1, 2. (a) How Jeezas mi ansa wen Peeta mi tel ahn fi bee kain tu ihself? (Koment pahn di picha da di biginin a dis aatikl.) (b) Wai Jeezas mi ansa laik dat?

JEEZAS disaipl dehn kudn bileev weh dehn mi-di hyaa. Dehn mi tink dat Jeezas wuda mi set op bak di kingdom a Izrel, bot hihn mi-di tel dehn dat ih mi wahn soon haftu sofa ahn ded. Rait away Peeta mi tel ahn: “Bee kain tu yuself, Laad, dehn tingz noh wahn hapm tu yoo ataal.” Bot Jeezas mi tel ahn: “Get bihain mi, Saytan! Yu wahn stombl mi if Ah lisn tu yu, bikaaz yu noh di tink laik Gaad, yu di tink laik man.”—Mach. 16:21-23, NW; Aks 1:6.

² Wen ih mi seh dat, Jeezas mi shoa klyaa-wan dat di way how Jehoava tink difrent fahn di way how Saytan werl tink. (1 Jan 5:19) Peeta mi-di inkorij Jeezas fi bee selfish laik peepl eena dis werl. Bot Jeezas mi noa dat Jehoava tinkin mi difrent. Hihn mi noa dat Gaad mi waahn mek ih pripyaa ihself fi di sofarin ahn det weh ih mi wahn haftu fays. Wen Jeezas mi ansa Peeta dis way, ih mi mek it playn dat hihn mi chooz  fi tink laik Jehoava ahn noh laik dis werl.

3. Wai ih soh haad fi tink laik Jehoava ahn rijek di tinkin a dis werl?

³ How bowt wee? Wee tink laik Gaad, er wi tink laik di peepl dehn eena dis werl? Az Kristyanz, wi chrai haad fi du tingz eena wahn way weh pleez Jehoava. Bot how bowt di way wi tink? Wi werk haad fi tink laik Jehoava ahn si tingz di sayhn way hihn si dehn? Dat tek lata werk. Bot pahn di ada han, ih eezi fi tink laik di peepl dehn eena dis werl, bikaaz di spirit a dis werl deh aal rong wi. (Ifee. 2:2) Pahn tap a dat, di peepl dehn eena di werl inkorij wi fi bee selfish, an wi ku bee temtid fi lisn tu dehn. Soh ih ku bee haad fi tink laik Jehoava, bot ih soh eezi fi tink laik di peepl dehn eena dis werl.

4. (a) Weh ku hapm if wi alow di werl fi gaid wi tinkin? (b) How dis aatikl wahn help wi?

⁴ If wi mek di werl gaid wi tinkin, wi wahn bee moa selfish ahn wi dizaiya fi chooz fi wiself weh rait ahn weh rang wahn geh schranga. (Maak 7:21, 22) Dat da wai ih soh impoatant dat wi laan fi “tink laik Gaad,” ahn noh “tink laik man.” Dis aatikl wahn help wi fi du dat. Wi wahn kansida sohn reezn wai ih soh moch beta fi vyoo tingz di sayhn way laik Jehoava. Ahn wi wahn si how wi ku mek shoar wi noh stan laik dehn peepl eena dis werl. Di neks aatikl wahn help wi fi laan how Jehoava si tingz ahn how wee ku laan fi si dehn di sayhn way.

5. Wai som peepl noh waahn nobadi tel dehn weh fi tink?

⁵ Som peepl noh waahn nobadi tel dehn how er weh fi tink. Dehn seh: “Ai tink fi maiself.” Dehn praabli meen fi seh dat dehn mek fi dehn oan disizhanz ahn dat da dehn ga di rait fi du dat. Dehn noh waahn nobadi kanchroal dehn ner foas dehn fi bee laik evribadi els. *

6. (a) Weh freedom Jehoava gi wi? (b) Dis freedom ga limit?

⁶ Ih gud fi noa dat eevn if wi chaynj wi tinkin fi mach Jehoava tinkin, wi ku stil tink fi wiself er ga wi oan opinyan. 2 Korintyanz 3:17 seh: “Weh di spirit a Jehoava deh, da deh freedom deh.” (NW) Jehoava gi wi di freedom fi chooz weh kaina persn wi waahn bee. Wi ku chooz fi wiself weh wi laik ahn weh wi noh laik, ahn wi ku chooz di tingz weh wi fain inchrestin. Jehoava mek wi fi injai da kaina freedom. Bot wi freedom ga wahn limit. (Reed 1 Peeta 2:16.) Wen wi haftu disaid if sohnting rait er rang, Jehoava waahn mek wi yooz fi hihn Werd az wahn gaid. Weh yoo tink? Dat tu schrik, er da fi wi oan gud?

7, 8. Di way Jehoava si tingz tu schrik fi wi? Yooz di egzampl eena di paragraaf.

⁷ Tink bowt dis egzampl: Payrents aalwayz chrai teech dehn pikni akaadn tu gud standadz. Dehn mait teech dehn fi bee aanis, fi werk haad, ahn fi kay bowt ada peepl. Dat noh tu schrik. Raada, dehn payrents di chrai teech dehn pikni fi ga sokses eena laif. Wans di pikni dehn groa op ahn moov owt pahn dehn oan, dehn free fi mek dehn oan disizhanz. If dehn disaid fi liv akaadn tu weh dehn payrents mi teech dehn, dehn  wahn praabli mek beta disizhanz. Dehn wahn avoid wahn lata prablemz ahn woriz, ahn dehn noh wahn ga no rigrets.

⁸ Laik wahn gud payrent, Jehoava waahn ih pikni dehn liv di bes laif pasabl. (Isa. 48:17, 18) Soh hihn gi dehn Baibl prinsiplz fi help dehn liv wahn kleen laif ahn fi chreet ada peepl di rait way. Ih invait wi fi laan fi si tingz di way hihn si dehn ahn fi liv akaadn tu fi hihn standadz. Dat noh tu schrik fi wi. Raada, ih help wi tink bowt tingz di rait way. (Ps. 92:5; Prov. 2:1-5; Isa. 55:9) Ih help wi fi mek gud disizhanz weh wahn mek wi hapi. Ahn wi wahn ku stil bee wiself an injai di freedom weh Jehoava gi wi. (Ps. 1:2, 3) Wi shuda aalwayz waahn tink laik Jehoava, bikaaz fi hihn way a tinkin gud fi wee!

9, 10. How wi noa dat Jehoava way a tinkin beta dan di tinkin a dis werl?

⁹ Wahn nada reezn wai Jehoava peepl waahn laan fi tink laik hihn da bikaaz fi hihn way a tinkin soh moch beta dan di tinkin a dis werl. Di werl aafa advais pahn how fi liv rait, ga wahn hapi famili, geh wahn gud jab, ahn wahn lata ada tingz eena laif. Bot moas a it noh gree wid Jehoava tinkin. Fi egzampl, di werl inkorij peepl fi put dehnself heda evribadi els. Dehn luk pahn sekshwal imoraliti laik if notn noh rang wid dat. Peepl separayt ahn divoas widowt no gud reezn ahn sohntaim dehn tink dat wahn mek dehn hapiya. Da kaina advais noh gree wid weh di Baibl seh. Bot yu tink dat tudeh ih mek moa sens fi fala di werl advais insteda di Baibl advais?

¹⁰ Jeezas mi seh: “Dehn wan weh fala Gaad wizdom wahn proov fi bee rait eena di langa ron.” (Mach. 11:19) Eevn doa di werl mek wahn lata proagres eena teknalaji, dehn stilyet kyaahn fiks aala wi prablemz. Wi stil ga waar, prejudis, ahn kraim. Pahn tap a dat, di werl aksep an eevn promoat di aidyaa dat notn rang wid sekshwal imoraliti. Bot lata peepl noa dat dehnya ting di mek famili prablemz, helt prablemz, an ada prablemz geh wos. Pahn di ada han, Kristyanz weh aksep Gaad standadz di injai beta famili laif, helt benifits bikaaz dehn liv wahn kleen laif, ahn dehn ga pees monks aala dehn bradaz ahn sistaz rong di werl. (Isa. 2:4; Aks 10:34, 35; 1 Kor. 6:9-11) Aala dat proov dat Jehoava way a tinkin beta dan di werl tinkin!

11. Hoo mi gaid Moaziz tinkin, ahn wat da-mi di rizolt?

¹¹ Jehoava faytful servants eena Baibl taimz mi noa dat Jehoava tinkin da di bes. Fi egzampl, eevn doa ‘di Eejipshan dehn mi teech Moaziz evriting weh dehn mi noa,ʼ hihn mi noa dat chroo chroo wizdom onli kohn fahn Gaad. (Aks 7:22; Ps. 90:12) Hihn mi bayg Jehoava: “Teech mi yu wayz.” (Ex. 33:13) Bikaaz Moaziz mi alow Jehoava fi gaid ih tinkin, Jehoava mi yooz ahn fi du amayzin tingz. Noh onli dat, Jehoava mi aana Moaziz wen Ih mi menshan ih faytful egzampl eena di Baibl.—Heeb. 11:24-27.

12. Pahn wat Paal mi bays fi hihn disizhan dehn?

¹² Di apasl Paal da-mi wahn wel ejukaytid man. Hihn mi noa fi taak at lees too langwij. (Aks 5:34; 21:37, 39; 22:2, 3) Bot enitaim ih mi haftu disaid weda sertn tingz mi rait er rang, hihn mi rijek di wizdom a di werl. Hihn aalwayz mi bays ih disizhan dehn pahn di Skripchaz. (Reed Aks 17:2, 3; 1 Korintyanz  2:6, 7, 13.) Sayka dat, Paal mi ga sokses eena ih minischri an ih mi luk faawod tu wahn evalastin riwaad.—2 Tim. 4:8.

13. Hoo rispansabl fi chaynj di way wi tink soh dat wi ku si tingz Jehoava way?

¹³ Fi shoar Jehoava way a tinkin faar beta dan di wizdom a dis werl. Wen wi liv akaadn tu fi hihn standadz, wi wahn bee hapi hapi ahn wi wahn ga sokses eena laif. Bot Jehoava noh foas wi fi tink laik hihn. Di faytful ahn diskreet slayv ahn di eldaz noh kanchroal wi tinkin needa. (Mach. 24:45; 2 Kor. 1:24) Raada, eech wan a wi haftu disaid fi wiself if wi wahn chaynj di way wi tink fi gree wid Jehoava tinkin. How wi ku du dat?

14, 15. (a) Weh wi haftu meditayt pahn fi mek wi tinkin gree wid Jehoava wan? (b) Wai wi kyaahn alow dis werl tinkin fi get eena wi main? Yooz di egzampl eena di paragraaf.

¹⁴ Eena Roamanz 12:2 wi reed: “Unu mosn stan laik dehn peepl eena dis werl ataal. Noh du weh dehn du. Insteda dat, unu mos mek Gaad chaynj di way unu tink soh dat evriting weh unu du wahn chaynj. Den dat wahn mek unu noa weh Gaad waahn, weh gud, ahn weh wahn pleez hihn, ahn yu wahn noa egzakli how yu shuda liv.” Dis meenz dat noh mata wat mi-di gaid wi tinkin bifoa wi mi laan di chroot, wi ku laan fi tink moa laik Jehoava. Eevn doa wi mi laan fi tink bays pahn weh wi mi inherit fahn wi payrents er weh wi ekspeeryens eena di paas, wi main ku stil kantinyu chaynj. Ahn wi tinkin wahn chaynj bays pahn weh wi chooz fi put eena wi main. Soh if wi aalwayz di meditayt pahn Jehoava tinkin, wi ku proov tu wiself dat fi hihn way a tinkin rait. Den wi wahn ga di dizaiya fi tink laik hihn.

¹⁵ Bot, fi mek wi alow Gaad fi chaynj di way wi tink, wi kyaahn “stan laik dehn peepl eena dis werl ataal.” Dat meenz wi haftu stap reed, wach, er lisn tu eniting weh promoat wahn way a tinkin weh goh gens Jehoava tinkin. Mek wi yooz food az wahn egzampl fi shoa dat dis veri impoatant. If sohnbadi disaid dat ih waahn bee moa helti, ih mait disaid fi eet onli helti food. Bot dat noh wahn help ahn if ih stil eet food weh spail lang wid di helti food. Sayhn way soh, aala di werk weh wi du fi chaynj wi tinkin fi mach Jehoava wan noh wahn du wi no gud if wi alow di werl tinkin fi korop wi main.

16. Weh wi haftu protek wiself fram?

¹⁶ Wi kuda eva kompleetli avoid di werl tinkin? Af koars nat! Wi wahn aalwayz ekspoaz tu som a di tinkin a dis werl. (1 Kor. 5:9, 10) Eevn wen wi goh owt goh preech, wi hyaa peepl di taak bowt dehn faals bileef dehn. Bot jos bikaaz wi kyaahn avoid dis werl tinkin, noh meenz wi haftu kip di tink bowt it er aksep it. Wi haftu bee laik Jeezas ahn put da kaina tinkin owta wi main rait away, bikaaz da kaina tinkin kohn fahn Saytan. Ahn wan way wi ku protek wiself da fi mek shoar wi noh ekspoaz wiself tu dis werl tinkin moa dan wi haftu.—Reed Proverbs 4:23. *

17. Wat da sohn wayz wi ku protek wiself fahn dis werl way a tinkin?

¹⁷ Fi egzampl, wi haftu bee kyaaful wen wi di pik wi kloas frenz. Di Baibl waan wi dat if wi spen tu moch taim wid peepl weh noh wership Jehoava, fi dehn tinkin ku chaynj di way wee tink. (Prov. 13:20; 1 Kor. 15:12, 32, 33) Wi haftu pik ahn chooz wi  entataynment tu. Wi rijek eni kaina entataynment weh promoat evolooshan, vailens, er sekshwal imoraliti. Dehn kaina entataynment onli gud fi paizn wi main ahn ‘stap wi fahn noa Gaad.ʼ—2 Kor. 10:5.

18, 19. (a) Wai ih ku bee haad sohntaim fi protek wiself fahn di werl tinkin? Wai wi haftu bee ekschra kyaaful den? (b) Wat da sohn kweschan weh wi shuda aks wiself, ahn wai?

¹⁸ Sohntaim wi mait noh eevn noatis wen dis werl promoat ih oan tinkin. Soh wi haftu bee ekschra kyaaful fi seeʼt ahn fi rijek it. Fi egzampl, di way di nyooz prizent wahn stoari mait mek wan paati song beta dan di neks, eevn if dehn noh akchwali tel yu wich wan dehn sopoat. Sohn ada nyooz ripoat mait inklood weh di werl kansida fi bee gud goalz er sokses eena laif. Som a di moovi ahn buk dehn mait inkorij wi fi luk owt fi wiself er wi famili heda evribadi els ahn mek dehn aidyaa song gud, laik if da di rait way fi liv. Bot dehn kaina tinkin noh gree wid di Skripchaz weh tel wi dat wee ahn wi famili wahn bee hapi if wi lov Jehoava moa dan eniting els. (Mach. 22:36-39) Eevn som a di stoari buk fi pikni mait bee aarait moas a di taim, bot dehn mait gat een sohn aidyaa weh mek di pikni dehn tink dat notn rang wid imoaral bihayvya.

¹⁹ Dat noh meenz wi kyaahn injai gud entataynment. Bot ih gud fi aks wiself dehnya kweschan: ‘Wee ku rekonaiz di tinkin a dis werl eevn wen dehn noh push it eena wi fays? Wee kanchroal humoch wi ekspoaz wiself ahn wi pikni tu sertn TV shoa er buk? Wee help wi pikni dehn fi tink laik Jehoava soh dat di werl noh afek di way dehn tink?ʼ If wee rekonaiz di difrens bitween Jehoava tinkin ahn di tinkin a dis werl, wi ku mek shoar dat wi noh “stan laik dehn peepl eena dis werl ataal.”

20. How wi ku mek shoar dat da onli Gaad di gaid wi tinkin?

²⁰ Memba, infamayshan onli kohn fahn too plays. Eeda wi geh wi infamayshan fahn Jehoava, er fahn Saytan werl. Wich wan di afek di way wi tink? Da di wan weh wi geh wi infamayshan fram. If wi aksep dis werl way a tinkin, ih wahn chaynj di way how wee tink, ahn den wi wahn staat tu goh aan jos laik di peepl eena di werl. Dat da wai ih soh impoatant dat wi bee ekschra kyaaful wen wi di pik ahn chooz weh wi wahn reed, wach, lisn tu, ahn tink bowt.

21. Weh wi wahn diskos eena di neks aatikl?

²¹ Eena dis aatikl wi laan dat if wi waahn tink laik Jehoava, wi haftu du moa dan jos avoid di tinkin a dis werl. Wi haftu meditayt pahn Jehoava tinkin ahn mek ih chaynj di way wi tink, soh dat wi ku tink moa laik hihn. Eena di neks aatikl, wi wahn laan how fi du dat.