1-2. (a) Akaadn tu Ifeezhanz 6:16, wai wi fayt need fi “bee laik wahn sheel”? (b) Weh kweschanz wi wahn kansida?

FI YOO fayt schrang “laik wahn sheel”? (Reed Ifeezhanz 6:16.) Af koars. Jos laik wahn big sheel weh protek moas a yu badi, yu fayt protek yu fahn di bad tingz eena di werl, laik imoraliti, vailens, an eniting els weh goh gens Gaad standadz.

² Bot wi di liv eena “di laas dayz,” ahn wi fayt wahn kantinyu fi geh tes. (2 Tim. 3:1) How yoo ku chek yu fayt fi si if ih schrang jos laik wahn sheel? Ahn how yoo ku hoal aan tait tu yu sheel? Mek wi diskos di ansaz tu dehndeh kweschanz.

3. Weh soaljaz doz du tu dehn sheel, ahn wai?

³ Bak eena Baibl taimz, wahn lata soaljaz doz ga sheel weh mi kova wid leda. Di soaljaz doz grees dehn sheel fi mek di leda laas langa ahn fi mek di metal paat a di sheel noh geh rosti. If wahn soalja mi noatis dat ih sheel mi damij, hihn wuda mi mek shoar ih get it fiks soh dat ih kuda mi aalwayz bee redi fi di neks waar. Weh da egzampl ga fi du wid yu fayt?

4. Wai wi need fi chek wi fayt weh da laik wahn sheel, ahn how wi fi du dat?

⁴ Laik di oal-taim soalja dehn, wi need fi aalwayz chek wi fayt weh da laik wahn sheel, ahn tek kayr a it soh dat  wi ku aalwayz redi fi waar. Az Kristyanz, wi di fait wahn spirichwal waar, ahn som a wi enimi dehn da eevl spirits. (Ifee. 6:10-12) Nobadi els ku tek kayr a wi sheel fi wi. How wi ku bee shoar dat wi fayt wahn bee schrang inof fi wen wi fays tes? Fos, wi need fi pray tu Gaad fi help. Den wi need Gaad Werd di Baibl fi help wi soh dat wi ku si wiself di way Gaad si wi. (Heeb. 4:12) Di Baibl seh: “Chros eena Jehoava wid aala yu haat, ahn noh pen pahn yu oan andastandin.” (Prov. 3:5, 6) Now tink bowt wahn sichuwayshan weh laytli hapm ahn weh yu mi du bowt it. Fi egzampl, yoo mi ga wahn seeryos moni prablem? Wen yu mi-di chrai fi solv di prablem, yoo mi tink bowt Jehoava pramis da Heebrooz 13:5, weh seh: “Ah wahn neva lef unu; Ah wahn neva dizert unu”? Da pramis mi gi yoo kanfidens dat Jehoava wahn help yu? If da soh, dat shoa dat yoo di kip yu fayt weh da laik wahn sheel, eena gud kandishan.

5. Weh yoo mait fain wen yu chek yu fayt?

⁵ Wen yu chek yu fayt reeli gud, yu mait bee sopraiz bai weh yu fain. Yu mait fain sohn weeknis weh yu neva mi-di noatis. Fi egzampl, yu mait fain owt dat woriz weh noh nesiseri, laiz, ahn diskorijment mi damij yu fayt. If dis mi hapm tu yoo, how yu ku protek yu fayt fahn geh damij eena di fyoocha?

6. Wat da sohn egzampl a tingz weh noh bad fi wori bowt?

⁶ Sohn tingz gud fi mek wi wori bowt. Fi egzampl, ih gud fi mek wi wori bowt weda er nat wi di pleez Jehoava ahn Jeezas. (1 Kor. 7:32) If wi komit wahn seeryos sin, wi wori bowt how fi fiks wi frenship wid Jehoava. (Ps. 38:18) Wi aalso wori bowt how fi pleez wi hozban er waif, how fi tek kayr a wi famili membaz, ahn how fi tek kayr a wi bradaz ahn sistaz.—1 Kor. 7:33; 2 Kor. 11:28.

7. Akaadn tu Proverbs 29:25, wai wi noh need fi fyaa man?

⁷ Pahn di ada han, woriz weh noh nesiseri ku damij wi fayt. Fi egzampl, wi ku loan di wori bowt weda wi ga inof food ahn kloaz. (Mach. 6:31, 32) Fi mek wi noh wori soh moch, wi mait foakos pahn mateeryal tingz ahn chrai fi si how wi ku geh moa. Wi ku eevn staat tu lov moni. If wi alow dat fi hapm, wi fayt eena Jehoava wahn geh week ahn wi wahn staat tu looz wi frenship wid ahn. (Maak 4:19; 1 Tim. 6:10) Er wi mait staat tu wori bowt weh ada peepl tink bowt wi, an onli foakos pahn how fi pleez dehn. Soh insteda wori bowt du tingz weh Jehoava laik, wi mait staat tu wori moa bowt weh ada peepl wahn tink a wi er weh dehn mait du tu wi. Fi protek wiself fahn da daynja, wi need fi bayg Jehoava fi gi wi di fayt ahn korij weh wi need fi fays da chalenj.—Reed Proverbs 29:25; * Look 17:5.

8. How wi shuda rispan tu laiz?

⁸ Saytan, “di pa a aala di lai dehn,” di yooz peepl weh deh anda fi hihn kanchroal fi spred laiz bowt Jehoava ahn bowt wi bradaz ahn sistaz. (Jan 8:44) Fi egzampl, apastayts tel lai ahn twis di faks bowt Jehoava aaganaizayshan pahn websait, TV, an ada tingz. Dehndeh lai deh monks Saytan ‘aro dehn weh ga faiya da en.ʼ (Ifee. 6:16) How  wee shuda ak if sombadi staat tu tel wi lai laik dehndeh? Wi rijek dehn! Wai? Bikaaz wee ga fayt eena Jehoava ahn wi chros wi bradaz. Az a mata a fak, wi noh kamyoonikayt wid apastayts. Wi noh kwaaril wid dehn bowt eniting er fi eni reezn, eevn if wi jos waahn noa da weh dehn di seh bowt wi.

9. How diskorijment ku afek wi?

⁹ Diskorijment ku mek wi fayt geh week. Sohntaim wi feel diskorij bikaaz wi ga prablemz. Af koars, wi noh fi ignoar wi prablemz. Bot wi noh fi tink bowt wi prablemz aal di taim needa. Kaaz if wi du dat, wi wahn ferget bowt aala di gud tingz weh Jehoava pramis wi. (Rev. 21:3, 4) Wi ku geh soh diskorij dat wi staat tu feel week ahn den wi stap serv Jehoava. (Prov. 24:10) Bot dat noh haftu hapm tu wi.

10. Weh wi laan fahn wahn leta weh wahn sista mi rait?

¹⁰ Mek wi luk pahn how wahn sista fahn di United States mi kip ih fayt schrang wail ih mi-di tek kyaa a ih hozban weh mi sik bad. Eena wahn leta weh shee mi rait tu werl hedkwaataz, shee mi seh: “Sohntaim, wi sichuwayshan reeli mek wi feel schres owt ahn diskorij, bot wi hoap schrang. Ah soh tankful fi evriting weh Jehoava gi wi fi schrentn wi fayt ahn fi inkorij wi. Wi mi reeli need dis advais an inkorijment. Ih help wi fi kantinyu serv Jehoava ahn fi bayr op anda di chraiyalz weh Saytan chroa wi way.” Fahn weh dis sista seh, wi laan dat wi ku get oava diskorijment! How? Memba dat yu chraiyalz da wahn tes fahn Saytan. Chros dat Jehoava wahn komfert yu. An apreeshiayt di spirichwal food weh hihn provaid.

11. Fi si weda er nat wi fayt schrang, weh kweschanz wi shuda aks wiself?

¹¹ Yoo si dat fi yoo fayt need fi bee schranga? Joorin di paas monts, yoo kuda mi stap yuself fahn wori bowt tingz weh noh nesiseri? Yoo kuda mi rifyooz fi lisn tu er kwaaril wid apastayts bowt laiz  weh dehn spred? Ahn yoo kuda mi koap wid diskorijment? If yu mi aybl fi du dehndeh tingz, den yu fayt deh eena gud kandishan. Bot wi mos kip pahn di lukowt, kaaz Saytan ga ada wepanz weh ih chrai fi yooz gens wi. Mek wi kansida wan a dehn.

12. Weh di lov a mateeryal tingz ku du tu wi?

¹² If wi staat tu lov moni wi fayt wahn geh week ahn wi wahn staat tu du les fi Jehoava. Di apasl Paal mi seh: “Wahn soalja wahn waahn pleez di aafisa weh deh oava ahn, soh ih noh wahn geh miks op wid aadineri laif.” (2 Tim. 2:4) Akchwali, wahn Roaman soalja kudn ga eni ada jab. Weh kuda mi hapm if wahn soalja neva fala da koman?

13. Wai wahn soalja wudn geh miks op wid aadineri laif?

¹³ Imajin dis. Wahn groop a soalja spen di maanin di chrayn wid dehn soad, bot wan a dehn felo soalja noh dehdeh wid dehn. Da soalja deh da maakit di sel food. Eena di eevnin, di soalja dehn spen taim di chek dehn aama ahn di shaapm dehn soad. Bot di wan weh mi-di sel food di pripyaa food fi sel di neks day. Bot di neks maanin, wahn enimi atak dehn wen dehn neva mi-di ekspek it. Wich soalja yoo tink wahn bee redi fi fait ahn fi mek ih komanda hapi? Ahn wich wan yoo wuda mi waahn fait langsaid—di soalja weh foakos ahn redi fi fait er di wan weh mi ga lata dischrakshan?

14. Az Krais soaljaz, weh impoatant tu wee?

¹⁴ Wee da jos laik dehn gud soaljaz. Di moas impoatant ting fi wee da fi mek fi wee komanda dehn, Jehoava ahn Jeezas, hapi. Tu wee, dat moa impoatant dan eniting weh wi ku geh eena Saytan werl. Wi mek shoar dat wi ga di taim an enerji weh wi need fi serv Jehoava. Ahn wi kip wi fayt, weh da laik wahn sheel, ahn di res a wi spirichwal aama eena gud kandishan.

15. Weh waanin Paal mi gi wi, ahn wai?

¹⁵ Wi need fi aalwayz bee redi! Wai? Di  apasl Paal mi waan wi dat ‘bikaaz peepl waahn moni soh badʼ dehn wahn “stap chros eena Gaad.” (1 Tim. 6:9, 10) Di ekspreshan “stap chros” shoa dat wee ku staat tu foakos moa ahn moa pahn mateeryal tingz ahn wi looz wi fayt. Dat ku kaaz wi haat fi “geh kech eena di chrap a [wi] oan los.” Raada dan alow wi haat fi geh chrap bai dehnya dizaiyaz er los, wi need fi memba dat Saytan di yooz dehnya dizaiyaz az wepanz fi mek wi fayt geh week.

16. Weh kweschanz di akonk da Maak 10:17-22 shuda moov wi fi tink bowt?

¹⁶ Sopoaz wi ga inof moni fi bai wahn lata mateeryal tingz. Yu tink wi di du sohnting bad if wi bai di tingz weh wi waahn bot wi noh akchwali need dehn? Noh reeli. Bot tink bowt dehnya kweschanz: Eevn if wi ga inof moni fi bai sohnting, yu tink wi reeli ga di taim an enerji fi yooz ahn tek kayr a it? Aalso, yu tink wi mait staat tu lov wi mateeryal tingz tu moch? Yu tink wi lov fi mateeryal tingz ku kaaz wi fi ak laik di yong man weh mi tern dong Jeezas invitayshan fi du moa fi Gaad? (Reed Maak 10:17-22.) Ih moch beta fi mek wi liv wahn simpl laif ahn spen wi taim an enerji di du Gaad wil!

17. Weh wi shuda neva ferget?

¹⁷ Wi shuda neva ferget dat wi deh eena wahn waar ahn dat wi need fi bee redi fi fait evri day. (Rev. 12:17) Wi bradaz ahn sistaz kyaahn kehr wi sheel fi wi. Wi need fi kip wi fayt schrang.

18. Wai di soalja dehn eena Baibl taimz doz hoal aan tait tu dehn sheel?

¹⁸ Eena Baibl taimz, wahn soalja doz geh aana wen ih mi brayv eena wahn waar. Bot ih wuda mi feel shaym if ih mi kohn fahn waar widowt ih sheel. Tacitus, wahn Roaman man weh stodi hischri, mi rait: “If wahn soalja mi lef ih sheel bihain, dat da-mi di bigis shaym.” Dat da wan reezn wai wahn soalja doz mek shoar dat ih hoal aan tait tu ih sheel.

19. How wee ku hoal aan tait tu fi wee fayt weh da laik wahn sheel?

¹⁹ Wi ku hoal aan tait tu wi fayt, weh da laik wahn sheel, if wi aalwayz goh da wi Kristyan meetin dehn, an if wi taak tu adaz bowt Jehoava an ih Kingdom. (Heeb. 10:23-25) Pahn tap a dat, wi reed di Baibl evri day ahn pray tu Jehoava fi help wi yooz weh ih seh eena wi laif. (2 Tim. 3:16, 17) Den, “no wepan weh dehn bring gens yu wahn ga eni kaina sokses.” (Isa. 54:17) Wi ‘fayt weh da laik wahn sheelʼ wahn protek wi. Wi wahn stan op schrang, ahn werk said bai said wid wi bradaz ahn sistaz. Ahn wi wahn du moa dan win di fait weh wi ga evri day—wi wahn ga di aana fi bee pahn Jeezas said wen hihn win di waar gens Saytan an ih falowaz.—Rev. 17:14; 20:10.