STODI AATIKL 47
Noh Mek Notn Separayt Yoo Fahn Jehoava
“Ah put mi chros eena yoo, Jehoava.”—PS. 31:14.
SANG 122 Stan Op Schrang ahn Noh Mek Notn Moov Yu!
WEH WI WAHN DISKOS? a
1. How wee noa dat Jehoava waahn deh kloas tu wi?
JEHOAVA invait wi fi jraa kloas tu ahn. (Jay. 4:8) Hihn waahn bee wi Gaad, wi Faada, ahn wi Fren. Hihn ansa wi pryaaz ahn help wi wen wi goh chroo tof sichuwayshanz. Ahn hihn yooz ih aaganaizayshan fi teech wi ahn protek wi. Bot weh wee need fi du fi jraa kloas tu Jehoava?
2. Weh wee need fi du fi jraa kloas tu Jehoava?
2 Wee ku jraa kloas tu Jehoava wen wi pray tu ahn, an wen wi reed di Baibl ahn tek taim fi tink bowt it. If wi du dat, wi wahn geh fi lov an apreeshiayt ahn moa. Dat wahn moov wi fi obay ahn, an giv ahn di aana weh hihn dizerv. (Rev. 4:11) Di moa wi geh fi noa Jehoava, di moa wi wahn chros hihn ahn di aaganaizayshan weh hihn yooz fi help wi.
3. How Saytan chrai stap wi fahn serv Jehoava, bot weh wahn help wi fi neva lef Jehoava an ih aaganaizayshan? (Psalm 31:13, 14)
3 Saytan chrai stap wi fahn serv Jehoava, espeshali wen wi di goh chroo sohn tof sichuwayshan. How hihn du dat? Lee bit bai lee bit Saytan chrai mek wi looz wi chros eena Jehoava an ih aaganaizayshan. Bot wee ku protek wiself fahn Saytan an eni atak weh hihn du. Wen wi ga schrang fayt eena Jehoava ahn chros eena ahn, notn wahn mek wi stap serv ahn an lef fi hihn aaganaizayshan.—Reed Psalm 31:13, 14. b
4. Weh wi wahn diskos eena dis aatikl?
4 Eena dis aatikl, wi wahn diskos chree wayz how Saytan yooz peepl weh da noh paat a di kangrigayshan fi chrai damij wi chros eena Jehoava an ih aaganaizayshan widowt wi eevn noatis. How dehnya tingz ku separayt wi fahn Jehoava? Ahn how wee ku stay faytful tu Jehoava an ih aaganaizayshan?
WEN WI GOH CHROO PRABLEMZ
5. How di prablemz weh wi di goh chroo mek wi looz wi chros eena Jehoava an ih aaganaizayshan?
5 Sohntaim, wi goh chroo wahn lata prablemz. Fi egzampl, wi famili mait ton gens wi er wi mait looz wi jab. Bot how dehnya prablemz ku mek wi looz wi chros eena Jehoava an ih aaganaizayshan ahn separayt wi fahn hihn? Wen wi goh chroo prablemz fi wahn lang taim, ih mait mek wi feel laik wi noh ga hoap, an ih mait mek wi feel dipres. Saytan yooz dehndeh tingz fi mek wi tink dat Jehoava noh lov wi. Saytan waahn mek wi tink dat Jehoava ahn fi hihn aaganaizayshan da di reezn wai wi di sofa. Di Izrelaits weh mi liv da Eejip az slayv mi gaahn chroo sohnting laik dat. Eena di biginin, dehn mi bileev dat Jehoava mi asain Moaziz an Ayron fi set dehn free. (Ex. 4:29-31) Bot laytaraan Fayro mi mek dehn laif haada, ahn dehn mi en op di blaym Moaziz an Ayron fi di prablemz weh dehn mi-di goh chroo. Dehn tel dehn: “Unu mek Fayro an ih servant dehn hayt wi, ahn now unu gi dehn reezn fi kil wi.” (Ex. 5:19-21) Di Izrelait dehn mi blaym Gaad laayal servants. Dat sad noh chroo? How yoo ku kip yu chros eena Jehoava an ih aaganaizayshan schrang wen yu di goh chroo prablemz fi wahn lang taim?
6. Weh wee ku laan fahn di prafit Habakok? (Habakkuk 3:17-19)
6 Pray tu Jehoava ahn poar owt yu haat tu ahn, an pen pahn hihn fi sopoat yu. Di prafit Habakok mi gaahn chroo wahn lata prablemz tu. Wan taim, hihn mi eevn tink dat Jehoava neva kay bowt ahn. Soh hihn mi pray tu Jehoava ahn tel ahn how hihn feel. Hihn mi seh: “Oa Jehoava, how lang Ah haftu krai owt fi help, bot yu noh lisn? . . . Wai yu talarayt injostis?” (Hab. 1:2, 3) Jehoava mi lisn tu ih laayal servant pryaa. (Hab. 2:2, 3) Afta Habakok tink bowt aal weh Jehoava mi du fi sayv ih peepl, ih mi feel hapi agen. Hihn mi kanvins dat Jehoava reeli kay bowt ahn, an dat Hihn mi wahn help ahn deel wid aal di chraiyalz weh ih mi-di goh chroo. (Reed Habakkuk 3:17-19.) c Weh wi ku laan fahn Habakok? Wen wi di goh chroo prablemz, wi need fi pray tu Jehoava ahn tel ahn how wi feel. Den wi need fi pen pan ahn fi sopoat wi. Wen yu du dis, yu ku bee shoar Jehoava wahn gi yu di schrent weh yu need fi bayr op. Ahn wen yu si how hihn sopoat yu, yu fayt wahn geh schranga.
7. Weh Shirley famili mi tel ahn, an weh mi mek shee stay kloas tu Jehoava?
7 Kip wahn spirichwal skejul weh wahn help yu stay kloas tu Jehoava. Dis da weh mi help Shirley, wahn sista fahn Papua New Guinea, wen shee mi-di goh chroo sohn prablemz. d Shirley famili mi poa, ahn sohntaim dehn neva ga inof food fi eet. Wan a ih relitiv mi chrai mek shee stap chros eena Jehoava. Hihn mi tel ahn: “Yoo seh dat Gaad hoali spirit di help yu, bot da how ih di help yu? Di famili stil poa. Yu di ways yu taim di preech.” Shirley seh: “Ai mi aks miself: ‘Gaad reeli kay bowt wee?ʼ Soh rait away Ah mi pray tu Jehoava ahn tel ahn evriting weh Ah mi-di wori bowt. Ai neva stap reed di Baibl ahn wi poblikayshanz, an Ah mi kantinyu preech ahn goh da aala di meetin dehn.” Shee mi geh fi si how Jehoava mi-di tek kayr a fi shee famili. Nat wan day paas dat dehn neva ga notn fi eet, ahn dehn mi hapi. Shirley seh: “Ah mi feel dat Jehoava mi-di ansa mi pryaaz.” (1 Tim. 6:6-8) Jos laik Shirley, if yu kip op wid yu spirichwal skejul, den notn wahn separayt yu fahn Jehoava.
WEN BRADAZ WEH TEK DI LEED FAYS PERSIKYOOSHAN
8. Weh ku hapm tu di bradaz weh tek di leed eena Jehoava aaganaizayshan?
8 Wi enimi dehn spred lai ahn gi rang infamayshan pahn soashal meedya bowt di bradaz weh tek di leed eena Jehoava aaganaizayshan. (Ps. 31:13) Dehn ares som a wi bradaz an eevn chaaj dehn laik if dehn da kriminal. Di fers-senchri Kristyanz mi gaahn chroo sohnting simila wen di Roaman dehn mi ares Paal fi sohnting weh hihn neva du. Weh dehnya bradaz mi du?
9. Weh som a di bradaz mi du wen dehn mi put Paal eena jayl?
9 Wen Paal mi deh eena jayl da Roam, som a di bradaz mi stap sopoat ahn. (2 Tim. 1:8, 15) Wai? Maybi dehn mi shaym a Paal bikaaz peepl mi si hihn az wahn kriminal. (2 Tim. 2:8, 9) Er maybi dehn mi frayd dat peepl mi wahn persikyoot dehn tu. Wateva da-mi fi dehn reezn, jos imajin how Paal mosi mi feel. Hihn mi gaahn chroo wahn lat an ih mi eevn ris ih oan laif fi dehn. (Aks 20:18-21; 2 Kor. 1:8) Wee noh waahn bee laik di bradaz weh neva help Paal wen hihn mi need dehn di moas! Soh weh wi need fi memba wen dehn persikyoot bradaz weh di tek di leed?
10. Weh wi shuda memba wen bradaz weh di tek di leed fays persikyooshan, ahn wai?
10 Memba wai wi fays persikyooshan ahn hoo da di wan weh kaaz it. Sekant Timoti 3:12 seh: “Evribadi weh waahn wership Gaad wid aala dehn haat az wahn disaipl a Krais Jeezas wahn fays persikyooshan.” Soh ih noh fi sopraiz wi wen Saytan atak wi bradaz weh tek di leed. Fi hihn goal da fi mek wi bee frayd ahn stap bee laayal tu Jehoava.—1 Peet. 5:8.
Onisiforos neva frayd fi sopoat Paal wen hihn mi eena jayl. Dis picha shoa how bradaz ahn sistaz sopoat ada bradaz weh deh eena jayl (Paragraaf 11-12)
11. Weh wi ku laan fahn Onisiforos egzampl? (2 Timoti 1:16-18)
11 Kantinyu sopoat yu bradaz noh mata wat. (Reed 2 Timoti 1:16-18.) Wahn brada fahn di fers senchri weh naym Onisiforos mi ak difrent fahn di ada bradaz wen Paal mi deh eena jayl. Dis da weh Paal mi seh bowt Onisiforos: “Ih neva shaym a mi bikaaz Ah deh eena prizn.” Insted, Onisiforos gaahn luk fi Paal, ahn wen ih fain ahn, hihn mi chrai help ahn fi get aal weh ih need. Onisiforos mi ris ih oan laif fi help Paal. Weh wi laan fahn fi hihn egzampl? Wi waahn kantinyu sopoat wi bradaz weh di fays persikyooshan, eevn doa wi mait feel frayd. Soh mek wi du aal weh wi kud fi help dehn ahn sopoat dehn. (Prov. 17:17) Dehn need aala wi lov ahn sopoat.
12. Weh wi ku laan fahn wi bradaz ahn sistaz weh liv da Russia?
12 Tink bowt how wi bradaz ahn sistaz weh liv da Russia help dehn bradaz ahn sistaz weh deh eena jayl. Wen dehn ga dehn koat kays, di bradaz ahn sistaz deh rait deh fi sopoat dehn. Weh wi laan fahn dehn? Wen dehn persikyoot, slanda, er ares wi bradaz weh tek di leed, wi noh fi feel frayd. Wi fi pray fi dehn, chrai fain wayz how fi help dehn famili, ahn luk fi wayz how wi ku sopoat dehn.—Aks 12:5; 2 Kor. 1:10, 11.
WEN PEEPL KRITISAIZ WI
13. Wen peepl kritisaiz wi, how dis ku mek wi looz wi chros eena Jehoava an ih aaganaizayshan?
13 Wi famili membaz weh da noh Witnisiz, wi klaasmayt, er peepl weh wi werk wid mait teez wi bikaaz wi goh owt ahn preech er bikaaz wi obay Jehoava laa. (1 Peet. 4:4) Som mait tel wi: “Ai laik yoo, bot yu rilijan tu schrik an oal-fashan.” Som peepl mait kritisaiz wi bikaaz a di way wi chreet wahn persn weh geh disfeloship. Som a dehn mait seh: “How yu ku kaal yuself wahn lovin persn?” Wen peepl seh tingz laik dehnya, ih ku mek wi dowt Jehoava an ih aaganaizayshan. Ih ku mek wi wanda: ‘Jehoava di ekspek tu moch fahn mi? Fi hihn aaganaizayshan tu schrik?ʼ If yoo di goh chroo sohnting laik dis, weh yu ku du fi stay kloas tu Jehoava an ih aaganaizayshan?
Joab neva bileev di lai weh ih soa-kaal frenz mi tel ahn wen dehn mi-di kritisaiz ahn. Insted, hihn mi mek op ih main fi stay laayal tu Jehoava (Paragraaf 14)
14. Weh wi shuda du wen peepl kritisaiz wi bikaaz wi obay Jehoava standadz? (Psalm 119:50-52)
14 Mek op yu main fi kantinyu obay Jehoava standadz noh mata wat. Joab mi obay Jehoava standadz eevn doa peepl mi kritisaiz ahn. Wan a Joab soa-kaal fren mi chrai mek hihn bileev dat Gaad neva kay if Joab mi du weh rait er nat. (Job 4:17, 18; 22:3) Bot Joab neva bileev dehndeh lai ataal. Hihn mi noa dat Jehoava standadz a rait ahn rang karek, soh hihn mi mek op ih main fi obay dehn. Hihn mi stay laayal tu Jehoava noh mata how adaz mi chreet ahn. (Job 27:5, 6) Wat da di lesn fi wee? Noh mek peepl weh laik kritisaiz yu mek yu dowt Jehoava standadz. Tink bowt weh yu don gaahn chroo. Maybi yu don seeʼt wahn lata taimz, dat yu laif beta wen yu obay Jehoava standadz. Mek op yu main fi aalwayz bee paat a Jehoava aaganaizayshan an obay fi hihn standadz. Den, ih noh wahn mata humoch peepl kritisaiz yu, yu wahn neva stap serv Jehoava.—Reed Psalm 119:50-52. e
15. Wai Brizit famili mi kritisaiz ahn?
15 Mek wi luk pahn di egzampl a Sista Brizit, weh liv da India. Fi shee famili mi kritisaiz ahn bikaaz shee da wan a Jehoava Witnisiz. Lee wail afta shee mi geh baptaiz eena 1997, fi shee hozban, weh da neva wan a Jehoava Witnisiz, mi looz ih jab. Hihn mi disaid dat ih hoal famili shuda goh liv wid ih payrents, weh mi liv eena wahn nada siti. Bot dis mi wahn bee wahn nada chalenj fi Brizit. Shee mi wahn haftu werk ful-taim fi sopoat ih famili, bikaaz fi shee hozban neva ga no jab. Pahn tap a dat, di kloasis Kingdom Haal mi deh 220 mailz (350 km) fahn wehpaat shee mi stay. Fi shee hozban famili mi deh gens ahn bikaaz shee da-mi wan a Jehoava Witnisiz. Di sichuwayshan mi geh soh bad dat Brizit ahn fi shee hoal famili mi haftu moov agen. Den, fi shee hozban mi ded. Laytaraan, wan a fi shee daata, weh mi onli 12 yaaz oal, mi ded fahn kyansa. Fi mek mataz wers, Brizit relitiv dehn mi blaym shee fi aala dehnya bad tingz weh mi hapm. Dehn mi klaym seh dat if shee da neva wan a Jehoava Witnisiz, non a dehndeh tingz mi wahn hapm. Bot Brizit mi kantinyu chros Jehoava, ahn shee mi stay kloas tu fi hihn aaganaizayshan noh mata wat.
16. Weh blesin Brizit mi geh bikaaz ih stay kloas tu Jehoava an ih aaganaizayshan?
16 Bikaaz Brizit mi liv faar fahn di Kingdom Haal, wahn serkit oavaseeya mi inkorij ahn fi preech eena di ayrya weh shee liv ahn fi ga meetin eena ih hows. Eena di biginin, shee mi feel laik da-mi tu moch fi shee. Bot shee stil mi du weh di brada tel ahn fi du. Brizit mi preech tu peepl eena fi shee ayrya, ga meetin eena fi shee hows, ahn set wahn taim fi du famili wership wid fi shee daataz. How Jehoava mi bles ahn? Brizit mi geh fi kandok wahn lata Baibl stodiz. Pahn tap a dat, wahn lata fi shee stodiz mi geh baptaiz. Eena 2005 shee staat tu serv az wahn regyula painyaa. Bikaaz shee chros Jehoava ahn stay laayal tu fi hihn aaganaizayshan, hihn mi bles ahn. Fi shee too daataz faytful ahn di serv Jehoava, ahn now too kangrigayshan deh eena di ayrya wehpaat shee liv! Brizit noa dat Jehoava mi gi shee di schrent fi deel wid di prablemz weh shee mi-di goh chroo ahn fi bayr op wen fi shee famili mi-di kritisaiz ahn.
STAY LAAYAL TU JEHOAVA AN IH AAGANAIZAYSHAN
17. Weh yu mek op yu main fi du?
17 Saytan waahn mek wi bileev dat wen wi di goh chroo prablemz Jehoava abandan wi ahn dat wen wi kantinyu sopoat fi hihn aaganaizayshan dat onli wahn mek wi laif haada. Wen dehn persikyoot, slanda, er put di bradaz weh di tek di leed eena prizn, Saytan waahn mek wi feel frayd. Ahn wen dehn kritisaiz wi, hihn waahn mek wi looz wi chros eena Jehoava ahn Fi Hihn aaganaizayshan. Bot bikaaz wi noa aala fi hihn chriks, hihn kyaahn fool wi. (2 Kor. 2:11) Mek it yu goal fi rijek aala Saytan lai ahn fi stay laayal tu Jehoava ahn Fi Hihn aaganaizayshan. Memba, dat Jehoava wahn neva abandan yu. (Ps. 28:7) Noh mek notn separayt yu fahn Jehoava!—Roam. 8:35-39.
18. Weh wi wahn diskos eena di neks aatikl?
18 Eena dis aatikl, wi taak bowt sohn prablemz weh kohn fahn owtsaida di kangrigayshan. Bot prablemz weh kohn fahn eensaida di kangrigayshan ku aalso mek wi looz wi chros eena Jehoava. How wi ku deel wid dehndeh prablemz ahn stil stay kloas tu Jehoava? Wi wahn taak bowt dat eena di neks aatikl.
SANG 118 “Gi Wi Moa Fayt”
a Fi mek wi bayr op ahn stay faytful joorin dehnya laas dayz, wi need fi kantinyu chros eena Jehoava an ih aaganaizayshan. Saytan yooz chraiyalz fi chrai dischrai da chros. Eena dis aatikl, wi wahn diskos chree wayz how Saytan du dat ahn weh wee ku du fi stay faytful tu Jehoava an ih aaganaizayshan.
b Psalm 31:13, 14: “Ah hyaa peepl seh wahn lata wikid tingz bowt mi, an evri way Ah ton Ah feel frayd. Wen dehn gyada fi kohn gens mi, dehn plan fi kil mi. 14 Bot Ah put mi chros eena yoo, Jehoava, an Ah seh: ‘Yoo da mai Gaad.ʼ”
c Habakkuk 3:17-19: “Di fig chree mait noh blaasam, ahn di vain dehn mait noh gat aan no froot; di aliv chree mait noh bayr, ahn di lan mait noh projoos no food; di sheep mait disapyaa fahn di sheep pen, ahn nohmoh kow mait deh eena di staybl; 18 Bot az fi mee, Ai wahn rijais wid Jehoava; Ah wahn bee hapi wid di Gaad a mai salvayshan. 19 Di Sovrin Laad Jehoava da mai schrent; hihn wahn mek mi fut bee laik di fut a di dyaa an ih wahn mek Ah waak eena di hai plays dehn.”
d Som a di naym dehn chaynj.
e Psalm 119:50-52: “Dis gi mee komfert wen Ai di sofa, kaaz yu werdz kip mi alaiv. 51 Eevn doa prowd peepl mak mi tu nohmoh nohmoh, Ai noh wahn schray weh fahn yu laa. 52 Ah memba how yu joj adaz eena di paas, Oa Jehoava, ahn dat gi mi komfert.”