1-2. Akaadn tu 1 Peeta 4:7, 8, weh wahn help wi fi koap wid tof sichuwayshanz?

AZ WI di geh kloasa ahn kloasa tu di en a “di laas dayz,” wi mait fays wahn lata tof sichuwayshanz. (2 Tim. 3:1) Fi egzampl, afta wahn ilekshan eena West Africa, dehn mi ga wahn lata vailens. Fi moa dan siks monts wi bradaz ahn sistaz kudn moov bowt laik how dehn mi waahn bikaaz a di vailens eena dehn ayrya. Weh mi help dehn fi koap joorin dehndeh haad taimz? Som a di bradaz ahn sistaz mi aybl fi stay da ada bradaz hows weh mi-di liv eena wahn ayrya weh mi moa sayf. Wan brada mi seh: “Eena wahn sichuwayshan laik dat, Ai mi hapi, kaaz Ai mi deh wid frenz. Wee mi aybl fi inkorij eech ada.”

² Wen “di grayt chribyulayshan” staat, wi wahn hapi fi ga gud frenz weh lov wi. (Rev. 7:14) Soh ih impoatant dat wi bil schrang frenship now. (Reed 1 Peeta 4:7, 8.) Wi ku laan wahn lat fahn Jerimaiya ekspeeryens. Fi hihn kloas frenz mi help hihn fi servaiv joorin di taim rait bifoa di dischrokshan a Jeroosalem. * How wee ku kapi Jerimaiya egzampl?

3. (a) Wai Jerimaiya maita mi waahn stay weh fahn ada peepl? (b) Weh Jerimaiya mi tel ih sekiteri Barok, ahn wat da-mi di rizolt?

³ Fi bowt 40 yaaz, Jerimaiya mi liv monks peepl weh neva laayal. Dis inklood ih naybaz ahn maybi eevn som a ih relitiv  fahn Anatat wehpaat ih mi groa op. (Jer. 11:21; 12:6) Bot Jerimaiya neva kip tu ihself. Az a mata a fak, hihn mi tel ih laayal sekiteri Barok how ih mi-di feel. Ahn wee aalso noa how Jerimaiya mi-di feel, kaaz ih deh eena di Baibl. (Jer. 8:21; 9:1; 20:14-18; 45:1) Joorin di taim wen Barok mi-di rait dong weh mi hapm tu Jerimaiya, di too a dehn mi laan fi lov ahn rispek eech ada wahn lat.—Jer. 20:1, 2; 26:7-11.

4. Weh Jehoava mi aks Jerimaiya fi du, ahn how dis asainment mi schrentn Jerimaiya ahn Barok frenship?

⁴ Fi yaaz, Jerimaiya neva frayd fi waan di Izrelait dehn bowt weh mi wahn hapm eena Jeroosalem. (Jer. 25:3) Di neks taim Jehoava mi inkorij di peepl fi ripent, hihn mi aks Jerimaiya fi rait di waanin pahn wahn skroal. (Jer. 36:1-4) Az Jerimaiya ahn Barok mi werk kloas tugeda pahn dis asainment weh Jehoava mi gi dehn, dehn mi moa dan laikli taak bowt tingz weh mi schrentn dehn fayt.

5. How wi noa dat Barok da-mi wahn gud fren tu Jerimaiya?

⁵ Afta dehn mi don rait di skroal, Jerimaiya mi haftu chros ih fren Barok fi diliva di mesij tu di peepl. (Jer. 36:5, 6) Barok mi fulfil dis daynjaros asainment wid korij. Yoo ku imajin how prowd Jerimaiya mosi mi feel wen Barok mi gaahn da di templ ahn reed di skroal tu di peepl? (Jer. 36:8-10) Di prins dehn a Jooda mi hyaa bowt weh Barok mi du, ahn dehn mi koman hihn fi reed di skroal owt lowd fi dehn! (Jer. 36:14, 15) Di prins dehn mi disaid fi tel King Jehoiyakim weh Jerimaiya mi seh. Dehn mi kansidarayt tu Barok, soh dehn mi tel ahn: “Unu goh haid unuself, yoo ahn Jerimaiya, ahn noh mek nobadi noa wehpaat unu deh.” (Jer. 36:16-19) Dat da-mi gud advais!

6. Weh Jerimaiya ahn Barok mi du wen peepl mi gaahn gens dehn?

 ⁶ King Jehoiyakim mi geh reeli beks wen ih mi hyaa Jehoodai di reed di werdz weh Jerimaiya mi rait, ih mi soh beks dat ih mi bon op di skroal an aada ih soaljaz fi ares Jerimaiya ahn Barok. Bot Jerimaiya neva geh frayd. Hihn mi tek wahn nada skroal ahn giv it tu Barok, an az Jerimaiya mi tel ahn Jehoava mesij, Barok mi rait dong “aala di sayhn werdz weh mi deh pan di fos skroal, weh King Jehoiyakim fahn Jooda mi bon op.”—Jer. 36:26-28, 32.

7. Weh mi hapm wen Jerimaiya ahn Barok mi werk tugeda?

⁷ Peepl weh goh chroo wahn chraiyal tugeda naamali kohn fi bee bes frenz. Soh ih pasabl dat Jerimaiya ahn Barok mi geh fi noa eech ada beta ahn kohn fi bee bes frenz. Dis mi hapm wail dehn mi-di werk tugeda fi riplays di skroal weh wikid King Jehoiyakim mi dischrai. How wi ku benifit fahn di egzamplz weh dehn too faytful man mi set?

8. Weh mait hoal wi bak fahn mek kloas frenz, ahn wai wi noh waahn giv op?

⁸ Wi mait fain it haad fi tel sombadi how wi feel bikaaz sombadi maita mi hert wi eena di paas. (Prov. 18:19, 24) Er wi mait feel laik dehn noh ga di taim er enerji fi faam kloas frenships. Bot, wi noh fi giv op. If wi waahn wi bradaz help wi wen wi di goh chroo haad taimz, wi need fi bil schrang frenship wid dehn now. Wan impoatant way fi du dat da fi tel dehn weh wi tink ahn how wi feel.—1 Peet. 1:22.

9. (a) How Jeezas mi shoa dat hihn chros ih frenz? (b) If wi taak bowt weh wi tink ahn how wi feel, how dat ku help wi fi mek kloas frenz? Yooz di egzampl eena di paragraaf.

⁹ Jeezas mi shoa dat ih chros ih frenz dehn, bikaaz ih neva haid eniting fahn dehn. (Jan 15:15) Wee ku kapi fi hihn egzampl if wi tel wi frenz bowt di tingz weh mek wi hapi, di tingz weh mek wi wori, ahn di tingz weh mek wi opset. If wi lisn reeli gud wen sombadi di taak tu wi, wi mait fain owt dat wi ga wahn lat in kaman. Kansida di egzampl a Cindy, wahn sista eena ih 20ʼs. Shee mi mek fren wid wahn sista eena ih 60ʼs weh naym Marie. Cindy ahn Marie werk tugeda eena feel servis evri Terzdeh maanin. Aalso dehn feel komfatabl di taak tu eech ada bowt eniting. Cindy seh, “Ai laik ga seeryos kanvasayshan wid frenz bikaaz dis help mee fi noa an andastan dehn beta.” Wen wi taak bowt weh wi di tink ahn how wi di feel wid  wi frenz ahn lisn tu dehn wen dehn taak, wi frenship geh schranga.—Prov. 27:9.

10. Akaadn tu Proverbs 27:17, weh gud tingz ku hapm wen wi werk wid wi bradaz ahn sistaz?

¹⁰ Jos laik weh mi hapm wid Jerimaiya ahn Barok, wen wi werk lang wid wi bradaz ahn sistaz ahn si dehn gud kwalitiz fi wiself, wi laan fahn dehn ahn geh kloasa tu dehn. (Reed Proverbs 27:17.) * Fi egzampl, how yoo feel wen yu deh pahn servis ahn yu hyaa yu fren di eksplayn di reezn fi weh ih bileev er di taak fahn ih haat bowt Jehoava an ih perpos? Moa dan laikli, yu lov ahn eevn moa.

11-12. Yooz di egzampl eena di paragraaf fi shoa how preechin wid wi frenz ku help schrentn wi frenship.

¹¹ Mek wi luk pahn too egzampl weh shoa how peepl geh kloasa tu eech ada wen dehn werk tugeda eena di minischri. Adeline, wahn sista weh 23 yaaz oal, mi aks ih fren weh naym Candice, fi goh wid ahn fi preech eena wahn teritori weh haadli geh werk. Shee seh: “Wi mi waahn du moa eena di minischri, ahn wi mi waahn injai it moa. Di too a wi mi need inkorijment soh dat wi kuda mi kantinyu gi Jehoava wi bes.” How dehn mi benifit wen dehn mi werk tugeda? Adeline seh: “Da di en a eech day, wi mi taak bowt how wi mi feel ahn bowt weh mi inkorij wi bowt di kanvasayshanz weh wi mi ga. Wi doz aalso taak bowt how wi si dat da Jehoava di dairek wi eena wi minischri. Di too a wi mi injai dehndeh kanvasayshanz ahn wi mi geh fi noa eech ada beta.”

¹² Laïla ahn Marianne da too singl sista fahn France. Dehn mi gaahn preech fi faiv weeks da Bangui, weh da di kyapital a di Central African Republic. Laïla seh: “Mee ahn Marianne mi ekspeeryens sohn haad taimz, bot tanks tu gud kamyoonikayshan ahn reel lov, wi frenship mi geh  schranga. Az Ah mi si di way how Marianne mi shoa lov fi di loakal peepl ahn di minischri, ahn di way how ih mi adap tu ih nyoo serkomstans, Ai mi rispek shee eevn moa.” Yu noh haftu moov tu wahn neks konchri fi injai dehnya benifits. Evri taim yu preech eena yu loakal teritori wid wahn brada er sista, yu ga di apachooniti fi geh fi noa dehn beta ahn yu aalso geh fi schrentn yu frenship wid dehn.

13. Weh hapm sohntaim wen wi werk wid wi frenz wahn lat?

¹³ Sohntaim wen wi werk wid wi frenz wahn lat, wi noh onli staat tu noatis dehn gud kwalitiz, bot aalso di mistayks weh dehn mek. Weh ku help wi fi stay kloas tu wi frenz eevn doa dehn mek mistayk? Mek wi luk pahn Jerimaiya egzampl agen. Mek wi si weh mi help hihn fi si di gud kwalitiz weh ih frenz mi gat ahn weh mi help ahn fi luk paas dehn mistayks.

14. Weh Jerimaiya mi laan bowt Jehoava, ahn how dis mi help ahn?

¹⁴ Jerimaiya mi rait 3 buk weh deh eena di Baibl. Hihn mi rait 1 ahn 2 Kings, ahn di buk a Jerimaiya. Da werk mi help hihn fi si humoch mersi Jehoava ga fi imperfek hyoomanz. Fi egzampl, Jerimaiya mi noa dat wen King Ayhab mi ripent a ih bad akshanz, Jehoava mi spyaa Ayhab fahn si ih hoal famili geh dischrai. (1 Ki. 21:27-29) Jos laik dat, Jerimaiya mi noa dat Manaaseh mi du eevn moa dan weh Ayhab mi du fi ofen Jehoava. Bot stil, Jehoava mi fergiv Manaaseh bikaaz hihn mi ripent. (2 Ki. 21:16, 17; 2 Chron. 33:10-13) Dehndeh akonk mosi mi help Jerimaiya fi kapi Gaad payshens ahn mersi wen ih di deel wid ih kloas frenz.—Ps. 103:8, 9.

15. How Jerimaiya mi kapi Jehoava payshens wen Barok mi looz ih foakos?

¹⁵ Tink bowt how Jerimaiya mi deel wid Barok wen hihn mi looz ih foakos eena ih asainment fi wahn wail. Insteda kwik fi giv op pahn ih fren, Jerimaiya mi help Barok. Hihn mi tel Barok bowt Gaad kain bot dairek mesij. (Jer. 45:1-5) Wat da som a di lesn dehn weh wi ku laan fahn dis akonk?

16. Akaadn tu Proverbs 17:9, weh wi need fi du soh dat wi noh looz wi frenship wid adaz?

¹⁶ Wi kyaahn ekspek wi bradaz ahn sistaz fi bee perfek. Soh, wans wee ahn sombadi da frenz, wi haftu werk haad fi kip wi frenship. If wi frenz mek wahn mistayk, wi mait need fi gi dehn kain bot aanis kongsl weh bays pahn di Baibl. (Ps. 141:5) Wen wi frenz hert wi, wi need fi fergiv dehn. Ahn wans wi fergiv dehn, wi noh wahn di bring op oava an oava weh dehn mi du wi. (Reed Proverbs 17:9.) * Joorin dehnya haad taim ih veri impoatant fi kip foakos pahn di gud kwalitiz a wi bradaz ahn sistaz raada dan di foakos pahn dehn mistayks! If wi du dat, wi wahn schrentn wi frenship wid dehn. Ih impoatant dat wi du dis now bikaaz wi wahn need kloas frenz joorin di grayt chribyulayshan.

17. Wai wi ku seh dat Jerimaiya da-mi wahn chroo fren espeshali wen ih frenz mi-di fays haad taimz?

¹⁷ Di prafit Jerimaiya da-mi wahn chroo fren espeshali wen ih frenz mi-di fays haad taimz. Fi egzampl, Ebed-melek, hoo da-mi di koat ofishal, mi sayv Jerimaiya fahn owta wahn deep deep hoal weh mi ful a mod, ahn wehpaat dehn mi lef ahn fi  ded. Afta dat, Ebed-melek mi frayd kaaz hihn mi tink dat di prins dehn mi wahn kil hihn fi weh ih mi du. Wen Jerimaiya mi hyaa bowt dis, hihn neva kip kwaiyet ahn hoap dat ih fren wuda mi deel wid dis pahn ih oan. Aldoa Jerimaiya mi eena prizn, hihn mi du weh ih kud fi inkorij ih fren Ebed-melek. Yes, Jerimaiya mi shayr Jehoava komfertin mesij wid ih fren.—Jer. 38:7-13; 39:15-18.

18. Akaadn tu Proverbs 17:17, weh wi shuda du wen wahn fren di sofa?

¹⁸ Tudeh, wi bradaz ahn sistaz di fays wahn lata difrent chalenjiz. Fi egzampl, wahn lata dehn di sofa bikaaz a tingz laik harikayn er waar. Wen dehndeh tingz hapm, som a wi mait ku help an invait dehnya bradaz ahn sistaz fi stay wid wi. Adaz mait ku help owt wid wahn lee moni. Bot aala wi ku aks Jehoava fi help wi bradaz ahn sistaz. If wi laan dat wahn brada er sista di feel diskorij, wi mait noh noa weh fi seh er weh fi du. Bot aala wi ku help. Fi egzampl, wi ku spen taim wid wi fren. Wi ku bee kain ahn lisn tu dehn az dehn di taak. Ahn wi ku tel dehn bowt wi fayvrit skripcha weh komfert wee. (Isa. 50:4) Weh mata di moas da dat wi dehdeh wen dehn need wi.—Reed Proverbs 17:17. *

19. If wi bil schrang frenship now, how ih wahn help wi eena di fyoocha?

¹⁹ Wi need fi mek op wi main fi bil ahn kip schrang frenship wid wi bradaz ahn sistaz now. Wai? Bikaaz wi enimiz wahn chrai fi yooz laiz fi divaid wi. Dehn wahn chrai fi ton wi gens eech ada. Bot dehn wahn fayl. Dehn kuda neva kaaz wi fi stap lov wi bradaz ahn sistaz. Notn weh dehn du wahn damij di frenship dehn weh wi faam. Az a mata a fak, dehndeh saym frenship wahn laas chroo di en a dis sistem ahn fareva!