WAHN lata bradaz ahn sistaz mi lef dehn hoam konchri soh dat dehn ku mek moa moni eena ada konchriz, bot dehn disaid fi goh bak hoam. Bikaaz dehn lov Jehoava ahn dehn lov peepl, dehn moov tu ayryaz weh need moa Kingdom poblishaz. (Mach. 22:37-39) Wat da som a di sakrifais dehn mi haftu mek ahn how Jehoava mi bles dehn? Fi fain owt, mek wi foakos pahn Cameroon, wahn konchri da Africa.

Eena 1998 wahn brada weh naym Onésime mi lef ih hoam da Cameroon an ih gaahn liv da wahn neks konchri fi 14 yaaz. Wan day, da wahn Kristyan meetin, ih hyaa wahn iloschrayshan bowt di preechin werk. Di speeka mi seh: “If too fren goh fishin eena too difrent spat, ahn wan di kech moa dan di ada wan, weh yu tink di wan weh noh di kech az moch fish shuda du? Yu noh tink ih shuda moov tu di spat weh ih wuda kech moa fish?”

Da iloschrayshan mi mek Onésime tink bowt weda ih shuda goh bak hoam da Cameroon wehpaat lata peepl mi waahn stodi di Baibl. Bot hihn mi-di wori bowt weda er nat hihn kuda mi geh yoostu liv da Cameroon agen. Fi fain owt, Onésime mi vizit Cameroon fi siks monts. Den eena 2012, ih moov bak fi liv deh.

Onésime seh: “Ah mi haftu geh yoostu di hat weda ahn di way a laif da Cameroon. Ah mi aalso haftu geh yoostu di haad seet dehn weh mi deh da di Kingdom Haal. Bot, di moa Ah foakos pahn di proagram, di moa Ah staat tu ferget bowt di komfatabl seet dehn weh mi deh da di Kingdom Haal weh Ah yoostu goh tu bifoa Ah mi moov bak da Cameroon.” Onésime seh dis wid wahn smail pan ih fays.

Eena 2013, Onésime geh marid tu Géraldine, wahn sista weh gaahn bak da Cameroon afta ih mi-di liv da France fi nain yaaz. How Jehoava mi bles dis kopl bikaaz dehn mi put spirichwal tingz fers eena dehn laif? Onésime seh: “Wi gaahn da di Skool fi Kingdom Ivanjelaizaz ahn den wi staat tu serv da Betel. An eena di paas yaa, 20 Baibl styoodents eena wi kangrigayshan mi geh baptaiz. Now, Ah feel laik Ah deh da di rait spat fi ‘kech fish.ʼ” (Maak 1:17, 18) Géraldine seh: “Ah geh moa blesin dan weh Ah kuda eva imajin.”

Judith mi moov tu di United States, bot shee mi waahn du moa eena ih servis tu Jehoava. Shee seh: “Evritaim Ah mi vizit mi famili da Cameroon, Ah krai wen da mi taim fi goh bikaaz Ah mi haftu lef bihain di peepl weh Ah mi staat tu stodi di Baibl wid.” Bot Judith mi frayd fi moov bak da Cameroon. Shee mi ga wahn jab da Stayts weh mi ga  gud pay ahn weh mi alow ahn fi help ih pa wid ih medikal ekspens dehn da Cameroon. Bot eevn soh, Judith mi chros eena Jehoava ahn shee mi disaid fi moov bak. Shee seh dat shee mi mis di komfatabl laif weh ih mi gat wen ih mi liv da Stayts. Shee mi pray tu Jehoava fi help ahn geh yoostu dis nyoo way a laif, ahn shee mi aalso geh inkorijment fahn wahn serkit oavaseeya an ih waif.

Judith seh: “Wen Ah mi moov bak da Cameroon, eena jos chree yaaz, Ah mi help foa peepl fi geh baptaiz ahn dat mi mek Ah feel reeli hapi.” Den Judith mi staat tu serv az wahn speshal painyaa. Ahn tudeh, shee di serv lang wid ih hozban, Sam-Castel, eena di serkit werk. Bot weh mi hapm tu Judith pa? Wel, shee an ih famili mi fain wahn haaspital eena wahn neks konchri weh mi wilin fi pay fi ih pa serjri. Ahn wi hapi fi noa dat di serjri gaahn gud.

Wahn brada weh naym Victor mi moov tu Canada. Afta ih mi reed wahn Wachtowa aatikl bowt haiya ejukayshan, ih staat tu tink bowt fi hihn oan ejukayshan. Soh ih kom owta yooniversiti an ih disaid fi tek difrent koars weh mi wahn help ahn fi laan wahn chrayd. Hihn seh: “Dat mi alow mi fi geh wahn jab soona. Ih mi aalso help mi fi painyaa​—sohnting weh Ah mi waahn du fahn lang taim.” Laytaraan, Victor mi geh marid tu Caroline, ahn den dehn mi vizit Cameroon. Dehn mi vizit di branch aafis wen dehn mi dehdeh, ahn di bradaz inkorij dehn fi kohn serv da Cameroon. Victor seh: “Wi neva ga no reezn fi seh no bikaaz da neva laik if wi mi wahn haftu lef wahn lata tingz bihain, soh wi kuda mi aksep di invitayshan.” An eevn doa Caroline mi ga sohn helt prablemz, dehn stil disaid fi goh hed ahn moov tu Cameroon.

Victor ahn Caroline mi staat tu serv az regyula painyaa fi help di peepl weh dehn mi meet weh mi inchrestid eena di Baibl. Ahn dehn mi gat inof moni sayv op soh dat dehn neva haftu werk eena di biginin. Afta dat, dehn gaahn werk da Canada fi wahn fyoo monts ahn dat mi alow dehn fi goh bak da Cameroon ahn kantinyu painyaa. How Jehoava mi bles dehn? Wel, dehn gaahn da di Skool fi Kingdom Ivanjelaizaz, dehn mi serv az speshal painyaaz, ahn now dehn di werk az kanschrokshan servants eena di aaganaizayshan. Victor seh: “Bikaaz wi mi lef wi komfatabl laif, wi mi haftu pen pahn Jehoava, ahn hihn tek kayr a wi.”

Eena 2002, Alain, wahn brada weh mi-di goh da yooniversiti da Germany, mi reed di chrak weh naym Youths​—What Will You Do With Your Life? Di infamayshan eena da chrak mi inkorij ahn fi set nyoo goalz. Soh eena 2006, ih gaahn da di Ministeeryal Chraynin Skool an ih mi geh di asainment fi goh serv da Cameroon, di konchri wehpaat ih mi baan.

Da Cameroon, Alain mi fain wahn paat-taim jab. Laytaraan, ih mi fain wahn jab weh mi giv ahn beta pay, bot hihn mi-di wori dat da jab neva mi wahn alow ahn fi du az moch eena di minischri. Soh wen ih mi geh di invitayshan fi goh serv az wahn speshal painyaa, hihn neva tink twais fi aksep it. An eevn doa fi hihn baas mi aafa ahn moa pay, Alain mi stik tu ih disizhan. Laytaraan, Alain mi geh marid tu Stéphanie, hoo mi liv da France fi lata yaaz. Wat da sohn chalenjiz shee mi fays afta ih moov tu Cameroon?

 Stéphanie seh: “Ah mi ga sohn lee helt prablemz an alerji, bot Ah mi manij fi geh regyula chreetment ahn dat mi help mi wahn lat.” Jehoava bles di kopl sayka weh dehn neva giv op eena dehn asainment. Alain seh: “Wen wi gaahn preech eena wahn faar vilij weh naym Katé, wi mi fain lata peepl weh mi waahn stodi di Baibl. Ahn laytaraan, wi kuda mi kandok wi Baibl stodiz oava di foan. Too a dehndeh Baibl styoodent mi geh baptaiz, ahn wahn groop mi staat op rait deh.” Stéphanie aalso seh: “Notn mek wi hapiya dan fi help peepl kwalifai fi dedikayt dehn laif tu Jehoava. Bikaaz wi di serv ya, wi ekspeeryens da jai lata taim.” Tudeh, Alain ahn Stéphanie di serv eena di serkit werk.

Gisèle mi geh baptaiz wail ih mi-di goh da medikal skool da Italy. Wen ih si how di kopl weh mi stodi di Baibl wid ahn mi put spirichwal tingz fers eena dehn laif, dat mi reeli impres shee, ahn shee mi waahn du moa eena di minischri tu. Soh Gisèle mi staat tu regyula painyaa wail ih mi-di finish skool.

Gisèle mi waahn du moa eena ih servis tu Jehoava da Cameroon, bot sohn tingz mi-di wori shee. Shee seh: “Ah mi wahn haftu giv op mi leegal rait fi liv da Italy an Ah mi wahn deh faar fahn mi famili ahn frenz.” Bot eevn soh, eena May 2016, Gisèle mi moov bak da Cameroon. Lee wail afta dat, shee geh marid tu Léonce, ahn di branch aafis da Cameroon mi inkorij di kopl fi moov tu Ayos, wahn tong weh mi need Kingdom poblishaz.

How tingz mi stan da Ayos? Gisèle seh: “Wahn lata taim, wi neva ga no korant, soh wi kudn eevn chaaj wi foan. Ahn moas a di taim di foan dehn neva werk. Ah mi haftu laan fi kuk pahn wahn faiya haat, ahn wi yoostu kehr weelbaro ahn flashlait fi goh get waata da nait wen noh moch peepl mi deh da di spring.” Weh mi help di kopl fi noh giv op? Gisèle seh: “Jehoava spirit, wahn gud marij paadna, ahn spirichwal ahn fainanshal help fahn famili ahn frenz mi help wi.”

Yu tink Gisèle hapi dat shee gaahn bak da ih hoam konchri? Shee seh: “Af koars! Ah onli hapi wid di disizhan weh Ah mek. At fers, wi mi fays lee chalenjiz ahn sohntaim wi mi eevn geh diskorij, bot wans wi mi laan how fi handl dehndeh tingz, mee ahn mi hozban mi feel laik wi mi du egzakli weh wi mi need fi du. Wi chros eena Jehoava ahn now wi feel kloasa tu ahn.” Léonce ahn Gisèle gaahn da di Skool fi Kingdom Ivanjelaizaz, ahn fi now, dehn di serv az speshal painyaaz.

Laik wahn fishaman weh brayv inof fi fays difrent chalenjiz jos fi kech lata fish, bradaz ahn sistaz weh goh bak da dehn hoam konchri wilin fi mek difrent sakrifais fi help peepl weh ga di rait haat kandishan ahn weh waahn laan di chroot. Fi shoar, Jehoava noh wahn ferget dehnya haad-werkin bradaz ahn sistaz ahn di lov weh dehn shoa fi ih naym. (Neh. 5:19; Heeb. 6:10) If yoo di liv faar fahn hoam bot yu hoam konchri ga wahn need fi Kingdom poblishaz, yu tink yu ku goh bak fi help owt? If yu du dat, fi shoar Jehoava wahn bles yu!​—Prov. 10:22.