IF YU wuda mi gaahn da Sangir Besar Ailan da Indonesia sohn yaaz abak, yu praabli wuda mi si chree a wi Kristyan sistaz bai seesaid. Lata peepl pahn da ailan noa dehndeh sistaz sayka weh dehn preech ahn dehn teech peepl fi andastan di Baibl. Bot wen yu si dehn bai seesaid, dehn di du sohnting els.

Fers, dehn wuda haal sohn stoan owta di waata. Som a di stoan dehn mi big, laik di saiz a wahn futbaal. Den, dehn wuda sidong pahn sohn lee bench ahn brok op di stoan dehn wid wahn hama. Wans dehn bos di stoan dehn dong tu di saiz a wahn eg er smaala, dehn wuda put dehn eena bokit ahn kehr dehn hoam. Bot dehn neva liv rait bai seesaid. Dehn mi haftu klaim wahn step fi reech wehpaat dehn liv. Den, dehn wuda put aala di stoan dehn eena sohn sak. Dehn wuda put dehndeh sak pahn wahn chrok weh wuda kehr dehn fi fiks road pahn di ailan.

Wan a dehndeh sista naym Hulda. Shee mi aybl fi spen moa taim di werk laik dis dan di ada too sista. Naamali ih wuda yooz aala di moni weh ih mek fi help pay fi weh ih famili need. Bot fi wahn lee wail, shee mi werk eevn moa dan yoozhwal bikaaz ih mi waahn bai wahn tablet fi yooz JW Library^®. Hulda mi noa dat di ap mi gat een lata veedyo ahn poblikayshan weh mi wahn help ahn fi andastan di Baibl beta ahn fi preech tu ada peepl.

Soh fi wahn mont an a haaf, Hulda mi werk fi wahn ekschra too owaz evri maanin di brok stoan. Ih mi brok inof stoan fi ful di bak a wahn lee chrok. Ih mi en op di mek inof moni fi bai wahn tablet.

Hulda seh: “Ah mi feel taiyad fahn di brok op rak ahn mi badi mi feel kramp op, bot Ah ferget aala dat wen Ah geh fi yooz mi tablet eena di minischri, an ih mek it eeziya fi pripyaa fi di meetin dehn tu.” Shee seh dat di tablet mi reeli help ahn owt joorin di biginin a di pandemik, laik how wi mi du wi meetin ahn minischri oava di Intanet. Wi soh hapi dat Hulda mi aybl fi reech ih goal.