1-2. Wai wi mait feel laik Jehoava noh di ansa wi pryaaz?

 DI SAAMIS taak bowt wahn byootiful pramis; ih seh: “Yu wahn geh di moas jai owta laif if yu di wership Jehoava, ahn hihn wahn gi yu weh yu dizaiya eena yu haat.” (Ps. 37:4) Yu tink wi shuda ekspek fi mek Jehoava gi wi evri singl ting wi aks fa rait away? Ih impoatant fi mek wi tink bowt da kweschan. Wai? Tink bowt dehnya sichuwayshan. Wahn singl sista pray fi goh da di Skool fi Kingdom Ivanjelaizaz, bot sohn yaaz layta ih stil noh geh invaitid. Wahn yong brada weh ga wahn bad siknis pray fi mek ih geh beta soh dat ih ku du moa eena di kangrigayshan, bot ih noh geh beta. Ahn sohn Kristyan payrents pray fi mek dehn son kantinyu serv Jehoava, bot insted ih stap serv Jehoava.

² Maybi yoo yuself aks Jehoava fi sohnting, bot yu noh get it yet. Yu mait staat tink dat Jehoava onli ansa ada peepl pryaaz, noh fi yoo wan. Er yu mait tink dat ih noh ansa yu kaaz yu mosi mi du sohnting rang. Wahn sista weh naym Janice b mi feel da saym way. Shee an ih hozban mi reeli waahn goh serv da Betel. Shee seh: “Ai mi shoar dat wi mi wahn soon goh da Betel.” Bot monts ahn yaaz mi paas ahn shee an ih hozban neva geh invaitid. Janice seh: “Ai mi feel sad ahn kanfyooz. Ah mi eevn wanda weh Ah mi du fi let dong Jehoava, bikaaz  Ah mi spesifik eena mi pryaaz. Ah neva andastan wai Jehoava neva ansa mi.”

3. Weh wi wahn diskos eena dis aatikl?

³ Sohntaim, wi mait wanda if Jehoava reeli lisn tu wi pryaaz. Eevn som a Jehoava faytful servants eena di paas mi wanda if hihn mi hyaa dehn pryaaz. (Job 30:20; Ps. 22:2; Hab. 1:2) Weh ku mek yu noa fi shoar dat Jehoava wahn reeli ansa yu pryaaz? (Ps. 65:2) Fi help wi ansa da kweschan, fers wi need fi diskos dehnya kweschan: (1) Weh Jehoava wahn du fi wi? (2) Weh Jehoava waahn wee du? (3) Wai wi mait need fi pray fi sohnting els?

4. Bays pahn Jeremiah 29:​12, weh Jehoava pramis fi du?

⁴ Jehoava pramis fi lisn tu wi pryaaz. (Reed Jeremiah 29:12.) Jehoava lov ih faytful servant dehn, soh hihn wuda neva ignoar dehn pryaaz. (Ps. 10:17; 37:28) Bot, dis noh meenz dat Jehoava wahn gi wi evri singl ting wi aks fa. Wi mait haftu wayt til di nyoo werl fi mek Jehoava gi wi som a di ting dehn weh wi pray fa.

5. Weh Jehoava kip in main wen ih lisn tu wi pryaaz? Pleez eksplayn yu ansa.

⁵ Jehoava kip ih perpos in main wen ih lisn tu wi pryaaz. (Isa. 55:​8, 9) Paat a da perpos da fi mek di ert ful op a hapi peepl weh yoonaitid anda Fi Hihn roolaship. Bot Saytan mi seh dat hyoomanz wuda bee beta aaf di rool dehnself. (Jen. 3:​1-5) Fi proov dat Saytan mi-di lai, Jehoava alow hyoomanz fi rool oava dehnself. Dat da wai wi ga lata prablemz tudeh. (Eccl. 8:9) Bot wi andastan dat Jehoava noh wahn geh rid a aala dehndeh prablemz rait now. If hihn wuda du dat, peepl mait tink dat wi noh need Gaad fi rool oava wi, ahn dat hyoomanz ku solv aala dehn prablemz.

6. Wai wi ku bee shoar dat Jehoava wahn aalwayz du weh lovin ahn fyaa?

⁶ Jehoava mait ansa sohn simila pryaa eena difrent wayz. Fi egzampl, wen King Hezikaiya mi reeli sik, hihn mi bayg Jehoava fi mek ih ku geh beta. Jehoava mi ansa ih pryaa an ih heel ahn. (2 Ki. 20:​1-6) Bot, wen di apasl Paal mi bayg Jehoava fi tek weh di “prikl eena [ih] badi,” weh da-mi praabli wahn helt prablem, Jehoava neva heel ahn. (2 Kor. 12:​7-9) Wi aalso ga di egzampl a Jaymz ahn Peeta. King Herod mi waahn kil too a dehn. Di kangrigayshan mi pray fi Peeta ahn moa dan laikli fi Jaymz tu. Bot, dehn mi kil Jaymz, ahn wahn aynjel mi reskyu Peeta. (Aks 12:​1-11) Wi mait wanda, ‘Wai Jehoava mi sayv Peeta ahn noh Jaymz?ʼ Di Baibl noh tel wi wai. c Bot wi ku bee shoar dat Jehoava aalwayz du weh rait ahn hihn “neva joj rang.” (Deut. 32:4) Ahn wee noa dat Jehoava mi lov Peeta ahn Jaymz. (Rev. 21:14) Sohntaim, Jehoava mait noh ansa wi pryaaz eena di way wi wuda waahn, bot wi chros Jehoava ahn wi noa dat hihn wahn aalwayz du weh lovin ahn fyaa. Soh wi noh komplayn bowt how hihn chooz fi ansa wi pryaaz.—Job 33:13.

7. Weh wi chrai noh fi du, ahn wai?

⁷ Wi chrai noh kompyaa fi wee sichuwayshan wid ada peepl wan. Fi egzampl,  wi mait pray tu Jehoava fi help wid wahn spesifik sichuwayshan, bot wi noh geh wahn ansa. Laytaraan, wi fain owt dat sombadi els mi pray fi sohnting simila, an ih luk laik Jehoava mi ansa fi dehn pryaaz. Wahn sista weh naym Anna gaahn chroo sohnting laik dat. Fi shee hozban, Matthew, mi ga kyansa ahn shee mi pray fi mek ih geh beta. Saym taim, too oalda sistaz mi-di fait kyansa tu. Anna mi pray haad fi di sistaz ahn fi Matthew. Di too sistaz mi geh beta, bot sadli Matthew mi ded. Anna mi wanda if di sistaz mi geh beta bikaaz Jehoava mi heel dehn. An if dat da-mi di kays, wai hihn neva heel Matthew tu? Wi kyaahn seh wai di too sistaz mi geh beta, bot wi noa dat Jehoava wahn geh rid a aala wi sofarin, ahn hihn reeli waahn rezorek ih frenz.—Job 14:15.

8. (a) Akaadn tu Isaiah 43:​2, how Jehoava gi wi di help weh wi need? (b) How pryaa ku help wi wen wi di fays prablemz? (Wach di veedyo weh naym Pryaa Help Wi fi Bayr Op.)

⁸ Jehoava wahn aalwayz gi wi di help weh wi need. Bikaaz hihn da wi lovin Pa, hihn noh laik si wi di sofa. (Isa. 63:9) Bot hihn noh wahn protek wi fahn aala wi prablem dehn. Eena di Baibl ih kompyaa wi prablemz tu sohn schrang riva er flaym. (Reed Isaiah 43:2.) Noh mata weh chraiyalz wi goh chroo now, hihn wahn aalwayz mek shoar dat wi ku kantinyu serv ahn. Jehoava wahn aalso gi wi ih powaful hoali spirit, soh wi ku bee shoar dat wi wahn aalwayz ga wateva wi need fi help wi bayr op ahn stay faytful. (Look 11:13; Fil. 4:13) d

9. Laik weh Jaymz 1:​6, 7 seh, wai wi need fi chros dat Jehoava wahn help wi?

⁹ Jehoava waahn wi chros ahn. (Heeb. 11:6) Bot sohntaim wi prablemz mait feel laik dehn da tu moch fi mek wi handl ahn wi mait eevn dowt dat Jehoava ku help wi. Bot di Baibl tel wi dat wid Jehoava help, ih pasabl fi “klaim wahn waal.” (Ps. 18:29) Soh wi shuda ga fayt eena Jehoava ahn noh dowt dat hihn wahn help wi. Pray ahn chros dat Jehoava wahn ansa yu pryaaz.—Reed Jaymz 1:​6, 7.

10. Gi wahn egzampl weh shoa how wi ku du wi paat afta wi don pray.

¹⁰ Jehoava waahn wi du wi paat afta wi don pray. Fi egzampl, wahn brada mait aks Jehoava fi help ahn geh taim aaf fahn werk soh dat ih ku goh da wahn reejinal kanvenshan. How Jehoava mait ansa da pryaa? Wel, hihn mait gi di brada di korij ih need fi aks fi di taim aaf. Bot di brada need fi du ih paat fi goh da ih baas an aks fi di taim aaf. Hihn mait need fi aks oava ahn oava agen. Er ih mait aafa fi chaynj ih shif wid wan a ih koa-werka dehn. An if non a dat werk, di brada mait eevn aafa fi geh di taim aaf widowt pay.

11. Wai wi need fi pray oava ahn oava bowt wi woriz?

¹¹ Jehoava waahn wi pray oava ahn oava bowt wi woriz. (1 Tes. 5:17) Jeezas help wi fi andastan dat wi noh wahn geh di tingz weh wi aks fa rait away. (Look 11:9) Soh noh giv op! Pray fahn yu haat ahn pray wahn lat. (Look 18:​1-7) Wen wi du dis, wi shoa Jehoava dat weh wi pray bowt reeli impoatant tu wi. Ahn wi  aalso shoa dat wi ga fayt dat Jehoava ku help wi.

12. (a) Wat da wan kweschan wi shuda aks wiself bowt wi pryaaz, ahn wai? (b) How wi ku mek shoar dat wi pryaaz shoa rispek fi Jehoava? (Si di baks weh naym “ Mai Pryaaz Shoa Rispek fi Jehoava?”)

¹² If wi noh di geh weh wi pray fa, wi mait waahn aks wiself sohn kweschan laik, ‘Ai di pray fi di karek ting?ʼ Lata taim, wi mait tink dat wi noa weh gud fi wi. Bot di tingz weh wi pray fa mait noh bee di bes ting fi wi. If wi di pray bowt wahn prablem, maybi dehn mait ga wahn beta solooshan dan di wan weh wi di pray bowt. Er ih ku bee dat wi aks fi sohnting weh noh goh lang wid Jehoava wil. (1 Jan 5:14) Tink bowt di egzampl weh wi mi menshan da di biginin a dis aatikl bowt di payrents weh mi bayg Jehoava fi mek dehn son kantinyu serv Jehoava. Wi mait tink dat notn noh rang wid da pryaa, bot Jehoava noh foas non a wi fi wership ahn. Hihn waahn mek aala wi chooz fi wership ahn, eevn wi chiljren. (Deut. 10:​12, 13; 30:​19, 20) Soh insted, di payrents kuda aks Jehoava fi help dehn reech dehn pikni haat soh dat dehn ku lov Jehoava ahn si ahn az dehn Fren.—Prov. 22:6; Ifee. 6:4.

13. Bays pahn Heebrooz 4:​16, wen Jehoava wahn help wi? Pleez eksplayn yu ansa.

¹³ Wahn neks kweschan wuda bee, ‘Da Jehoava taim fi ansa mi pryaaz?ʼ Wi mait tink dat wi need wahn ansa tu wi pryaaz rait away, bot Jehoava noa wen da di rait taim fi help wi. (Reed Heebrooz 4:16.) Wen wi noh geh weh wi aks  fa rait away, wi mait feel laik Jehoava di tel wi ‘No.ʼ Bot ih ku bee dat ih akchwali di tel wi ‘Noh yet.ʼ Tink bowt di brada weh mi pray fi mek Jehoava kyoar ih siknis. If Jehoava mi du wahn mirakl ahn heel ahn, Saytan kuda mi seh dat di onli reezn wai di brada mi kantinyu serv Jehoava da-mi bikaaz ih kyoar ahn. (Job 1:​9-11; 2:4) Bot, Jehoava don set wahn taim wen ih wahn geh rid a aal kaina siknis. (Isa. 33:24; Rev. 21:​3, 4) Til da taim kohn, wi noh fi ekspek Jehoava fi du wahn mirakl fi heel wi. Soh insted, di brada kud aks Jehoava fi giv ahn di schrent fi indyoar ih siknis soh dat ih ku stay faytful ahn kantinyu serv ahn.—Ps. 29:11.

14. Weh yu laan fahn Janice egzampl?

¹⁴ Memba Janice hoo mi pray fi goh serv da Betel? Afta faiv yaaz, shee mi geh fi andastan dat Jehoava mi did ansa ih pryaaz, bot noh how shee mi ekspek. Shee seh: “Joorin da taim, Jehoava teech mi lata tingz an ih help mi fi bee wahn beta Kristyan. Fi egzampl, Ah mi need fi chros eena hihn moa, laan fi reeli stodi di Baibl, an Ah mi need fi laan dat mi hapinis noh pen pahn wahn asainment.” Laytaraan, Janice an ih hozban mi geh wahn invitayshan fi serv eena di serkit werk. Janice mi seh: “Jehoava mi did ansa mi pryaaz, bot noh how Ah mi ekspek it. Ih tek mi wahn wail fi si dat di way Jehoava mi ansa mi da-mi wahn byootiful gif. Ah soh tankful dat Ah mi geh fi feel Jehoava lov ahn kainis.”

15. Wai sohntaim wi noh need fi bee tu spesifik wen wi di pray?(Koment pahn di picha dehn.)

¹⁵ Wahn nada kweschan wi ku aks wiself  da, ‘Ah shuda pray fi sohnting els?ʼ Ih gud fi bee spesifik wen wi pray, bot sohntaim ih mait help if wi noh soh spesifik bowt weh wi aks fa soh dat wi ku fain owt weh Jehoava waahn fi wi. Tink bowt di egzampl a wahn sista weh pray fi mek ih goh da di Skool fi Kingdom Ivanjelaizaz. Shee waahn goh da di skool soh dat shee ku goh wehpaat dehn need moa poblishaz. Bot eevn doa ih kip di pray, shee ku aks Jehoava fi help ahn fain ada wayz how ih ku du moa eena ih minischri. (Aks 16:​9, 10) Den, ih ku du ih paat an aks ih serkit oavaseeya if wahn kangrigayshan weh deh kloas bai need moa painyaaz. Er ih ku rait wahn leta tu wahn branch aafis fi fain owt if wahn kangrigayshan need moa Kingdom poblishaz. e

16. Weh wee ku bee shoar bowt?

¹⁶ Eena dis aatikl, wi mi laan how Jehoava ansa wi pryaaz eena wahn lovin ahn fyaa way. (Ps. 4:3; Isa. 30:18) Eevn doa ih mait noh ansa wi how wi wuda waahn, wi noa dat Jehoava aalwayz redi fi lisn an ansa wi pryaaz. Hihn du dis bikaaz hihn lov wi, an ih neva abandan ih faytful servants. (Ps. 9:10) Soh kantinyu fi “chros eena hihn aal di taim,” ahn noh stap poar owt yu haat tu hihn eena pryaa.—Ps. 62:8.