1. Da weh mesij di prafit Aizaiya mi gi di Izrelaits?

 DI PRAFIT Aizaiya mi seh dat Jehoava da “di Gaad a chroot.” Di werd weh chranslayt az “chroot,” meenz “aymen.” (Isa. 65:16) Di werd “aymen” meen “fi shoar,” er dat yu agree wid sohnting. Eena di Baibl, lata taim dehn yooz di werd “aymen” fi shoa dat weh Jehoava er Jeezas seh da chroo. Soh, dis da di klyaa mesij weh Aizaiya mi-di tel di Izrelaits: Wateva Jehoava seh wahn hapm. Ahn Jehoava proov dis wen ih mek aal ih pramis dehn kohn chroo.

2. Wai wi ku chros eena Jehoava pramis dehn fi di fyoocha, ahn weh kweschanz wi wahn ansa?

² Wi ku aalwayz chros dat aala Jehoava pramis dehn wahn kohn chroo. Nayli 800 yaaz afta di prafit Aizaiya mi ded, di apasl Paal mi tel wi wai aala Gaad pramis dehn wahn aalwayz kohn chroo. Paal mi seh: “Ih noh pasabl fi mek Gaad lai.” (Heeb. 6:18) Jos laik how wahn spring kyaahn giv yu fresh waata ahn saalt waata saym taim, Jehoava, di Gaad a chroot, kyaahn tel lai. Soh wi ku reeli chros evriting weh Jehoava seh, inkloodin aala fi hihn pramis dehn fi wi fyoocha. Eena dis aatikl, wi wahn ansa  dehnya kweschan: Weh Jehoava pramis fi gi wi eena di fyoocha? Ahn how Jehoava mek wi noa fi shoar dat dis pramis wahn kohn chroo?

3. (a) Wat da wan a Jehoava pramis weh preshos tu aala fi hihn servants? (Revilayshan 21:​3, 4) (b) Weh sohn peepl seh wen wi tel dehn bowt da pramis?

³ Di pramis weh wi wahn taak bowt da wahn preshos pramis weh reeli impoatant tu Jehoava servants aal rong di werl. (Reed Revilayshan 21:​3, 4.) Jehoava pramis wi wahn taim wen “nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.” Wahn lata wi yooz dehnya vers fi komfert peepl weh wi preech tu ahn fi shoa dehn weh laif wahn bee laik eena Paradais. Weh peepl mait seh wen wi shayr dis pramis wid dehn? Sohntaim dehn mait seh, “Dat song tu gud fi bee chroo.”

4. (a) Weh Jehoava mi noa wahn hapm eena fi wee day wen ih mek di pramis bowt Paradais? (b) Afta Jehoava mi mek dis pramis, wat els Jehoava mi du?

⁴ Wen Jehoava mi mek di apasl Jan rait dong da pramis bowt laif eena Paradais, Hihn mi noa fi shoar dat wi mi wahn shayr dis hoap wid peepl tudeh. Ahn Jehoava mi noa tu dat ih wuda mi bee haad fi mek lata peepl bileev dat tingz mi wahn chaynj eena di fyoocha. (Isa. 42:9; 60:2; 2 Kor. 4:​3, 4) How wi ku help adaz fi kanvins dehnself dat di blesinz weh deh eena Revilayshan 21:​3, 4 wahn kohn chroo? Jehoava neva jos mek da pramis rait soh. Hihn shoa wi sohn reezn wai wi ku chros da pramis tu. Wat da dehndeh reezn?

5. Weh skripchaz gi wi reezn fi chros Gaad pramis bowt Paradais, ahn weh dehn seh?

⁵ Eena di neks vers dehn, wi fain gud reezn fi chros eena Jehoava pramis bowt Paradais. Ih seh: “Di Wan weh mi-di sidong pahn di chroan seh: ‘Ai di mek evriting nyoo.ʼ Den ih seh: ‘Rait dat dong, bikaaz dehndeh werdz da di chroot, ahn peepl ku bileev weh Ah di seh.ʼ Den ih tel mi: ‘Dehndeh werdz don kohn chroo! Ai da di Alfa an di Omayga, di biginin ahn di en.ʼ”—Rev. 21:5, 6a.

6. How Revilayshan 21:​5, 6 schrentn wi chros eena Gaad pramis?

⁶ How dis Baibl pasij schrentn wi chros eena Gaad pramis? Eena dehnya vers, da laik Jehoava di sain wahn dakyument weh proov dat fi shoar hihn wahn kip ih pramis. b Di pramis weh Gaad mek deh eena Revilayshan 21:​3, 4. Bot eena vers 5 ahn 6, eena wahn way da laik wi fain Jehoava signicha. Mek wi si how Jehoava kanvins wi dat wi ku chros ahn.

7. Hoo staat taak eena vers 5, ahn wai dis speshal?

⁷ Revilayshan 21:5 staat aaf di seh: “Di Wan weh mi-di sidong pahn di chroan seh.” Dat reeli speshal, bikaaz Jehoava onli taak chree taimz eena Revilayshan ahn dis da wan a dehn. Da neva wahn aynjel ner Jeezas seh dis, bot da Jehoava ihself. Dat meenz wi ku reeli chros weh hihn seh afta dat. Wai wi seh dat? Bikaaz Jehoava “kyaahn tel lai.” (Taitos 1:2) Soh wi ku reeli chros dat weh Revilayshan 21:​5, 6 seh wahn kohn chroo.

8. Weh Jehoava seh fi mek wi noa fi shoar dat ih pramis wahn kohn chroo? (Isaiah 46:10)

⁸ Den Jehoava seh: “Ai di mek evriting nyoo.” Rait ya, Jehoava mi-di taak bowt chaynjiz weh ih wahn mek eena di fyoocha. Bot bikaaz hihn soh shoar dat dehnya pramis wahn kohn chroo, hihn seh it laik if ih don hapm aredi.—Reed Isaiah 46:10.

9. (a) Weh Jehoava mi meen wen ih seh, “Ai di mek evriting nyoo”? (b) Weh wahn hapm tu di “hevn” ahn di “ert” weh egzis now?

⁹ Weh Jehoava mi meen wen ih seh ih di “mek evriting nyoo?” Revilayshan chapta 21 taak bowt too tingz weh Jehoava wahn du. Fers, hihn wahn geh rid a di oal sistem. Den, hihn wahn bring een wahn nyoo sistem. Revilayshan 21:1 seh: “Di hevn ahn di ert weh mi dehdeh bifoa neva egzis nohmoh.” “Di hevn . . . weh mi dehdeh bifoa” di rifaa tu aal di govament dehn weh Saytan ahn di deemon dehn di kanchroal. (Mach. 4:​8, 9; 1 Jan 5:19) Sohntaim eena di Baibl, di werd “ert” ku rifaa tu di peepl weh liv pahn di ert. (Jen. 11:1; Ps. 96:1) Soh “di ert weh mi dehdeh bifoa” di rifaa tu wikid peepl. Jehoava noh wahn jos fiks op di “hevn” ahn di “ert,” bot ih wahn geh rid a dehn fareva. Den afta dat hihn wahn put “wahn nyoo hevn ahn wahn nyoo ert,” weh meen dat wahn nyoo govament wahn rool oava raichos peepl.

10. Eena weh way Jehoava wahn mek evriting nyoo?

¹⁰ Da Revilayshan 21:​5, wi reed weh Jehoava seh bowt di tingz weh hihn wahn mek nyoo. Noatis dat Jehoava neva seh “Ai di mek nyoo tingz.” Insteda dat, hihn seh “Ai di mek evriting nyoo.” Jehoava wahn heel di ert ahn hyoomanz soh dat dehn ku bee perfek. Laik weh Aizaiya mi seh, Jehoava wahn mek di hoal ert intu wahn byootiful plays weh simila tu di gyaadn weh mi deh da Eedn. Hihn wahn mek wi nyoo wen ih heel eech wan a wi kompleetli. Peepl weh kripl, blain, er def wahn geh heel, an eevn peepl weh ded wahn kohn bak tu laif.—Isa. 25:8; 35:​1-7.

11. Weh Jehoava mi tel Jan fi du, ahn wai?

¹¹ Wat els Jehoava mi seh soh dat wi ku chros ahn? Jehoava mi tel Jan: “Rait dat dong, bikaaz dehndeh werdz da di chroot.” (Rev. 21:5) Wen Jehoava mi tel Jan fi “rait dat dong,” ih giv ahn wahn reezn tu. Hihn seh: “Dehndeh werdz da di chroot.” Soh bikaaz a dat wi ku reeli chros weh Gaad seh. Wi soh hapi dat Jan obay di koman fi “rait dat dong.” Sayka dat wi ku reed bowt Gaad pramis bowt Paradais ahn wi ku meditayt pahn di wandaful blesinz weh deh heda wi.

12. Wai Jehoava kuda mi seh “dehndeh werdz don kohn chroo”?

¹² Wat els Gaad mi seh? “Dehndeh werdz don kohn chroo!” (Rev. 21:6) Wai Jehoava mi seh dat dehndeh pramis kohn chroo aredi? Bikaaz notn ku stap Jehoava fahn du weh hihn waahn du. Den, Jehoava seh sohnting els weh ku help wi fi bee shoar dat fi hihn pramis wahn kohn chroo.

13. Wai Jehoava seh “Ai da di Alfa an di Omayga”?

¹³ Laik weh wi menshan erliya, Jehoava  mi taak tu Jan chree taimz eena ih vizhan dehn. (Rev. 1:8; 21:​5, 6; 22:13) Evri taim Jehoava mi taak tu Jan, Hihn mi seh: “Ai da di Alfa an di Omayga.” Alfa da di fers leta eena di Greek alfabet, an omayga da di laas leta. Wen Jehoava seh dat hihn da “di Alfa an di Omayga,” ih shoa wi dat wen hihn staat sohnting, hihn wahn mek shoar ih finish it.

14. (a) Wen Jehoava kuda mi seh “Alfa,” ahn wen ih wahn ku seh “Omayga”? (b) Weh Jenisiz 2:​1-3 tel wi wahn hapm fi shoar?

¹⁴ Afta Jehoava mek Adam ahn Eev, Hihn mi seh wat da ih perpos fi hyoomanz ahn fi di ert. Di Baibl seh: “Gaad bles dehn an ih tel dehn: ‘Unu fi ga lata pikni ahn ful op di ert, ahn tek kayr a it.ʼ” (Jen. 1:28) Di fers taim Jehoava mi seh wat da fi hihn perpos da mi laik if Jehoava mi-di seh “Alfa.” Di taim mi wahn kohn wen Adam ahn Eev obeedyant ahn perfek pikni dehn mi wahn ful op di ert ahn ton it intu wahn paradais. Wen dat hapm, da laik if Jehoava mi wahn seh “Omayga.” Afta Jehoava mi mek “di hevnz ahn di ert an evriting weh deh eena di hevnz ahn pahn di ert,” hihn mi seh sohnting weh mi shoa dat fi hihn perpos mi wahn kohn chroo. Wi fain it rait deh da Jenisiz 2:​1-3. (Reed.) Jehoava mi bles di sevent day, ahn tu hihn da day hoali. Dat shoa dat Jehoava perpos fi di peepl ahn di ert mi wahn kohn chroo noh mata wat. Bai di en a di sevent day, Jehoava mi wahn finish du evriting weh ih mi set owt fi du fahn di biginin.

15. Wai ih kuda mi luk laik Saytan mi stap Gaad orijinal perpos fahn kohn chroo?

¹⁵ Afta Adam ahn Eev mi disobay,  dehn mi ton sinaz ahn paas aan sin ahn det tu dehn pikni. (Roam. 5:12) Ih kuda mi luk laik Saytan mes op Gaad orijinal plan fi ful op di ert wid perfek an obeedyant peepl. Ih kuda mi luk laik Saytan mek it soh dat Jehoava kyaahn seh “Omayga.” Saytan mosi mi tink dat Jehoava mi wahn kyaahn kip ih pramis. Maybi ih mi eevn tink dat Jehoava mi wahn kil Adam ahn Eev ahn jos mek wahn nada perfek kopl fi mek Ih perpos fi hyoomanz kohn chroo. Bot if Gaad mi du dat, den di Devl kuda mi seh dat Jehoava mi tel lai. Wai wi seh dat? Bikaaz eena Jenisiz 1:​28, Jehoava mi tel Adam ahn Eev dat fi dehn chiljren wuda mi ful op di ert.

16. Wai Saytan kuda mi tink dat hihn kuda mi stap Jehoava fahn mek ih pramis kohn chroo?

¹⁶ Wat els Saytan kuda mi tink Jehoava mi wahn du? Maybi Saytan mi tink dat Jehoava mi wahn alow Adam ahn Eev fi ga chiljren weh kuda neva bee perfek. (Eccl. 7:20; Roam. 3:23) An if Adam ahn Eev pikni kuda neva bee perfek, fi shoar di Devl mi wahn seh dat Jehoava kyaahn kip ih pramis fi mek di ert bee wahn Paradais weh ful op wid perfek peepl.

17. Wen Saytan, Adam, ahn Eev mi ribel, how Jehoava mi solv di prablem, ahn wat wahn bee di rizolt? (Koment pahn di picha.)

¹⁷ Saytan kuda mi neva imajin weh Jehoava mi wahn du. Jehoava mi ga di bes solooshan fi mek ih perpos kohn chroo, eevn doa Saytan an Adam ahn Eev mi ribel gens Jehoava. (Ps. 92:5) Jehoava mi mek Adam ahn Eev ga chiljren, ahn soh Jehoava neva tel no lai. Dis shoa dat wen Jehoava seh ih wahn du sohnting, notn ku stap ahn fahn du it. Hihn mek shoar dat fi hihn perpos wahn stil kohn chroo wen ih mi gi wahn “disendant” weh mi wahn sayv Adam ahn Eev obeedyant pikni dehn. (Jen. 3:15; 22:18) Saytan mosi mi sopraiz dat Jehoava mi wahn yooz wahn ransom fi sayv peepl. Wai Saytan neva ekspek dis? Bikaaz di ransom mi bays pahn lov. (Mach. 20:28; Jan 3:16) Ahn Saytan tu selfish fi eva shoa lov. Soh weh wahn hapm sayka di ransom? Afta Krais don rool fi wahn towzn yaaz, Adam ahn Eev perfek an obeedyant chiljren wahn ful  op di hoal ert. Dat da weh Jehoava mi waahn fahn di biginin. Ahn wans fi hihn perpos kohn chroo, den da laik Jehoava wahn ku fainali seh “Omayga.”

18. Wat da di chree reezn weh Jehoava gi wi fi chros ih pramis? (Si di baks, “ Chree Reezn Wai Wi Ku Chros Jehoava Pramis.”)

¹⁸ Eena dis aatikl, wi taak bowt sohn reezn wai wi ku bee shoar dat dis ert wahn bee wahn paradais. Weh wi ku tel adaz fi mek dehn noa fi shoar dat dis wahn hapm? Fers, Jehoava ihself mi mek di pramis. Eena di buk a Revilayshan, ih seh: “Di Wan weh mi-di sidong pahn di chroan seh: ‘Ai di mek evriting nyoo.ʼ” Jehoava ga di wizdom, di dizaiya, ahn di powa fi mek dis pramis kohn chroo. Sekant, Jehoava soh shoar dat hihn wahn du weh ih seh, dat tu hihn da laik ih don hapm aredi. Hihn seh: “Dehndeh werdz don kohn chroo!” Terd, notn ku stap Jehoava fahn finish sohnting weh ih staat. Dat da wai hihn seh: “Ai da di Alfa an di Omayga.” Jehoava wahn proov dat Saytan laiyad ahn dat hihn kyaahn stap Jehoava fahn du weh ih seh ih wahn du.

19. Weh yu ku du if sohnbadi fain it haad fi bileev eena Gaad pramis bowt Paradais?

¹⁹ Memba, evri taim yu tel peepl bowt weh Jehoava seh wahn hapm, yu kantinyu schrentn fi yoo chros eena Jehoava pramis dehn tu. Soh di neks taim wen yu di reed di inkorijin pramis bowt Paradais weh deh eena Revilayshan 21:4 ahn sohnbadi tel yu, “Dis song tu gud fi bee chroo,” weh yu ku du? Maybi yu ku reed vers 5 ahn 6 an eksplayn how da laik Jehoava sain wahn garantee pahn ih pramis eena dehnya vers.—Isa. 65:16.