STODI AATIKL 46
How Jehoava Help Wi fi Bayr Op ahn Stil Bee Hapi
“Jehoava di bee payshent an ih di wayt fi bles unu, ahn hihn redi fi shoa unu mersi.”—ISA. 30:18.
SANG 3 Gi Wi Schrent, Hoap, ahn Kanfidens
WEH WI WAHN DISKOS? a
1-2. (a) Weh kweschanz wi wahn ansa eena dis aatikl? (b) How wi noa dat Jehoava reeli waahn help wi?
JEHOAVA help wi fi deel wid wi prablemz. Hihn ku aalso help wi fi bee hapi wail wi serv ahn. How Jehoava help wi fi du dis? Weh wi need fi du fi benifit fahn di help weh Jehoava gi wi? Dis aatikl wahn ansa dehnya kweschan. Bot bifoa wi ansa dehn, mek wi si weh proof wi ga dat Jehoava reeli waahn help wi.
2 Sohnting weh di apasl Paal mi seh eena ih leta tu di Heebrooz ku help wi ansa da kweschan. Paal mi seh: “Jehoava da di wan weh help mi, soh Ah noh wahn frayd. Da weh enibadi ku du tu mee?” (Heeb. 13:6) Sohn Baibl dikshineri seh dat di orijinal meenin a di frayz “di wan weh help mi” eena dis vers rifaa tu wahn persn weh ron fi help sohnbadi weh di baal fi help. Now, imajin Jehoava di rosh fi reskyu sohnbadi weh reeli need help. Dis reeli diskraib Jehoava az sohnbadi weh redi an eega fi help wi, noh chroo? Az lang az Jehoava deh bai wi said, wi wahn ku deel wid eni prablem ahn stil bee hapi.
3. Wat da chree tingz weh Jehoava du fi help wi soh dat wi ku bayr op ahn stil bee hapi?
3 Wat da chree tingz weh Jehoava du fi help wi soh dat wi ku bayr op ahn stil bee hapi? Sins lata di prafesi dehn weh Jehoava mi mek Aizaiya rait ga fi du wid Gaad servants tudeh, mek wi si weh di buk a Isaiah seh fi help wi ansa da kweschan. Aizaiya mi diskraib Jehoava eena wayz weh wee ku reeli andastan. Noatis sohn egzampl eena chapta 30. Aizaiya mi yooz sohn byootiful iloschrayshan fi shoa wi how Jehoava help ih peepl. Hihn mi rait dat Jehoava help wi wen ih (1) reeli lisn tu wi an ansa wi pryaaz, (2) gaid wi, ahn (3) gi wi blesinz now an eena di fyoocha. Eena dis aatikl, wi wahn diskos dehnya chree tingz weh Jehoava du fi help wi.
JEHOAVA LISN TU WI
4. (a) Weh Jehoava mi seh bowt di Jooz weh mi liv eena Aizaiya taim, ahn weh Jehoava mi alow fi hapm? (b) Weh hoap Jehoava mi gi di faytful Jooz? (Isaiah 30:18, 19)
4 Da di biginin a Isaiah chapta 30, Jehoava mi kaal di Jooz “stobant pikni,” weh “ad aan sin tap a sin.” Ahn den ih seh, “Dehnya peepl da loan rebl, . . . weh noh waahn hyaa Jehoava laa.” (Isa. 30:1, 9) Bikaaz dehnya peepl mi stobant ahn dehn neva waahn lisn, Aizaiya mi seh dat Jehoava mi wahn alow dehn fi sofa. (Isa. 30:5, 17; Jer. 25:8-11) Ahn dat mi kohn chroo wen di Babiloanyan dehn mi kehr dehn da Babilan az priznaz. Bot monks dehndeh priznaz dehn mi ga sohn faytful Jooz, an Aizaiya mi gi dehn wahn mesij a hoap soh dat dehn noh giv op. Hihn tel dehn dat wan day Jehoava mi wahn alow dehn fi goh bak fi liv da Jeroosalem. (Reed Isaiah 30:18, 19.) b Ahn dat da weh mi hapm fi chroo. Jehoava mi free dehn fahn Babilan. Bot dat neva hapm rait away, bikaaz dehn mi haftu wayt fi sohn yaaz bifoa Jehoava mi free dehn. Aizaiya mi tel di peepl: “Jehoava di bee payshent an ih di wayt fi bles unu.” Soh dis shoa dat sohn taim mi wahn paas bifoa Jehoava sayv ih faytful servants. Az a mata a fak, di Izrelait dehn mi stay da Babilan fi 70 yaaz az priznaz bifoa som a dehn gaahn bak gaahn liv da Jeroosalem. (Isa. 10:21; Jer. 29:10) Wen di Izrelait dehn da-mi prizna da Babilan dehn yoostu baal kaaz dehn mi sad, bot wen dehn gaahn bak da Jeroosalem dehn mi baal bikaaz dehn mi hapi.
5. Weh pramis Isaiah 30:19 gi wi?
5 Tudeh, wi ku geh komfert fahn dehnya werdz: “Fi shoar, hihn wahn shoa yu kompashan wen yu baal owt fi help.” (Isa. 30:19) Aizaiya tel wi dat Jehoava reeli lisn tu wi wen wi aks Ahn fi help, ahn dat hihn kwik fi ansa wi pryaaz. Ahn den Aizaiya seh: “Hihn wahn ansa yu az soon az ih hyaa yu.” Dehnya werdz shoa wi dat Jehoava ga wahn schrang dizaiya fi help enibadi weh aks ahn fi help. Hihn redi fi help wi bayr op ahn kantinyu bee hapi.
6. How Aizaiya werdz mek wi noa dat Jehoava lisn tu eech wan a wi wen wi pray?
6 Wat els wi ku laan bowt pryaa fahn dis vers? Dat Jehoava lisn tu eech wan a wi wen wi pray. How wi noa dat? Eena di fers paat a Isaiah chapta 30, Jehoava yooz di werd “unu” bikaaz ih mi-di taak tu aala ih peepl tugeda. Bot now eena vers 19 ih yooz di werd “yu” bikaaz ih di taak tu eech persn. Aizaiya seh: “Yu noh wahn krai nohmoh”; “hihn wahn shoa yu kompashan”; “hihn wahn ansa yu.” Bikaaz Jehoava da wahn lovin pa, hihn noh wahn tel ih son er daata weh don feel diskorij dat dehn shuda bee schrang jos laik dehn breda er sista. Insted, hihn kay bowt eech wan a wi ahn pay kloas atenshan tu eech wan a wi pryaaz.—Ps. 116:1; Isa. 57:15.
Weh Aizaiya mi meen wen ih seh: “Unu noh fi mek [Jehoava] res?” (Paragraaf 7)
7. How Aizaiya ahn Jeezas shoa dat ih impoatant fi mek wi kip aan di pray?
7 Wen wi pray tu Jehoava ahn tel ahn bowt sohnting weh wi di goh chroo, di fers ting weh hihn mait du da gi wi di schrent fi bayr op. Bot if wi feel laik wi noh di geh wahn ansa tu wi pryaaz, wi mait jos need fi kantinyu pray fi di schrent fi bayr op. In fak, dat da egzakli weh hihn waahn mek wi du. Dat da weh Aizaiya mi-di chrai mek wi andastan wen ih seh: “Unu noh fi mek [Jehoava] res.” (Isa. 62:7) How wi ku du dat? Wel, wi shuda kip aan di pray, ahn da way deh wi noh wahn di alow Jehoava fi res. Dis rimain wi a sohnting weh Jeezas seh bowt pryaa da Look 11:8-10, 13. Rait dehsoh Jeezas yooz wahn iloschrayshan fi inkorij wi fi “kip aan di bayg” ahn fi “kip aan di aks” Gaad fi ih hoali spirit. Pahn tap a dat, wi ku bayg Jehoava fi help wi mek gud disizhanz eena laif.
JEHOAVA GAID WI
8. How di prafesi da Isaiah 30:20, 21 mi kohn chroo eena Baibl taimz?
8 Reed Isaiah 30:20, 21. c Wen di Babiloanyan aami mi kyamp rong Jeroosalem fi wahn yaa an a haaf, di peepl mi sofa soh moch dat dehn sofarin mi feel az kaman az bred ahn waata. Bot da vers 20 ahn 21, Jehoava mi pramis dat if di peepl mi ripent ahn chaynj dehn wayz, hihn mi wahn sayv dehn. Aizaiya mi kaal Jehoava dehn Grayt Teecha, ahn hihn mi pramis dehn dat Jehoava mi wahn teech dehn how fi wership ahn eena wahn way weh Hihn aksep. Dehnya werdz mi kohn chroo wen di Jooz mi geh set free fahn Babilan. Jehoava mi shoa dehn dat hihn da dehn Grayt Teecha, ahn wen di peepl mi lisn tu ahn, dehn mi en op di geh bak chroo wership. Tudeh wee hapi bikaaz Jehoava da fi wee Grayt Teecha.
9. Wat da wan way how Jehoava gaid wi tudeh?
9 Da wahn aana fi ga Jehoava di teech wi tudeh. Eena dehnya vers, Aizaiya seh dat wee da laik styoodents weh Jehoava teech eena too wayz. Fers, Aizaiya seh: “Yu wahn si yu Grayt Teecha wid yu oan aiy.” Eena dis iloschrayshan di teecha di stan op fronta ih styoodents. How Jehoava teech wi? Hihn teech wi chroo ih aaganaizayshan. Ahn wee soh hapi dat Jehoava aaganaizayshan gaid wi eena wahn way weh eezi fi andastan, noh chroo? Jehoava aaganaizayshan teech wi chroo wi kangrigayshan meetin, asembli, kanvenshan, braadkyaas, an ada difrent wayz. Aala dehnya tingz help wi fi bayr op ahn bee hapi eevn wen wi di goh chroo chalenjiz.
10. Eena weh way wi hyaa “wahn werd di kohn fahn bihain [wi]”?
10 Aizaiya menshan wahn sekant way how Jehoava gaid wi. “Yu oan ayz wahn hyaa wahn werd di kohn fahn bihain yu.” Rait yasoh, Aizaiya di shoa dat Jehoava da wahn gud teecha weh di waak bihain ih styoodent dehn fi gaid dehn ahn tel dehn wich way fi goh. How wi hyaa Jehoava vais fahn bihain wi tudeh? Gaad Werd di Baibl mi geh rait dong fahn lang taim, wahn taim weh deh faar bihain wi. Soh wen wi reed di Baibl, da laik wi di hyaa Gaad vais di kohn fahn bihain wi.—Isa. 51:4.
11. Weh tingz wi need fi du fi bayr op ahn bee hapi, ahn wai wi need fi du dis?
11 How wi ku benifit fahn di way Jehoava gaid wi chroo ih aaganaizayshan an ih Werd di Baibl? Noatis dat Aizaiya seh too tingz. Fers, “dis da di way.” Sekant, “waak eena it.” (Isa. 30:21) Ih noh inof fi jos noa “di way,” wi aalso need fi “waak eena it.” Chroo di Baibl ahn di gaidans weh wi geh chroo Jehoava aaganaizayshan, wi laan weh Jehoava ekspek fahn wi. Wi aalso laan how fi yooz weh ih teech wi eena wi laif. If wi waahn bayr op ahn bee hapi, wi haftu du dehnya too ting. Onli if wi du dat wi ku bee shoar dat Jehoava wahn bles wi.
JEHOAVA BLES IH PEEPL
12. Akaadn tu Isaiah 30:23-26, how Jehoava mi wahn bles ih peepl?
12 Reed Isaiah 30:23-26. d How dis prafesi mi kohn chroo fi di Jooz weh gaahn bak da Izrel afta dehn da-mi slayv da Babilan? Jehoava mi bles dehn wid lata tingz fi liv ahn kip aan di serv ahn. Hihn neva onli gi dehn lata food, bot moa dan dat ih bles dehn wid weh dehn need fi jraa kloas tu ahn an staat wership ahn eena di rait way agen. Op tu da taim deh, Gaad peepl neva yet geh soh moch blesinz fahn Gaad. Akaadn tu vers 26, wi si dat hihn gi dehn wahn lat moa lait. In ada werdz, hihn mi help dehn fi andastan ih Werd beta. (Isa. 60:2) Di blesinz weh Jehoava mi giv ih servants mi help dehn fi kip aan di serv ahn wid jai ahn korij “bikaaz a di gud kandishan a [dehn] haat.”—Isa. 65:14.
13. How di prafesi bowt chroo wership kohn chroo eena fi wee day?
13 How di prafesi bowt chroo wership kohn chroo eena fi wee day? Sins 1919, milyanz a peepl stap bee priznaz tu Babilan di Grayt, weh reprizent aala faals rilijan. Jehoava gaid dehnya peepl tu sohnweh faar beta dan di Pramis Lan. Dehn di injai laif eena wahn spirichwal paradais. (Isa. 51:3; 66:8) Wat da di spirichwal paradais?
14. Wat da di spirichwal paradais, ahn hoo liv deh tudeh? (Koment pahn di futnoat.)
14 Di anointid di liv eena di spirichwal paradais sins 1919. e Oava di yaaz, di “ada sheep,” weh da dehn wan weh ga di hoap fi liv fareva pahn ert, aalso di liv eena dis spirichwal paradais ahn dehn di injai Jehoava blesinz.—Jan 10:16; Isa. 25:6; 65:13.
15. Wehpaat di spirichwal paradais deh?
15 Wehpaat di spirichwal paradais deh tudeh? Yu ku fain peepl weh wership Jehoava aal rong di werl tudeh. Soh, dis spirichwal paradais deh aal rong di werl. Dat meenz dat noh mata wehpaat yu liv, yu ku stil bee paat a da paradais az lang az yu sopoat chroo wership.
How eech wan a wi ku help mek di spirichwal paradais moa byootiful? (Paragraaf 16-17)
16. Weh wi need fi du fi kantinyu si di byooti a wi spirichwal paradais?
16 Fi mek wi ku stay eena di spirichwal paradais, wi haftu kantinyu bee tankful fi aala wi bradaz ahn sistaz rong di werl. How wi ku du dat? Wi need fi foakos pahn di gud kwalitiz weh wi bradaz ahn sistaz gat, ahn noh pahn dehn mistayks. (Jan 17:20, 21) Mek wi luk pahn wahn egzampl fi si wai dis impoatant. Eena wahn feel wi ku plaant difrent tingz, fi egzampl tomayto, sweet pepa, oanyan, an lata ada tingz. Saym way soh, eena wi kangrigayshanz tudeh wi ga lata difrent kaina peepl weh da laik dehndeh tingz weh wi fain eena di feel. (Isa. 44:4; 61:3) If wi geh kloas tu wan a di tingz weh wi plaant ahn wi noatis dat sohnting rang wid it, wi noh wahn seh dat di hoal feel noh gud. Jos laik dat, wi kyaahn alow fi wee oan mistayks er di mistayks a wi bradaz fi dischrak wi fahn di byooti a di hoal aaganaizayshan.
17. Weh eech wan a wi ku du fi kip di kangrigayshan yoonaitid?
17 Weh eech wan a wi ku du fi kip di kangrigayshan yoonaitid? Fi du dis, wi haftu bee sohnbadi weh redi fi mek pees. (Mach. 5:9; Roam. 12:18) Wi mek wi spirichwal paradais eevn moa byootiful wen wi du wi paat fi kip di pees wid wi bradaz ahn sistaz eena di kangrigayshan. Ahn wi need fi memba dat Jehoava da di wan weh bring eech wan a wi eena di spirichwal paradais. (Jan 6:44) Wee noa dat wi preshos tu Jehoava, soh jos imajin how hapi hihn mosi feel wen wi werk haad fi ga pees ahn yooniti wid wi bradaz ahn sistaz.—Isa. 26:3; Hag. 2:7.
18. Wat da sohn tingz wi shuda meditayt pan, ahn wai?
18 Jehoava giv ih servants wahn lata gud tingz. Soh how wi ku benifit fahn dehnya tingz? Wi ku meditayt pahn weh wi stodi fahn di Baibl ahn wi poblikayshan dehn. Wen wi du dis, ih help wi fi werk pahn kwalitiz weh wahn help wi fi “ga schrang lov fi wan anada laik if aala [wi] bilangz tu di saym famili.” (Roam. 12:10) Wen wi meditayt pahn di blesinz weh wi di geh now, wi rilayshanship wid Jehoava geh schranga. Ahn wen wi tink bowt di gud tingz weh Jehoava wahn gi wi eena di fyoocha, ih wahn mek wi luk faawod fi serv ahn fareva, an ih wahn help wi fi kantinyu serv ahn an bee hapi rait now.
WI NOH WAHN GIV OP
19. (a) Akaadn tu Isaiah 30:18, weh wi ku bee shoar a? (b) Weh wahn help wi bayr op ahn bee hapi?
19 Jehoava “redi fi shoa [wi] mersi” wen ih dischrai dis wikid werl. (Isa. 30:18) Laik how Jehoava da “wahn Gaad a jostis,” wi shoar dat hihn noh wahn alow Saytan werl fi egzis nat wan minit langa dan ih haftu. (Isa. 25:9) Jos laik Jehoava, wi di wayt wid payshens fi mek di day kohn wen ih sayv wi. Wail wi di wayt, wi waahn mek op wi main fi cherish di privilij weh wi ga fi pray, fi stodi an obay Gaad Werd, ahn fi meditayt pahn wi blesinz. Wen wi du dat, Jehoava wahn help wi fi bayr op ahn bee hapi wail wi wership ahn.
SANG 142 Hoal Aan tu di Hoap Weh Gaad Gi Wi
a Eena dis aatikl, wi wahn diskos chree wayz how Jehoava help ih servants fi bayr op wen dehn ga prablemz ahn stil bee hapi. Fi da reezn, wi wahn diskos Isaiah chapta 30. Dis chapta wahn rimain wi wai ih impoatant fi pray tu Jehoava ahn stodi di Baibl. Ih wahn aalso rimain wi fi meditayt pahn how Jehoava di bles wi rait now ahn how ih wahn bles wi eena di fyoocha.
b Isaiah 30:18, 19: “Jehoava di bee payshent an ih di wayt fi bles unu, ahn hihn redi fi shoa unu mersi. Kaaz Jehoava da wahn Gaad a jostis. Di wan dehn weh di wayt pahn hihn hapi. 19 Wen di peepl a Zaiyan goh bak goh liv da Jeroosalem, yu noh wahn krai nohmoh. Fi shoar, hihn wahn shoa yu kompashan wen yu baal owt fi help. Hihn wahn ansa yu az soon az ih hyaa yu.”
c Isaiah 30:20, 21: “Eevn doa Jehoava wahn giv unu payn fi eet laik if da bred ahn sofarin fi jrink laik if da waata, yu Grayt Teecha noh wahn haid ihself nohmoh, ahn yu wahn si yu Grayt Teecha wid yu oan aiy. 21 Ahn yu oan ayz wahn hyaa wahn werd di kohn fahn bihain yu di seh, ‘Dis da di way. Waak eena it,ʼ jos in kays yu goh tu di rait er tu di lef.”
d Isaiah 30:23-26: “Ahn hihn wahn gi di rayn fi wet di seed weh yu plaant eena di grong, ahn di food weh di grong projoos wahn bee plenti ahn rich. Pan da day yu animal dehn wahn di feed eena oapm paascha. 24 Ahn di kyatl ahn di dongki dehn weh di werk di grong wahn eet food weh seezn wid saril, weh peepl fan owt wid di shovl ahn di pichfaak. 25 Ahn pahn tap a evri taal mongtin ahn evri hai hil, sohn krik ahn riva wahn deh, pan di day a di big slaata wen di towa dehn jrap. 26 Ahn di lait fahn di ful moon wahn bee laik di lait fahn di son; ahn di lait fahn di son wahn bee sevn taim braita, laik di lait a sevn dayz, pan di day wen Jehoava ban op ih peepl weh mi geh inja, ahn heel di wan weh geh kot bad fahn di lik weh ih mi gi dehn.”
e WEH IH MEEN? Wi deh eena dis “spirichwal paradais” wen wi wership Jehoava wid wi bradaz ahn sistaz eena pees ahn yooniti. Eena dis paradais, Jehoava gi wi aal di spirichwal food weh wi need soh dat wi free fahn aal di lai weh faals rilijan teech. Ahn wi ga lata werk weh wi injai, weh da fi preech di gud nyooz a Gaad Kingdom. Wi injai wahn kloas rilayshanship wid Jehoava, ahn wi liv eena pees wid wi bradaz ahn sistaz, hoo help wi fi bayr op ahn bee hapi eevn doa wi fays chalenjiz. Wi goh eena di spirichwal paradais wen wi staat tu wership Jehoava eena di rait way ahn wen wi du wi bes fi fala ahn.