1-2. (a) Wai Paal kuda mi seh dat lov grayta dan fayt ahn hoap? (b) Weh kweschanz wi wahn ansa?

 WEN Paal mi taak bowt fayt, hoap, ahn lov, ih mi seh dat “di graytis wan da lov.” (1 Kor. 13:13) Bot wai Paal mi seh dat? Wel, wahn taim wahn kohn wen aala Gaad pramis bowt di nyoo werl wahn kohn chroo. Wen da taim kohn, wi noh wahn haftu ga fayt eena dehndeh pramis nohmoh, ner wi noh wahn haftu hoap fi mek di nyoo werl kohn. Bot wi wahn aalwayz haftu lov Jehoava ahn peepl. Ahn wi lov fi dehn wahn stay di groa fareva.

² Laik how wi aalwayz need fi shoa lov, mek wi ansa chree kweschan. Wan, wai wi need fi shoa lov tu wan anada? Too, how wi shoa lov tu wan anada? Ahn chree, how wi ku kip wi lov fi wan anada schrang?

3. Wat da sohn reezn wai wi shuda lov wi bradaz ahn sistaz?

³ Wai ih soh impoatant fi mek wi lov wan anada? Kaaz lov da weh proov dat wee da chroo chroo Kristyanz. Jeezas mi tel ih apasl dehn: “Evribadi wahn noa dat unu da mai disaipl if unu lov wan anada.” (Jan 13:35) Pahn tap a dat, lov da weh mek wi stay yoonaitid. Paal mi seh dat “lov bring peepl tugeda eena wahn perfek  way.” (Kol. 3:14) Bot wi ga wahn nada impoatant reezn wai wi shuda lov wan anada. Di apasl Jan mi tel ih bradaz ahn sistaz: “Enibadi weh lov Gaad haftu lov ih bradaz tu.” (1 Jan 4:21) Wen wi shoa dat wi lov wi bradaz ahn sistaz, wi proov dat wi lov Jehoava tu.

4-5. Gi wahn egzampl weh shoa weh wi lov fi Gaad ga fi du wid wi lov fi wi bradaz ahn sistaz.

⁴ Weh wi lov fi Gaad ga fi du wid wi lov fi wi bradaz ahn sistaz? Tink bowt how wi haat kanek tu di res a wi badi. Wen wahn dakta chek wi pols pahn wi han fi si if ih week er schrang, dat ku help hihn fi noa weh kandishan wi haat deh eena. Soh weh dis teech wi bowt lov?

⁵ Jos laik how di dakta geh fi noa how wi haat di du wen ih chek wi pols, da rait soh wi ku fain owt how schrang wi lov fi Jehoava if wi chek how schrang wi lov fi wi bradaz ahn sistaz. If wi si dat wi noh ga schrang lov fi wi bradaz ahn sistaz, den dis shoa dat wi lov fi Jehoava mait bee week tu. Bot wen wi stay di shoa dat wi lov wi bradaz ahn sistaz, dat proov dat wi lov fi Jehoava schrang.

6. If wi lov fi wi bradaz ahn sistaz noh schrang, wai dis ku bee wahn seeryos prablem? (1 Jan 4:​7-9, 11)

⁶ If wi lov fi wi bradaz ahn sistaz di geh week, dis da wahn seeryos prablem. Wai? Bikaaz if wi noh lov wi bradaz ahn sistaz, Jehoava noh wahn waahn bee wi fren. Di apasl Jan mi mek dat klyaa wen ih seh: “If ih noh lov ih bradaz weh ih ku si, den ih kyaahn lov Gaad weh ih neva si yet.” (1 Jan 4:20) Weh dat teech wi? Jehoava onli wahn pleez wid wi if wi “lov wan anada.”—Reed 1 Jan 4:​7-9, 11.

7-8. Wat da sohn wayz wee ku shoa lov fi wan anada?

⁷ Di Baibl koman wi oava ahn oava fi “lov wan anada.” (Jan 15:​12, 17; Roam. 13:8; 1 Tes. 4:9; 1 Peet. 1:22; 1 Jan 4:11) Bot lov da wahn feelin eena wi haat ahn nobadi ku seeʼt. Soh how wi ku shoa wi bradaz ahn sistaz dat wi lov dehn? Wi shoa dehn bai di tingz weh wi du ahn seh.

⁸ Wi ga lata wayz how wi ku shoa lov fi wi bradaz ahn sistaz. Mek wi luk pahn sohn egzampl: “Taak di chroot wid wan anada.” (Zech. 8:16) “Kip pees wid wan anada.” (Maak 9:50) “Unu fi bee wilin fi shoa aana tu wan anada.” (Roam. 12:10) “Unu fi welkom wan anada.” (Roam. 15:7) “Kantinyu fi . . . fergiv wan anada.” (Kol. 3:13) “Kip aan di bak wan anada hevi berdn.” (Gal. 6:2) “Kantinyu fi komfert wan anada.” (1 Tes. 4:18) “Kip aan di . . . bil op wan anada.” (1 Tes. 5:11) “Pray fi wan anada.”—Jay. 5:16.

9. Wai ih impoatant fi komfert wi bradaz ahn sistaz? (Koment pahn di picha.)

⁹ Mek wi taak bowt wan a di wayz how wi ku shoa lov fi adaz. Paal mi seh: “Kantinyu fi komfert wan anada.” Wai ih impoatant fi mek wi komfert wi bradaz ahn sistaz? Kaaz wen wi du dis wi shoa dehn dat wi reeli lov dehn. Akaadn tu wahn Baibl refrens, wen Paal yooz di werd “komfert,” ih akchwali meen fi “stan op saida wahn persn fi inkorij ahn wen ih di sofa sayka wahn seeryos sichuwayshan er prablem.” Soh enitaim wi komfert wahn brada er  sista, wi di help dehn fi stay faytful tu Jehoava ahn kip di serv ahn. Dat reeli shoa humoch wi lov dehn, noh chroo?—2 Kor. 7:​6, 7, 13.

10. How kompashan ahn komfert goh tugeda?

¹⁰ Wen yu feel kompashan fi sohnbadi weh di sofa, yu wahn waahn komfert dehn ahn du sohnting weh wahn help dehn feel beta. Soh fers, wi feel kompashan fi dehn, den wi komfert dehn. Paal mi eksplayn how Jehoava komfert peepl bikaaz ih feel kompashan fi dehn. Ahn hihn diskraib Jehoava az di “Faada weh ga lata mersi ahn di Gaad weh aal komfert kohn fram.” (2 Kor. 1:3) Rait ya, Paal mi yooz di ekspreshan “lata mersi” fi diskraib di kompashan weh wahn persn feel fi adaz. Soh Gaad da di Wan weh lata mersi kohn fram, bikaaz hihn ga lata kompashan fi peepl. Jehoava kompashan mek hihn komfert wi “eena aala wi chraiyalz.” (2 Kor. 1:4) Jos laik how wahn koal kop a waata pahn wahn hat day mek wi feel rifresh wen wi tersti, saym way soh Jehoava komfert ahn rifresh wi wen wi schres owt bikaaz a wi woriz. How wi ku kapi Jehoava ahn feel kompashan fi wi bradaz ahn sistaz ahn gi dehn di komfert weh dehn need? Wan way wi ku du dis da wen wi werk pahn kwalitiz weh wahn help wi fi fain wayz fi komfert dehn. Mek wi si sohn kwalitiz weh ku help wi.

11. Akaadn tu Koloashanz 3:12 ahn 1 Peeta 3:​8, weh ada kwalitiz wahn help wi fi lov adaz ahn komfert dehn?

¹¹ Weh wahn help wi fi kip di lov weh wi need soh dat wi ku “kantinyu fi komfert wan anada” evri day? Aala wi need fi kantinyu werk haad fi shoa kompashan ahn kainis fi adaz ahn lov wan anada laik famili. (Reed Koloashanz 3:12; 1 Peeta 3:8.) Wen wi ga kompashan fi wi bradaz ahn sistaz ahn wi reeli kay bowt dehn, ih mek wi ga wahn schrang dizaiya fi help dehn wen dehn di sofa. Jos laik weh Jeezas mi seh, “wateva ful op wahn persn haat, dat da weh ih wahn taak bowt. Di gud man seh gud tingz kaaz ih ga gud tingz eena ih haat.” (Mach. 12:​34, 35) Wen wi komfert wi bradaz ahn sistaz enitaim dehn need it, wi shoa dat wi reeli lov dehn wahn lat.

12. (a) Wai wi need fi bee kyaaful noh fi looz wi lov fi wan anada? (b) Weh kweschan wi wahn kansida?

¹² Aala wi need fi “kantinyu fi lov wan anada.” (1 Jan 4:7) Bot Jeezas mi waan wi dat “peepl lov wahn kool aaf.” (Mach. 24:12) Hihn neva meen dat moas a ih disaiplz mi wahn stap shoa lov tu wan anada. Bot stil, wi need fi bee kyaaful dat di bad atichood weh peepl eena di werl shoa noh afek wee ahn mek wi stap shoa lov tu wi bradaz ahn sistaz. Soh now mek wi tink bowt dis impoatant kweschan: How wi ku noa if wi lov fi wi bradaz ahn sistaz schrang?

13. Weh ku help wi fi noa if wi lov fi wi bradaz ahn sistaz schrang?

¹³ Wan way how wi ku noa if wi lov fi wi bradaz ahn sistaz schrang da fi pay main tu how wi ak er bihayv eena difrent sichuwayshanz. (2 Kor. 8:8) Peeta mi menshan wan a dehn kaina sichuwayshan  wen ih seh: “Moa dan eniting els, lov wan anada fahn unu haat, bikaaz di persn weh ga lov aalwayz wilin fi fergiv adaz.” (1 Peet. 4:8) How wi bihayv wen wi bradaz ahn sistaz mek wahn mistayk er hert wi wahn shoa if wi ga schrang lov fi dehn.

14. Akaadn tu 1 Peeta 4:​8, weh kaina lov wi need fi ga, ahn wai? Yooz di egzampl eena di paragraaf.

¹⁴ Now mek wi tek wahn kloas luk pahn weh Peeta mi seh. Di biginin a vers 8 shoa di kaina lov wi need fi ga wen ih seh “lov wan anada fahn unu haat.” Di werd weh wi chranslayt az “fahn unu haat” akchwali meenz “schrech owt.” Di sekant paat a di vers diskraib weh wi wahn du wen wi ga da kaina lov fi wi bradaz ahn sistaz. Da kaina lov help wi fi fergiv dehn. Imajin wahn taybl weh aal skrach op ahn maak op. Yu kuda tek wahn taybl-klaat ahn kova di hoal ting, noh jos wan er too maak. Saym way soh, if wi ga schrang lov fi wi bradaz ahn sistaz, wi wahn bee wilin fi fergiv, er kova oava, dehn weeknis er mistayks.

15. Wen wi ga schrang lov fi wi bradaz ahn sistaz weh ih wahn moov wi fi du? (Koloashanz 3:13)

 ¹⁵ Wi lov fi wi bradaz ahn sistaz shuda bee soh schrang dat ih wahn moov wi fi fergiv dehn mistayk eevn wen dat noh eezi fi du. (Reed Koloashanz 3:13.) Wen wi du dat, wi mek Jehoava hapi. Bot wat els ku help wi fi fergiv adaz wen dehn mek mistayk ahn noh geh beks wid dehn fi weh dehn du?

16-17. Wat els wahn help wi fergiv wi bradaz ahn sistaz wen dehn mek mistayk? Yooz di egzampl eena di paragraaf. (Koment pahn di picha.)

¹⁶ Chrai foakos pahn di gud kwalitiz weh yu bradaz ahn sistaz gat, noh pahn dehn bad kwalitiz. Tink bowt dis egzampl. Mek wi seh dat yu deh da wahn gyadarin ahn yu reeli di injai yuself. Bifoa yu goh hoam, yu disaid fi tek wahn picha a di groop. Yu tek too moa picha jos in kays di fers wan neva kom owt gud; now yu ga chree pichaz. Bot eena wan a dehn yu noatis dat wan a di brada noh di smail. Soh yu dileet da picha bikaaz yu ga too moa weh evribadi di smail, inkloodin da brada.

¹⁷ Soh mek wi kompyaa dehndeh saym pichaz wid som a wi memriz weh wi mek. Wi yoozhwali ga gud memriz a di taim wi spen wid wi bradaz ahn sistaz. Bot wat if pahn wan a dehndeh okayzhan, wan a wi brada er sista du er  seh sohnting weh hert wi? Weh wi shuda du wid da memri? Wi shuda chrai ferget weh hapm, jos laik how wi mi dileet wan a di pichaz eena wi iloschrayshan. (Prov. 19:11; Ifee. 4:32) Wi ku ferget di lee mistayk dehn weh wi brada er sista mek wen wi memba aala di gud taimz weh wi mi injai wid dehn. Dehndeh da di kaina memriz weh wi waahn hoal aan tu.

18. Weh wi laan bowt lov eena dis aatikl?

¹⁸ Wai ih impoatant fi kip wi lov fi wan anada schrang? Bikaaz wen wi shoa lov tu wi bradaz ahn sistaz, wi di shoa lov fi Jehoava. How wi ku shoa dat wi lov dehn? Wan way wi ku du dat da fi komfert dehn. Wi wahn ku “komfert wan anada” if wi ga kompashan fi adaz. How wi ku kip da lov fi wan anada schrang? Wi ku du dat wen wi fergiv dehn mistayk eevn wen ih noh eezi fi wi.

19. Wai ih soh impoatant fi mek wi lov wi bradaz ahn sistaz tudeh?

¹⁹ Wai ih soh impoatant fi shoa lov fi wan anada tudeh? Peeta tel wi wai wen ih seh: “Di en deh kloas. Soh den, unu mos . . . lov wan anada fahn unu haat.” (1 Peet. 4:​7, 8) Weh wahn hapm wail di en a dis wikid werl geh kloasa? Jeezas mi tel ih disaiplz: “Dehn wahn hayt unu bikaaz unu da mai falowaz.” (Mach. 24:9) Fi stay faytful tu Jehoava eevn wen peepl deh gens wi, ih impoatant fi mek wi stay yoonaitid. Ahn noh mata weh Saytan chrai du fi separayt wi, ih noh wahn werk, “kaaz lov bring peepl tugeda eena wahn perfek way.”—Kol. 3:14; Fil. 2:​1, 2.