1. Weh wi ku ekspek, ahn weh wi ku bee shoar a?

 WI KU ekspek dat sohn peepl wahn deh gens wi wen wi di preech. Ahn dat praabli wahn geh wers az wi geh kloasa tu di en a dis sistem. (Dan. 11:44; 2 Tim. 3:12; Rev. 16:21) Wi ku bee shoar dat Jehoava wahn gi wi di help weh wi need. Wai wi ku bee soh shoar? Bikaaz Jehoava aalwayz help ih servant dehn fi du di werk weh hihn aks dehn fi du, eevn if di asainment haad. Fi egzampl, Jehoava mi help di prafit Izeekyel fi preech tu di Jooz eena Babilan. Mek wi kansida som a di tingz weh mi hapm eena Izeekyel laif.

2. Weh Jehoava mi seh bowt di peepl weh Izeekyel mi wahn preech tu, ahn weh wi wahn laan eena dis aatikl? (Ezekiel 2:3-6)

² Weh kaina peepl Izeekyel mi haftu preech tu? Jehoava mi seh dat di peepl mi “haad ayz,” “stobant eena dehn haat,” ahn dat dehn mi wahn “ton gens” ahn. Dehnya peepl da-mi laik daynjaros skyaapyan ahn laik prikl bush weh ku hert adaz. Dat da wai Jehoava mi tel Izeekyel wahn lata taimz: “Noh frayd”! (Reed Ezekiel 2:3-6.) b Izeekyel mi ga sokses eena ih asainment bikaaz (1) Jehoava mi sen ahn, (2) Gaad spirit mi gi ahn di schrent ih mi need, ahn (3) weh Gaad tel ahn mi schrentn ih fayt. How dehnya chree tingz mi help Izeekyel, ahn how dehn ku help wee tudeh?

3. Weh mi inkorij Izeekyel, ahn how Jehoava mi mek ih noa dat Hihn di sopoat ahn?

³ Jehoava mi tel Izeekyel: “Ai di sen yu.” (Ezek. 2:3, 4) Dehndeh werdz mosi mi reeli inkorij Izeekyel. Wai? Bikaaz Izeekyel mosi mi memba dat Jehoava mi tel Moaziz an Aizaiya sohnting simila wen Hihn mi chooz dehn fi bee Fi Hihn prafit dehn. (Ex. 3:10; Isa. 6:8) Izeekyel mi aalso noa dat Jehoava help dehndeh too prafit wen dehn mi geh sohn tof asainment. Soh wen Jehoava mi tel Izeekyel too taim: “Ai di sen yu,” Izeekyel mi noa fi shoar dat Jehoava mi wahn sopoat ahn. Wi fain wahn lata taim di frayz “Jehoava tel mi” eena di buk a Izeekyel. (Ezek. 3:16) Pahn tap a dat, Izeekyel mi aalso rait dis frayz wahn lata taim: “Den Jehoava taak tu mi agen.” (Ezek. 6:1) Izeekyel mi kanvins dat Jehoava da di wan weh sen ahn. Laik how Izeekyel pa da-mi wahn prees, hihn mi praabli teech Izeekyel dat Jehoava pramis ih prafit dehn dat Hihn wuda aalwayz help dehn. In fak, Jehoava mi tel Aizak, Jaykop, ahn Jerimaiya: “Ai deh wid yu.”—Gen. 26:24; 28: 15; Jer. 1:8.

4. Weh mi gi Izeekyel di schrent weh ih mi need fi preech?

⁴ How moas a di Izrelaits mi wahn rispan tu di preechin werk weh Izeekyel mi wahn du? Jehoava mi seh: “Di peepl a Izrel noh waahn lisn tu mee, soh dehn noh wahn waahn lisn tu yoo needa.” (Ezek. 3:7) Soh wen di peepl mi rijek Izeekyel, dehn mi-di rijek Jehoava tu. Dehndeh werdz mi komfert Izeekyel bikaaz eevn doa di peepl mi rifyooz fi lisn tu hihn, dat neva meen dat hihn da neva wahn gud prafit. Jehoava mi tel Izeekyel dat wen  di jojment mesij weh hihn preech kohn chroo, di peepl mi wahn “noa dat wahn prafit mi deh monks dehn.” (Ezek. 2:5; 33:33) Fi shoar dehndeh werdz mi komfert Izeekyel ahn gi ahn di schrent weh ih mi need fi preech.

5. Akaadn tu Isaiah 44:8, wehpaat wi ku geh korij?

⁵ Wen wi noa dat Jehoava da di wan weh sen wi fi preech, dat gi wi korij. Da wahn aana fi mek Jehoava kaal wi ih “witnisiz.” (Isa. 43:10) Dat da wahn wandaful privilij! Jehoava mi tel Izeekyel: “Noh frayd,” an ih tel wee tu: “Noh geh fraitn.” Wai wi shudn frayd fi di peepl weh deh gens wi? Jehoava sen wee, jos laik how ih mi sen Izeekyel, ahn soh wi ga Jehoava sopoat.—Reed Isaiah 44:8. c

6. (a) How Jehoava mek wi noa dat hihn di help wi? (b) Wehpaat wi ku geh di inkorijment ahn di komfert weh wi need?

⁶ Jehoava pramis dat hihn wahn help wi. Fi egzampl, jos bifoa Jehoava seh: “Yoo da mai witnisiz,” hihn mi seh: “Wen yu paas chroo di waata ahn chroo di riva dehn, Ai wahn deh wid yu, dehn noh wahn flod oava yu. Wen yu waak chroo di faiya, yu noh wahn bon op, ahn di flaym noh wahn swinj yu.” (Isa. 43:2) Wen wi preech, sohntaim wi mait fays sohn haad sichuwayshan weh da laik flod ahn chraiyalz weh da laik faiya. Bot wi noa fi shoar dat Jehoava wahn help wi fi kip aan di preech. (Isa. 41:13) Jos laik eena Izeekyel day, tudeh wahn lata peepl noh waahn lisn tu di mesij weh wi preech. Bot dat da noh bikaaz wi noh preech gud. Wi feel inkorij fi noa dat Jehoava hapi wid wi bikaaz wi noh giv op ahn wi kantinyu preech tu adaz. Paal mi seh: “Eech persn wahn geh ih oan riwaad akaadn tu di werk weh ih du.” (1 Kor. 3:8; 4:1, 2) Wahn sista weh di painyaa fi yaaz seh: “Ai feel hapi fi noa dat Jehoava bles wi bikaaz wi chrai wi bes.”

7. How Izeekyel mosi mi feel evri taim ih tink bowt di vizhan weh ih mi si? (Koment pahn di picha pahn di kova.)

⁷ Izeekyel mi geh fi si how powaful Gaad spirit powaful. Eena wahn vizhan, hihn mi si how Jehoava hoali spirit mi ga powa oava di aynjel ahn big weel dehn a di hevnli chariyat. (Ezek. 1:20, 21) How Izeekyel mi riyak wen ih si da vizhan? Hihn seh: “Az Ah seeʼt, Ah jrap dong wid mi fays tu di grong.” Hihn mi soh impres wid dis amayzin vizhan dat ih jrap da grong. (Ezek. 1:28) Laytaraan, wen Izeekyel mi tink bowt da amayzin vizhan, ih praabli mi mek ih fayt geh schranga ahn help ahn fi si dat Gaad hoali spirit mi wahn help ahn fi kantinyu preech.

8-9. (a) Weh mi hapm tu Izeekyel wen Jehoava mi tel ahn fi stan op? (b) How Jehoava mi gi Izeekyel di korij fi preech eena wahn teritori weh peepl mi deh gens ahn?

⁸ Jehoava mi koman Izeekyel: “Son a man, stan op soh dat Ah ku taak tu yu.” Wen Jehoava tel Izeekyel fi stan op, dat mi giv ahn di schrent, er di “spirit,” weh ih mi need fi get op fahn di grong. Izeekyel mi seh: “Gaad spirit mi kom eena mi ahn mek Ah stan op.” (Ezek. 2:1, 2) Chroo aal di asainment weh Izeekyel mi geh, Jehoava mi gaid Izeekyel wid ih “han,” weh da di hoali spirit.  (Ezek. 3:22; 8:1; 33:22; 37:1; 40:1) Gaad spirit mi gi Izeekyel di schrent soh dat ih ku preech tu “stobant ahn haad ayz” peepl eena ih teritori. (Ezek. 3:7) Jehoava mi tel Izeekyel: “Ah wahn mek yu fays haad jos laik fi dehn wan ahn yu farid haad jos laik fi dehn wan tu. Ah mek yu farid haad laik wahn daimon, weh haada dan wahn rak. Noh mek dehn fays mek yu feel frayd, ahn noh geh fraitn.” (Ezek. 3:8, 9) Da laik if Jehoava mi-di tel Izeekyel: ‘Noh geh diskorij sayka weh di peepl stobant. Ai wahn schrentn yu.ʼ

⁹ Afta dat, Jehoava spirit mi kehr Izeekyel chroo di teritori weh ih mi gwehn goh preech. Izeekyel mi seh: “Ah mi feel Jehoava spirit di gaid mi eena wahn powaful way.” Ih mi tek di prafit wahn hoal week fi laan an andastan di mesij weh ih mi wahn preech soh dat ih kuda song laik ih bileev it. (Ezek. 3:14, 15) Den Jehoava tel ahn fi goh da di vali, wehpaat ih mek “ih hoali spirit kom oava [ahn].” (Ezek. 3:23, 24) Soh Izeekyel mi redi fi staat tu preech.

10. Weh ku help wi fi du dis preechin werk, ahn wai wi need da help?

¹⁰ Weh wahn help wi fi du wi preechin werk? Fi ansa dat, tink bowt weh hapm tu Izeekyel. Bifoa hihn mi staat tu preech, Gaad spirit mi giv ahn di schrent weh ih mi need fi du ih asainment. Izeekyel mi need Jehoava spirit. Sayhn way soh, tudeh wee need Jehoava spirit fi du dis werk. Wai? Bikaaz Saytan di fait gens wi fi chrai stap wi fahn du dis preechin werk. (Rev. 12:17) Ih mait luk laik Saytan schranga dan wee ahn dat wi kyaahn win di fait gens ahn. Bot wen wi tek paat eena di preechin werk, wi akchwali di win di fait gens ahn! (Rev. 12:9-11) How dat pasabl? Wen wi tek paat eena di minischri, wi shoa dat wi noh frayd fi Saytan. Eech taim wi preech tu sohnbadi, Saytan di looz di fait. Soh, di fak dat wi ku kantinyu preech eevn wen wi enimiz chrai stap wi da proof dat da Jehoava powa di help wi  fi du it ahn dat hihn hapi wid wi.—Mach. 5:10-12; 1 Peet. 4:14.

11. How Jehoava hoali spirit ku help wi, ahn how wi ku kantinyu geh ih hoali spirit?

¹¹ Wen Jehoava mi mek Izeekyel fays ahn farid geh haad, ih mi-di gi Izeekyel di schrent weh ih mi need fi goh preech. Weh wi ku laan fahn dis? Gaad spirit ku help wee goh chroo eni prablem wi mait fays eena di minischri. (2 Kor. 4:7-9) Soh weh wi need fi du fi mek shoar dat wi ku kantinyu geh Gaad hoali spirit? Wi need fi kip aan di pray ahn bee kanfident dat Jehoava wahn hyaa wi. Jeezas mi teech ih disaiplz dat dehn need fi: “Kip aan di aks, . . . kip aan di saach, . . . [ahn] kip aan di nak.” Ahn den Jehoava wahn ansa, ahn “gi hoali spirit tu di wan dehn weh di aks ahn far it!”—Look 11:9, 13; Aks 1:14; 2:4.

12. Bays pahn Ezekiel 2:9–3:3, wehpaat di skroal mi kohn fram, ahn weh mi rait dong pahn di skroal?

¹² Gaad spirit mi gi Izeekyel di korij weh ih mi need fi preech, bot noh onli dat, weh Gaad tel ahn mi schrentn ih fayt tu. Eena wahn vizhan, Izeekyel mi si wahn han di hoal wahn skroal. (Reed Ezekiel 2:9–3:3.) d Weh di skroal mi kohn fram? Weh mi deh rait dong pahn di skroal? Ahn how dat mi schrentn Izeekyel? Mek wi fain owt. Di skroal mi kohn fahn Gaad chroan. Jehoava mosi mi yooz wan a di foa aynjel weh Izeekyel mi si erliya fi giv Izeekyel di skroal. (Ezek. 1:8; 10:7, 20) Di skroal mi gat een Gaad werdz, weh da-mi wahn lang jojment mesij. Izeekyel mi sopoas tu gi dis mesij tu di Jooz weh neva obay Jehoava. (Ezek. 2:7) Di skroal mi ga raitin pahn di front ahn bak.

13. Weh Jehoava mi tel Izeekyel fi du wid di skroal, ahn wai di skroal mi sweet?

¹³ Jehoava mi tel ih prafit fi eet di skroal ahn “ful [ih] beli wid it.” Izeekyel mi obay an eet di hoal skroal. Weh dis paat a di vizhan mi meen? Izeekyel mi need fi andastan di mesij gud bifoa ih goh tel di peepl. Hihn mi haftu bileev di mesij fers bifoa ih goh preech tu di peepl. Sohnting mi hapm weh mi sopraiz Izeekyel. Hihn mi fain owt dat di skroal “mi tays sweet laik honi.” (Ezek. 3:3) Wai ih mi tays sweet? Bikaaz Izeekyel mi seeʼt az wahn privilij fi reprizent Jehoava. Da mi wahn sweet ahn nais ekspeeryens fi hihn. (Ps. 19:8-11) Hihn mi hapi dat Jehoava mi pik ahn fi serv az ih prafit.

14. Weh mi help Izeekyel fi bee redi fi du weh Jehoava asain ahn?

¹⁴ Laytaraan, Jehoava mi tel Izeekyel: “Lisn tu evriting weh Ah tel yu ahn reeli tink bowt it.” (Ezek. 3:10) Wen Jehoava mi gi Izeekyel dehndeh inschrokshanz, ih mi-di tel ahn fi memba di tingz weh ih mi rait dong eena di skroal ahn fi tek taim fi meditayt pan it. Wen Izeekyel mi du dat, ih fayt mi geh schranga. Dat mi aalso help ahn fi gi wahn powaful mesij tu di peepl. (Ezek. 3:11) Now dat Izeekyel mi andastan ahn bileev di mesij weh Jehoava giv ahn, ih mi redi fi staat preech ahn fi finish ih asainment.—Kompyaa Psalm 19:14.

15. Fi mek wi noh giv op eena di minischri, weh wi need fi “reeli tink bowt”?

¹⁵ Fi mek wi noh giv op eena wi minischri, wi need fi stodi Gaad werd soh dat ih ku kantinyu schrentn wi fayt. Wi need fi “reeli tink bowt” evriting weh Jehoava tel wi. Tudeh, Jehoava taak tu wi chroo ih Werd, di Baibl. How wi ku mek shoar dat Gaad Werd kantinyu afek di way wi tink, how wi feel, ahn weh wi du?

16. Weh wi need fi du fi mek Gaad Werd toch wi haat?

¹⁶ Wen wi eet food ahn daijes it, wi badi geh schranga. Saym way soh, wen wi stodi Gaad Werd ahn meditayt pahn it, wi fayt geh schranga. Memba di lesn weh wi laan bowt di skroal. Wen ih kohn tu Gaad Werd, Jehoava waahn mek wi “ful [wi] beli wid it.” Dat meenz dat wi reeli need fi andastan weh ih seh. Wi ku du dat wen wi pray, reed, ahn meditayt. Fers, wi need fi pray soh dat Gaad Werd ku toch wi haat. Sekant, wi reed di Baibl. Ahn den wi stap ahn tink bowt it. Dat da weh ih reeli meenz fi meditayt. Weh wahn hapm if wi du dat? Di moa wi meditayt, di moa wi wahn andastan Gaad Werd, ahn dat wahn schrentn wi fayt.

17. Wai ih impoatant fi mek wi tink bowt weh wi reed eena di Baibl?

¹⁷ Wai ih impoatant fi reed di Baibl ahn meditayt pan it? Bikaaz dat wahn help wi fi ga di korij fi preech di Kingdom mesij now ahn fi preech di jojment mesij eena di fyoocha. Pahn tap a dat, wen wi meditayt pahn Jehoava wandaful kwalitiz, wi frenship wid hihn groa. Aala dis wahn help wi ga pees ahn feel kantentid. Now dat da sohnting sweet fi chroo!—Ps. 119:103.

18. Weh di peepl eena wi teritori wahn haftu noa, ahn wai?

¹⁸ Izeekyel da-mi wahn prafit, bot wee da noh prafit. Stilyet, doh, wi ga di mesij weh Jehoava ga eena ih Werd. Ahn wi mek op wi main fi kantinyu preech da mesij til wen Jehoava seh da werk don. Wen di day a jojment kohn, di peepl wahn kyaahn seh dat Gaad neva waan dehn er dat hihn mi ignoar dehn. (Ezek. 3:19; 18:23) Insted, dehn wahn haftu noa dat di mesij wi mi preech kohn fahn Gaad.

19. Weh wahn gi wi di schrent fi preech?

¹⁹ Weh wahn gi wi di schrent fi preech? Di saym chree tingz weh mi help Izeekyel. Wi kantinyu preech bikaaz wi noa dat da Jehoava sen wi, hihn gi wi ih hoali spirit, an ih Werd di Baibl schrentn wi fayt ahn gi wi korij. Wi mek op wi main fi kantinyu preech ahn bayr op “tu di en” bikaaz wi noa dat Jehoava di help wi.—Mach. 24:13.