1. Akaadn tu Machyu 28:18-20, weh Jeezas mi koman ih disaiplz fi du?

AFTA Jeezas geh rayz op bak fahn di ded, ih mi apyaa tu ih disaipl dehn wen dehn mi deh da Gyalilee. Hihn mi ga sohnting impoatant fi tel dehn. Ahn wi ku fain di tingz weh hihn mi waahn tel dehn da Machyu 28:18-20.—Reed.

2. Weh kweschanz wi wahn ansa eena dis aatikl?

² Jeezas ekspek aala Gaad servant dehn tudeh fi mek disaiplz tu. Soh den, mek wi diskos chree kweschan weh ga fi du wid di asainment weh Jeezas gi wi. Fers, insteda onli teech peepl weh Gaad waahn wi du, wat els wi shuda du? Sekant, how aala di poblishaz eena di kangrigayshan ku help Baibl styoodents groa spirichwali? Ahn terd, how wee ku help wi bradaz ahn sistaz weh stap preech fi staat tu mek disaiplz agen?

3. Weh spesifik inschrokshanz Jeezas mi inklood eena ih koman?

³ Wi noh haftu wanda weh Jeezas inschrokshanz meen. Wi haftu teech peepl fi obay evriting weh hihn mi koman wi fi du; dat eezi fi andastan. Bot wi noh waahn lef owt wahn impoatant deetayl weh deh eena Jeezas inschrokshanz. Jeezas neva seh: ‘Teech dehn aal di tingz weh Ai mi koman unu.ʼ Insted, ih mi seh: “Teech dehn fi obay aal di tingz weh Ai mi koman unu.” Fi fala Jeezas inschrokshanz, wi kyaahn jos teech wi Baibl styoodent weh fi du, wi haftu shoa ahn how fi du it. (Aks 8:31) Bot wai wi need fi du dat?

4. Yooz di egzampl eena di paragraaf fi eksplayn how wi ku teech wahn Baibl styoodent fi obay weh Jeezas koman wi fi du.

 ⁴ How wi ku teech wahn Baibl styoodent fi obay weh Jeezas koman wi fi du? Di neks egzampl ku help wi fi andastan weh wee need fi du. Da how sohnbadi weh di teech wahn persn fi jraiv help ahn fi obay di chrafik laa dehn? Fers, ih teecha haftu goh oava di difrent laa dehn wid ahn bifoa ih akchwali staat tu jraiv. Ahn wen di styoodent get pahn di road, an ih di put intu praktis evriting weh ih don laan, di teecha wahn dehdeh fi gaid ahn an giv ahn advais. Weh wi ku laan fahn da egzampl?

5. (a) Akaadn tu Jan 14:15 ahn 1 Jan 2:3, weh wi need fi teech wi Baibl styoodent dehn fi du? (b) Gi sohn egzampl a how wi ku gaid wi Baibl styoodent dehn.

⁵ Wen wi stodi di Baibl wid peepl, wi teech dehn weh Gaad waahn wi du. Bot wi haftu du moa dan dat. Wi haftu teech dehn fi put intu praktis di tingz weh dehn laan. (Reed Jan 14:15; 1 Jan 2:3.) Bai di tingz weh wee du, wi ku shoa wi Baibl styoodent dehn how fi yooz Baibl prinsiplz eena dehn laif, weda dehn deh da skool er werk, er weda dehn jos di rilaks. Wi ku tel dehn bowt sohnting weh hapm tu wi eena fi wee laif fi shoa dehn dat wen wi mi yooz weh wi laan fahn di Baibl, ih mi kip wi owta chrobl er fi shoa dehn how ih mi help wi fi mek wahn waiz disizhan. Ahn weneva wi deh wid wi Baibl styoodent, wi ku pray tu Jehoava an aks ahn fi gaid di styoodent wid ih hoali spirit.—Jan 16:13.

6. Wat els wi need fi du wen wi di teech adaz fi obay Jeezas komanment dehn?

⁶ Wat els wi need fi du wen wi di teech adaz fi obay Jeezas komanment dehn? Wi need fi help wi Baibl styoodent dehn fi ga di dizaiya fi mek disaiplz. Sohn Baibl styoodent mait frayd fi goh owt goh preech. Soh wi need fi bee payshent wid dehn wail wi di help dehn fi andastan di Baibl chroot dehn beta soh dat dehn fayt ku geh schranga. Den dat wahn toch dehn haat, ahn dehn wahn ga di dizaiya fi goh owt goh preech. Bot weh wi need fi du fi help wi Baibl styoodent dehn fi ga di dizaiya fi shayr di gud nyooz wid ada peepl?

7. How wi ku help wahn Baibl styoodent fi ga di dizaiya fi shayr di gud nyooz wid ada peepl?

⁷ Wi ku aks wi Baibl styoodent kweschanz laik: “How yu laif geh beta afta yu mi put intu praktis di tingz weh yu laan fahn di Baibl? Yoo tink dat ada peepl need fi hyaa dis mesij? Weh yoo ku du fi help dehn?” (Prov. 3:27; Mach. 9:37, 38) Shoa yu Baibl styoodent di chrak dehn weh deh eena wi Teechin Toolbaks ahn mek ih chooz wich wan ih tink ih relitiv dehn, ih fren dehn, er di peepl dehn weh ih werk wid wuda bee inchrestid eena. Yu ku gi yu Baibl styoodent wahn gud amonk a dehndeh chrak. Ahn den praktis wahn prezentayshan wid ahn fi teech ahn how ih ku aafa di chrak eena wahn kain way. An af koars, wen wi Baibl styoodent kwalifai fi goh preech, wi need fi werk lang wid ahn soh dat wi ku gaid ahn.—Eccl. 4:9, 10; Look 6:40.

8. Wai ih impoatant dat wi Baibl styoodent dehn ga wahn schrang lov fi Gaad ahn fi peepl? (Si di baks “ How fi Help Wi Baibl Styoodents Ga Wahn Schranga Lov fi Gaad.”)

⁸ Noh ferget dat Jeezas mi tel wi fi teech adaz fi “obay aal di tingz” weh hihn mi koman wi fi du. Af koars, dat inklood too a di moas impoatant komanment, weh da fi lov Gaad ahn fi lov peepl. Ahn dehndeh too komanment ga wahn lat fi du wid di preechin werk ahn di werk fi mek disaiplz.  (Mach. 22:37-39) Wai wi seh dat? Wel, di moas impoatant reezn wai wi preech da bikaaz wi lov Gaad ahn wi lov peepl. Ahn wi ku andastan wai sohn Baibl styoodent frayd fi goh preech. Bot wi ku help dehn fi si dat lee bit bai lee bit Jehoava wahn help dehn fi get oava da fyaa. (Ps. 18:1-3; Prov. 29:25) Di baks weh goh lang wid dis aatikl help wi fi si how wi ku help wi Baibl styoodent fi ga wahn schranga lov fi Gaad. Bot weh di kangrigayshan ku du fi help di Baibl styoodent shoa moa lov?

9. How wahn persn weh di laan fi jraiv di laan sohn impoatant lesn? Yooz di egzampl eena di paragraaf.

⁹ Mek wi goh bak tu di egzampl bowt di persn weh jos di laan how fi jraiv. Az ih di jraiv chroo chrafik wid ih teecha rait neks tu ahn, how ih di laan sohn impoatant lesn? Ih di laan wen ih lisn tu di persn weh di teech ahn how fi jraiv ahn wen ih luk pahn di ada gud jraiva dehn rong ahn. Fi egzampl, ih teecha mait point owt wahn kain jraiva weh giv way tu wahn neks persn an alow da persn fi goh fronta ahn. Er ih mait point tu wahn jraiva weh mi kain inof fi tek aaf ih hai beem soh dat ih eeziya fi mek di ada jraiva dehn ku si. Dehndeh egzampl wahn help di persn weh di laan how fi jraiv fi praktis dehn sayhn ting wen ih deh pahn di road.

10. Weh ku help wahn Baibl styoodent fi groa spirichwali?

¹⁰ Sayhn way soh, wen wahn Baibl styoodent staat tu chravl pahn di road tu laif, ih noh onli laan fahn di wan weh stodi di Baibl wid ahn bot ih aalso laan fahn di gud egzampl a adaz weh serv Jehoava. Soh den, da weh wahn help di Baibl styoodent fi mek spirichwal proagres? Ih need fi goh da di Kristyan meetin dehn. Bot wai? Bikaaz di tingz weh ih hyaa da di meetin dehn wahn help ahn fi laan moa, dehn wahn schrentn ih fayt, ahn dehn wahn aalso mek ih lov fi Gaad geh schranga. (Aks 15:30-32) Aalso, wen di styoodent goh da meetin, di persn weh stodi di Baibl wid ahn ku inchrojoos ahn tu ada bradaz ahn sistaz weh praabli fays di sayhn chalenjiz weh di Baibl styoodent fays. Ahn di styoodent wahn si lata gud egzampl a bradaz ahn sistaz di shoa lov eena di kangrigayshan. Mek wi luk pahn sohn egzampl.

11. Wat da sohn egzampl wahn Baibl styoodent mait si eena di kangrigayshan, ahn how dehndeh egzampl ku help ahn?

¹¹ Wahn Baibl styoodent hoo da wahn singl payrent mait noatis dat wahn Kristyan sista deh eena di saym sichuwayshan az shee. Ih toch di styoodent haat fi si how haad di sista chrai fi goh da di meetin dehn wid aala ih chiljren. Wahn Baibl styoodent weh di fain it haad fi stap smoak mait geh fi noa wahn brada weh yoostu smoak tu. Di brada tel di Baibl styoodent dat afta ih lov fi Gaad mi geh schranga ahn schranga, dat mi moov ahn fi stap smoak. (2 Kor. 7:1; Fil. 4:13) Afta di brada tel di Baibl styoodent weh aal ih mi haftu du fi stap smoak, ih tel ahn: “Yoo ku stap tu.” Dat inkorij di styoodent ahn help ahn fi bee moa kanfident dat ih ku stap smoak. Wahn yong uman weh di stodi di Baibl ku tel dat wahn yong sista reeli injai ih laif az wahn Witnis. Wen di yong uman si dat, shee waahn laan moa bowt wai di sista aalwayz luk soh hapi.

12. Wai wi ku seh dat evribadi eena di kangrigayshan ku du sohnting fi help di Baibl styoodent dehn?

¹² Wen Baibl styoodents geh fi noa wahn lata faytful bradaz ahn sistaz, fi dehn egzampl teech di styoodents weh ih meen fi lov Gaad ahn fi lov peepl. (Jan 13:35;  1 Tim. 4:12) Aalso, laik weh wi si erliya, poblishaz ku teech wahn Baibl styoodent how fi deel wid chalenjiz weh simila tu di wan dehn weh di styoodent fays. Dehndeh egzampl teech di Baibl styoodent dat ih pasabl fi mek di chaynjiz weh ih need fi mek fi kwalifai fi bee Krais disaipl. (Deut. 30:11) Dat da wai wi ku seh dat evribadi eena di kangrigayshan ku du sohnting fi help Baibl styoodents. (Mach. 5:16) Da weh yoo chrai fi du fi inkorij Baibl styoodents weh goh da di meetin dehn?

13-14. How Jeezas mi chreet ih apasl dehn wen dehn mi diskorij?

¹³ Wi waahn help wi bradaz ahn sistaz weh stap preech fi staat tu preech agen ahn mek disaiplz. Di way how Jeezas mi chreet ih apasl dehn wen dehn mi diskorij shoa wi weh wee ku du tudeh.

¹⁴ Da di en a Jeezas minischri pahn ert, rait bifoa ih mi ded, aala ih apasl dehn mi “ron lef ahn.” (Maak 14:50; Jan 16:32) Joorin da taim, Jeezas apasl dehn mi reeli diskorij. Soh da how Jeezas mi chreet dehn? Lee wail afta Jeezas geh rayz op bak fahn di ded, ih tel som a ih falowaz: “Noh frayd. Goh ahn ripoat tu mi breda dehn [dat Ah geh rayz op bak fahn di ded].” (Mach. 28:10a) Jeezas neva giv op pan ih apasl dehn. Eevn doa dehn mi abandan hihn, ih stil kaal dehn “mi breda dehn.” Jos laik how Jehoava shoa mersi ahn fergivnis, Jeezas mi shoa dehndeh saym kwalitiz tu.—2 Ki. 13:23.

15. How wi feel bowt wi bradaz ahn sistaz weh stap preech?

¹⁵ Sayhn way soh, wi reeli kay bowt wi bradaz ahn sistaz weh stap preech. Dehn da stil wi bradaz ahn sistaz, ahn wi lov dehn wahn lat! Wi noh ferget how haad dehn mi werk fi Jehoava, ahn som a dehn mi werk haad fi lata yaaz. (Heeb. 6:10) Wi reeli mis dehn! (Look 15:4-7) Soh how wi ku kapi Jeezas ahn shoa dat wi reeli kay bowt dehn?

16. How wi ku shoa dat wi kay bowt wi bradaz ahn sistaz weh stap preech?

¹⁶ Invait dehn tu di meetin dehn eena wahn kain way. Jeezas mi inkorij ih apasl dehn wen ih mi invait dehn da wahn meetin. (Mach. 28:10b; 1 Kor. 15:6) Sayhn way soh, wi waahn inkorij wi bradaz ahn sistaz fi staat tu goh da di meetin dehn if dehn noh di goh agen. Ahn wi mait haftu invait dehn wahn lata taim bifoa dehn aksep wi invitayshan. Wi noa fi shoar dat Jeezas mi onli hapi wen ih apasl dehn mi aksep fi hihn invitayshan.—Kompyaa Machyu 28:16 ahn Look 15:6.

17. How wi shuda goh aan wen wahn brada er sista weh mi stap goh da di meetin dehn staat tu goh agen?

¹⁷ Gi dehn wahn waam welkom. Jeezas mi welkom ih disaipl dehn wen dehn mi meet op wid ahn, an dat mi mek dehn feel reeli hapi. Jeezas neva wayt fi mek dehn goh op tu ahn, hihn mi gaan op tu dehn fers ahn staat tu taak tu dehn. (Mach. 28:18) Weh wi wahn du wen wi si dat wahn brada er sista weh noh kohn da meetin lang taim shoa op da di Kingdom Haal? Wi shuda goh op tu ahn an giv ahn wahn waam welkom. At fers, wi mait wori dat wi noh wahn noa weh fi seh. Bot widowt mek ih feel shaym, wi ku jos tel ahn how hapi wi hapi fi si ahn.

18. How wi ku inkorij bradaz ahn sistaz weh stap preech?

¹⁸ Inkorij dehn. Jeezas disaipl dehn mi praabli feel laik dehn mi wahn kyaahn preech di gud nyooz eena di hoal werl.  Soh fi inkorij ih disaipl dehn, Jeezas mi tel dehn: “Ah wahn deh wid unu evri day.” (Mach. 28:20) Yu tink dat mi help ih disaipl dehn? Yes. Bikaaz rait away, dehn mi “kantinyu fi teech widowt stap ahn fi shayr di gud nyooz.” (Aks 5:42) Bradaz ahn sistaz weh stap preech need inkorijment tu. Dehn mait feel frayd fi staat tu preech agen. Wi ku inkorij dehn ahn tel dehn dat dehn noh wahn haftu preech bai dehnself. Ahn weneva dehn redi, wi ku werk lang wid dehn eena di minischri. Wi noa fi shoar dat dehn wahn hapi fi geh help fahn wi wen dehn staat tu preech agen. Ahn wen wi shoa di bradaz ahn sistaz weh stap preech dat wi stil si dehn az paat a wi famili, dehn mait waahn du moa fi Jehoava agen. Ahn den evribadi eena di kangrigayshan wahn bee hapi.

19. Wat da fi wee dizaiya, ahn wai?

¹⁹ How lang wee wahn kantinyu fi preech ahn mek disaiplz? Til di en a dis sistem a tingz. (Mach. 28:20; si di Glasari, “En a di sistem a tingz.”) Yu tink wi wahn ku preech ahn mek disaiplz til da taim? Dat da fi wee goal! Wi hapi fi giv a wi taim, enerji, ahn moni fi help evribadi weh “ga di rait haat kandishan fi get evalastin laif.” (Aks 13:48) Wen wi du dis, wi di fala Jeezas egzampl. Hihn mi seh: “Mai food da fi du di wil a di Wan weh sen mi, ahn fi finish di werk weh hihn gi mi fi du.” (Jan 4:34; 17:4) Ahn dat da aalso fi wee dizaiya. Wee waahn finish di werk weh Jeezas gi wi fi du. (Jan 20:21) Ahn wi waahn adaz, inkloodin wi bradaz ahn sistaz weh noh aktiv eena di kangrigayshan nohmoh, fi stay faytful eena dis werk lang wid wi.—Mach. 24:13.

20. Akaadn tu Filipiyanz 4:13, wai wi ku finish di werk weh Jeezas koman wi fi du?

²⁰ Da chroo, ih noh eezi fi du weh Jeezas koman wi fi du. Bot wi noh di du dis werk pahn wi oan. Jeezas mi pramis wi dat ih mi wahn deh wid wi. Wen wi mek disaiplz, “wee di werk lang wid Gaad” ahn wi da “falowaz a Krais.” (1 Kor. 3:9; 2 Kor. 2:17) Soh den, wee kud finish dis werk. Ahn da wahn privilij fi du dis werk ahn fi help adaz fi du di saym werk tu!—Reed Filipiyanz 4:13.