1. Weh wi mi laan da di 2023 anwal meetin?

 DA DI 2023 anwal meetin, a wi mi geh sohn nyoo andastandin bowt sohn Baibl teechin ahn wi mi geh sohn eksaitin anonksment bowt wi minischri. Fi egzampl, wi laan dat afta Babilan di Grayt geh dischrai, sohn peepl mait stil ga di chaans fi tek said wid Jehoava peepl. Ahn wi mi laan dat staatin fahn Novemba 2023, poblishaz noh need fi rikaad aal weh dehn du eena di minischri. Yu tink dat meenz dat wi preechin werk noh az impoatant ahn seeryos az bifoa? No!

2. Wai di preechin werk di geh eevn moa impoatant az wi geh kloasa tu di en? (Maak 13:10)

² Wid evri day weh paas, wi preechin werk geh eevn moa impoatant, bikaaz wi noh ga lata taim lef bifoa di en kohn. Mek wi luk pahn weh Jeezas mi seh bowt wi preechin werk ahn weh wahn hapm eena di laas dayz. (Reed Maak 13:10.) Eena di buk a Machyu, Jeezas mi seh dat di gud nyooz mi wahn geh preech aal oava di ert ahn den “di en” wahn kohn. (Mach. 24:14) Dis skripcha di taak bowt how Saytan sistem wahn geh dischrai, ahn Jehoava don set ‘di day ahn di owaʼ fi mek dat hapm. (Mach. 24:36; 25:13; Aks 1:7) Evri day weh paas bring wi kloasa ahn kloasa tu da taim. (Roam. 13:11) Wail wi di wayt, wi need fi kantinyu preech til wen di en kohn.

3. Wai wi goh preech?

 ³ Mek wi tink bowt dis kweschan: Wai wi goh preech? Wel, wi goh preech bikaaz a lov—fi di gud nyooz, fi peepl, ahn moas impoatant, fi Jehoava an ih naym. Mek wi luk pahn dehnya wan bai wan.

WI PREECH BIKAAZ WI LOV DI GUD NYOOZ

4. Wen wi hyaa gud nyooz, weh wi du?

⁴ Tink bowt di laas taim yu mi geh sohn gud nyooz. Maybi wahn baybi baan eena di famili, er maybi yu mi geh wahn jab weh yu mi reeli need. How dat mi mek yu feel? Fi shoar yu mi soh eksaitid dat yu mi waahn shayr da gud nyooz wid aala yu famili ahn frenz. Wen yu mi hyaa di gud nyooz bowt Gaad Kingdom, weh da di bes nyooz eva, yoo mi feel di saym way?

5. How yu mi feel wen yu fers laan di chroot? (Koment pahn di picha dehn.)

⁵ How yu mi feel wen yu fers laan di chroot fahn di Baibl? Fi egzampl, yu mi fain owt dat yu hevnli Faada lov yu ahn dat ih waahn mek yu bee paat a ih famili weh wership ahn. Yu mi laan dat ih pramis fi en sofarin ahn dat yu ga di hoap fi si yu famili ahn frenz weh ded kohn bak tu laif eena di nyoo werl. (Maak 10:​29, 30; Jan 5:​28, 29; Roam. 8:​38, 39; Rev. 21:​3, 4) Dehndeh teechinz mi reeli toch yu haat, noh chroo? (Look 24:32) Bikaaz yu mi lov weh yu mi laan, yu kudn kip it tu yuself ahn yu mi waahn evribadi noa bowt it!—Kompyaa Jeremiah 20:9.

6. Weh yoo laan fahn Ernest ahn Rose ekspeeryens?

⁶ Mek wi luk pahn Brada Ernest ekspeeryens. b Hihn mi bowt ten yaaz oal wen ih pa mi ded. Ernest seh, “Ah yoostu wanda if mi pa gaahn da hevn, er if mi pa mi wahn stay ded fareva. Ah  yoostu jelos di ada pikni weh mi stil ga dehn pa.” Ernest wuda aalwayz goh da ih pa grayv ahn pray tu Gaad ahn seh, “Pleez, Gaad, Ah waahn noa wehpaat mi pa deh.” Bowt 17 yaaz afta Ernest pa ded, sohnbadi aafa ahn wahn Baibl stodi, an ih mi aksep it. Ih mi soh hapi fi laan dat peepl weh ded noh noa notn ahn da laik dehn deh eena wahn deep sleep. Ih mi aalso laan dat di Baibl pramis dehn wahn ga wahn rezorekshan eena di fyoocha. (Eccl. 9:​5, 10; Aks 24:15) Ernest mi fainali fain di ansaz tu kweschanz weh ih mi-di wanda bowt fi wahn lang taim. Hihn mi soh hapi fi laan dehnya Baibl teechinz. Ih waif, Rose, mi staat tu stodi tu, ahn di too a dehn mi lov weh dehn mi-di laan. Dehn mi geh baptaiz eena 1978, ahn dehn mi shayr dehnya wandaful Baibl teechinz wid dehn famili, wid dehn frenz, ahn wid enibadi weh wilin fi lisn tu dehn. Sayka dat, Ernest ahn Rose mi help moa dan 70 peepl fi kom eena di chroot.

7. Wen wi lov weh wi laan fahn di Baibl, weh dat moov wi fi du? (Look 6:45)

⁷ Wen wi lov weh wi laan fahn di Baibl, wi jos kyaahn kip it tu wiself. Ih moov wi fi tel adaz. (Reed Look 6:45.) Wi feel jos laik Jeezas disaipl dehn eena di fers senchri, weh seh: “Wi kyaahn stap taak bowt di tingz wi mi si ahn hyaa.” (Aks 4:20) Wi lov di chroot soh moch dat wi waahn shayr it wid az moch peepl az wi kud.

WI PREECH BIKAAZ WI LOV PEEPL

8. Weh mek wi waahn shayr di gud nyooz wid adaz? (Si di baks “ Lov Peepl ahn Teech Dehn fi Fala Jeezas.”) (Koment pahn di picha.)

⁸ Laik Jehoava ahn Jeezas, wee lov peepl tu. (Prov. 8:31; Jan 3:16) Wi haat goh owt tu peepl weh “[noh] noa Gaad” ahn peepl “widowt hoap.” (Ifee. 2:12) Peepl fays wahn lata prablemz eena laif weh mek dehn feel laik dehn deh eena wahn deep deep hoal. Di gud nyooz da laik wahn roap weh ku pul dehn owta da hoal. Wi du wi bes fi shayr di gud nyooz wid dehn bikaaz wi lov peepl ahn wi haat goh owt tu dehn. Dis preshos mesij wahn gi peepl di hoap weh wahn help dehn fi liv wahn hapi laif rait now ahn gi dehn di apachooniti fi injai “di reel laif” fareva eena di nyoo werl.—1 Tim. 6:19.

9. Weh wi waan peepl bowt, ahn wai wi waan dehn? (Ezekiel 33:​7, 8)

⁹ Lov fi peepl moov wi fi waan dehn dat di en a dis wikid werl soon kom.  (Reed Ezekiel 33:​7, 8.) c Wi feel sari fi wi naybaz ahn famili membaz weh noh aksep di chroot. Dehn di goh bowt dehn laif widowt noa weh wahn soon hapm. Wi soon gwehn chroo wahn “grayt chribyulayshan . . . weh nobadi eva si sins di werl bigin dong tu tudeh, ahn wan laik weh nobadi wahn eva si agen.” (Mach. 24:21) Wi need fi mek dehn noa weh wahn hapm joorin di grayt chribyulayshan. Fers, faals rilijan wahn geh dischrai, ahn den Jehoava wahn dischrai dis wikid sistem da Armagedon. (Rev. 16:​14, 16; 17:​16, 17; 19:​11, 19, 20) Wi pray dat wahn lata peepl lisn tu dis waanin ahn staat wership Jehoava wid wi. Bot weh wahn hapm tu peepl weh noh waahn lisn rait now, eevn wi famili membaz weh wi lov?

10. Wai ih impoatant fi mek wi kip aan di waan peepl?

¹⁰ Laik weh wi mi taak bowt eena di laas aatikl, wen peepl si Babilan di Grayt geh dischrai, som a dehn mait ga wahn chaynj a haat. Ih mait bee Jehoava wil fi sayv dehndeh peepl weh put fayt eena ahn. Soh tink bowt dis: Weh wi tel peepl now mait gi dehn sohnting fi tink bowt layta. (Kompyaa Ezekiel 33:33.) Dat da wai ih impoatant fi mek wi kantinyu waan peepl. Maybi wen da taim kom, dehn wahn memba how wi mi waan dehn, ahn dis mait help dehn fi disaid fi staat serv Jehoava lang wid wi bifoa ih tu layt. Di jayla da Filipai mi chaynj di way ih tink onli afta “wahn big ertkwayk hapm.” Sohn peepl mait bee jos laik di jayla ahn disaid fi chaynji onli afta Babilan di Grayt get dischrai.—Aks 16:​25-34.

WI PREECH BIKAAZ WI LOV JEHOAVA AN IH NAYM

11. How wi gi Jehoava gloari an aana? (Revilayshan 4:11) (Koment pahn di picha dehn.)

¹¹ Di moas impoatant reezn wai wi preech da bikaaz wi lov Jehoava ahn wi waahn kip ih naym hoali. Wi si wi preechin werk az wahn way fi prayz di Gaad weh wi lov. (Reed Revilayshan 4:11.) Wi agree dat Jehoava dizerv aala di gloari an aana fahn di peepl weh wership ahn. Wi giv ahn di gloari ahn di aana wen wi help adaz noa dat hihn “mek evriting” ahn dat sayka hihn wee ga laif. Ahn wi du  wi bes fi yooz wi taim, enerji, ahn di tingz weh wi oan fi preech tu az moch peepl az wi kud. (Mach. 6:33; Look 13:24; Kol. 3:23) In ada werdz, wi lov fi taak bowt di Gaad weh wi lov, ahn wi feel eega fi tel adaz bowt ih naym ahn weh ih meenz. Wai?

12. How di preechin werk help wi fi kip Jehoava naym hoali?

¹² Wi lov fi Jehoava moov wi fi kip ih naym hoali. (Mach. 6:9) Wi waahn du evriting weh wi kud fi klyaa Jehoava naym fahn aala di wikid lai weh Saytan seh bowt ahn. (Jen. 3:​1-5; Joab 2:4; Jan 8:44) Wen wi preech, wi eega fi stan op fi Jehoava ahn mek peepl noa di chroot bowt ahn. Wi waahn evribadi noa dat Jehoava da wahn Gaad a lov. Hihn da wahn roola weh raichos ahn fyaa, an ih Kingdom wahn soon en aal sofarin ahn bring pees ahn hapinis fi evribadi weh liv pahn ert. (Ps. 37:​10, 11, 29; 1 Jan 4:8) Wen wi tel peepl dehnya ting, wi di help difen Jehoava naym ahn kip it hoali. Ahn wi feel hapi dat wi di du weh wi sopoas tu du az Jehoava Witnisiz. Wai wi seh dat?

13. Wai wi prowd fi ga di naym Jehoava Witnisiz? (Isaiah 43:​10-12)

¹³ Jehoava chooz wee fi bee ih “witnisiz.” (Reed Isaiah 43:​10-12.) d Wahn leta fahn di Govanin Badi weh mi kom owt sohn yaaz agoa seh: “Di graytis aana weh wi kuda eva gat da fi bee wan a Jehoava  Witnisiz.” e Wai wi feel da way? Mek wi luk pahn wahn iloschrayshan. If dehn akyooz yu dat yu du sohnting rang ahn yu need sohnbadi fi taak op fi yu da koat, weh kaina persn yu wuda pik? Yu wuda pik sohnbadi weh yu noa ahn weh yu chros, sohnbadi weh ga wahn gud repyutayshan soh dat adaz wuda chros weh ih seh. Soh wen Jehoava chooz wee fi bee fi hihn Witnisiz, ih shoa dat Jehoava noa wi gud ahn dat ih chros wi fi tel adaz dat hihn da di onli chroo Gaad. Da wahn aana fi mek wi bee wan a fi hihn Witnisiz. Eni chaans weh wi get, wi waahn tel adaz bowt ih naym ahn klayr op eni lai weh peepl seh bowt ahn. Wen wi du dat, wi liv op tu wi naym ahn wi shoa dat wi prowd fi ga di naym Jehoava Witnisiz!—Ps. 83:18; Roam. 10:​13-15.

WI WAHN KANTINYU PREECH TIL DI EN KOHN

14. Weh eksaitin tingz mait soon hapm eena di fyoocha?

¹⁴ Wi eksaitid bowt weh wahn soon hapm eena di fyoocha! Wid Jehoava help, wi hoap fi si wahn lat moa peepl staat serv Jehoava bifoa di grayt chribyulayshan staat. An ih eksaitin fi noa dat eevn joorin di grayt chribyulayshan, weh wahn bee di haadis taim eena aal hyooman hischri, wi mait stil si sohn moa peepl lef Saytan werl ahn jain wi fi serv Jehoava!—Aks 13:48.

15-16. Weh wi wahn kip aan di du, ahn wen wi wahn stap?

¹⁵ Di preechin werk da wahn impoatant werk weh wi need fi du rait now. Wi ga di privilij fi preech di gud nyooz bowt Gaad Kingdom aal oava di ert, ahn dis werk wahn neva hapm agen. Bot wi need fi kip aan di waan peepl dat dis wikid sistem soon en. Wen di taim kohn fi mek Jehoava joj peepl, dehn wahn noa dat di mesij weh wi mi-di preech aal di wail kohn fahn Jehoava Gaad.—Ezek. 38:23.

¹⁶ Soh weh wi fi du now? Wi waahn kantinyu werk haad ahn du wi bes fi preech op tu di day wen Jehoava seh, “Di preechin werk don!” Lov fi di gud nyooz, fi peepl, ahn moas impoatant, fi Jehoava an ih naym wahn moov wi fi du dis.