ‘Weh Ah ku du fi mek dat noh hapm agen?ʼ (Prov. 27:12) Sohntaim wen sohnting hoal wi bak, ih ku mek wi si dat ih mait tu haad fi reech da goal. If dat eva hapm tu yoo, yu ku tink bowt yu goal agen ahn si if dis goal wahn stil bee pasabl fi yoo. f Jehoava noh wahn joj yu jos bikaaz yu kudn reech wahn goal weh mi tu haad fi yu.—2 Kor. 8:12.

17. Wai wi shuda kantinyu tink bowt goalz weh wi don reech aredi?

¹⁷ Kantinyu tink bowt goalz weh yu don reech. Di Baibl seh dat “Gaad da wahn raichos Gaad, ahn hihn noh wahn ferget . . . how unu du unu bes.” (Heeb. 6:10) If hihn noh ferget how haad yu di chrai fi du yu bes, den yoo shudn ferget needa. Tink bowt di goalz weh yu don reech aredi. Ih ku bee dat yu mek yu rilayshanship wid Jehoava schranga, yu preech tu adaz bowt ahn, er yu geh baptaiz. Jos laik how yu mi chrai yu bes fi reech dehndeh goalz eena di paas, yu wahn kantinyu chrai du beta fi reech yu spirichwal goalz now.—Fil. 3:16.

18. Weh wi shuda memba fi foakos pan az wi di werk haad fi reech wi goal? (Koment pahn di picha.)

¹⁸ Jos laik wahn sayla weh reech wehpaat ih need fi goh, yoo kud reech yu goal tu, wid Jehoava help. Bot memba, wahn lata sayla injai dehn chrip bifoa dehn reech wehpaat dehn mi gwehn. Saym way soh, noh ferget fi foakos pahn how Jehoava di help yu ahn bles yu lang di way az yu di chrai fi reech yu goal. (2 Kor. 4:7) Yu wahn geh lat moa blesinz if yu noh giv op.—Gal. 6:9.