1-2. Weh gud reezn wi ga fi shoa laayal lov tu wan anada?

WI GA gud reezn fi shoa laayal lov tu wan anada. Wat da som a dehn? Mek wi fain di ansa eena dehnya skripchaz: “Noh mek laayal lov ahn faytfulnis lef yu. . . . Den evribadi wahn lov yu ahn yu wahn bee waiz fronta Gaad ahn man.” “Wahn man a laayal lov benifit ihself.” “Hooeva goh afta raichosnis ahn laayal lov wahn fain laif.”—Prov. 3:3, 4; 11:17, ftn.; 21:21.

² Dehnya skripchaz menshan chree reezn wai wi need fi shoa laayal lov. Fers, wi preshos tu Jehoava wen wi shoa laayal lov. Sekant, wi benifit now wen wi shoa laayal lov. Fi egzampl, wi ku mek frenz wid ada peepl ahn wi frenship wahn laas fareva. Ahn terd, wen wi shoa laayal lov, wi wahn geh lata blesinz eena di fyoocha, inkloodin evalastin laif. Soh ih klyaa fi si dat wi ga gud reezn fi obay Jehoava ahn “shoa laayal lov ahn mersi tu wan anada.”—Zech. 7:9.

3. Weh kweschanz wi wahn diskos eena dis aatikl?

³ Eena dis aatikl, wi wahn kansida dehnya foa kweschan: Hoo wi fi shoa laayal lov tu? Weh wi ku laan fahn di buk a Ruth bowt how fi shoa laayal lov? How wi ku shoa laayal lov tudeh? Ahn how wee benifit wen wi shoa laayal lov?

4. How wi ku bee laik Jehoava ahn shoa laayal lov? (Maak 10:29, 30)

⁴ Laik weh wi laan eena di laas aatikl, Jehoava onli shoa laayal lov tu dehn wan weh lov hihn ahn serv ahn. (Dan.  9:4) Wi waahn “chrai fi bee laik Gaad, bikaaz [wee] da fi hihn chiljren weh ih lov.” (Ifee. 5:1) Soh den, wi waahn ga laayal lov fi wi bradaz ahn sistaz.—Reed Maak 10:29, 30.

5-6. Weh di werd “laayalti” naamali meen?

⁵ Fi shoar yu wahn agree dat wi need fi andastan weh laayal lov reeli meenz fi mek wi ku shoa dis kwaliti tuwaadz wi bradaz ahn sistaz. Soh fi mek wi reeli andastan weh laayal lov meenz, mek wi luk pahn wahn egzampl weh wahn help wi si how peepl naamali andastan di meenin a di werd “laayalti.”

 ⁶ Wi mait diskraib wahn persn weh werk da di sayhn kompani fi wahn lata yaaz az wahn laayal werka. Bot eena aal dehn yaaz weh ih werk deh, ih praabli neva eevn meet eni wan a di oana dehn. Ih praabli neva aalwayz gree wid aala di disizhanz weh di oana dehn mek fi di kompani. Hihn noh lov di kompani, bot ih werk deh bikaaz ih need wahn jab soh dat ih ku mek sohn moni. An ih wahn kantinyu werk deh til ih ritaiya er geh wahn beta jab.

7-8. (a) Weh moov wahn persn fi shoa laayal lov? (b) Wai wi wahn diskos sohn vers fahn di Baibl buk a Ruth?

⁷ Soh, di difrens bitween laayalti laik weh wi diskos eena  paragraaf 6 ahn laayal lov da di reezn wai wahn persn shoa it. Wai servants a Gaad eena Baibl taimz mi shoa laayal lov? Di reezn wai dehn mi shoa laayal lov da neva bikaaz dehn mi haftu, bot bikaaz dehn mi waahnt. Tink bowt di egzampl a Dayvid. Hihn mi waahn shoa laayal lov tu ih fren Janatan eevn doa Janatan pa mi waahn kil Dayvid. Yaaz afta Janatan mi ded, Dayvid mi kantinyu shoa laayal lov tu Janatan son Mefiboshet.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Wi ku laan wahn lat bowt weh ih meenz fi shoa laayal lov fahn di Baibl buk a Ruth. Wat da sohn lesn weh wi ku laan bowt laayal lov fahn difrent peepl weh geh menshan eena di buk a Ruth? How wi ku yooz weh wi laan eena wi kangrigayshan? *

9. Wai Nayomi mi tink dat Jehoava mi-di fait gens ahn?

⁹ Eena di buk a Ruth, wi reed di stoari bowt Nayomi, ih daata-in-laa Root, ahn wahn man weh naym Boawaz. Hihn mi lov Gaad ahn hihn da-mi Nayomi hozban relitiv. Bikaaz nohmoh food mi deh da Izrel, Nayomi, ih hozban, ahn dehn too son gaahn liv da Moawab. Joorin di taim wen dehn mi liv deh, Nayomi hozban mi ded, ih too son dehn mi geh marid, bot sad fi seh, dehn mi ded tu. (Ruth 1:3-5; 2:1) Aala dehnya tingz weh mi hapm mi mek Nayomi feel moa ahn moa sad ahn diskorij. Shee mi feel soh diskorij dat tu shee, Jehoava mi-di fait gens ahn. Noatis weh shee mi seh bowt di way how ih mi feel bowt Gaad: “Ah feel laik Jehoava di ponish mi.” “Da Gaad mek Ah sofa wahn lat.” Shee mi aalso seh: “Da Jehoava di Almaiti deh gens mi, ahn da hihn mek mi laif haad.”—Ruth 1:13, 20, 21.

10. How Jehoava mi feel bowt weh Nayomi mi seh, ahn weh hihn mi du far ahn?

¹⁰ How Jehoava mi feel bowt weh Nayomi mi seh? Hihn neva abandan Nayomi.  Insteda dat, hihn mi feel far ahn. Jehoava noa dat “schres ku mek wahn waiz persn geh beks.” (Eccl. 7:7) Stilyet, Nayomi mi need fi si dat Jehoava neva abandan ahn. How hihn mi help ahn fi si dat? (1 Sam. 2:8) Jehoava mi yooz Root fi shoa laayal lov tu Nayomi. Root mi waahn shoa laayal lov tu Nayomi ahn help ahn fi noh feel soh diskorij. Shee mi waahn help ahn si dat Jehoava stil lov ahn. Weh wi ku laan fahn Root egzampl?

11. Wai lata wi kain bradaz ahn sistaz chrai help owt adaz weh feel sad er diskorij?

¹¹ Wen wi ga laayal lov, wi wahn chrai help enibadi weh feel sad er diskorij. Jos laik how Root mi stay bai Nayomi said, wi kain bradaz ahn sistaz redi ahn wilin fi help enibadi eena di kangrigayshan hoo mait di feel sad er diskorij. Di lov weh dehn ga fi dehn bradaz ahn sistaz mek dehn waahn du weh dehn need fi du fi help dehn owt. (Prov. 12:25, ftn.; 24:10) Di apasl Paal mi inkorij wi fi du dis wen ih seh: “Komfert dehn wan weh dipres, help dehn wan weh week, ahn bee payshent wid evribadi.”—1 Tes. 5:14.

12. Wat da di bes way how wi ku help wahn brada er sista weh feel sad er diskorij?

¹² Moas a di taim, wan a di bes ting weh wi ku du fi help wahn brada er sista weh feel sad er diskorij da fi lisn tu dehn ahn mek dehn noa dat wi lov dehn. Jehoava hapi wen ih si dat yoo di help wan a ih preshos servant dehn. (Ps. 41:1) Proverbs 19:17 seh: “Di persn weh shoa kainis tu sombadi weh poa di len tu Jehoava, ahn Hihn wahn pay ahn bak fi weh ih du.”

13. How di disizhan weh Root mi mek difrent fahn Orpa wan, ahn how Root mi shoa laayal lov? (Koment pahn di picha pahn di kova.)

¹³ Wi geh fi andastan moa bowt weh ih meenz fi shoa laayal lov wen wi tink bowt weh mi hapm tu Nayomi afta ih hozban an ih too son ded. Wen Nayomi mi fain owt dat “Jehoava mi staat tu bles fi hihn peepl agen, ahn hihn mi mek di lan projoos wahn lata food fi dehn,” ih disaid fi goh bak hoam. (Ruth 1:6) Too a ih daata-in-laa mi staat di jerni wid ahn. Bot lang di way, chree taimz Nayomi mi insis dat ih daata-in-laa dehn goh bak da Moawab. Weh mi hapm? Di Baibl seh: “Orpa kis ih mada-in-laa an ih gaahn hoam, bot Root stay wid ahn.” (Ruth 1:7-14) Orpa mi du egzakli weh Nayomi mi tel ahn fi du ahn gaahn bak da Moawab. Bot Root mi du moa dan dat. Shee kuda mi gaahn bak hoam tu, bot bikaaz ih mi ga laayal lov fi Nayomi, ih mi disaid fi stay wid ahn an help ahn. (Ruth 1:16, 17) Root mi chooz fi stay wid Nayomi, noh bikaaz ih mi haftu, bot bikaaz shee mi waahnt. Weh shee mi du shoa wi egzakli weh ih meenz fi shoa laayal lov. Weh wi ku laan fahn weh Root mi du?

14. (a) How wahn lata wi bradaz ahn sistaz kapi di egzampl a Root tudeh? (b) Akaadn tu Heebrooz 13:16, how wi ku pleez Jehoava?

 ¹⁴ Wen wi ga laayal lov, wi goh di ekschra mail fi help adaz. Jos laik weh mi hapm eena di paas, wahn lata wi bradaz ahn sistaz tudeh chooz fi shoa laayal lov tu adaz, eevn tu peepl hoo dehn neva meet bifoa. Fi egzampl, wen dehn fain owt dat wahn nachral dizaasta hapm eena wahn ayrya, dehn hori fi fain owt weh dehn ku du fi help. Wen sohnbadi eena di kangrigayshan need help wid moni, dehn chrai fi fain owt wat da persn need ahn chrai help ahn. Jos laik weh mi hapm da Masidoanya eena di fers senchri, di bradaz goh di ekschra mail fi help adaz. Dehn ‘giv aal weh dehn ku giv, eevn moa dan weh dehn ku afoadʼ soh dat dehn ku help dehn bradaz weh need help. (2 Kor. 8:3) Wi ku imajin how hapi Jehoava feel wen hihn si dis!—Reed Heebrooz 13:16.

15-16. How Root mi shoa dat ih mi wahn kip di chrai help Nayomi?

¹⁵ Wi ku laan sohn gud lesn fahn di Baibl stoari a Root ahn Nayomi. Mek wi diskos wahn kopl a dehn.

¹⁶ Kip di chrai help. Di fers taim wen Root mi aafa fi goh bak wid Nayomi tu Jooda, Nayomi mi chrai stap ahn. Bot Root neva giv op. Weh mi hapm afta dat? “Wen Nayomi noatis dat notn kuda mi chaynj Root main, shee mi stap chrai kanvins ahn.”—Ruth 1:15-18.

17. Weh ku help wi fi noh giv op soh eezi?

¹⁷ Di lesn fi wee: Ih tek wahn lata payshens fi help enibadi hoo feel sad er dipres, bot wi noh waahn giv op pahn dehn; wi waahn kip di chrai help dehn. Wahn sista weh need help mait rifyooz di help weh wi aafa ahn. * Bot, laayal lov wahn mek wi du wi bes fi stik kloas tu wi sista. (Gal. 6:2) Wi hoap dat soona er layta ih wahn aksep wi aafa an alow wi fi help ahn, an komfert ahn.

18. Weh kuda mi mek Root geh beks?

¹⁸ Noh geh beks. Wen Nayomi ahn Root mi reech da Betlihem, Nayomi mi meet op wid ih nayba dehn. Shee mi tel dehn: “Wen Ah mi lef fahn ya, Ah mi ga evriting. Bot Jehoava mek Ah kohn bak wid notn.” (Ruth 1:21) Imajin how Root mosi mi feel wen ih mi hyaa Nayomi seh dehndeh werdz! Root mi gaan owta ih way fi help Nayomi. Ih mi krai wid ahn, ih komfert ahn, an ih waak til waakin kyaahn don wid ahn. Eevn wid aala dat, Nayomi mi seh: “Jehoava mek Ah kohn bak wid notn.” Eevn doa Root mi deh rait saida Nayomi, Nayomi mi mek ih song laik if weh Root mi du far ahn da notn. Dis mi praabli mek Root feel veri sad! Stilyet, doh, shee mi stik kloas tu Nayomi.

19. Weh ku help wi fi stik kloas tu sohnbadi weh deh anda schres?

¹⁹ Di lesn fi wee: Wahn sista mait tel wi sohnting weh reeli hert wi feelinz, eevn afta aal weh wi don du far ahn. Bot wi chrai fi noh geh beks. Wi stik kloas tu wi sista bikaaz ih need di help, ahn wi aks Jehoava fi help wi fain wahn way fi giv ahn di komfert weh ih need.—Prov. 17:17.

20. Weh mi gi Root di schrent weh ih mi need fi kip di help Nayomi?

²⁰ Giv inkorijment wen yu si dat di persn need it. Root mi shoa laayal lov tu Nayomi, bot now Root mi need inkorijment.  Jehoava mi yooz Boawaz fi inkorij Root. Boawaz mi tel Root: “Ah hoap dat Jehoava di Gaad a Izrel pay yu bak fi evriting weh yu du. An Ah hoap dat Jehoava bles yu wahn lat bikaaz hihn da di wan weh yu ton tu fi protekshan.” Dehndeh kain werdz mi reeli komfert Root. Shee mi tel Boawaz: “Yu komfert mi an inkorij mi.” (Ruth 2:12, 13) Boawaz mi komfert Root egzakli wen ih mi need it, ahn dat mi gi shee di schrent weh ih mi need fi noh giv op.

21. Laik weh Isaiah 32:1, 2 diskraib, how lovin eldaz wahn tek kayr a di bradaz ahn sistaz eena di kangrigayshan?

²¹ Di lesn fi wee: Sohntaim dehn wan weh shoa laayal lov need inkorijment tu. Boawaz mi noatis aal di gud tingz weh Root mi-di du fi Nayomi ahn hihn mi komen ahn far it. Tudeh, eldaz aalso tek di taim fi komen wi kain bradaz ahn sistaz hoo aalso du dehn bes fi help adaz eena di kangrigayshan. Di kain werdz ahn lovin inkorijment wahn help wi bradaz ahn sistaz, an ih wahn gi dehn di schrent wen dehn need fi noh giv op.—Reed Isaiah 32:1, 2. *

22-23. How Nayomi atichood mi chaynj, ahn wai? (Psalm 136:23, 26)

²² Afta sohntaim mi paas, Boawaz mi gi Root ahn Nayomi lata food, hihn mi veri jenaros tuwaadz dehn. (Ruth 2:14-18) Weh Nayomi mi du wen ih si aal weh Boawaz mi du fi dehn? Shee mi seh: “Jehoava da di Gaad weh aalwayz shoa laayal lov tu peepl weh alaiv ahn tu peepl  weh ded.” (Ruth 2:20a) Di way how Nayomi mi feel mi kompleetli chaynj! Erliya, shee mi krai owt di seh: “Jehoava . . . deh gens mi,” bot now wid lata jai shee hala seh: “Jehoava . . . aalwayz shoa laayal lov.” Wai yu tink Nayomi feelinz mi kompleetli chaynj?

²³ Fainali, Nayomi mi-di staat tu si dat Jehoava neva did abandan ahn. Jehoava mi yooz Root fi gi Nayomi di sopoat weh ih mi need wail dehn mi-di chravl bak tu Jooda. (Ruth 1:16) Nayomi mi aalso geh fi andastan dat Jehoava mi yooz Boawaz fi help shee ahn Root. (Ruth 2:19, 20b) Shee mi praabli tink tu ihself ahn seh, ‘Now Ah andastan, Jehoava neva did lef mi, hihn deh wid mi dis hoal wail!ʼ (Reed Psalm 136:23, 26.) * Wi ku onli imajin how graytful Nayomi mosi mi feel dat Root ahn Boawaz neva giv op pan ahn! Fi shoar di chree a dehn mi veri hapi dat Nayomi mi geh bak ih jai ahn schrent fi kantinyu serv Jehoava.

24. Wai wi shuda waahn kantinyu shoa laayal lov tu wi bradaz ahn sistaz?

²⁴ Weh wi laan fahn di buk a Ruth bowt laayal lov? Bikaaz wi ga laayal lov fi wi bradaz ahn sistaz, wi noh wahn giv op pahn eni wan a dehn weh feel sad er diskorij. Ih aalso mek wi waahn goh di ekschra mail fi help dehn owt. Eldaz aalso need fi inkorij dehn wan eena di kangrigayshan hoo di du dehn bes fi help owt adaz. Wi feel soh hapi wen si sohnbadi eena di kangrigayshan geh bak dehn jai ahn schrent fi kantinyu serv Jehoava. (Aks 20:35) Bot, wat da di mayn reezn wai wi kantinyu fi shoa laayal lov? Bikaaz wi waahn Jehoava bee hapi wid wi, ahn wi waahn bee jos laik Jehoava, hoo “ful op a laayal lov.”—Ex. 34:6; Ps. 33:22.