STODI AATIKL 21
SANG 107 Jehoava Lovin Wayz
How fi Fain Wahn Gud Hozban er Waif?
“Ih haad fi fain wahn gud waif. Shee wert wahn lat moa dan koaral.”—PROV. 31:10.
WEH WI WAHN DISKOS?
Dis aatikl wahn taak bowt difrent Baibl prinsiplz weh ku help wahn singl persn fain wahn gud hozban er waif. Ahn wi wahn si how bradaz ahn sistaz eena di kangrigayshan ku sopoat dehn wan weh waahn geh marid.
1-2. (a) Wat da sohn tingz wahn singl Kristyan need fi tink bowt bifoa ih staat dayt? (b) Weh ih meenz fi dayt? (Koment pahn di futnoat weh naym “Weh Ih Meen?”)
YOO wuda waahn geh marid? Eevn doa yu noh haftu geh marid fi bee hapi, wahn lata singl bradaz ahn sistaz, weda dehn yong er oal, waahn geh marid. Bot bifoa yu staat luk fi wahn hozban er wahn waif, yu need fi ga wahn schrang rilayshanship wid Jehoava, noa yuself gud, ahn bee aybl fi sopoat wahn famili. a (1 Kor. 7:36) If yu gat aala dehndeh tingz kovad, ih wahn eeziya fi ga wahn hapi marij.
2 Ih ku bee haad fi fain sohnbadi weh ku bee wahn gud hozban er waif. (Prov. 31:10) An eevn if yu fain sohnbadi weh ku bee wahn gud hozban er waif, ih noh aalwayz eezi fi staat dayt. b Eena dis aatikl, wi wahn gi sohn sojeshanz pahn how wahn persn ku fain sohnbadi weh ku bee wahn gud hozban er waif, how dehn ku staat dayt, ahn how di bradaz ahn sistaz eena di kangrigayshan ku sopoat dehn.
HOW FI FAIN WAHN GUD HOZBAN ER WAIF?
3. Weh wahn singl Kristyan need fi tink bowt wen ih di luk fi wahn gud hozban er waif?
3 Bifoa yu staat tu dayt, yu need fi noa weh kaina kwalitiz yu waahn yu fyoocha hozban er waif gat. Dat impoatant bikaaz yu ku en op di dayt di rang persn er yu mait noh noatis sohnbadi weh ku bee wahn gud persn fi marid. Af koars, hooeva yu disaid fi dayt need fi bee wahn baptaiz Kristyan. (1 Kor. 7:39) Bot jos bikaaz ih baptaiz noh meenz dat ih da di rait persn fi mek yoo marid. Soh aks yuself dehnya kweschan: ‘Wat da mai goalz eena laif? Weh kaina kwalitiz mai fyoocha hozban er waif need fi gat? Ai reeznabl wid di tingz weh Ai ekspek fan ahn?ʼ
4. Weh sohn singl bradaz ahn sistaz pray bowt?
4 If yoo waahn geh marid, den yu praabli don pray an aks Jehoava fi help yu fain wahn gud hozban er waif. (Fil. 4:6) Eevn doa Jehoava noh pramis fi gi wi wahn hozban er waif, hihn kay bowt how wi feel ahn weh wi need, ahn hihn ku help wi fain sohnbadi gud fi marid. Soh ih gud fi mek wi kantinyu tel Jehoava how wi feel ahn tel ahn egzakli weh wi waahn. (Ps. 62:8) Ih impoatant fi mek wi aks Jehoava fi help wi bee payshent ahn mek waiz disizhanz. (Jay. 1:5) Wahn singl brada fahn di United States weh naym John c seh: “Ah wuda tel Jehoava bowt di kwalitiz weh Ah waahn mi fyoocha waif gat. Ah wuda aalso aks ahn fi help mi fain difrent wayz Ah ku meet sohnbadi laik dat. An Ah aks Jehoava fi help mi ga kwalitiz weh wahn mek Ai bee wahn gud hozban.” Wahn sista fahn Sri Lanka weh naym Tanya seh: “Wail Ah stil di luk fi wahn hozban, Ah aks Jehoava fi pleez help mi stay faytful ahn fi bee hapi.” Eevn if yu noh fain wahn hozban er waif rait away, Jehoava wahn mek shoar hihn tek kayr a yu ahn gi yu di lovin atenshan weh yu need.—Ps. 55:22.
5. Weh singl bradaz ahn sistaz ku du soh dat dehn ku meet ada singl peepl weh lov Jehoava? (1 Korintyanz 15:58) (Koment pahn di picha.)
5 Di Baibl tel wi fi aalwayz ga “plenti fi du eena di werk weh di Laad gi wi fi du.” (Reed 1 Korintyanz 15:58.) If yu kip yuself bizi di du tingz fi Jehoava ahn spen taim wid lata difrent bradaz ahn sistaz, dat noh onli wahn inkorij yu bot yu wahn geh fi meet ada singl peepl weh di du dehn bes fi serv Jehoava. Ahn wen yu du yu bes fi serv Jehoava, yu wahn bee reeli hapi.
If yu kip yuself bizi di du tingz fi Jehoava ahn spen taim wid lata difrent bradaz ahn sistaz, yu mait meet ada singl peepl weh wuda waahn geh marid (Paragraaf 5)
6. If yoo da wahn singl persn weh waahn geh marid, weh yu need fi memba wen yu di luk fi wahn hozban er waif?
6 If yu goal da fi geh marid, yu haftu bee kyaaful dat ih noh dischrak yu fahn tingz weh moa impoatant. (Fil. 1:10) Yu rilayshanship wid Jehoava da weh wahn mek yu bee hapi, weda yu singl er marid. (Mach. 5:3) Ahn wen yu singl, yu ku du moa fi Jehoava. (1 Kor. 7:32, 33) Soh memba fi yooz yu taim eena wahn waiz way. Wahn sista weh naym Jessica, weh geh marid wen ih mi aalmoas 40, seh, “Wen Ah mi singl, Ah mi kip miself bizi eena servis, ahn dat mi help mi fi stay hapi eevn doa Ah mi waahn geh marid.”
TEK TAIM FI FAIN OWT MOA BOWT DI PERSN
7. Wai ih impoatant fi tek taim fi fain owt moa bowt wahn persn bifoa yu tel ahn how yu feel? (Proverbs 13:16)
7 Wen yu fain sohnbadi weh ku bee wahn gud hozban er waif, yu tink yu shuda tel ahn rait away how yu feel? Di Baibl seh wahn waiz persn tink bifoa ih du eniting. (Reed Proverbs 13:16.) d Soh bifoa yu mek sohnbadi noa how yu feel bowt ahn, ih waiz fi mek yu tek taim fi fain owt moa bowt ahn. Wi ku dis wen wi noatis som a di tingz ih du. Wahn brada fahn di Netherlands weh naym Aschwin seh, “Ih eezi fi staat ga schrang feelinz fi sohnbadi, bot saym way soh dehndeh feelinz ku fayd weh faas. Soh tek taim fi chek owt di persn, bikaaz yu noh waahn staat sohnting wid ahn jos bays pahn how yu feel.” If yu du dis, yu mait fain owt dat hihn er shee da noh di rait persn fi yoo.
8. Weh wahn singl persn ku du wen ih di chrai fain owt moa bowt sohnbadi weh ih mait waahn dayt? (Koment pahn di picha.)
8 How yu ku fain owt moa bowt sohnbadi bifoa yu tel ahn how yu feel? Wen yu goh da meetin er da wahn gyadarin, yu ku noatis ih persnaliti, how ih bihayv, ahn humoch ih reeli lov Jehoava. Yu ku aalso luk owt fi si weh kaina frenz ih gat ahn weh dehn taak bowt wen dehn deh tugeda. (Look 6:45) Chrai fain owt if too a unu ga simila goalz eena laif. Yu ku taak tu di eldaz eena ih kangrigayshan er machoar bradaz ahn sistaz weh ku help yu fain ansaz tu kweschanz laik: ‘Wat da ih repyutayshan? Weh kaina persn hihn er shee? Weh kaina kwalitiz ih gat?ʼ (Prov. 20:18; Root 2:11) Wail yu di fain owt moa bowt di persn, chrai yu bes fi noh mek di persn feel wahn kaina way. Aalwayz memba dat yu need fi rispek ih praivasi an ih feelinz ahn noh anai ahn.
Chrai fain owt moa bowt wahn persn bifoa yu tel ahn how yu feel (Paragraaf 7-8)
9. Bifoa yu tel sohnbadi how yu feel, weh yu need fi bee shoar bowt?
9 How lang yu fi wayt bifoa yu tel di persn how yu feel? If yu du it tu soon, di persn mait tink dat yu da sohnbadi weh mek dehn feelinz kanchroal dehn. (Prov. 29:20) An if yu tek tu lang, di persn mait tink dat yu jos noh noa weh yu waahn, espeshali if ih don riyalaiz dat yu ga feelinz far ahn. (Eccl. 11:4) Bifoa yu tel sohnbadi how yu feel, yu noh need fi bee shoar dat dat da di persn yu wahn marid tu. Bot yu doo need fi bee shoar dat yu redi fi geh marid ahn dat di ada persn wuda bee sohnbadi gud fi yu.
10. Weh yu need fi du if yu noa sohnbadi laik yu, bot yoo noh feel di saym way?
10 Wat if yu feel laik sohnbadi laik yu? If yu noh feel di saym way, ih impoatant fi mek yu noh du tingz weh wahn mek di persn feel laik yu inchrestid eena ahn. Ih wuda bee reeli meen if yu mek di persn tink dat dehn ga wahn chaans wid yu wen yu noa dat yu noh laik ahn.—1 Kor. 10:24; Ifee. 4:25.
11. If yu di help set op too peepl, den wat da sohn tingz weh yu need fi luk owt fa?
11 Eena sohn konchri, payrents er wahn nada persn eena di famili ga di rispansabiliti fi fain wahn hozban er waif fi wahn singl persn. An eena sohn ada plays, famili er frenz wuda jos set op too singl peepl soh dat dehn ku figa owt if dehn gud fi eech ada. If sohnbadi aks yu fi set ahn op wid sohnbadi, yu need fi noa weh di too a dehn laik ahn need. Memba dat ih impoatant fi yu fain sohnbadi fi dehn weh reeli lov Jehoava. Ahn get fi noa di persn gud ahn di kaina kwalitiz ih gat. Ih moa impoatant fi fain sohnbadi weh ga wahn schrang rilayshanship wid Jehoava dan fi fain sohnbadi weh ga wahn hai ejukayshan, lata moni, er wahn pozishan eena di kamyooniti. Memba dat da di en a di day, yu jos di help dehn. Da dehn haftu disaid if dehn wahn marid eech ada.—Gal. 6:5.
WEN YU WAAHN STAAT DAYT SOHNBADI
12. If yu laik sohnbadi ahn waahn dayt ahn, weh yu ku du neks?
12 If yu don disaid hoo yu waahn dayt, den weh yu fi du neks? e Yu ku mek planz fi taak tu ahn eena wahn poblik plays er pahn di foan. Wen yu taak tu di persn, yu need fi mek it klyaa dat yu laik ahn, an yu waahn geh fi noa ahn beta. (1 Kor. 14:9) If di persn need taim fi tink bowt it, den mek shoar yu giv ahn di taim weh ih need. (Prov. 15:28) If di persn disaid dat ih noh waahn ga wahn rilayshanship wid yu, rispek ih disizhan.
13. Weh yoo fi du if sohnbadi tel yu ih waahn dayt yu? (Koloashanz 4:6)
13 Wat if sohnbadi tel yu dat ih waahn dayt yu? Weh yu shuda du? Bee kain tu di persn ahn shoa ahn rispek, bikaaz ih mi tek wahn lata korij fi tel yu how ih feel. (Reed Koloashanz 4:6.) If yu need taim fi tink bowt weh ih tel yu ahn fi mek wahn disizhan, den tel ahn dat yu need taim. Bot chrai yu bes fi giv ahn wahn ansa az soon az pasabl. (Prov. 13:12) Bot if yu noh inchrestid eena ahn, den bee klayr ahn tel ahn, bot bee kain. Mek wi luk pahn wahn egzampl fahn wahn brada da Austria weh naym Hans. Dis da weh hihn mi du wen wahn sista kohn tel ahn how shee mi feel. Hihn seh: “Ah mi mek it klyaa tu ahn wat da-mi mai disizhan, bot Ah mi tel ahn eena wahn kain way. Ah neva wayt tu lang needa. Ah tel ahn how Ah mi feel rait away soh dat shee noh tink ih mait stil ga wahn chaans fi mek wi dayt eena di fyoocha. An Ah mi haftu bee kyaaful aftawodz soh dat Ah noh seh er du eniting weh ku mek ih feel laik Ah wuda chaynj mi main.” Wat if yu laik di persn ahn waahn geh fi noa ahn beta? If dat da di kays, den tel ahn. Unu wahn need fi taak bowt di tingz unu wahn du er noh du wail unu di geh fi noa eech ada beta. Noh bee sopraiz if yoo ahn di ada persn noh si tingz di saym way. Dat ku bee bikaaz unu kolcha er how unu groa op difrent.
HOW WEE KU SOPOAT SINGL BRADAZ AHN SISTAZ?
14. How wi ku sopoat bradaz ahn sistaz weh singl?
14 How wi ku sopoat bradaz ahn sistaz weh waahn geh marid? Wi need fi bee kyaaful wid weh wi seh. (Ifee. 4:29) Wi ku aks wiself kweschanz laik: ‘Ai teez singl peepl weh waahn geh marid? Wen Ai si wahn singl brada ahn sista di taak tu eech ada, Ai staat tink dat dehn laik wan anda?ʼ (1 Tim. 5:13) Wi noh waahn du eniting weh wuda mek wahn singl persn feel laik ih need fi geh marid er ih di mis owt pahn sohnting. Hans, di brada weh wi menshan erliya, seh: “Som a di bradaz wuda aks mi, ‘How komz yu noh marid yet? Yu noa yu di geh oal, rait?ʼ Tingz laik dat mek wahn singl persn feel bad bowt ihself ahn laik ih reeli need fi geh marid.” Soh insted, weh wi waahn du da seh tingz weh wahn inkorij dehn.—1 Tes. 5:11.
15. (a) Wai ih impoatant fi tink bowt Roamanz 15:2 if yu tink too peepl wuda bee gud tugeda? (Koment pahn di picha.) (b) Weh impoatant lesnz yu laan fahn di veedyo?
15 Wat if yu tink wahn brada ahn sista wuda mek wahn kyoot kopl ahn bee gud tugeda? Di Baibl tel wi fi mek wi aalwayz tink bowt how di tingz wi seh ahn du ku afek ada peepl. (Reed Roamanz 15:2.) Wahn lata singl bradaz ahn sistaz wuda prifaa fi mek yu noh set dehn op wid sohnbadi, ahn wee fi rispek how dehn feel. (2 Tes. 3:11) Bot dehn ga ada peepl weh wuda laik yu fi help dehn, bot yu shudn du dis anles dehn aks yu fi help. f (Prov. 3:27) An eevn doa som peepl wuda bee wilin fi aksep help, dehn noh waahn nobadi inchrojoos dehn tu di persn. Wahn singl sista fahn Germany weh naym Lydia seh: “Yu ku invait dehn lang wid ada frenz soh dat dehn ku deh eena wahn big groop. Dis wahn help dehn fi mek dehn meet eech ada pan dehn oan ahn yu lef di res op tu dehn.”
Wahn big groop ku mek it eeziya fi too singl peepl meet (Paragraaf 15)
16. If yu singl, weh yu need fi memba?
16 Ih noh mata if yu singl er marid, yu ku stil bee hapi! (Ps. 128:1) If yu wuda waahn geh marid bot yu kyaahn fain sohnbadi weh ku bee wahn gud hozban er waif fi yu, kantinyu du aal weh yu ku du fi Jehoava. Wahn sista fahn Macao weh naym Sin Yi seh: “If yu kompyaa yu laif eena Paradais az wahn marid persn tu yu laif rait now az wahn singl persn, yu wahn riyalaiz dat di taim wen yu singl way shaata dan di taim wen yu marid. Soh chrezha yu singl laif ahn mek di bes owta it.” Wat if yu fain sohnbadi weh ku bee wahn gud hozban er waif fi yu? If dat da di kays, den di neks aatikl ku help yu fi mek waiz disizhanz wail yu di dayt.
SANG 137 Wi Faytful Sista Dehn
a If yu need help fi noa if yu redi fi geh marid, reed di aatikl weh naym “Dating—Part 1: Am I Ready to Date?” pahn jw.org.
b WEH IH MEEN? Eena dis aatikl ahn di neks wan, wen wi taak bowt daytin, wi di taak bowt di taim wen wahn man ahn wahn laydi di geh fi noa eech ada beta soh dat dehn ku noa weda er nat dehn ku geh marid. Sohntaim peepl wuda seh dehn di koatn, dehn di geh fi noa wan anada, dehn di goh owt, er dehn da bwaifren ahn gyalfren. Wahn kopl staat dayt wen di man ahn di laydi mek it klyaa dat dehn laik eech ada, ahn dehn kantinyu geh fi noa eech ada til wen dehn eeda disaid dehn wahn geh marid er en di rilayshanship.
c Som a di naym dehn chaynj.
d Proverbs 13:16: “Wahn waiz persn tink bifoa ih du eniting, bot wahn foolish persn shoa ih foolishnis.”
e Eena sohn kolcha, da yoozhwali wahn brada mek di fers moov fi staat dayt di sista. Bot notn rang if wahn sista mek di fers moov ahn goh taak tu di brada. (Root 3:1-13) Moa infamayshan deh eena di aatikl weh naym “Young People Ask . . . How Can I Tell Him How I Feel?” eena di Awake! fahn Aktoaba 22, 2004.
f Wach di veedyo weh naym Jehoava Faytful Servants Weh Di Win di Fait fi di Fayt—Singl Bradaz ahn Sistaz pahn jw.org.
