1-3. (a) How wi shuda feel bowt di chroot fahn di Baibl? Yooz di egzampl eena di paragraaf. (Koment pahn di picha dehn da di biginin a dis aatikl.) (b) Weh kweschanz wi wahn ansa eena dis aatikl?

NOWADAYZ, ih kaman fi peepl bai sohnting da shap ahn den kehr it bak. Maybi da bikaaz dehn neva laik it az moch az dehn mi tink. Er ih ku bee dat wen dehn mi kehr it hoam, dehn mi fain owt dat sohnting mi rang wid it. Soh dehn disaid fi kehr it bak an ekschaynj it, er get dehn moni bak far it.

² Eevn doa wi mait chrai get bak wi moni wen wi kehr sohnting bak da shap, wi wuda neva waahn giv op di chroot fahn di Baibl weh wi mi “bai.” If wi wuda giv op di chroot, ih wuda bee laik wi di “sel” it. (Reed Proverbs 23:23; * 1 Tim. 2:4) Eena di laas aatikl, wi mi taak bowt humoch taim wi mi spen fi bai chroot, er laan it. Pahn tap a dat, maybi wi mi giv op wahn gud jab, deel wid chaynjiz eena wi rilayshanship wid famili ahn frenz, mek chaynjiz eena how wi tink an ak, er giv op  sertn kostom ahn habit weh Jehoava noh pleez wid. Bot wateva wi mi giv op er chaynj da-mi jos wahn smaal prais fi pay fi di blesinz weh wi get.

³ Jeezas mi gi wahn iloschrayshan bowt wahn biznizman weh aalwayz mi-di luk owt fi gud kwaliti perl. Wen di man mi fain wan weh ga hai valyu, ih mi hori sel evriting weh ih mi gat fi mek ih ku bai da perl. Jeezas mi yooz dis iloschrayshan fi shoa how preshos di chroot tu peepl weh di saach far it. (Mach. 13:45, 46) Sayhn way soh, wen wee mi fos laan di chroot bowt Gaad Kingdom an evriting els weh wi mi laan fahn di Baibl, wi mi redi ahn wilin fi mek eni sakrifais fi get it. Az lang az wi stil si di valyu a di chroot, wi wahn “neva sel it.” Bot sad fi seh, som a Gaad oan peepl noh jos faget how preshos di chroot weh dehn mi laan, bot dehn eevn sel it. Wi hoap dat neva hapm tu wee! Soh fi shoa dat wi stil apreeshiayt di chroot ahn dat wi wahn neva sel it, wi haftu du weh di Baibl seh ahn “fala di chroot.” (Reed 3 Jan 2-4.) Dat meenz wi haftu liv akaadn tu di chroot. Fi du dat, wi haftu put it fos eena wi laif, ahn chaynj wi laif fi goh lang wid Baibl standadz. Bot how ahn wai sohnbadi mait “sel” di chroot? How wi ku mek shoar wi noh mek da sayhn mistayk? How wi ku schrentn wi dizaiya fi “fala di chroot”?

4. Wai som peepl mi “sel” di chroot eena di fos senchri?

⁴ Eena di fos senchri, som a di peepl hoo mi staat fala Jeezas teechinz mi stap fala di chroot. Fi egzampl, afta Jeezas mi du wahn mirakl fi feed wahn krowd a peepl, dehn mi fala ahn tu di ada said a di See a Gyalilee. Den, Jeezas mi tel dehn sohnting weh mi shak dehn: ‘Unu mos eet di Son a Man flesh ahn jrink ih blod; onli soh unu wahn ga reel laif eena unu.ʼ Insteda aks Jeezas fi eksplayn weh ih mi meen, dehn mi geh beks ahn seh: “Dehndeh da sohn haad teechin fi tek. Da hoo ku aksep dehndeh?” Sayka dat, ‘lata Jeezas falowaz mi ton bak ahn stap goh bowt wid ahn.ʼ—Jan 6:53-66.

5, 6. (a) Wai som peepl ton weh fahn di chroot eena fi wee taim? (b) How sohnbadi ku jrif weh fahn di chroot?

⁵ Sad fi seh, som peepl ton weh fahn di chroot eena fi wee taim tu. Som a dehn lef di chroot bikaaz dehn neva gree wid wahn nyoo andastandin a wahn Baibl pasij. Er maybi dehn lef bikaaz wahn brada weh evribadi noa ahn rispek mi seh er du sohnting weh dehn neva laik. Som lef bikaaz dehn neva waahn aksep di kongsl weh dehn mi get fahn di Skripchaz. Adaz let goh a di chroot bikaaz dehn kudn get lang wid sohnbadi eena di kangrigayshan. Som reed mateeryal fahn apastayts er ada peepl weh twis wi bileef dehn. Ahn soh, som a dehn staat tu “ton weh” fahn Jehoava ahn di kangrigayshan. (Heeb. 3:12-14) Ih wuda mi bee soh moch beta if dehn mi kip dehn fayt ahn kanfidens eena Jeezas, jos laik weh Peeta mi du! Wen di krowd mi-di staat tu lef, Jeezas mi aks di apasl dehn if dehn mi wahn lef ahn tu. Rait away Peeta mi ansa: “Laad, da hoo els wi gwehn tu? Da yoo ga di werd dehn weh gi laif weh wahn neva en.”—Jan 6:67-69

⁶ Adaz lef di chroot lee bit bai lee bit, ahn sohntaim dehn noh eevn kanshos ih di hapm. Dehn da jos laik wahn boat weh jrif weh fahn di rivasaid sloa-wan. Di Baibl waan wi fi bee kyaaful soh dat wee  “noh jrif weh.” (Heeb. 2:1) Yoozhwali, wahn persn weh “jrif weh” fahn di chroot noh mek wahn disizhan fi lef di chroot laik sohnbadi weh “ton weh” fan it. Bot dehn mek dehn rilayshanship wid Jehoava geh week, an if dehn noh kyaaful, dehn ku eevn looz dehn frenship wid Jehoava. How wee ku mek shoar dat dis neva hapm tu wi?

7. Weh wahn help wi fi neva sel di chroot?

⁷ Fi fala di chroot, wi haftu aksep an obay evriting weh Jehoava tel wi fi du. Wi haftu put di chroot fos eena wi laif ahn liv akaadn tu Baibl prinsipl. Eena wahn pryaa tu Jehoava, King Dayvid mi seh: “Ah wahn liv akaadn tu yu chroot.” (Ps. 86:11) Dayvid mi feel laik dat da-mi di bes ting fi du, ahn hihn mi mek op ih main fi fala Gaad chroot noh mata wat. Sayhn way, wee haftu bee kanvins fi liv akaadn tu Gaad chroot tu. Adawaiz, wi ku staat tu dowt di valyu a di chroot. Den wi mait waahn goh bak tu som a di tingz weh wi mi giv op fi bai di chroot. Bot wi kyaahn pik ahn chooz wich Baibl chroot wi wahn aksep er wich wan wi wahn ignoar. Wi haftu liv akaadn tu “di hoal chroot.” (Jan 16:13) Eena di laas aatikl wi mi taak bowt faiv tingz weh wi kuda mi sakrifais fi laan an aplai di chroot. Now wi wahn taak bowt how wi ku mek shoar dat wi neva goh bak tu di tingz wi mi lef bihain.—Mach. 6:19.

8. How di way wahn Kristyan yooz ih taim ku kaaz ahn fi jrif weh fahn di chroot? Yooz di egzampl eena di paragraaf.

⁸ Taim. Fi mek shoar wi noh jrif weh fahn di chroot, wi haftu mek gud yoos a wi taim. If wi noh kyaaful wi ku en op di spen tu moch taim pahn di Intanet, di wach TV, er pahn ada tingz weh wi injai. Eevn doa notn rang wid dehnya tingz, di taim weh wi spen pahn dehn ku tek weh di taim weh wi yoostu spen pahn spirichwal tingz. Kansida weh mi hapm tu wahn sista weh naym Emma. * Fahn wen ih mi yong, Emma mi reeli laik eniting weh ga fi du wid haas. Enitaim ih mi geh di chaans, ih yoostu goh raid haas. Afta wahn wail, ih mi staat tu wori bowt di amonk a taim weh ih mi-di spen di raid. Shee mi mek sohn chaynjiz weh mi help ahn fi put dat eena ih prapa plays. Shee mi aalso geh inkorijment fahn di ekspeeryens a Cory Wells, wahn sista hoo yoostu raid haas eena kompetishan. * Now Emma hapi fi yooz ih taim eena Jehoava servis ahn fi spen moa taim wid ih Kristyan famili ahn frenz. Ih feel kloasa tu Jehoava an ih ga pees, bikaaz ih noa dat ih di mek gud yoos a ih taim.

9. How wi ku staat tu put mateeryal tingz heda spirichwal tingz?

⁹ Mateeryal tingz. If wi waahn kantinyu liv akaadn tu di chroot, wi haftu put mateeryal tingz eena dehn prapa plays. Wen wi mi fos laan di chroot, wi mi staat tu riyalaiz dat spirichwal tingz moa impoatant dan mateeryal tingz. Wi mi hapi fi mek chaynjiz soh dat wi kuda liv akaadn tu di chroot. Bot az taim paas, wi mait si ada peepl di bai di laytes ilekchranik divais er injai ada mateeryal tingz. Wen wi si dat, wi mait staat tu feel laik wi di mis owt. Den wi noh wahn bee satisfai wid weh wi gat, ahn wi mait staat tu goh afta mateeryal tingz agen. Lata taim wi wuda haftu set spirichwal tingz  wan said fi du dat. Wi ku en op laik Deemas. Hihn mi giv op di privilij fi serv lang wid di apasl Paal bikaaz ih mi lov “di ting dehn weh eena dis werl.” (2 Tim. 4:10) Maybi Deemas mi lov mateeryal tingz moa dan ih mi lov spirichwal tingz. Er, maybi ih jos neva wilin agen fi mek persnal sakrifais fi goh serv lang wid Paal. Ih ku bee dat eena di paas wi yoostu lov mateeryal tingz. Bot wi wuda neva waahn goh bak tu dehn ting ahn mek wi lov fi spirichwal tingz geh koal.

10. Weh wi haftu fait gens fi mek wi ku fala di chroot?

¹⁰ Famili ahn frenz. Fi kantinyu liv akaadn tu di chroot, wi kyaahn giv een tu presha fahn di peepl rong wi. Wen wi mi fos staat fala di chroot, wi rilayshanship wid wi famili ahn frenz mi chaynj. Maybi som a dehn talarayt di chaynj, bot maybi adaz mi ton gens wi ahn chrai stap wi. (1 Peet. 4:4) Eevn doa wi chrai kip wahn gud rilayshanship wid dehn ahn bee nais tu dehn, wi kyaahn ignoar Jehoava standadz jos fi kip dehn hapi. Wi wahn kantinyu fi chrai get lang wid wi famili ahn frenz, bot wi haftu memba weh wi laan fahn 1 Korintyanz 15:33, dat wi kloas fren dehn shuda onli bee peepl hoo lov Jehoava.

11. How wi ku avoid doti tinkin ahn kandok?

¹¹ Doti tinkin ahn kandok. Enibadi weh fala di chroot haftu bee hoali. (Isa. 35:8; reed 1 Peeta 1:14-16.) Wen wi mi-di laan di chroot, aala wi mi haftu mek sohn chaynjiz fi liv akaadn tu Baibl standadz. Maybi som a wi mi haftu mek big chaynjiz. Noh mata weh chaynjiz wi mi haftu mek, wi haftu bee kyaaful fi noh ekschaynj di kleen ahn hoali laif weh wi ga now fi di dotinis ahn loos livin weh wi si eena di werl. How wi ku mek shoar wi noh giv een tu eni kaina temtayshan fi du sohnting imoaral? Tink bowt humoch Jehoava mi giv op fi mek wee ku bee hoali. Hihn mi giv op di preshos laif a ih wan an onli Son, Jeezas Krais! (1 Peet. 1:18, 19) Fi kip wiself kleen fronta Jehoava, wi aalwayz haftu kip di preshos valyu a Jeezas ransom sakrifais eena wi main ahn haat.

12, 13. (a) Wai ih soh impoatant fi luk pahn haliday di sayhn way Jehoava vyoo dehn? (b) Weh wi wahn kansida neks?

¹² Kostom ahn habit weh Gaad noh pleez wid. Eena di werl tudeh, dehn ga aal kaina kostom ahn haliday weh peepl selibrayt. Wi famili, peepl wi werk wid er peepl wi goh da skool wid mait chrai get wi fi selibrayt wid dehn. Wat wahn help wi fi stan op tu di presha fi tek paat eena dehn kaina kostom ahn haliday weh noh aana Jehoava? Wi haftu kip klyaa eena wi main how Jehoava vyoo dehnya ting. Wi ku du risaach eena wi poblikayshan dehn fi si wehpaat dehn haliday kohn fram. Wen wi meditayt pahn di reezn wai wi noh selibrayt di haliday dehn, ih wahn help wi fi mek shoar dat wi di liv eena wahn way “weh pleez di Laad.” (Ifee. 5:10) If wi chros Jehoava ahn fi hihn Werd, den wi noh wahn wori bowt weh ada peepl tink.—Prov. 29:25.

¹³ Wi hoap dat wi kantinyu fala di chroot fareva. How wi ku schrentn wi dizaiya fi kantinyu liv akaadn tu di chroot? Mek wi luk pahn chree wayz.

14. (a) How wi dizaiya fi kantinyu liv akaadn tu di chroot wahn geh schranga wen wi kantinyu fi bai chroot? (b) Wai wizdom, disiplin, an andastandin soh impoatant?

¹⁴ Fos, wi haftu kantinyu fi stodi di chroot fahn Gaad Werd ahn meditayt pan it. Wi haftu spen taim fi bai chroot,  soh wi skejul taim fi feed pahn Gaad Werd evri day. Dat wahn help wi fi apreeshiayt di chroot weh wi bai eevn moa, an ih wahn schrentn wi dizaiya fi noh sel it. Bot Proverbs 23:23 neva tel wi onli fi bai chroot. Ih tel wi fi bai “wizdom ahn disiplin an andastandin” tu. Nalij bai ihself noh inof. Wi haftu yooz di chroot weh wi laan eena wi laif. Wen wi geh andastandin, wi si how evriting weh wi laan fahn Jehoava fit wid weh wi mi don laan aredi. Wen wi geh wizdom, wi wahn mek gud yoos a weh wi laan. Sohntaim, di chroot disiplin wi, ahn ih shoa wi weh chaynjiz wi need fi mek eena wi laif. Mek wi aalwayz pay atenshan tu di gaidans weh wi geh fahn Gaad Werd an aplai it rait away. Di Baibl seh dat da gaidans moa preshos dan silva.—Prov. 8:10.

15. How di belt a chroot protek wi?

¹⁵ Sekant, mek op yu main fi aplai di chroot evri day a yu laif. Mek di chroot bee laik di belt weh yu wayr. (Ifee. 6:14) Eena Baibl taimz, wahn soalja yoostu wayr wahn belt fi protekshan ahn sopoat. Bot fi mek ih belt protek ahn, ih mi haftu kip it tait. If ih belt mi loos, ih noh mi wahn giv ahn no sopoat er protekshan. How wi spirichwal belt a chroot protek wi? If wi kip di chroot rap tait rong wi laik wahn belt, ih wahn protek wi mek wi noh tink di rang way, an ih wahn help wi fi mek waiz disizhanz. Wen wi fays temtayshan er wi goh chroo chraiyalz, Baibl chroot wahn schrentn wi dizaiya fi du weh rait. Soh jos laik how wahn soalja wuda neva goh da waar widowt ih belt, wee mos neva loos wi belt a chroot, er wos, tek it aaf. Raada, wi waahn du evriting wi kud fi kip it tait. Di way wi du dat da fi kip di liv akaadn tu Baibl chroot. Bot di soalja mi ga wahn nada yoos fi ih belt. Ih yoostu heng ih soad pan it. Dat bring wi tu di neks way how wi ku schrentn wi dizaiya fi liv akaadn tu di chroot.

16. How wi dizaiya fi kantinyu liv akaadn tu di chroot geh schranga wen wi teech di chroot tu adaz?

¹⁶ Terd, du az moch az yu kud fi teech adaz di chroot fahn di Baibl. Wen yu du dat, yu wahn kip di hoal aan tait tu yu spirichwal soad, weh da “Gaad Werd.” (Ifee. 6:17) Aala wi ku werk haad fi du beta eena di teechin werk, ahn “teech peepl di chroo Werd a Gaad, eena di rait way.” (2 Tim. 2:15) Wen wi yooz di Baibl fi help adaz fi bai chroot, wi wahn apreeshiayt di chroot weh wee mi bai eevn moa. Den wi dizaiya fi hoal aan tu di chroot ahn noh sel it wahn geh eevn moa schranga.

17. Wai di chroot preshos tu yoo?

¹⁷ Di chroot da wahn preshos gif fahn Jehoava. Bikaaz a da gif, wi ku injai wahn kloas, persnal rilayshanship wid Jehoava, ahn dat da di moas preshos ting weh wi gat. Bot Jehoava ga soh moch moa fi teech wi! Hihn pramis fi kantinyu teech wi di chroot fareva. Soh kantinyu fi luk pahn di chroot laik da wahn preshos perl. Kantinyu fi “bai chroot ahn neva sel it.” Den, jos laik Dayvid, yu wahn ku kip dis pramis tu Jehoava: “Ah wahn liv akaadn tu yu chroot.”—Ps. 86:11.