Pahn di nait bifoa Jeezas mi ded, ih mi kongsl ih apasl dehn noh fi goh afta wahn hai pozishan monks di disaipl dehn. Ih mi tel dehn: “Dehn king weh da noh Joo laik rool fi dehn peepl stif-wan, ahn dehn wan weh baas dehn op wid wahn hevi han stil ton rong ahn kaal dehnself di peepl dehn ‘frenʼ [er, “Benifakta,” NW]. Bot unu noh fi stan laik dat.”—Look 22:25, 26.

Hoo da-mi di Benifakta dehn weh Jeezas mi taak bowt? Eena dehn dayz, peepl yoostu rait er kaav impoatant peepl naym er ada infamayshan pahn moni, stoan, picha, er bildin. Dehn raitin shoa dat eena di Greek ahn Roaman kolcha dehn yoostu aana impoatant peepl wid di taitl Euergetes, er Benifakta. Dehn wuda aana dehn dis way bikaaz a sohn kaina poblik servis weh dehn mi du weh mi help lata peepl.

Lata king mi ga di taitl Benifakta. Fi egzampl, di Eejipshan roola dehn Ptolemy III Euergetes (bowt 247-222 B.C.E.) ahn Ptolemy VIII Euergetes II (bowt 147-117 B.C.E.). Roaman roola laik Joolyos Seeza (48-44 B.C.E.) an Agostos (31 B.C.E.–14 C.E.) mi ga da taitl tu. Ahn Herod di Grayt, hoo da-mi king a Judeeya, mi ga da taitl tu, praabli bikaaz ih mi bring een weet fahn wahn nada konchri wen ih oan peepl mi-di staav ahn bikaaz ih mi provaid kloaz fi di poa.

Akaadn tu Adolf Deissmann, wahn Baibl teecha fahn Germany, dis taitl mi kaman. Hihn mi seh: “Ih wudn bee haad fi fain eena di oal raitin dehn, eena jos wahn lee bit a taim, oava wahn honjrid taim [weh dehn yooz dis taitl].”

Soh den, weh Jeezas mi meen wen ih mi tel ih disaipl dehn: “Unu noh fi stan laik dat”? Yu tink Jeezas mi-di tel dehn noh fi kay bowt di peepl rong dehn? No, Jeezas mi-di tink moa bowt di reezn wai dehn peepl mi soh jenaros.

Eena Jeezas day, rich peepl yoostu sponsa entataynment, bil paak ahn templ, ahn sopoat adaz weh mi du simila tingz. Dehn wuda du aala dat fi mek ada peepl tink gud bowt dehn. Di onli reezn wai dehn mi soh jenaros da-mi fi mek peepl prayz dehn op, fi geh papyula, er fi mek peepl voat fi dehn. Wan Baibl refrens seh: “Eevn doa som a dehn mi jenaros fi di rait reezn, moas a di taim da palitiks mi deh bihain it.” Dat da wahn selfish atichood, ahn dat da egzakli weh Jeezas mi kongsl ih disaipl dehn fi avoid.

Sohn yaaz layta, di apasl Paal mi mek da sayhn point veri klyaa wen ih mi taak bowt di reezn wai wi giv. Hihn mi rait tu di Kristyan dehn da Korint: “Evribadi fi mek op dehn oan main az tu humoch dehn wahn giv. Dehn noh fi tink haad fi giv, er feel laik enibadi di presha dehn fi giv, kaa Gaad lov wen yu hapi fi giv.”—2 Kor. 9:7.