1. Akaadn tu Machyu 7:13, 14, wai wi ku seh dat wi di chravl dong wahn road?

AALA wi di chravl dong wahn road. Ahn fi wee goal da fi reech di nyoo werl, weh wi lovin Gaad Jehoava wahn rool oava. Evri day, wi chrai stay pahn di road weh wahn kehr wi tu laif. Bot jos laik weh Jeezas mi seh, da road naro ahn sohntaim ih haad fi stay pan it. (Reed Machyu 7:13, 14.) Ahn bikaaz non a wi noh perfek, ih eeziya fi mek wi kom aafa dis road.—Gal. 6:1.

2. Weh wi wahn diskos eena dis aatikl? (Koment pahn di baks “ Wen Wi Hombl, ih Eeziya fi Mek Chaynjiz.”)

² If wi disaid fi stay pahn di naro road weh kehr wi tu laif, wi haftu bee wilin fi chaynj wi tinkin, wi atichood, ahn di tingz weh wi du. Di apasl Paal mi inkorij di Kristyanz weh mi-di liv da Korint fi kantinyu ‘karek dehn tinkin.ʼ (2 Kor. 13:11) Da advais da fi wee tu. Eena dis aatikl, wi wahn diskos how di Baibl ku help wi fi mek chaynjiz ahn how spirichwali machoar frenz ku help wi fi stay pahn di road weh kehr wi tu laif. Wi wahn diskos wai ih mait bee haad fi fala som a di inschrokshan dehn weh Jehoava aaganaizayshan gi wi. Ahn wi wahn si dat wen wi hombl, wi wahn ku mek chaynjiz ahn stil bee hapi wail wi di serv Jehoava.

3. How Gaad Werd ku help wi?

³ Ih noh eezi fi egzamin weh wi di tink ahn weh wi di feel. Wai? Bikaaz wi haat chriki, an ih mait bee haad fi mek wi noa weh wi haat waahn wi du. (Jer. 17:9) Soh ih eezi fi ‘fool wiself.ʼ (Jay. 1:22) Dat da wai wi need fi yooz di Werd a Gaad fi si hoo wee pahn di eensaid, ahn den dat wahn help wi fi si ‘di tingz weh wi tink bowt eena wi haat ahn weh wi waahnt.ʼ  (Heeb. 4:12, 13) Soh eena wahn way, di Werd a Gaad da laik wahn eks-chray masheen; ih help wi fi si weh deh eensaida wi. Bot wi need fi bee hombl soh dat wi ku put intu praktis di advais weh wi get fahn di Baibl er fahn di bradaz weh di tek di leed eena Jehoava aaganaizayshan.

4. How wi noa dat King Saal mi en op fi bee wahn prowd man?

⁴ King Saal egzampl shoa wi weh ku hapm wen wi noh hombl. Saal mi en op fi bee soh prowd dat ih mi rifyooz fi admit, eevn tu ihself, dat ih mi need fi mek chaynjiz eena di way ih tink an eena di tingz weh ih du. (Ps. 36:1, 2; Hab. 2:4) Ahn dis mi playn fi si wen Jehoava mi gi Saal spesifik inschrokshan pahn weh ih shuda du afta ih ga vikchri oava di Amalekait dehn. Bot Saal neva lisn tu Jehoava. Ahn wen di prafit Samwel gaahn taak tu ahn bowt it, Saal mi rifyooz fi admit dat ih mi mek wahn mistayk. Insteda dat, hihn mi seh dat da neva wahn big deel ahn dat di peepl mi foas ahn fi du it. (1 Sam. 15:13-24) Ahn bifoa dat, Saal mi shoa da saym kaina atichood. (1 Sam. 13:10-14) Sad fi seh, hihn mi alow ih haat fi geh prowd. Ahn bikaaz ih neva karek ih tinkin, Jehoava disiplin ahn an ton ih bak pan ahn.

5. Weh wi ku laan fahn Saal egzampl?

⁵ Wi noh waahn bee laik Saal, soh wi need fi aks wiself dehnya kweschan: ‘Wen Ah fain advais eena di Werd a Gaad, Ai chrai fain difrent reezn wai Ah noh need fi obay it? Wen Ah mek wahn mistayk, Ai tink dat da noh reeli wahn big deel? Ai blaym ada peepl fi weh Ah du?ʼ If wi ansa tu eni a dehndeh kweschan da yes, den wi need fi mek chaynjiz eena wi tinkin an atichood. Kaaz if nat, wi wahn geh soh prowd dat Jehoava noh wahn waahn bee wi fren.—Jay. 4:6.

6. Wat da-mi di difrens bitween King Saal ahn King Dayvid?

⁶ Wahn big difrens deh bitween King Saal ahn King Dayvid. King Dayvid mi lov “di laa a Jehoava.” (Ps. 1:1-3) Dayvid mi noa dat Jehoava sayv di wan dehn weh hombl, bot Ih deh gens dehn wan weh prowd. (2 Sam. 22:28) Soh Dayvid mi alow Gaad laa fi chaynj di way ih tink. Hihn mi rait: “Ah wahn prayz Jehoava, hoo gi mi advais. Eevn joorin di nait, mi kanshans karek mi.”—Ps. 16:7.

7. Weh wi wahn du if wi hombl?

⁷ If wi hombl, wi wahn mek di Werd a Gaad karek wi rang tinkin bifoa wi disaid fi du di rang tingz weh di tink bowt. Gaad Werd wahn bee jos laik wahn vais weh tel wi: “Dis da di way. Waak eena it.” An ih wahn waan wi wen wi staat tu du sohnting weh rang. (Isa. 30:21) Wen wi lisn tu Jehoava, wi wahn benifit eena lata difrent wayz. (Isa. 48:17) Fi egzampl, wi noh wahn haftu feel shaym bikaaz sombadi mi need fi karek wi. Ahn wi wahn jraa kloasa tu Jehoava bikaaz wi wahn si how ih chreet wi laik wahn pa weh lov ahn tek kayr a ih pikni.—Heeb. 12:7.

8. Laik weh Jaymz 1:22-25 seh, how wi ku yooz di Werd a Gaad laik wahn miro?

⁸ Di Werd a Gaad da jos laik wahn miro. (Reed Jaymz 1:22-25.) Moas a wi luk eena wahn miro bifoa wi lef wi hows. Da way deh, wi wahn ku si if wi need fi fiks op wiself bifoa ada peepl si wi. Da di saym ting wid di Baibl. Wen wi reed it evri day, wi wahn ku si difrent wayz how wi ku mek chaynjiz eena wi tinkin ahn wi atichood. Wahn lata peepl noatis dat wen dehn reed di dayli teks bifoa dehn lef dehn hows, dat reeli help dehn. Dehn alow di tingz weh dehn reed fi gaid dehn tinkin. Den aal chroo di day, dehn luk fi wayz how dehn ku put intu praktis di  tingz weh dehn mi reed fahn di Werd a Gaad. Pahn tap a dat, wi need fi stodi Gaad Werd ahn meditayt pahn weh wi reed evri day. Dis mait song laik wahn lee ting, bot da wan a di moas impoatant ting dehn weh wi need fi du fi help wi stay pahn di naro road weh kehr wi tu laif.

9. Wai wahn fren mait haftu karek yu?

⁹ Yoo eva staat tu du sohnting weh mi-di dischrai yu rilayshanship wid Jehoava? (Ps. 73:2, 3) If wahn spirichwali machoar fren mi brayv inof fi karek yu, yoo mi lisn tu ih advais ahn put it intu praktis? If yu mi du dat, den yu du di rait ting. Ahn yu reeli apreeshiayt dat yu fren mi waan yu, noh chroo?—Prov. 1:5.

10. Weh yu shuda du if yu fren karek yu?

¹⁰ Gaad Werd tel wi: “Yu ku chros weh wahn fren seh, eevn wen ih hert.” (Prov. 27:6) Weh dis skripcha meen? Tink bowt dis iloschrayshan: Imajin dat yu di wayt fi kraas di schreet ahn yu geh wahn mesij pahn yu foan. Ahn yu noh eevn kanshos dat yu staat tu kraas di schreet, bikaaz yu deh pahn yu foan. Den rait away, yu fren grab yu han an ih haal yu bak pahn di said a di road. Ih haal yu soh haad dat yu han geh brooz op anaal. Bot bikaaz a weh ih du, wahn kaar neva nak yu dong. Eevn if di brooz pahn yu han hert yu fi wahn lata dayz, yoo wuda geh beks bikaaz a weh yu fren mi du? Af koars nat! Yu kuda mi looz yu laif! Saym way soh, at fers yu mait kech feelinz if wahn fren waan yu bikaaz yu seh er du sohnting weh noh goh lang wid Jehoava raichos standadz. Bot noh du dat; dat wuda bee foolish. (Eccl. 7:9) Insteda kech feelinz, yu fi bee tankful dat yu fren mi brayv inof fi taak tu yu bowt it.

11. Wai sombadi mait ignoar di gud kongsl weh dehn get fahn wahn fren?

¹¹ Wai sombadi mait ignoar di gud kongsl weh dehn get fahn wahn lovin fren? Maybi da kaaz ih prowd. Prowd peepl onli hyaa “weh dehn waahn hyaa.” Ahn dehn “stap lisn tu di chroot.” (2 Tim. 4:3, 4) Dehn feel laik dehn noh need advais, bikaaz dehn tink dat dehn waiza er moa impoatant dan ada peepl. Bot di apasl Paal mi rait: “If enibadi tink dat dehn da sohnting wen reeli dehn da notn, dehn di fool op dehn oanself.” (Gal. 6:3) Ahn nobadi ku seh dis beta dan King Salaman; hihn mi rait: “Wahn poa bot waiz chail beta dan wahn oal ahn foolish king weh noh waahn lisn tu advais nohmoh.”—Eccl. 4:13.

12. Weh wi ku laan fahn di apasl Peeta egzampl eena Galayshanz 2:11-14?

¹² Tink bowt weh di apasl Peeta mi du wen di apasl Paal mi karek ahn fronta ada peepl. (Reed Galayshanz 2:11-14.) Peeta kuda mi geh beks wid Paal bikaaz a di way how ih mi taak tu ahn, an espeshali bikaaz Paal mi du it fronta ada peepl. Bot Peeta mi waiz. Ih mi aksep di kongsl an ih neva hoal malis. Ahn laytaraan, hihn mi eevn rifaa tu Paal az ih “dyaa brada.”—2 Peet. 3:15.

13. Weh yu need fi tink bowt bifoa yu kongsl sohnbadi?

¹³ If yu eva feel laik yu need fi gi yu fren kongsl, wat da sohn tingz yu need fi memba? Bifoa yu goh taak tu yu fren, yu need fi aks yuself, ‘Ai di goh aan laik if Ai “moa raichos dan evribadi els”?ʼ (Eccl. 7:16) Wahn persn weh tink dat ih moa raichos dan evribadi els yooz ih oan standadz fi joj peepl; ih noh yooz Jehoava standadz. Ahn peepl laik dat mait eevn mek ada peepl feel wers bowt dehnself. Soh afta yu tek wahn aanis luk pahn yuself ahn yu si dat yu stil need fi kongsl yu fren, den tel ahn wat da di prablem ahn yooz difrent kweschan fi help  ahn andastan dat ih du sohnting rang. Mek shoar dat di kongsl kohn fahn Gaad Werd. Ahn memba dat yu jab da noh fi joj yu fren bot da fi help ahn andastan how Jehoava feel bowt weh ih di du. (Roam. 14:10) Soh pen pahn di wizdom weh yu fain eena di Baibl, ahn wen yu di kongsl sombadi, aalwayz ga kompashan jos laik Jeezas. (Prov. 3:5; Mach. 12:20) Wai? Bikaaz Jehoava wahn chreet wee di saym way wi chreet ada peepl.—Jay. 2:13.

14. Da weh Jehoava aaganaizayshan gi wi?

¹⁴ Fi help wi stay pahn di road tu laif, Jehoava yooz ih aaganaizayshan fi gaid wi. Ahn fi hihn aaganaizayshan gi wi lata difrent veedyo ahn poblikayshan, an ih gi wi di meetin dehn weh help aala wi fi put intu praktis di kongsl weh deh eena di Werd a Gaad. Wi ku chros dis infamayshan bikaaz ih kohn schrayt fahn di Baibl. Ahn wen di bradaz fahn di Govanin Badi mek disizhanz bowt di bes way fi du di preechin werk, dehn aalwayz pen pahn di hoali spirit. Bot eevn soh, di Govanin Badi stil luk oava dehndeh disizhan fahn taim tu taim fi si if dehn need fi mek enimoa chaynjiz. Wai? Bikaaz “di werl laik how wi noa it now di chaynj,” ahn Gaad aaganaizayshan need fi ajos tu dehndeh chaynjiz.—1 Kor. 7:31.

15. Weh chalenjiz sohn poblisha mi fays?

¹⁵ Wen Gaad aaganaizayshan gi wi wahn nyoo eksplanayshan a wahn Baibl teechin er gi wi inschrokshanz pahn moaral standadz, wi aksep dehn ahn put dehn intu praktis. Bot weh wi du wen Gaad aaganaizayshan mek wahn chaynj weh afek ada paats a wi laif? Fi egzampl, nowadayz ih di geh moa ekspensiv fi bil ahn mantayn di plays dehn wehpaat wi goh fi wership. Dat da wai di Govanin Badi mi disaid dat az moch kangrigayshan az pasabl fi yooz di saym Kingdom Haal. Bikaaz a da nyoo chaynj, sohn kangrigayshan jain op fi bee wan kangrigayshan, ahn di bradaz mi sel som a di ada Kingdom Haal dehn. Di moni weh di aaganaizayshan sayv op afta aala dat da weh dehn yooz fi help bil sohn Kingdom Haal eena ada ayryaz weh reeli need dehn. If yoo liv eena wahn ayrya wehpaat di aaganaizayshan di sel di Kingdom Haal dehn ahn sohn kangrigayshan di jain op wid ada kangrigayshanz, ih mait bee haad fi ajos tu dehndeh chaynjiz. Wai? Bikaaz now sohn poblisha haftu chravl faar fi get da dehn meetin. Ahn sohn bradaz ahn  sistaz weh mi werk haad fi bil er mantayn wahn Kingdom Haal mait wanda wai di aaganaizayshan di sel it. Dehn mait feel dat aala di taim an enerji weh dehn mi spen di du dat gaahn rait dong di jrayn. Bot wi shuda komen dehnya bradaz ahn sistaz bikaaz eevn soh, dehn stil di sopoat dis nyoo araynjment.

16. If wi put intu praktis di kongsl da Koloashanz 3:23, 24, how dat wahn help wi fi kip wi jai?

¹⁶ Wi wahn kip wi jai if wi memba dat di werk weh wi du da fi Jehoava ahn dat hihn di leed fi hihn aaganaizayshan. (Reed Koloashanz 3:23, 24.) King Dayvid mi set wahn gud egzampl wen hihn mi doanayt moni fi bil di templ. Hihn mi seh: “Da hoo mee ahn mai peepl dat wi ku mek valanteri aafrin laik dis? Bikaaz evriting da fahn yoo, ahn weh wi gi yoo, da fahn yu oan han.” (1 Chron. 29:14) Da di saym ting wid wee tudeh; eni amonk a moni weh wi giv tu Jehoava kohn fahn hihn eena di fers plays. Stilyet, ih mek Jehoava feel veri hapi wen wi gi wi taim, wi enerji, ahn di tingz weh wi oan fi du fi hihn werk.—2 Kor. 9:7.

17. Wai yu shudn feel diskorij if yu haftu mek chaynjiz eena di tingz weh yu du?

¹⁷ If wi waahn stay pahn di naro road weh kehr wi tu laif, aala wi need fi fala Jeezas egzampl. (1 Peet. 2:21) Soh if ih luk laik yu need fi mek chaynjiz eena di tingz weh yu du, noh mek dat diskorij yu. In fak, if yoo si dat yu need fi mek chaynjiz, den dat shoa dat yu waahn fala Jehoava dairekshan. An aalwayz memba dat Jehoava noa dat wi noh perfek. Soh hihn noh ekspek wi fi fala Jeezas egzampl tu wahn tee.

18. Weh wi need fi du fi reech wi goal?

¹⁸ Wi waahn foakos pahn di fyoocha ahn bee wilin fi mek chaynjiz eena wi tinkin, eena wi atichood, an eena di tingz weh wi du. (Prov. 4:25; Look 9:62) Soh mek wi stay hombl, ‘kantinyu fi bee hapi, ahn karek wi tinkin.ʼ (2 Kor. 13:11) If wi du dat, “di Gaad a lov ahn pees wahn deh wid [wi].” Ahn wi noh onli wahn hapi wen wi reech di nyoo werl, bot wi wahn aalso hapi wail wi di chravl pahn di road weh wahn kehr wi deh.