1-2. (a) Wai koplz weh jos geh marid shuda chros eena Jehoava? (Psalm 37:3, 4) (b) Weh wi wahn diskos eena dis aatikl?

YOO bowt fi geh marid, er yu jos geh marid? If yu ansa da yes tu eni wan a dehndeh kweschan, fi shoar yu di luk faawod fi injai yu laif saida di persn weh yu lov soh moch. Af koars, marid laif noh aalwayz eezi, ih ga ih oan chalenjiz, ahn koplz weh jos geh marid ga impoatant disizhanz fi mek. Di way yu deel wid dehndeh chalenjiz ahn di disizhanz yu mek wahn afek yu hapinis az wahn kopl. If yu chros eena Jehoava, yu wahn mek waiz disizhanz, yu marij wahn geh schranga, ahn yu wahn bee hapiya. If yu noh fala Gaad advais, yu wahn fays lata prablemz weh wahn afek yu marij, ahn yu noh wahn bee hapi.—Reed Psalm 37:3, 4. *

² Eevn doa dis aatikl foakos pahn koplz weh jos geh marid, ih wahn diskos prablemz weh aal marid koplz ku fays. Wi wahn diskos weh wi ku laan fahn di egzampl dehn a faytful man ahn uman eena di Baibl. Dehnya egzampl teech wi sohn lesn weh wi ku yooz eena wi laif, inkloodin wi marij. Wi wahn aalso si weh wi ku laan fahn di ekspeeryens a sohn koplz eena fi wee taim.

3-4. Weh chalenjiz koplz weh jos geh marid mait fays?

³ Sohn peepl mait inkorij wahn kopl weh jos geh marid fi liv wahn laif laik weh moas peepl liv tudeh. Fi egzampl, payrents er ada relitivz mait presha wahn kopl fi ga chiljren az soon az pasabl. Er frenz ahn famili mait inkorij wahn kopl weh jos geh marid fi bai wahn hows ahn lata tingz fi mek dehn liv eena wahn komfatabl way.

⁴ If dehn noh kyaaful, dehn ku mek disizhanz weh ku mek dehn oa wahn lata moni. Den di too a dehn wahn haftu spen lata owaz di werk fi pay aaf weh dehn oa. Dehn mait haftu werk soh moch dat dehn ku en op di noh ga inof taim fi spen eena persnal stodi, famili wership, ahn di minischri. Di kopl mait eevn mis meetinz fi werk oavataim soh dat dehn ku mek moa moni er fi kip dehn jab. If dehn du dat, den dehn ga sohn eksaitin tingz eena Jehoava servis weh dehn kyaahn du.

5. Weh yu laan fahn di egzampl a Klaus ahn Marisa?

⁵ Lata egzampl proov dat if di moas impoatant ting eena wi laif da fi ga moa tingz, wi noh wahn bee hapi. Tink bowt weh Klaus ahn Marisa mi laan. * Wen dehn mi geh marid, di too a dehn mi werk ful-taim soh dat dehn kuda ga lata moni ahn mateeryal tingz. Bot dehn neva reeli hapi. Klaus seh: “Wi mi ga moa dan weh wi mi need, bot wi neva ga planz fi du moa fi Jehoava. In fak, wi laif mi komplikaytid ahn ful a schres.” Maybi yoo geh fi si fi yuself dat wen yu foakos yu laif di chrai geh lata moni ahn mateeryal tingz ih noh mek yu hapi. If dat da di kays, noh feel diskorij. Wen yu luk pahn di gud egzampl a adaz, ih ku help yu mek di chaynjiz yu need fi mek. Fers, mek wi kansida weh di hozban dehn ku laan fahn di egzampl a King Jehoshafat.

6. How King Jehoshafat mi aplai di prinsipl eena Proverbs 3:5, 6 wen wahn big aami mi kohn fait gens ih peepl?

⁶ Yoo weh da wahn hozban, sohntaim yu noh feel laik if di rispansabiliti dehn weh yu gat da tu moch fi mek yu handl? If yes, yoo ku benifit fahn King Jehoshafat egzampl. Az king, Jehoshafat mi rispansabl fi di sayfti a di hoal nayshan! Weh hihn mi du fi tek kayr a da seeryos rispansabiliti? Jehoshafat mi du weh hihn mi kud fi protek di nayshan. Hihn mi protek di siti dehn a Jooda an ih mi gyada wahn big aami a moa dan 1,160,000 soaljaz. (2 Chron. 17:12-19) Layta, Jehoshafat mi fays wahn big prablem. Wahn big aami a Amonaits, Moawabaits, ahn peepl fahn di mongtinz a Seer mi chretn hihn, ih famili, an ih peepl. (2 Chron. 20:1, 2) Weh Jehoshafat mi du? Hihn mi aks Jehoava  fi help ahn an schrentn ahn. Hihn mi aplai di prinsipl eena Proverbs 3:5, 6. (Reed.) * Jehoshafat hombl pryaa weh deh eena 2 Chronicles 20:5-12, shoa dat hihn mi chros eena Jehoava wahn lat. How Jehoava mi rispan tu Jehoshafat pryaa?

7. How Jehoava mi rispan tu Jehoshafat pryaa?

⁷ Jehoava mi taak tu Jehoshafat chroo wahn Leevait weh naym Jahazyel. Jehoava mi seh: “Tek unu pozishan, stay deh, ahn si how Jehoava wahn sayv unu.” (2 Chron. 20:13-17) Fi shoar, dat da noh di way fi fait wahn batl! Bot, dehndeh inschrokshanz neva kohn fahn wahn hyooman; dehn mi kohn fahn Jehoava. Jehoshafat mi chros eena ih Gaad, soh hihn mi obay ih inschrokshanz. Wen hihn ahn di peepl mi gaahn owt fi meet di enimi, hihn neva put di bes soaljaz fronta di aami, insted, ih mi put di man dehn weh neva ga no wepan ahn weh mi prayz Jehoava wid sang. Jehoava mi kip ih pramis tu Jehoshafat; Hihn mi win oava di enimi.—2 Chron. 20:18-23.

8. Weh di hozban dehn ku laan fahn Jehoshafat egzampl?

⁸ If yoo da wahn hozban, yu ku laan fahn Jehoshafat egzampl. Yu ga di rispansabiliti fi tek kayr a yu famili, soh werk haad fi protek ahn sopoat yu famili. Wen yu ga prablemz, yu mait feel laik yu ku solv dehndeh prablemz bai yuself. Bot noh chros eena yu oan schrent. Insted, wen yu deh bai yuself, pray fi Jehoava help. Aalso, pray fahn yu haat wid yu waif. Luk fi dairekshan fahn Jehoava wen yu stodi di Baibl ahn di poblikayshanz weh bays pahn di Baibl weh Gaad aaganaizayshan provaid, an yooz weh yu laan eena yu laif. Adaz mait noh gree wid di disizhanz weh yu mek weh bays pahn di Baibl, ahn dehn mait eevn tel yu dat yu foolish. Dehn mait seh dat moni ahn tingz weh yu ku bai wahn gi yu di bes protekshan fi yu famili. Bot memba Jehoshafat egzampl. Hihn mi chros eena Jehoava an ih mi shoa it eena di tingz weh ih mi du. Jehoava neva abandan da laayal man, ahn hihn noh wahn abandan yoo needa. (Ps. 37:28; Heeb. 13:5) Wat els koplz ku du fi mek shoar dat dehn ga wahn hapi laif tugeda?

9. Weh wi ku seh bowt di prafit Aizaiya an ih waif?

⁹ Di moas impoatant ting fi di prafit Aizaiya an ih waif da-mi fi serv Jehoava. Aizaiya da-mi wahn prafit, an ih ku bee dat ih waif mi ga ih oan asainments tu sins eena di Baibl shee geh kaal “di prafites.” (Isa. 8:1-4) Az wahn kopl, Aizaiya an ih waif mi put dehn wership tu Jehoava fers plays eena dehn laif. Dat da wahn ekselent egzampl fi koplz tudeh!

10. Wen marid koplz stodi di prafesi dehn eena di Baibl, how dat ku help dehn du az moch az pasabl eena dehn servis tu Jehoava?

¹⁰ Marid koplz tudeh ku kapi Aizaiya an ih waif di du aal weh dehn kud eena dehn servis tu Jehoava. Dehn ku mek dehn chros eena Jehoava geh schranga wen dehn stodi Baibl prafesi tugeda ahn si how ih aalwayz kohn chroo. * (Taitos  1:2) Dehn ku tink bowt weh dehn ku du fi help mek sertn Baibl prafesi kohn chroo. Fi egzampl, dehn ku preech di gud nyooz, ahn dat wahn help mek Jeezas prafesi kohn chroo dat di gud nyooz wahn geh preech aal oava di ert bifoa di en kom. (Mach. 24:14) Di moa wahn kopl noa dat Baibl prafesi di kohn chroo, di moa dehn wahn waahn du eena dehn servis tu Jehoava.

11. Weh Prisila an Akwila mi aybl fi du, ahn wai?

¹¹ Yong marid koplz ku laan fahn Prisila an Akwila, wahn Jooish kopl weh mi liv da Roam. Dehn mi hyaa di gud nyooz bowt Jeezas ahn dehn geh fi bee Kristyanz. Fi shoar dehn mi hapi wid dehn laif. Bot dehn laif mi chaynj sodn-wan wen Empera Klaadiyos mi aada aal Jooz fi lef Roam. Noatis weh dat mi meenz fi Akwila ahn Prisila. Dehn mi haftu lef di ayrya wehpaat dehn mi liv, fain wahn nyoo hows, ahn staat dehn tent bizniz aal oava agen da wahn nyoo plays. Yu tink dehnya nyoo chaynjiz eena dehn laif wuda mek dehn stap du az moch az dehn kud fi Jehoava? Yoo praabli noa di ansa tu da kweschan. Da Korint, Akwila ahn Prisila mi staat tu help di loakal kangrigayshan ahn werk lang wid di apasl Paal fi schrentn di fayt a di bradaz ahn sistaz. Layta, dehn moov tu difrent tong wehpaat dehn mi need moa help eena di preechin werk. (Aks 18:18-21; Roam. 16:3-5) Dehn mi ga wahn veri bizi ahn hapi laif!

12. Wai wahn marid kopl shuda set goalz eena dehn servis tu Jehoava?

¹² Marid koplz ku kapi Prisila an Akwila egzampl ahn put di Kingdom fers eena dehn laif. Di bes taim fi mek wahn kopl taak bowt dehn goalz eena laif da bifoa dehn geh marid. Wen wahn kopl set goalz eena dehn servis tu Jehoava ahn werk haad tugeda fi reech dehndeh goalz, dehn ga moa apachooniti fi si how Jehoava help dehn eena dehn laif. (Eccl. 4:9, 12) Kansida di egzampl a Russell an Elizabeth. Russell seh: “Bifoa wi geh marid, wi mi diskos bowt weh di too a wi mi waahn  du fi Jehoava.” Elizabeth seh: “Wi mi diskos dis soh dat wen wi mi haftu mek disizhanz laytaraan, wi wuda mek shoar dat wi disizhanz noh stap wi fahn reech wi goalz.” Russell an Elizabeth kuda mi moov tu Micronesia fi serv wehpaat dehn need moa Kingdom poblishaz.

13. Akaadn tu Psalm 28:7, weh wahn hapm if wi chros eena Jehoava?

¹³ Jos laik Russell an Elizabeth, lata koplz disaid fi kip dehn laif simpl soh dat dehn ku spen az moch taim az pasabl eena di preechin ahn teechin a di gud nyooz. Wen wahn kopl set goalz fi du aal weh dehn kud fi Jehoava ahn den werk tugeda fi reech dehndeh goalz, dehn wahn ga gud rizolts. Dehn wahn si how Jehoava tek kayr a dehn, dehn chros eena hihn wahn groa, ahn dehn wahn bee reeli hapi.—Reed Psalm 28:7. *

14. How di apasl Peeta an ih waif mi shoa dat dehn mi chros eena di pramis weh deh eena Machyu 6:25, 31-34?

¹⁴ Marid koplz ku aalso laan fahn di egzampl a di apasl Peeta an ih waif. Bowt siks monts tu wahn yaa afta Peeta mi meet Jeezas fi di fers taim, Peeta mi haftu mek wahn impoatant disizhan. Peeta mi werk az wahn fishaman fi provaid fi ih famili. Soh wen Jeezas mi invait Peeta fi fala ahn ful-taim, Peeta mi haftu tink bowt ih waif wen ih mi-di mek ih disizhan. (Look 5:1-11) Peeta mi chooz fi goh preech wid Jeezas. Hihn mi mek wahn waiz disizhan! Ahn wee ga gud reezn fi bileev dat Peeta waif mi sopoat fi hihn disizhan. Di Baibl shoa dat afta Jeezas rezorekshan, shee gaahn lang wid Peeta pahn som a fi hihn chrip dehn. (1 Kor. 9:5) Bikaaz shee da-mi wahn gud Kristyan waif, Peeta neva frayd fi gi kongsl tu di Kristyan hozban ahn waif dehn. (1 Peet. 3:1-7) Ih klyaa fi si dat Peeta an ih waif mi chros Jehoava pramis dat Hihn wuda provaid fi dehn if dehn put di Kingdom fers eena dehn laif.—Reed Machyu 6:25, 31-34.

15. Weh yu laan fahn di ekspeeryens a Tiago an Esther?

¹⁵ If yoo marid fi sohn yaaz now, how yu ku ga di dizaiya fi du moa eena yu servis tu Jehoava? Wan way how yu ku du dat da if yu laan fahn di ekspeeryens a ada koplz. Fi egzampl, yu ku reed di seeriz “Dehn Mi Wilin fi Goh Help Owt.” Dehndeh aatikl mi help Tiago an Esther, wahn marid kopl fahn Brazil, fi ga wahn schrang dizaiya fi serv wehpaat need moa help eena di minischri. Tiago seh: “Wen wi mi reed bowt how Jehoava mi help ih servants eena fi wee taim, wee mi aalso waahn fala Jehoava advais ahn si how hihn help wi eena fi wee laif.” Dehn mi en op di moov tu Paraguay, wehpaat dehn di serv eena di Portuguese feel sins 2014. Esther seh: “Wahn skripcha weh di too a wi lov da Ifeezhanz 3:20. Lata taim, wi si how dehnya werdz kohn chroo eena wi servis tu Jehoava.” Eena da leta tu di Ifeezhanz, Paal mi pramis dat Jehoava wuda provaid moch moa dan weh wi aks fa. Da pramis kohn chroo lata taim!

16. Fi hoo advais yong koplz fi luk fa wen dehn di tink bowt dehn goalz eena laif?

¹⁶ Yong koplz tudeh ku benifit fahn di  ekspeeryens a adaz weh laan fi chros eena Jehoava. Sohn koplz spen lata yaaz di serv Jehoava eena ful-taim servis. Maybi yu ku aks dehn fi advais if yu di tink bowt yu goalz. Dis da wahn neks way fi shoa dat yu di chros eena Jehoava. (Prov. 22:17, 19) Di eldaz ku aalso help yong marid koplz fi set spirichwal goalz ahn reech dehn.

17. Weh mi hapm tu Klaus ahn Marisa, ahn weh wi laan fahn fi dehn egzampl?

¹⁷ Sohntaim wi mait noh waahn du moa fi Jehoava eena wahn sertn way, bot hihn mait moov wi fi serv hihn eena wahn nada way. Kansida di egzampl a Klaus ahn Marisa, weh wi mi menshan erliya. Afta dehn mi marid fi chree yaaz, dehn mi moov fahn dehn hoam-konchri ahn valantyaa fi du kanschrokshan werk da di Finland branch. Bot, dehn mi fain owt dat dehn mi wahn kyaahn stay fi moa dan siks monts. At fers dehn mi feel disapointid. Bot soon afta dat, dehn mi geh invaitid fi bee paat a wahn Arabic langwij koars, ahn now dehn hapi di serv eena di Arabic feel da wahn nada konchri. Wen Marisa tink bowt weh mi hapm, shee seh: “Ah mi frayd fi du sohnting Ah mi neva du bifoa an Ah mi need fi chros eena Jehoava kompleetli. Bot Ah geh fi si how Jehoava bles wi eena wayz weh wi neva eevn ekspek. Afta Ah si how Jehoava bles wi, mi chros eena Jehoava geh schranga.” Laik weh wi si fahn da egzampl, yoo ku bee shoar dat Jehoava wahn aalwayz bles yu if yu chros eena hihn kompleetli.

18. Weh marid koplz ku du fi kip di chros eena Jehoava?

¹⁸ Marij da wahn gif fahn Jehoava. (Mach. 19:5, 6) Hihn waahn marid koplz fi injai da gif. (Prov. 5:18) Unu yong marid koplz, egzamin weh unu di du wid unu laif. Unu di du aal weh unu ku du fi shoa Jehoava humoch unu apreeshiayt di gif dehn weh hihn giv unu? Taak tu Jehoava eena pryaa. Saach eena fi hihn Werd di Baibl fi prinsiplz weh ku help unu eena unu sichuwayshan. Den fala di advais weh Jehoava giv unu. Unu ku bee shoar dat unu wahn ga wahn hapi laif wid lata blesinz if unu mek unu servis tu Jehoava bee di moas impoatant ting eena unu marij!