1. Wai wi ku seh dat wi di liv joorin sohn eksaitin taimz?

 WI DI liv joorin sohn eksaitin taimz! Evri day, wi geh fi si Baibl prafesi kohn chroo. Fi egzampl, wi si how di “king a di sowt” ahn di “king a di naat” di fait gens eech ada fi si hoo wahn bee nomba wan eena di werl. (Dan. 11:40) Wi si how di gud nyooz di spred aal oava di werl laik neva bifoa. Ahn sayka dat, milyanz a peepl di serv Jehoava now. (Isa. 60:22; Mach. 24:14) Ahn wi si how di faytful ahn waiz slayv di gi wi wahn lata spirichwal food “da di rait taim.”—Mach. 24:​45-47.

2. How Jehoava wahn help wi joorin di grayt chribyulayshan, ahn weh wi need fi memba?

² Jehoava di help wi fi andastan beta ahn beta sohn impoatant tingz weh wahn hapm eena di fyoocha. (Prov. 4:18; Dan. 2:28) Wi noa dat di grayt chribyulayshan wahn bee wahn haad taim. Eevn soh, wi ku bee shoar dat Jehoava wahn mek wi noa evriting weh wi need fi noa fi stay faytful tu hihn ahn fi stay yoonaitid wid eech ada joorin da taim. Bot wi need fi memba dat dehn ga sohn tingz weh wi jos noh noa bowt di fyoocha. Eena dis aatikl, wi wahn diskos wai wi mek sohn ajosment tu wi andastandin bowt sertn tingz weh wahn hapm eena di fyoocha. Den, wi wahn diskos som a di tingz weh wi doo noa bowt di fyoocha ahn how Jehoava, wi Hevnli Faada, wahn handl tingz.

 WEH WI NOH NOA?

3. Weh wi yoostu seh wahn hapm tu peepl wen di grayt chribyulayshan staat if dehn noh di serv Jehoava, ahn wai wi mi seh dat?

³ Eena wi poblikayshan dehn, wi yoostu seh dat wen di grayt chribyulayshan staat, ih wahn bee tu layt fi mek enibadi staat wership Jehoava. Wi yoostu seh dat wen Armagedon kohn, dehn wahn geh dischrai. Wi mi tink dat di Flod weh mi hapm eena Noawa taim mi reprizent weh wahn hapm eena di fyoocha. Fi egzampl, nobadi kuda mi gaan eena di aak afta Jehoava mi shet di doa. Ih mi tu layt fi mek enibadi weh mi deh owtsaid geh sayv. Soh wi yoostu seh dat jos laik dat, wen di grayt chribyulayshan staat, ih wahn bee tu layt fi mek enibadi staat put fayt eena Jehoava ahn geh sayv.—Mach. 24:​37-39.

4. Ih karek fi seh dat evriting weh mi hapm joorin di Flod reprizent weh wahn hapm eena di fyoocha? Pleez eksplayn yu ansa.

⁴ Soh ih karek fi seh dat evriting weh mi hapm joorin di Flod reprizent weh wahn hapm eena di fyoocha? Di ansa da no, bikaaz di Baibl noh seh dat. a Da chroo, Jeezas mi seh dat jos laik how tingz mi stan eena Noawa dayz, da rait soh ih wahn bee wen Jeezas kohn bak. Bot Jeezas neva mi-di seh dat evriting weh mi hapm eena Noawa taimz mi reprizent sohnting biga weh wahn hapm eena di fyoocha. Soh wen Jehoava mi shet di doa a di aak, dat neva reprizent notn eena di fyoocha. Bot  stilyet, wi ku laan wahn lata gud lesn fahn Noawa ahn di Flod.

5. (a) Wat da sohn tingz weh Noawa mi du bifoa di Flod mi kohn? (Heebrooz 11:7; 1 Peeta 3:20) (b) Wen ih kohn tu di preechin werk, how fi wee sichuwayshan da jos laik eena Noawa dayz?

⁵ Wen Jehoava mi waan Noawa bowt di Flod, Noawa mi lisn ahn bil di aak. Dis shoa dat Noawa mi ga fayt. (Reed Heebrooz 11:7; 1 Peeta 3:20.) Peepl nowadayz need fi shoa fayt tu, jos laik Noawa. Wen dehn hyaa di gud nyooz bowt Gaad Kingdom, dehn need fi du sohnting bowt it. (Aks 3:​17-20) Peeta seh dat Noawa da-mi wahn “preecha a raichosnis.” (2 Peet. 2:5) Bot jos laik weh wi laan eena di laas aatikl, wi noh noa if Noawa mi preech tu evri singl persn bifoa di Flod mi kohn. Wee bizi, tu, di chrai wi bes fi preech tu peepl aal oava di ert. Stilyet, noh mata how haad wi chrai, ih jos noh pasabl fi mek wi reech evribadi wid di gud nyooz bifoa di en kohn. Wai wi seh dat?

6-7. Wai ih noh pasabl fi preech tu evribadi bifoa di en kohn?

⁶ Tink bowt weh Jeezas mi seh bowt how big dis preechin werk wahn bee. Hihn mi seh dat di gud nyooz wahn geh preech “aal oava di ert soh dat aala di nayshan dehn ku noa bowt it.” (Mach. 24:14) Fi shoar, wi si dis prafesi di kohn chroo tudeh. Fi egzampl, wi di preech eena moa dan 1,000 langwij aal oava di werl. Ahn bikaaz a wi jw.org websait, lata peepl ku laan bowt di gud nyooz a Gaad Kingdom.

⁷ Eevn wid aala dat, wi stil wahn kyaahn preech tu evribadi bifoa di en kohn. Wai wi seh dat? Jeezas mi tel ih disaipl dehn dat hihn wahn kohn “bifoa [dehn] geh fi preech eena aala di siti ahn vilij dehn.” (Mach. 10:23; 25:​31-33) Soh wi si dat wi wahn kyaahn preech tu eech persn bifoa Jeezas kohn fi joj peepl pahn di ert. Weh aalso mek it haad fi preech tu evribadi da dat eena sohn paats a di werl di govament ban wi preechin werk. Pahn tap a dat, honjridz a baybi di baan evri minit. Soh noh mata how haad wi chrai, wi jos kyaahn reech evribadi wid di gud nyooz bifoa di en kohn. Stilyet, wi di chrai wi bes fi preech di gud nyooz tu “peepl fahn evri nayshan ahn chraib, ahn tu peepl fahn difrent rays, ahn tu peepl weh taak aal kaina langwij.”—Rev. 14:6.

8. Weh kweschanz wi mait ga bowt how Jehoava wahn joj peepl eena di fyoocha? (Koment pahn di picha dehn.)

⁸ Soh bays pahn weh wi jos diskos, yu mait wanda: ‘Weh wahn hapm tu di peepl weh neva geh wahn chaans fi hyaa di gud nyooz bifoa di grayt chribyulayshan staat? How Jehoava an ih Son, weh ih apoint fi du di jojin, wahn joj dehndeh peepl?ʼ (Jan 5:​19, 22, 27; Aks 17:31) Wel, mek wi goh bak tu weh di teem skripcha fi dis aatikl seh. Ih seh dat Jehoava “noh waahn nobadi geh dischrai.” Insted, Jehoava waahn “evribadi geh di chaans fi ripent.” (2 Peet. 3:9; 1 Tim. 2:4) Wi noa dis bowt Jehoava, bot ih noh tel wi yet how ih wahn joj peepl weh neva geh wahn chaans fi hyaa di gud nyooz bifoa di en kohn. Af koars, Jehoava noh haftu tel wi evriting bowt weh ih du er weh ih wahn du eena di fyoocha.

9. Weh di Baibl seh Jehoava wahn du eena di fyoocha?

⁹ Eena di Baibl, Jehoava doo tel wi bowt som a di tingz weh hihn wahn du. Fi egzampl, eena di Baibl Jehoava tel wi dat ih wahn rayz op bak “peepl weh neva raichos.” (Aks 24:15; Look 23:​42, 43) Dehnya da peepl weh neva geh di apachooniti fi laan bowt di gud nyooz ahn chaynj  dehn laif fi serv hihn. Bot dis mait mek wi ga moa kweschanz.

10. Weh ada kweschanz wi mait gat?

¹⁰ Soh if wahn persn ded joorin di grayt chribyulayshan, dat meenz dat ih geh dischrai fareva an ih noh ga no hoap fi geh rezorek? Wel, di Baibl mek it klyaa dat wen Armagedon kohn, Jehoava an ih hevnli aami wahn dischrai enibadi weh goh gens Ahn. Dehn wahn geh dischrai fareva ahn dehn no wahn geh rezorek. (2 Tes. 1:​6-10) Bot weh wahn hapm tu peepl weh ded joorin di grayt chribyulayshan, maybi bikaaz dehn geh sik, dehn get eena wahn aksident, er sohnbadi kil dehn? (Eccl. 9:11; Zech. 14:13) Yu tink ih pasabl dat som a dehn mait deh monks di “peepl weh neva raichos” weh wahn geh rezorek eena di nyoo werl? Wi jos noh noa di ansa tu da kweschan.

WEH WI DOO NOA?

11. How Jeezas wahn joj peepl?

¹¹ Dehn ga sohn tingz weh wi doo noa bowt di fyoocha. Fi egzampl, wi noa dat Jeezas wahn joj peepl az eeda sheep er goat bays pahn how dehn chreet fi hihn anointid bradaz. (Mach. 25:40) Enibadi weh sopoat Jeezas anointid bradaz pahn di ert wahn geh joj az sheep. Wen di grayt chribyulayshan staat, som a Jeezas anointid bradaz wahn stil deh pahn di ert. Dehn noh gwehn da hevn til rait bifoa Armagedon staat. Soh dis meenz dat az lang az som a Jeezas anointid bradaz stil deh pahn di ert, peepl wid di rait haat kandishan ga di apachooniti fi sopoat dehn ahn di werk weh dehn du. (Mach. 25:​31, 32; Rev. 12:17) Wai ih impoatant fi noa dehnya tingz?

12-13. Weh sohn peepl mait disaid fi du afta dehn si “Babilan di Grayt” geh dischrai? (Koment pahn di picha dehn.)

¹² Wen di grayt chribyulayshan staat ahn peepl si “Babilan di Grayt” geh dischrai, som a dehn mait memba dat fi wahn lang taim Jehoava Witnisiz mi-di preech dat dis mi wahn hapm. Soh yu tink dat dis mait mek sohn peepl ga wahn chaynj a haat ahn disaid fi wership Jehoava?—Rev. 17:5; Ezek. 33:33.

 ¹³ If dat hapm, den ih wuda bee jos laik weh mi hapm da Eejip joorin Moaziz taim. Memba dat wen di Izrelait dehn mi lef Eejip, “wahn big groop a aal kaina peepl” mi gaahn wid dehn. Ih pasabl dat som a dehn mi staat tu put fayt eena Gaad wen dehn si Moaziz waanin bowt di Ten Playg kohn chroo. (Eks. 12:38) If sohnting laik dat hapm wen Gaad dischrai Babilan di Grayt, yu tink ih wuda mek wi feel laik ih noh fyaa dat dehndeh peepl jain wi rait bifoa di en kohn? Neva! Wee waahn bee jos laik wi Pa da hevn, wahn Gaad ‘weh shoa lata mersi, weh ga kompashan, weh noh eezi fi geh beks, weh shoa wahn lata lov, an aalwayz tel di chroot.ʼ b—Eks. 34:6.

14-15. Wahn persn hoap fi liv fareva dipen pahn wen ih ded er wehpaat ih liv? Pleez eksplayn yu ansa. (Psalm 33:​4, 5)

¹⁴ Maybi yu hyaa wahn brada er sista seh bowt wahn famili memba weh noh di serv Jehoava: “Ih wuda beta if mi famili memba ded bifoa di grayt chribyulayshan staat soh da way deh ih ga di hoap fi geh rezorek.” Dis brada er sista noh meen notn bad wen ih seh dat, bot Jehoava noh wahn bays ih disizhan fi rezorek sohnbadi jos pahn wen ih ded. Jehoava da wahn perfek joj. Hihn wahn aalwayz joj eena wahn fyaa ahn raichos way. (Reed Psalm 33:​4, 5.) c Soh wee ku ga kanfidens dat Jehoava, “di wan weh joj evribadi pahn  di ert,” wahn aalwayz du weh rait.—Jen. 18:25.

¹⁵ Wi ku aalso seh dat Jehoava praabli noh wahn chooz fi rezorek sohnbadi jos bikaaz a wehpaat di persn liv. Jehoava wuda neva joj milyanz a peepl az goat jos bikaaz dehn liv eena wahn plays wehpaat dehn neva geh di apachooniti fi hyaa di gud nyooz. (Mach. 25:46) Memba dat Jehoava da wahn raichos joj weh kay bowt dehnya peepl moa dan how wee kuda eva kay bowt dehn. Wi noh noa how Jehoava wahn handl tingz joorin di grayt chribyulayshan. Ih pasabl dat di tingz weh peepl si di hapm joorin di grayt chribyulayshan mait mek dehn disaid fi put fayt eena Jehoava ahn tek dehn stan pahn Jehoava said wen hihn mek evribadi pahn di ert noa ih naym.—Ezek. 38:16.

16. Weh wi don laan bowt Jehoava? (Koment pahn di picha.)

¹⁶ Wen wi stodi di Baibl, wi geh fi laan dat peepl preshos tu Jehoava. Hihn sen ih Son fi giv ih laif fi wi soh dat evribadi ku ga di hoap fi liv fareva. (Jan 3:16) Aala wi geh fi ekspeeryens Jehoava lov ahn kainis. (Isa. 49:15) Noh onli dat, hihn noa eech wan a wi bai naym. Hihn noa wi soh gud dat eevn if wi ded, ih ku rezorek wi bikaaz ih noa evriting bowt wi! (Mach. 10:​29-31) Wi ku bee shoar dat fi wee Pa, Jehoava, wahn joj eena wahn perfek way bikaaz hihn waiz, raichos, ahn ga lata mersi.—Jay. 2:13.

17. Weh kweschanz wi wahn ansa eena di neks aatikl?

¹⁷ Dehnya ajosment tu wi andastandin mek wi preechin werk eevn moa seeryos an impoatant. Wai wi seh dat? Weh wahn moov wi fi preech widowt stap? Eena di neks aatikl, wi wahn ansa dehnya kweschan.