1. Weh Jehoava alow wi fi du?

JEHOAVA alow wi fi chooz di way how wi waahn liv wi laif. Hihn teech wi how fi mek gud disizhanz, ahn hihn help wi fi ga sokses wen wi mek disizhanz weh mek hihn hapi. (Ps. 119:173) Soh if wi praktis weh wi laan fahn di Baibl, wi ku mek waiz disizhanz.—Heeb. 5:14.

2. Weh wi mait fain haad fi du afta wi don mek wahn disizhan?

² Eevn wen wi mek wahn waiz disizhan, wi mait stil fain it haad fi finish weh wi mi staat. Kansida sohn egzamplz: Wahn yong brada disaid dat hihn wahn reed di hoal Baibl. Fi wahn fyoo weeks hihn mi du gud, bot den fi sohn reezn hihn mi stap. Wahn sista mek op ih main fi serv az wahn regyula painyaa, bot den shee kip di chaynj di dayt weh ih mi set fi staat. Wahn badi a eldaz disaid dat dehn mi wahn staat tu du moa shepadin kaalz pahn bradaz ahn sistaz eena di kangrigayshan, bot afta wahn fyoo monts dehn stil neva staat. Eech wan a dehnya sichuwayshan difrent, bot aala dehn ga sohnting in kaman. Aala dehn mi mek op dehn main fi du sohnting, bot non a dehn neva du it. Joorin di taim a di apasl dehn, di Kristyanz da Korint mi fays wahn simila chalenj. Mek wi si weh wi ku laan fahn dehn.

3. Weh di bradaz da Korint mi disaid fi du, bot weh mi hapm?

³ Rong 55 C.E., di bradaz da Korint mi mek wahn impoatant disizhan. Dehn mi fain owt dat di bradaz da Jeroosalem ahn Judeeya mi-di fays sohn reeli haad taimz ahn dat di ada kangrigayshanz mi-di kalek moni fi help dehn. Di  bradaz da Korint mi soh kain ahn jenaros; dehn mi disaid fi aalso doanayt moni fi help dehndeh bradaz, soh dehn mi aks Paal weh dehn mi need fi du fi help. Paal mi sen dehn inschrokshanz an ih mi chooz Taitos fi help owt wid di kalekshan. (1 Kor. 16:1; 2 Kor. 8:6) Bot wahn fyoo monts layta, Paal mi fain owt dat di bradaz da Korint neva mi-di du weh dehn seh dehn mi wahn du. Soh bikaaz a dis, fi dehn gif neva mi wahn bee redi in taim fi mek dehn kehr it da Jeroosalem lang wid di ada kanchribyooshan fahn di ada kangrigayshanz.—2 Kor. 9:4, 5.

4. Akaadn tu 2 Korintyanz 8:7, 10, 11, weh Paal mi inkorij di bradaz da Korint fi du?

⁴ Di bradaz da Korint mi mek wahn gud disizhan, ahn Paal mi inkorij dehn fi dehn schrang fayt an eeganis fi bee jenaros. Bot hihn mi aalso haftu inkorij dehn fi finish weh dehn mi staat. (Reed 2 Korintyanz 8:7, 10, 11.) Fi dehn ekspeeryens teech wi dat eevn faytful Kristyanz weh mek waiz disizhanz ku fain it haad fi du weh dehn seh dehn wahn du.

5. Weh kweschanz wi wahn ansa eena dis aatikl?

⁵ Jos laik di bradaz da Korint, wi mait fain it haad fi du weh wi seh wi mi wahn du. Wai? Bikaaz wi imperfek, wi mait laik du tingz laas minit. Er tingz weh wi neva ekspek fi hapm mait noh mek it pasabl fi mek wi du weh wi seh wi mi wahn du. (Eccl. 9:11; Roam. 7:18) How wi ku goh oava wahn disizhan weh wi don mek ahn disaid weda er nat wi need fi chaynj it? Ahn how wi ku mek shoar dat wi finish weh wi mi staat?

6. Da wen wi mait need fi chaynj wahn disizhan?

⁶ Dehn ga sohn impoatant disizhan eena wi laif weh wi kyaahn chaynj. Fi egzampl, wi disizhan fi serv Jehoava ahn fi bee faytful tu wi marij mayt; dehndeh da disizhanz weh wi haftu stik tu. (Mach. 16:24; 19:6) Bot ada disizhanz ku chaynj. Wai? Bikaaz sohntaimz wi serkomstans chaynj. Weh ku help wi mek waiz disizhanz?

7. Weh wi shuda pray fa, ahn wai?

⁷ Pray fi wizdom. Jehoava mi mek Jaymz rait: “If eni a unu noh ga di wizdom weh Gaad gi, yu mos aks Gaad fi gi yu. Hihn wahn gi yu nof.” (Jay. 1:5) Aala wi need “di wizdom weh Gaad gi.” Soh wi need fi pen pahn Jehoava wen wi di mek wahn disizhan ahn wen wi di disaid weda er nat wi need fi chaynj wahn disizhan weh wi don mek. Jehoava wahn help wi mek waiz disizhanz.

8. Weh kaina risaach wi need fi du bifoa wi mek wahn disizhan?

⁸ Du deep risaach. Ton tu Gaad Werd fi advais, reed poblikayshanz fahn Jehoava aaganaizayshan, ahn taak tu peepl weh yu ku chros. (Prov. 20:18) Yu need fi du risaach laik dat bifoa yu disaid weda er nat fi chaynj yu jab er fi moov. Ih aalso impoatant wen yu di chooz di kaina ejukayshan weh wahn help yu fi sopoat yuself eena di minischri.

9. How wi wahn benifit if wi aanis wid wiself?

⁹ Goh oava di reezn fi yu disizhanz. Jehoava kay bowt wai wi du tingz. (Prov. 16:2) Hihn waahn mek wi bee aanis eena evriting weh wi du. Soh wen wi mek disizhanz, wi waahn bee aanis wid wiself ahn wid adaz bowt wi reezn. If wi noh reeli aanis, moa dan laikli wi wahn fain it haad fi du weh wi seh wi wahn du. Fi egzampl, wahn yong brada mait disaid fi bee wahn regyula painyaa. Bot afta sohn taim, hihn schrogl fi kompleet di amonk a  owaz weh wahn painyaa need fi mek, an ih bayli fain jai eena ih minischri. Maybi hihn mi tink dat di mayn reezn wai hihn mi waahn painyaa da-mi fi pleez Jehoava. Bot yu tink ih kuda mi bee bikaaz hihn mi jos waahn pleez ih payrents er sohnbadi weh ih luk op tu?

10. Weh wahn persn need fi ga fi mek chaynjiz eena ih laif?

¹⁰ Tink bowt wahn Baibl styoodent weh disaid dat ih waahn stap smoak. At fers, hihn mait stap smoak fi wan er too weeks eevn doa ih fain it haad, den hihn giv op ahn staat tu smoak agen. Bot eena di en, hihn mi ga sokses! Hihn mi aybl fi stap smoak bikaaz a ih lov fi Jehoava an ih dizaiya fi pleez Ahn.—Kol. 1:10; 3:23.

11. Wai wi need fi ga spesifik goalz?

¹¹ Bee spesifik. If wi ga spesifik goalz ih wahn bee eeziya fi reech dehn. Fi egzampl, maybi wi disaid dat wi waahn reed di Baibl moa aafn. Bot if wi noh set wahn spesifik taim, wi mait noh du weh wi mi waahn du. * Er di eldaz eena di kangrigayshan mait disaid fi du moa shepadin vizit, bot afta sohn taim dehn stil noh staat du weh dehn mi seh dehn wahn du. Fi ga sokses, dehn ku aks dehnself kweschanz laik dehnya: “Wi don noa wich bradaz ahn sistaz ku benifit fahn wi vizit? Wee don set wahn spesifik taim fi goh vizit dehn?”

12. Weh wi mait need fi du, ahn wai?

¹² Bee reeznabl. Non a wi ga aal di taim, moni, an enerji fi du evriting weh wi wuda waahn du. Soh bee praktikal ahn reeznabl. Sohntaim yu mait haftu chaynj wahn disizhan bikaaz yu riyalaiz dat yu reeli kyaahn du it. (Eccl. 3:6) Bot sopoaz yu goh oava yu disizhan, mek di chaynjiz weh yu mi need fi mek, ahn yu feel laik yu ku stil du weh yu mi disaid fi du. Kansida dehnya faiv steps weh ku help yu finish weh yu mi staat.

13. How wi ku geh di schrent weh wi need fi finish weh wi staat?

¹³ Pray fi di schrent fi du weh wi mi plan fi du. Gaad ku gi wi “di powa fi du” weh wi mi plan fi du (Fil. 2:13) Soh aks Jehoava fi mek ih hoali spirit gi yu di powa weh yu need. Kantinyu pray eevn if yu tink yu pryaa noh geh ansa yet. Laik weh Jeezas mi seh: “Stay di aks ahn unu wahn geh [di hoali spirit].”—Look 11:9, 13.

14. How di prinsipl da Look 14:28 ku help yu du sohnting weh yu seh yu wahn du?

¹⁴ Mek wahn plan. (Reed Look 14:28.) Fi mek yu ku finish wahn proajek weh yu staat, yu need fi ga wahn plan. Den yu need fi werk lang wid yu plan. Sayhn way soh, wen yu mek wahn disizhan, mek wahn lis a spesifik tingz weh yu need fi du soh dat yu ku kompleet weh yu mi seh yu wahn du. Wen yu ga wahn big jab fi du, yu ku divaid it intu sohn smaala jab. Evritaim yu du wan a di smaala jab, yu wahn ku si humoch yu don du. Paal mi inkorij di bradaz da Korint fi tek owt wahn lee amonk a dehn kanchribyooshan “pahn di fos day a evri week” soh dat dehn neva haftu wayt ahn kalek op no moni wen hihn reech. (1 Kor. 16:2) Wen yu brok dong wahn biga jab intu sohn smaala jab, dat ku aalso help yu fi noh feel laik yu kyaahn du weh yu seh yu mi wahn du.

15. Afta yu mek wahn plan, weh yu ku du?

¹⁵ If yu rait dong di tingz weh yu plan fi du, ih wahn eeziya fi mek yu du it. (1 Kor. 14:40) Fi egzampl, di aaganaizayshan  dairek di badi a eldaz fi asain wahn elda fi rait dong eech disizhan weh dehn mek, dehn aalso haftu rikaad hoo geh asain fi du it ahn wen da persn fi finish du it. Wen eldaz fala dis dairekshan ih eeziya fi mek dehn du weh dehn seh dehn wahn du. (1 Kor. 9:26) Yu ku chrai du sohnting laik dat wid di tingz dehn weh yu naamali du evriday. Fi egzampl, yu ku rait dong wahn lis a di tingz dehn weh yu need fi du joorin di day ahn put dehn eena di aada weh yu waahn du dehn. Dis noh wahn onli help yu kompleet weh yu staat bot ih wahn aalso help yu du moa tingz eena lee bit a taim.

16. Weh wi need fi du soh dat wi ku finish weh wi staat, ahn how di advais da Roamanz 12:11 ku help wi wid dis?

¹⁶ Werk haad. Ih tek wahn lata werk fi fala wi plan ahn kompleet weh wi staat. (Reed Roamanz 12:11.) Paal mi tel Timoti fi “mek shoar fi reed Gaad Werd” ahn “noh fi stap du dehn tingz” soh dat ih ku bee wahn beta teecha. Wi ku yooz Paal advais fi eniting weh wi waahn du fi Jehoava.—1 Tim. 4:13, 16.

17. How Ifeezhanz 5:15, 16 ku help wi du weh wi mi disaid fi du?

¹⁷ Mek gud yoos a yu taim. (Reed Ifeezhanz 5:15, 16.) Fi mek yu ku finish weh yu staat, set wahn taim ahn stik tu it. Noh chrai wayt fi di perfek taim, kaa da perfek taim mait neva kohn. (Eccl. 11:4) Yu haftu bee kyaaful fi noh alow ada tingz weh les impoatant fi dischrak yu ahn tek op di taim an enerji weh yu need fi du di moa impoatant tingz. (Fil. 1:10) If pasabl, chooz wahn taim wen yu wahn ga les dischrakshan. Mek adaz noa dat yu need taim fi foakos. Yu ku eevn ton aaf yu foan ahn noh chek yu e-mayl er soashal meedya til afta yu don du weh yu sopoas tu du. *

18-19. Weh ku help wi fi finish weh wi staat eevn wen wi fays chalenjiz weh noh mek it eezi?

¹⁸ Foakos pahn di rizolt. Wi ku kompyaa di rizolt a wahn disizhan tu wahn jerni. If wi reeli waahn reech di en a wi jerni, wi noh wahn giv op eevn if wi fain owt dat di road kloaz ahn dat wi need fi tek wahn difrent road. Sayhn way soh, if wi foakos pahn di rizolt a wahn disizhan, wi noh wahn giv op wen wi fays chalenjiz ahn chraiyalz.—Gal. 6:9.

¹⁹ Ih haad fi mek waiz disizhanz, an ih ku bee wahn schrogl fi finish weh wi staat tu. Bot wid Jehoava help, yu ku geh di wizdom ahn schrent weh yu need fi finish weh yu staat.