Ai mi baan eena 1983. Ai da-mi wahn helti chail fi di fers kopl yaaz a mi laif, bot wen Ah tern ten, Ah staat tu feel sohn bad payn aal chroo mi badi. Bowt too yaaz afta dat, Ah wayk op wahn maanin an Ah kudn moov. Noh mata how haad Ah mi chrai, Ah jos neva ga di schrent fi moov. Eva sins da day, Ah kudn waak agen. Mai siknis mi aalso stap mi fahn groa.

Ah mi get soh sik dat Ah kudn lef mi hows; Ah mi haftu stay hoam kaaz a mi sichuwayshan. Wahn kopl monts afta dat, too Witnis mi kohn vizit mi. If enibadi wuda chrai vizit mi, Ah wuda chrai haid fahn dehn, bot pahn da day Ah mek di Witnisiz taak tu mi. Wen dehn mi-di taak tu mi bowt Paradais, ih mek Ah memba weh Ah hyaa wen Ah mi faiv yaaz oal. Joorin da taim, wahn mishineri weh naym Jethro, weh mi liv da Suriname, mi vizit wi vilij wans a mont ahn hihn mi stodi di Baibl wid mi pa. Jethro mi chreet mi eena wahn kain way. Hihn da-mi wahn reeli gud persn. Ahn mi grani ahn grampa mi kehr mi da som a di meetin dehn weh di Witnisiz yoostu gat da wi vilij. Soh wen Florence, wan a di laydi dehn weh mi vizit mi da day, aks mi if Ah mi waahn laan moa, Ah seh yes.

Soh Florence kohn bak wid ih hozban, Justus, ahn di too a dehn staat tu stodi di Baibl wid mi. Wen dehn mi noatis dat Ah neva noa how fi reed, dehn teech mi how fi reed. Ahn lee wail afta dat, Ah mi-di reed pahn mi oan. Den wan day, di kopl tel mi dat dehn geh wahn asainment fi goh serv da Suriname. Sad fi seh, nobadi mi lef da Orealla weh kuda mi kantinyu stodi di Baibl wid mi. Bot Ah mi hapi dat Jehoava neva ferget mi.

Noh tu lang afta dat, wahn painyaa weh mi naym Floyd kohn da Orealla, ahn hihn mi meet mi wen ih mi-di preech fahn tach hows tu tach hows. Wen ih aks mi if Ah mi waahn stodi di Baibl, Ah smail. Den ih aks mi: “Wai yu di smail?” Ah tel ahn dat Ah mi don stodi di broashoar What Does God Require of Us?, ahn dat Ah mi staat stodi di buk Knowledge That Leads to Everlasting Life. * Ah mi eksplayn tu ahn wai Ah neva mi-di stodi agen. Den hihn stodi di res a di Knowledge buk wid mi, bot den hihn mi geh  wahn nyoo asainment tu. Soh agen Ah neva ga sohnbadi fi stodi wid mi.

Bot eena 2004, Granville ahn Joshua, too speshal painyaaz, mi kohn serv da Orealla. Ahn wen dehn mi-di preech fahn tach hows tu tach hows, dehn fain mi. Wen dehn aks mi if Ah mi waahn stodi, Ah smail. Ah aks dehn fi stodi di Knowledge buk fahn di biginin wid mi. Ah mi waahn si if dehn mi wahn teech mi di sayhn ting dehn weh mi ada teechaz mi teech mi. Granville mi invait mi fi goh da di meetin dehn weh di Witnisiz mi gat rait eena di vilij. Eevn doa Ah neva lef mi hows fi bowt ten yaaz, Ah mi waahn goh. Soh Granville pik mi op, put mi eena wahn weelchyaa, ahn push mi tu di Kingdom Haal.

Laytaraan, Granville inkorij mi fi jain di Teeyokratik Minischri Skool. Hihn mi seh: “Yu mait kyaahn waak, bot yu ku taak. Wan day, yu wahn gi wahn poblik taak. Fi shoar ih wahn hapm.” Fi hihn inkorijin werdz mi help mi fi bee kanfident.

Ah mi staat tu goh preech wid Granville. Bot di road dehn mi tu rof fi di weelchyaa. Soh Ah aks Granville fi put mi eena wahn weelbaro ahn push mi rong. Ahn dat mi werk owt gud. Den eena Aypril 2005, Ah geh baptaiz. Lee wail afta dat, di bradaz chrayn mi fi bee rispansabl fi di lichricha ahn fi handl di song sistem da di Kingdom Haal.

Den, sad fi seh, eena 2007 mi pa mi ded eena wahn boat aksident. Wi famili mi shak wen dat hapm. Soh Granville mi pray wid wi ahn shayr sohn komfertin skripcha wid wi. Den too yaaz layta, wi mi geh wahn nada bad nyooz—Granville mi ded eena wahn boat aksident tu.

Wi lee kangrigayshan mi feel sad afta weh mi hapm, ahn wi neva ga no elda an onli wan ministeeryal servant. An Ai mi feel reeli sad wen Granville mi ded, kaaz hihn da-mi wahn kloas fren. Hihn mi help mi fi aalwayz jraa kloas tu Jehoava, ahn hihn mi mek shoar dat Ah gat evriting weh Ah need. Da di neks meetin afta Granville mi ded, Ah mi ga di asainment fi reed fi di Wachtowa Stodi. Ah onli mek it chroo di fers too paragraaf, ahn den afta dat, Ah staat tu krai an Ah kudn stap. Ah mi haftu kom aafa di stayj.

Ah staat tu feel beta wen sohn bradaz fahn wahn nada kangrigayshan mi kohn help wi da Orealla. Aalso, di branch aafis mi sen Kojo, hoo da-mi wahn speshal painyaa. An Ah mi hapi wen mi ma ahn mi yonga breda staat tu stodi di Baibl ahn geh baptaiz. Den eena Maach 2015, Ah geh apointid az wahn ministeeryal servant. Lee wail afta dat, Ah gi mi fers poblik taak. Da day, Ah smail ahn krai bikaaz Ah memba weh Granville mi tel mi yaaz bifoa dat: “Wan day, yu wahn gi wahn poblik taak. Fi shoar ih wahn hapm.”

Chroo di JW Braadkyaastin proagram dehn, Ah geh fi hyaa bowt ada bradaz ahn sistaz weh deh eena di saym sichuwayshan laik mai wan. Bot eevn doa dehn ga sohn seeryos helt prablemz, dehn stil ga wahn hapi laif weh ful a meenin. Ahn jos laik dehn, Ah ku stil du sertn tingz. Ah mi waahn du az moch az Ah kud fi Jehoava, soh Ah staat tu painyaa. Eena Septemba 2019, Ah mi geh sohn reeli gud nyooz! Da saym mont Ah fain owt dat Ah geh apointid fi serv az wahn elda eena wi kangrigayshan weh ga bowt 40 poblishaz.

Ah tankful fi di preshos bradaz ahn sistaz weh mi stodi wid mi ahn weh help mi fi serv Jehoava. Bot weh Ah reeli tankful fa da dat Jehoava neva ferget mi!