EENA Baibl taimz, wahn servant er slayv hoo da-mi wahn hows manija doz tek kayr a sombadi els hows er prapati. Di Heebroo er Greek werd weh deh eena di Baibl ku aalso meen oavaseeya er man in chaaj.

Jaykop son weh naym Joazef, da-mi wahn slayv da Eejip eena di hows a Potifa. Afta wahn wail, Potifa mi put Joazef in chaaj a di hoal hows. Az a mata a fak, Potifa “lef evriting weh mi bilangz tu hihn eena Joazef kyaa.” (Gen. 39:2-6) Laytaraan, wen Fayro mi mek Joazef di sekant moas powaful roola eena Eejip, Joazef mi apoint wahn hows manija fi luk afta ih hows.—Gen. 44:4.

Eena Jeezas day, peepl weh doz oan lan neva doz naamali liv wehpaat dehn du dehn faamin. Dehn doz liv eena di siti, soh dehn doz put wahn man in chaaj fi soopavaiz di werk pahn di faam.

Hoo mi kwalifai fi bee wahn hows manija? Eena di taim a di apasl dehn, wahn Roaman raita weh naym Columella mi rait dat wahn slayv weh mi geh chooz fi bee wahn oavaseeya, er wahn hows manija, mi need fi bee sombadi weh mi “laan fi du di werk gud.” Ih mi need fi bee sombadi hoo mi wahn “mek shoar dat di werkaz du dehn werk, bot ih neva sopoas tu bee kruwil.” Ih mi kantinyu fi seh: “Ih mi impoatant dat wahn hows manija neva tink dat ih noa evriting, an ih mi sopoas tu aalwayz waahn laan nyoo tingz.”

Di Baibl yooz di egzampl a wahn man in chaaj fi iloschrayt som a di werk weh tek plays eena di Kristyan kangrigayshan. Fi egzampl, di apasl Peeta inkorij Kristyanz fi yooz dehn speshal gif weh Gaad bles dehn wid “fi serv adaz.”—1 Peet. 4:10.

Jeezas ihself mi yooz di egzampl a wahn man hoo mi geh put in chaaj eena di iloschrayshan da Look 16:1-8. Pahn tap a dat, eena wahn prafesi bowt di sain a wen Jehoava apoint Jeezas az King, Jeezas mi pramis ih falowaz dat hihn wahn chooz wahn “servant weh waiz.” Di mayn asainment a da servant wahn bee fi stay di giv spirichwal food tu Krais falowaz joorin di taim a di en. (Mach. 24:45-47; Look 12:42) Wee soh tankful dat wee ku geh di poblikayshanz weh di waiz servant pripyaa ahn mek avaylabl aal oava di werl.