Ah mi baan eena 1948 eena wahn smaal lee vilij weh deh eena di sowtwes paat a Nigeria. Da taim deh, mai pa yonga breda, Moustapha, ahn mi oalda breda, Wahabi, mi geh baptaiz az Jehoava Witnisiz. Wen Ah mi nain, mi pa ded. Ah mi feel sad sad. Mai oalda breda Wahabi mi tel mi dat Ah wahn ku si dadi agen eena di rezorekshan. Dat mi gi mi wahn lata komfert an ih mi mek Ah waahn stodi di Baibl. Soh Ah mi stodi an Ah geh baptaiz eena 1963 lang wid mi chree ada breda dehn.

Ai gaahn da Lagos eena 1965 fi stay wid mi oalda breda Wilson. Ah mi soh hapi fi deh eena di Igbobi kangrigayshan wid lata ada regyula painyaaz. Fi dehn jai ahn dehn gud egzampl mi mek Ah waahn painyaa. Soh eena Janiweri 1968, Ah staat tu regyula painyaa.

Albert Olugbebi, wahn brada hoo mi serv da Betel, mi aaganaiz wahn speshal meetin wid aala di yong peepl fi taak tu wi bowt how naadan Nigeria mi need speshal painyaaz. Ah stil memba weh Brada Olugbebi mi tel wi: “Unu yong an unu ku yooz unu enerji fi serv Jehoava. Dehn ga lata werk fi mek unu du deh.” Ah mi waahn bee jos laik Aizaiya ahn goh eniway wehpaat Jehoava wuda  waahn sen mi. Soh Ah mi aplai fi serv az wahn speshal painyaa.—Isa. 6:8.

Eena May a 1968, Ah mi geh asain tu di siti a Kano, weh mi deh eena naadan Nigeria. Dis mi hapm joorin di Biafran Waar, weh mi laas fahn 1967-1970. Wahn lata peepl mi sofa ahn ded bikaaz a di faitin eena naadan Nigeria. Afta dat, di faitin mi moov tu di ees paat a Nigeria. Wahn brada mi chrai kanvins mi fi noh goh deh bikaaz ih neva waahn mek Ah geh hert. Bot Ah tel ahn: “Tank yu, Ah noa yu kay wahn lat bowt mi. Bot if Jehoava waahn mek Ah goh deh ahn du mai asainment, Ah shoar dat hihn wahn help mi.”

Ih mi reeli sad fi si weh mi hapm joorin di waar da Kano. Ih mi dischrai moas a di siti. Sohntaim, wail wi mi deh owt eena feel servis, wi mi si ded badiz fahn peepl weh mi geh kil joorin di waar. An eevn doa dehn mi ga sohn kangrigayshan da Kano, moas a di bradaz mi lef di siti. Les dan 15 poblishaz mi stay da Kano, ahn dehn mi frayd ahn diskorij bad. Wen di siks a wee speshal painyaaz mi reech deh, di bradaz ahn sistaz mi soh hapi. Wi mi inkorij dehn wahn lat ahn dehn mi feel beta. Wi help dehn fi staat aaganaiz di meetinz ahn preechin agen ahn fi staat sen dehn feel servis ripoat ahn lichricha aada tu di branch aafis.

Wee speshal painyaaz mi staat laan di Hausa langwij. Ahn wen di loakal peepl mi hyaa di Kingdom mesij eena dehn oan langwij, wahn lata dehn staat lisn tu wi. Bot peepl fahn di mayn rilijan eena di ayrya neva hapi bowt dat ataal. Wan taim wahn man chays mee ahn mi paadna wid wahn naif, bot gud ting wi ron faasa dan hihn soh ih kudn kech wi! Eevn doa wi laif mi deh eena daynja, Jehoava mi mek wi “feel sayf” ahn di nomba a poblishaz mi staat tu groa. (Ps. 4:8) Tudeh, dehn ga oava 500 poblishaz di serv eena 11 kangrigayshan da Kano.

Eena Aagas 1968, afta Ah mi deh da Kano fi onli wahn fyoo monts, Ah mi geh asain tu Niamey, weh da di kyapital a Niger. Ah mi gaahn  wid too ada speshal painyaaz. Ahn wi mi soon fain owt dat Niger, weh deh eena West Africa, deh eena wan a di hatis ayrya pahn ert. Wi mi haftu laan fi deel wid blayzin son hat ahn wi mi haftu laan French, weh da-mi di mayn langwij da Niamey. Eevn doa dis neva eezi, wi mi put wi chros eena Jehoava ahn staat tu preech eena di siti tugeda wid di lee bit a poblishaz weh mi liv deh. Eena wahn shaat wail, aalmoas evribadi da Niamey weh mi noa how fi reed mi geh wahn kapi a di buk weh naym The Truth That Leads to Everlasting Life. Dehn mi ga peepl weh mi eevn kohn luk fi wi fi geh dehn oan kapi!

Noh lang afta dat, wi mi geh fi fain owt dat di govament neva laik Jehoava Witnisiz. Wi mi ga wi fers serkit asembli eena Joolai 1969, ahn da mi bowt 20 a wi mi dehdeh. Too poblishaz mi fi geh baptaiz, bot pahn di fers day a di asembli, di polees mi kohn stap di proagram. Dehn mi kehr di speshal painyaaz ahn di serkit oavaseeya da di polees stayshan. An afta dehn kweschan wi, dehn mi tel wi dat wi mi haftu goh bak da di polees stayshan di neks day. Wi mi riyalaiz dehn mait stil chrai stap wi agen, soh wi mi disaid fi ga di baptizm taak da sombadi hows ahn fi baptaiz di poblishaz eena seekrit eena wahn riva.

Wahn fyoo weeks afta dat, di govament aada mee ahn di faiv ada speshal painyaaz fi lef Niger. Dehn mi gi wi 48 owaz fi lef di konchri, ahn wi mi haftu fain wi oan way fi goh. Soh wi obay ahn gaahn schrayt da di branch aafis da Nigeria, wehpaat dehn gi wi wahn nyoo asainment.

Dehn mi asain mi tu wahn lee vilij da Nigeria weh naym Orisunbare, wehpaat Ah mi lov preech ahn kandok Baibl stodiz lang wid di smaal groop a poblishaz weh mi liv deh. Afta siks monts di branch mi invait mi fi goh bak da Niger, bot dis taim ih mi wahn bee mee wan. Fers, Ah mi sopraiz ahn nervos, bot Ah mi hapi dat Ah mi wahn geh fi si di bradaz da Niger agen!

Di day afta Ah get bak da Niamey, wahn Nigerian biznizman mi si mi ahn riyalaiz dat Ai da wahn Witnis. Ih staat aks mi kweschanz bowt di Baibl, ahn soon wi mi staat stodi di Baibl tugeda. Afta ih mi stap smoak ahn stap di lata jrinkin, ih mi geh baptaiz. Afta dat, Ah mi soh hapi fi preech wid di bradaz ahn sistaz eena difrent paat a Niger, an Ah mi geh fi si how oava di yaaz peepl mi aksep di chroot rait deh da Niger. Wen Ah mi fers get deh, dehn mi ga onli 30 poblishaz eena di hoal konchri. Wen Ah mi lef, dehn mi ga 69.

Eena Disemba 1977, Ah gaahn bak da Nigeria fi geh chraynin. Afta da chraynin, weh mi laas chree weeks, Brada Malcolm Vigo, hoo da-mi di Branch Komiti oavaseeya, mi mek Ah reed wahn leta fahn di Sierra Leone branch aafis. Eena da leta dehn mi seh dat dehn mi-di luk fi wahn brada weh helti, singl, di painyaa, ahn weh mi taak Inglish ahn  French fi serv az wahn serkit oavaseeya da Guinea. Brada Vigo mi tel mi dat dehn mi-di chrayn mee fi da asainment an ih mek it klyaa dat ih neva mi wahn bee wahn eezi asainment. Soh ih tel mi, “Tink bowt it gud bifoa yu ansa.” An Ai ansa rait deh, “Sins da Jehoava waahn mek Ah goh, Ah gwehn.”

Ah kech wahn playn fi gaahn da Sierra Leone. Wen Ah get da di branch aafis, wahn brada tel mi: “Wi noh noa how wi bradaz ahn sistaz di du da Guinea.” Eevn doa di bradaz da di Sierra Leone branch mi rispansabl fi tek kayr a di bradaz da Guinea, dehn kudn kamyoonikayt wid di poblishaz deh bikaaz a di waar weh mi-di goh aan. Dehn mi don chrai sen bradaz deh bifoa, bot ih neva pasabl bikaaz a di sichuwayshan eena da konchri. Soh dehn sen mi da Conakry, weh da di kyapital a Guinea, fi mek Ah geh permishan fahn di govament fi liv deh.

Wen Ah reech da Conakry, Ah mi gaahn da di Nigerian embasi fi meet wid di ambasada. Ah mi tel ahn dat Ah mi waahn stay da Guinea fi preech deh. Bot di ambasada tel mi noh fi stay deh kaaz dehn kuda ares mi er eevn hert mi. Pahn tap a dat, ih tel mi: “Goh bak da Nigeria ahn preech deh.” Bot Ah tel ahn, “Ah noh gwehn no way. Ah waahn stay rait ya ahn preech.” Soh di ambasada rait wahn leta tu di minista da Guinea soh dat ih kuda help mi, ahn di minista did help mi.

Noh tu lang afta dat, Ah gaahn bak da di branch aafis da Sierra Leone ahn tel di bradaz bowt di disizhan weh di minista mi mek. Dehn mi soh eksaitid dat dehn showt wid hapinis wen dehn mi hyaa how Jehoava mi mek tingz gaahn gud fi mi da Guinea. Di govament mi gi mi permishan fi liv da Guinea.

Fahn 1978 tu 1989, Ah serv az wahn serkit oavaseeya da Guinea ahn Sierra Leone an az wahn sobstityoot serkit oavaseeya da Liberia. Lata taim Ah mi geh sik, ahn sohntaim dis mi hapm da sohn plays weh mi haad fi reech. Bot di bradaz mi tek gud kayr a mi ahn dehn mi chrai dehn bes fi kehr mi da wahn haaspital.

Wan taim, Ah mi geh sik bad wid malayria, an Ah mi aalso fain owt dat Ah ga lata werm eena mi beli. Laytaraan, afta Ah mi geh beta, Ah mi fain owt dat di bradaz mi tink Ah mi wahn ded, soh dehn mi don di disaid wehpaat dehn mi wahn beri mi! Eevn doa Ah mi nayli ded fahn dehndeh siknis, Ah neva wans tink bowt lef mi asainment. Ai kanvins dat da onli Jehoava ku protek wi eena di bes way, bikaaz eevn if wi ded hihn ku rayz wi op bak tu laif.

Eena 1989, Ah meet Dorcas, wahn painyaa sista weh hombl ahn lov Jehoava. Wi geh marid ahn shee jain mi eena di serkit werk. Dorcas mi werk haad lang wid mi eena wi asainment ahn shee mek wahn lata sakrifais fi Jehoava. Tugeda, wi wuda waak op tu 15 mailz (25 kilomita) fahn wan kangrigayshan tu di neks, ahn wi mi haftu bak wi logij tu. Fi goh da di kangrigayshan dehn weh mi  deh faar, wi mi haftu hich haik ahn di road dehn mi modi ahn ful a pat hoal.

Dorcas da wahn brayv wuman. Fi egzampl, wan taim wi mi haftu chravl fi faiv dayz fi reech wehpaat wi mi gwehn, ahn wi mi haftu kraas wahn riva weh mi ga lata krakadail. Ahn da taim deh di brij mi brok, soh wi mi haftu kraas eena doari. Wen Dorcas stan op fi get owta di doari, ih jrap eena deep waata. Non a wi mi noa how fi swim, ahn krakadail mi deh eena di riva. Gud ting sohn yong man mi jomp eena di waata fi sayv mi lee waif. Too a wi mi ga sohn naitmyaa bowt da chrip fi wahn lang taim afta dat. Bot wi mi kantinyu fi serv eena wi asainment.

Erli eena 1992, wi mi sopraiz fi fain owt dat Dorcas mi pregnant. Wi mi haftu disaid if wi mi wahn kantinyu serv az speshal painyaaz. Soh wi seh tu wiself, “Jehoava gi wi wahn preshos gif!” Soh wi mi disaid fi naym wi lee daata Jahgif. Ahn foa yaaz afta Jahgif mi baan, wi mi ga wahn neks baybi ahn wi mi naym hihn Eric. Too a wi pikni da wahn gif fahn Jehoava. Jahgif di serv da di rimoat chranslayshan aafis da Conakry, an Eric da wahn ministeeryal servant.

Eevn doa Dorcas mi haftu stap speshal painyaa, shee mi kantinyu regyula painyaa eevn wail ih mi-di tek kayr a wi pikni dehn. Ahn wid Jehoava help, Ah mi kantinyu fi serv az wahn speshal painyaa. Ahn wans wi pikni dehn mi groa op, Dorcas kuda mi speshal painyaa agen. Now too a wi di serv az mishineriz da Conakry.

Ai mi aalwayz gaan eniway wehpaat Jehoava sen mi. Mee ahn mi lee waif aalwayz si how Jehoava bles ahn protek wi. Ahn bikaaz wi mi chros eena Jehoava insteda chros eena mateeryal tingz, wi mi avoid lata prablemz ahn wi noh wori tu moch. Eena aala wi ekspeeryens chroo wi laif, mee ahn Dorcas laan dat Jehoava da di bes protekshan ahn hihn da di “Gaad weh sayv wi.” (1 Chron. 16:35) Ai shoar dat Jehoava wahn protek dehn wan weh chros eena hihn jos “laik how sohnbadi wuda rap op sohnting preshos eena wahn bag fi protek it.”—1 Sam. 25:29.