1, 2. (a) Wat da di moas preshos ting weh yu gat eena yu laif? (b) Wat da sohn Baibl chroot weh wi lov, ahn wai? (Koment pahn di picha dehn da di biginin a dis aatikl.)

WAT da di moas preshos ting weh yu gat eena yu laif? Yu wuda bee wilin fi ekschaynj it fi sohnting weh ga les valyu? Fi Jehoava servants, ih eezi fi ansa dehndeh kweschan. Di moas preshos ting weh wi gat da wi rilayshanship wid Jehoava, ahn wi wudn giv it op fi notn els. Ahn wi lov di chroot weh wi fain eena di Baibl, kaaz ih ku help wi fi bee Jehoava fren.—Kol. 1:9, 10.

² Jos tink bowt aal weh Jehoava teech wi eena fi hihn Werd, di Baibl! Ih teech wi weh fi hihn naym meenz an ih tel wi bowt fi hihn wandaful kwalitiz. Ih tel wi dat ih lov wi soh moch dat ih mi sen ih Son, Jeezas, fi giv ih laif fi wi. Jehoava teech wi bowt fi hihn Kingdom. Ih gi wi wahn hoap fi di fyoocha, weda eena hevn fi di anointid, er eena Paradais pahn ert fi di “ada sheep.” (Jan 10:16, NW) Ih teech wi how fi liv wi laif eena di bes way pasabl. Dehnya chroot fahn di Baibl preshos tu wi bikaaz dehn help wi fi jraa kloas tu wi Kriyayta ahn dehn gi wi laif meenin.

3. Jehoava eva aks wi fi bai di chroot wid moni?

 ³ Jehoava da wahn jenaros Gaad. Hihn soh jenaros dat ih mi eevn giv op ih oan Son fi wi. Hihn noh hoal bak notn fahn enibadi hoo di saach fi di chroot. Fi shoar, Gaad wuda neva aks wi fi bai di chroot wid moni. Az a mata a fak, wen wahn man weh mi naym Saiman mi aafa fi pay Peeta fi di atariti fi gi peepl hoali spirit, Peeta mi haftu karek ih tinkin. Ih mi tel ahn: “Yu silva wahn geh dischrai lang wid yu, bikaaz yu mi tink yu ku bai di free gif fahn Gaad wid moni.” (Aks 8:18-20, NW) Soh den, weh ih meen wen di Baibl seh: “Bai chroot”?

4. Weh wi wahn laan bowt di chroot eena dis aatikl?

⁴ Reed Proverbs 23:23. * Wi kyaahn fain di chroot eena Gaad Werd if wi noh werk far it. Wi haftu bee wilin fi giv op ada tingz fi get it. Fi “bai chroot” meenz fi laan it, ahn fi “sel” di chroot meenz fi looz it. Wans wi “bai” it, wi haftu bee kyaaful dat wi noh “sel” it. Soh, how wi ku “bai” di chroot? Ahn humoch ih kaas? Wen wi ansa dehnya kweschan, wi wahn apreeshiayt di chroot moa, ahn wi wahn mek op wi main fi neva “sel” it. Wi wahn si dat di chroot fahn Jehoava wert moa dan eniting els.

5, 6. (a) How wi ku bai chroot widowt moni? Yooz di egzampl eena di paragraaf. (b) How di chroot benifit wi?

⁵ Jos bikaaz sohnting free noh meenz wi noh pay notn far it. Da Proverbs 23:23, di Heebroo werd weh chranslayt az “bai” ku aalso meen “gayn.” Di too werd dehn gi di aidyaa dat yu haftu werk er ekschaynj sohnting a valyu far it. Tink bowt it laik dis: Mek wi seh sohnbadi da maakit di aafa “Free Banaana.” Wee ku ekspek dehn banaana fi jos shoa op pahn wi taybl? Af koars nat! Wee wuda haftu goh get dehn da maakit. Soh eevn doa di banaana dehn free, wi stil en op di pay wid wi taim, efoat, ahn maybi eevn gyas, fi get dehn. Jos laik dat, wi noh need moni fi bai chroot. Bot wi haftu mek di efoat fi get it.

⁶ Reed Isaiah 55:1-3. * Eena di buk a Isaiah, Jehoava help wi fi andastan weh ih meen fi “bai chroot.” Eena dehnya vers, Jehoava seh dat fi hihn werd da laik waata, milk, ahn wain. Di chroot fahn Gaad Werd rifresh wi, jos laik wen yu jrink sohn kool, kleen waata. Ahn jos laik how milk help pikni fi groa schranga, sayhn way, Baibl chroot help wi fi schrentn wi rilayshanship wid Jehoava. Bot how Jehoava werd dehn da laik wain? Di Baibl seh dat wain mek peepl hapi. (Ps. 104:15) Soh wen Jehoava tel ih peepl fi “bai wain,” ih di pramis wi dat if wi fala fi hihn teechinz wi wahn bee hapi. (Ps. 19:8) Dat da wahn byootiful way fi diskraib how wi benifit if wi laan di chroot fahn Gaad an aplai it eena wi laif! Di efoat weh ih tek fi laan an aplai di chroot da di prais weh wi pay. Soh mek wi diskos faiv tingz weh wi mait haftu giv op fi bai chroot.

7, 8. (a) Wai wi haftu spen taim fi bai chroot? (b) Humoch wahn yong styoodent mi wilin fi pay, ahn wat da-mi di rizolt?

⁷ Taim. Enibadi weh waahn bai chroot haftu spen taim fi get it. Ih tek taim fi lisn tu di Kingdom mesij, fi reed di Baibl ahn Baibl-bays poblikayshan, fi ga wahn persnal Baibl stodi, ahn fi pripyaa ahn goh da wi kangrigayshan meetin dehn. Wi haftu ‘mek yoos a evri chaans wi ga,ʼ eevn if dat meenz wi haftu tek taim fahn sohnting els. (Reed Ifeezhanz 5:15, 16.) Humoch taim ih tek fi andastan baysik Baibl chroot? Eech persn difrent, bot no limit noh deh pahn weh wi ku laan bowt Jehoava wizdom, ih wayz, ahn di tingz weh ih du. (Roam. 11:33) Di fos ishu a di Watch Tower mi seh dat di chroot da laik “wahn lee flowaz.” Den di aatikl mi seh: “Noh bee kantentid wid jos wan flowaz a chroot. If wan mi nof, onli wan mi wahn deh. Noh stap pik flowaz, aalwayz luk fi moa.” Soh wee ku aks wiself: ‘Humoch flowaz Ai gat eena mai bokay a chroot?ʼ Eevn if wi liv fareva, wi wahn aalwayz laan moa bowt Jehoava. Nowadayz, di moas impoatant ting da fi mek di bes yoos a wi taim soh dat wi ku bai az moch chroot az pasabl. Mek wi luk pahn wahn egzampl a sohnbadi weh mi saach fi di chroot.

⁸ Mariko, * wahn yong uman fahn Japan, mi moov tu New York City fi goh da skool. Wan day wahn painyaa sista mi preech tu ahn da ih hows. Eevn doa Mariko mi ga ih oan rilijan, ih mi staat stodi di Baibl wid di sista. Wen shee mi staat tu laan di chroot, ih mi lov it soh moch dat ih mi aks di painyaa sista fi stodi wid ahn too taim fi di week. Eevn doa Mariko mi bizi wid skool an ih mi-di werk paat-taim, ih mi staat goh da meetin rait away. Ih mi spen les taim pahn soashal aktiviti soh dat ih kuda mi ga moa taim fi laan bowt Jehoava. Mariko mi mek spirichwal proagres kwik-wan bikaaz ih mi mek dehn sakrifais. Eena les dan wahn yaa, ih mi geh baptaiz. Siks monts afta dat, eena 2006, ih mi staat tu painyaa, an ih stil di painyaa tudeh.

9, 10. (a) How di way wi luk pahn mateeryal tingz chaynj wans wi laan di chroot? (b) Weh wahn yong uman mi giv op, ahn how shee feel bowt it?

⁹ Mateeryal tingz. Fi bai chroot, wi mait haftu giv op wi kareeya er wahn jab weh pay gud. Fi egzampl, Peeta an Anjru da-mi fishaman, bot wen Jeezas mi invait dehn fi bee fi hihn disaipl, dehn mi lef dehn bizniz ahn gaahn lang wid ahn. (Mach. 4:18-20) Dis noh meenz dat evribadi weh laan di chroot haftu lef dehn jab. Dehn stil haftu tek kayr a dehn famili rispansabiliti. (1 Tim. 5:8) Bot peepl hoo laan di chroot lata taim haftu chaynj di way dehn luk pahn mateeryal tingz ahn staat tu put di moa impoatant tingz fos eena dehn laif. Jeezas mi mek dat klyaa wen ih mi seh: “Yu noh fi put op yu richiz dong ya pahn dis ert, . . . Insteda du dat, sayv op richiz eena hevn fi unuself.” (Mach. 6:19, 20) Kansida di egzampl a wahn yong uman weh naym Maria.

¹⁰ Maria mi lov play golf fahn wen ih mi smaal. Shee mi kantinyu fi praktis wen ih mi-di goh da hai skool. Ih mi play soh gud dat ih mi en op di geh wahn skalaship fi goh da yooniversiti. Golf da-mi evriting tu shee, an fi shee goal da-mi fi mek wahn lata moni di play. Den Maria mi staat stodi di Baibl, an ih mi lov di chroot weh ih mi-di laan. Wen ih mi staat  tu aplai weh ih mi laan eena ih laif ih mi hapi. Shee mi seh: “Di moa Ah mi chaynj mi atichood ahn laifstail fi meet Baibl standadz, di hapiya Ah mi get.” Maria mi andastan dat ih wuda bee haad fi foakos pahn spirichwal tingz ahn moni sayhn taim. (Mach. 6:24) Soh shee mi disaid fi giv op ih goal fi geh rich ahn faymos di play golf. Dat da di prais weh shee mi pay fi di chroot. Bot, bikaaz shee mi bai chroot, ih di painyaa now an ih di injai weh shee seh da “di hapiyis laif, weh ful a perpos.”

11. Wen wi bai chroot, weh ku hapm tu wi rilayshanship wid som a wi famili ahn frenz?

¹¹ Famili ahn frenz. Wen wi chooz fi liv akaadn tu Baibl chroot, wi rilayshanship wid wi famili ahn frenz ku chaynj. How soh? Jeezas mi gi di reezn wen ih mi pray fi ih falowaz: ‘Mek yu werd dehn weh da di chroot mek dehn onli liv fi yoo wan, kaa fi yoo werd dehn da di chroot.ʼ (Jan 17:17) ‘Mek dehn onli liv fi yoo wanʼ ku aalso meen “mek dehn bee separayt.” Wen wi aksep di chroot, wi separayt wiself fahn di werl bikaaz wi fala wahn difrent standad fahn moas peepl. Peepl luk pahn wi difrent bikaaz wi bileef dehn chaynj. Wi liv bai di Baibl standad a rait ahn rang. Eevn doa wi noh chrai chaynj wi rilayshanship wid famili ahn frenz, sohntaim dehn noh waahn spen taim wid wi bikaaz a weh wi bileev. Bot dis da noh nyooz tu wee, bikaaz Jeezas mi seh: “Yu wos enimi dehn wahn bee fahn owta yu oan famili.” (Mach. 10:36) Ahn hihn mi pramis wi dat di riwaad wi get wen wi bai chroot wahn wot faar moa dan eni prais weh wi mait haftu pay!—Reed Maak 10:28-30.

12. Weh prais wahn Jooish man mi pay fi di chroot?

¹² Wahn Jooish biznizman weh naym Ayron seh dat fahn wen ih mi smaal ih mi bileev dat ih rang fi seh Gaad naym. Bot ih reeli mi waahn noa di chroot bowt Gaad. Wan day wahn Witnis mi shoa ahn dat if ih ad di vowel dehn tu di foa Heebroo letaz eena Gaad naym, ih ku seh it az “Jehoava.” Hihn mi eksaitid fi laan dis, soh ih mi gaahn da di sinagag fi tel di rabai dehn. Hihn mi tink dehn mi wahn bee hapi fi laan di chroot bowt Gaad naym, bot insteda dat, dehn mi spit pan ahn, ahn dehn mi chays ahn owt. Eevn ih famili mi ton gens ahn, bot hihn neva mek notn stap ahn fahn laan moa bowt Jehoava. Hihn da-mi wahn faytful Witnis a Jehoava fi di res a ih laif. Jos laik Ayron, wee haftu bee redi ahn wilin fi pay di prais fi di chroot, eevn if dat meenz som a wi famili ahn frenz mait ton dehn bak pahn wi.

13, 14. How wi chaynj wi tinkin ahn kandok fi bai chroot? Yooz di egzampl eena di paragraaf.

¹³ Doti tinkin ahn kandok. Fi aksep di chroot ahn liv akaadn tu Baibl standadz, wi haftu bee wilin fi chaynj di way wi tink ahn di way wi ak. Noatis weh di apasl Peeta mi seh bowt dehnya chaynjiz: “Obay Gaad bikaaz yoo da ih pikni. Noh goh bak goh liv dehn oal eevl way weh yu mi yoostu. Dehndeh taim yu neva noa no beta. Insteda dat, yu fi liv hoali eena evriting weh yu du.” (1 Peet. 1:14, 15) Lata peepl weh mi liv da Korint mi liv wahn doti, loos laifstail. Fi mek dehn kuda mi bai chroot, dehn mi haftu mek sohn big chaynjiz. Onli soh dehn kuda mi bee kleen eena Jehoava sait. (1 Kor. 6:9-11) Sayhn way soh, fi bai chroot tudeh, lata peepl haftu chaynj dehn laif fi geh rid a eni kaina bihayvya weh Jehoava noh laik. Peeta mi aalso rimain di Kristyan dehn eena fi hihn day: ‘Yu don spen inof taim bak den di du  dehn tingz weh peepl weh no noa Gaad du. Yu doz spen yu taim di goh da wail paati; yu jrink ahn geh jronk; yu liv wahn loos laif; yu ful a los; ahn yu doz du di moas disgostin ting, yu doz wership aidol.ʼ—1 Peet. 4:3.

¹⁴ Fi wahn lang taim, Devon ahn Jazmin yoostu bee jronkad. Eevn doa Devon da-mi wahn gud akongtant, ih kudn kip wahn jab bikaaz ih mi jrink tu moch. Jazmin mi ga wahn repyutayshan fi bee faita bad. Wan day wen Jazmin mi-di waak dong di road jronk, ih mi meet wahn mishineri kopl. Di mishineri dehn mi araynj fi wahn Baibl stodi, bot wen dehn mi reech Devon ahn Jazmin hows di neks week, di too a dehn mi jronk. Dehn neva ekspek di mishineri dehn fi kay bowt dehn inof fi akchwali kohn da dehn hows. Bot di neks taim, di sichuwayshan mi difrent. Rait fahn di staat, Jazmin ahn Devon mi eksaitid fi laan di chroot fahn di Baibl, ahn dehn mi kwik fi aplai weh dehn mi-di laan eena dehn laif. Eena jos chree monts, dehn mi stap jrink ahn dehn mi geh marid. Ada peepl mi si di chaynjiz weh dehn mi mek, ahn lata di peepl eena di vilij mi staat stodi di Baibl tu.

15. Wat ku bee wan a di haadis ting fi giv op fi di chroot, ahn wai?

¹⁵ Kostom ahn habit weh Gaad noh pleez wid. Som peepl mait fain it eezi fi stap praktis dehn ting weh Jehoava noh laik. Bot adaz noh mait fain it soh eezi. Dehn mait wori bowt how dehn famili, frenz, ahn peepl weh dehn werk wid wahn feel. Lata taim peepl ga schrang feelinz pahn sertn kostom, laik di way how dehn aana dehn ded relitiv dehn. (Deut. 14:1) Wi ku laan fahn di gud egzampl a peepl eena di paas weh mi ga di korij fi mek dehn chaynjiz fi pleez Jehoava. Mek wi luk pahn di egzampl a som a di Kristyanz weh mi liv da Efisos eena di fos senchri.

16. Weh som a di peepl weh mi liv da Efisos mi du fi bai chroot?

¹⁶ Majik da-mi wahn kaman praktis da Efisos. Weh di peepl hoo mi-di praktis majik mi du wen dehn mi laan di chroot? Di Baibl seh: “Som a dehn wan weh mi-di du oabya er blak majik bring dehn blak majik buk dehn ahn bon dehn op eena poblik. Wen dehn kalkyulayt humoch di buk dehn wot, ih wuda mi kom op tu bowt fifti towzn pees a silva. Soh di Werd a Gaad mi powaful ahn ih gaan owt evriway ahn moa ahn moa peepl bileev.” (Aks 19:19, 20) Di faytful Kristyan dehn mi wilin fi bon op dehn ekspensiv buk ahn Jehoava mi bles dehn far it.

17. (a) Weh wi mait haftu giv op fi geh di chroot? (b) Weh wi wahn diskos eena di neks aatikl?

¹⁷ Humoch yoo mi pay fi di chroot? Aala wi spen taim di luk fi “flowaz” fi ad tu wi spirichwal bokay a chroot. Som a wi pay fi di chroot wen wi giv op mateeryal tingz er wen wi rilayshanship wid famili ahn frenz chaynj. Lata wi haftu chaynj di way wi tink, di way wi ak, er wi kostom ahn habit weh noh gree wid Baibl standadz. Wateva wi haftu pay, wi noa fi shoar dat Baibl chroot wel wert di prais. Ih gi wi di moas preshos ting weh wi gat, wahn kloas rilayshanship wid Jehoava. Wen wi tink bowt aala di blesin dehn weh wi geh bikaaz wi noa di chroot, wi kyaahn eevn imajin wai enibadi wuda waahn “sel” it. How dat ku hapm, ahn how wee ku mek shoar dat wi neva mek soch a big mistayk? Wi wahn ansa dehnya kweschan eena di neks aatikl.