1. Wai wi ku laan fahn wi oalda bradaz ahn sistaz?

 AALA wi need help fi mek gud disizhanz. Di eldaz an ada machoar Kristyanz ku help wi bikaaz dehn ga moa ekspeeryens, andastandin, ahn wizdom. (Joab 12:12) An eevn if dehn way oalda dan wee, wi shudn tink dat fi dehn advais noh gud fi wee. Jehoava waahn wi laan fahn wi oalda bradaz ahn sistaz.

2. Weh wi wahn taak bowt eena dis aatikl?

² Eena Baibl taimz, Jehoava mi yooz faytful oalda peepl fi inkorij ahn gaid ih peepl. Fi egzampl, hihn mi yooz Moaziz, Dayvid, ahn di apasl Jan. Dehn mi liv joorin difrent taimz, ahn dehn gaahn chroo difrent tingz eena laif. Wen dehn mi soon ded, dehn mi gi waiz advais tu yonga peepl. Eech wan a dehn mi taak bowt how impoatant ih impoatant fi obay Gaad. Jehoava mi mek shoar dat di waiz advais dehn giv deh eena di Baibl soh wi ku benifit fan it tudeh. Noh mata if wi yong er oal, aala wi ku benifit fahn fi dehn advais. (Roam. 15:4; 2 Tim. 3:16) Eena dis aatikl, wi wahn taak bowt som a di laas advais weh dehn giv, ahn si weh lesn weh wi ku laan.

“UNU WAHN LIV WAHN LANG TAIM”

3. Eena weh wayz Moaziz mi serv Jehoava ahn di Izrelait dehn?

³ Moaziz mi werk haad fi serv Jehoava aal ih laif. Hihn da-mi wahn prafit, wahn joj, wahn komanda, ahn wahn raita. Moaziz mi laan wahn lat fahn aala di tingz weh ih gaahn chroo eena laif! Hihn mi leed di nayshan a Izrel owt fahn Eejip, an ih mi si lata Jehoava miraklz. Jehoava mi yooz hihn fi rait di fers faiv buk a di Baibl ahn Saam 90. Ih mi praabli rait Saam 91 ahn di buk a Joab tu.

4. Hoo Moaziz mi inkorij, ahn wai?

 ⁴ Lee bit bifoa Moaziz mi ded, wen ih mi 120 yaaz oal, ih mi kaal tugeda aal di Izrelait dehn fi rimain dehn bowt di tingz weh dehn si Jehoava du fi dehn. Wen dehn mi yonga, wahn lata dehn mi si di mirakl dehn weh Jehoava mi du ahn how ih mi ponish di Ijipshan dehn. (Eks. 7:​3, 4) Dehn mi si Jehoava split di Red See ahn dehn mi waak chroo it. Dehn mi si how Jehoava dischrai Fayro an ih hoal aami. (Eks. 14:​29-31) Jehoava mi tek kayr a dehn ahn protek dehn eena di wildanes. (Deut. 8:​3, 4) Ahn wen di Izrelaits mi redi fi goh eena di Pramis Lan, Moaziz mi tek dis laas chaans fi inkorij dehn. a

5. Bays pahn Deuteronomy 30:​19, 20, weh Moaziz mi tel di Izrelaits dehn kuda mi luk faawod tu?

⁵ Weh Moaziz mi seh? (Reed Deuteronomy 30:​19, 20.) b Di Izrelait dehn mi ga lata wandaful tingz fi luk faawod tu eena di fyoocha. Wid Jehoava blesin, dehn mi wahn ku liv fi wahn lang taim eena di lan weh hihn mi pramis fi gi dehn. Ahn dat da-mi wahn byootiful lan weh mi projoos lata kraps! How Moaziz mi diskraib it fi dehn? Ih mi seh: “Dis lan weh soh gud ahn weh ga sohn big siti weh unu neva bil, weh ga sohn hows weh ful op a gud tingz weh unu neva werk fa, weh ga wel weh unu neva dig, ahn weh ga sohn grayp aachad an aliv chree weh unu neva plaant.”—Deut. 6:​10, 11.

6. Wai Gaad mi alow ada nayshanz fi kanka di Izrelait dehn?

⁶ Moaziz mi gi di Izrelait dehn wahn waanin tu. If dehn mi waahn kantinyu liv eena dehn byootiful lan, dehn mi haftu obay Jehoava komanment dehn. Moaziz mi inkorij dehn fi lisn tu Jehoava ahn “stik tu ahn,” an dat da how dehn wuda “chooz laif.” Bot di Izrelait dehn mi rijek Jehoava. Soh afta sohn taim paas, Gaad mi alow di Asiriyan ahn di Babiloanyan dehn fi kanka di Izrelait dehn ahn fi tek dehn weh fahn dehn lan ahn foas dehn fi liv sohnweh els.—2 Ki. 17:​6-8, 13, 14; 2 Chron. 36:​15-17, 20.

7. Weh wi ku laan fahn weh Moaziz seh? (Koment pahn di picha.)

⁷ Wat da di lesn fi wee? If wi obay Jehoava, wi ku liv fareva. Wee deh eena wahn simila sichuwayshan tu di Izrelaits. Dehn mi wahn soon goh eena di Pramis Lan, ahn wee wahn soon goh eena di Paradais weh Gaad pramis wi. (Isa. 35:1; Look 23:43) Eena di Paradais, wi noh wahn haftu wori bowt di Devl ahn di deemonz nohmoh. (Rev. 20:​2, 3) Nohmoh faals rilijan wahn deh weh wahn teech lai bowt Jehoava. (Rev. 17:16) Nohmoh hyooman govament wahn dehdeh fi rof peepl op. (Rev. 19:​19, 20) Jehoava noh wahn mek nobadi kaaz prablemz eena Paradais. (Saa. 37:​10, 11) Evribadi, noh mata wehpaat dehn deh, wahn obay Jehoava raichos laa dehn, ahn soh wi wahn liv eena pees ahn yooniti. Evribadi wahn  lov ahn chros wan anada. (Isa. 11:9) Dat wahn bee wahn wandaful taim fi liv! An if wi obay Jehoava, wi wahn ku kantinyu liv eena Paradais fareva.—Saa. 37:29; Jan 3:16.

8. How di pramis a evalastin laif mi help wahn brada? (Jood 20, 21)

⁸ If wi kip di meditayt pahn di evalastin laif weh Gaad pramis wi, wi wahn waahn stik tu ahn noh mata weh prablemz wi mait fays. (Reed Jood 20, 21.) Da pramis ku help wi fait gens temtayshan tu. Wahn brada weh da-mi wahn mishineri da Africa fi wahn lang taim seh dat lata taim hihn mi fays temtayshan fi du sohnting weh Jehoava noh laik. Ih seh: “Ah riyalaiz dat Ah kudn liv fareva eena Paradais if Ah neva obay Jehoava. Dat mi help mi fi fait mi temtayshan ahn pray tu Jehoava eevn moa ahn beg ahn fi help mi. Wid fi hihn help, Ah mi aybl fi fait gens mi temtayshan.”

“YU WAHN GA SOKSES”

9. Weh chraiyalz Dayvid mi fays?

⁹ Dayvid da-mi wahn king fi Jehoava peepl an ih mi laayal tu Gaad. Hihn da-mi wahn myoozishan, poawet, wariya, ahn prafit. Hihn mi fays lata chraiyalz. Fi lata yaaz, hihn mi haftu ron weh ahn haid fahn King Saal, kaaz hihn mi waahn kil ahn. An az king a Izrel, ih mi haftu ron fi ih laif ahn haid bikaaz ih son Absalom mi waahn kil ahn an bee di neks king. Bot eevn doa ih mi fays aala dehndeh prablemz ahn mek sohn seeryos mistayk, ih mi stay laayal tu Gaad til ih ded. Jehoava mi seh dat Dayvid da-mi “wahn man weh pleez [Ih] haat.” Dat da wai ih mek sens fi lisn tu Dayvid advais!—Aks 13:22; 1 Ki. 15:5.

10. Wai Dayvid mi gi Salaman advais bifoa Salaman mi geh fi bee king?

¹⁰ Tek, fi egzampl, weh Dayvid mi tel ih son, Salaman, hoo mi wahn bee di neks king a Izrel. Jehoava mi chooz Salaman fi bil wahn templ wehpaat peepl ku wership Ahn. (1 Chron. 22:5) Salaman mi ga lata werk fi du, ahn hihn mi need fi pen pahn Jehoava fi help ahn leed di nayshan a Izrel. Mek wi si weh advais Dayvid mi giv ahn.

11. Akaadn tu 1 Kings 2:​2, 3, weh advais Dayvid mi gi Salaman, ahn weh hapm wen Salaman mi obay da advais? (Koment pahn di picha.)

¹¹ Weh Dayvid tel ahn? (Reed 1 Kings 2:​2, 3.) c Dayvid mi tel ih son dat if ih mi  obay Jehoava, ih wuda bee wahn gud leeda ahn Jehoava wuda bles ahn. Ahn fi lata yaaz, dat da weh mi hapm. (1 Chron. 29:​23-25) Salaman mi bil di byootiful templ, an ih mi rait sevral buks a di Baibl, ahn yu ku fain som a ih werdz eena ada paats a di Baibl tu. Hihn mi faymos fi ih wizdom ahn richiz. (1 Ki. 4:34) Bot laik weh Dayvid mi seh, Salaman wuda onli ga sokses if ih mi obay Jehoava. Wen Salaman mi geh oalda, ih staat tu wership ada gaadz. Sayka dat, Jehoava stap bles ahn, an ih stap gi Salaman di wizdom fi rool ih peepl eena wahn kain ahn fyaa way.—1 Ki. 11:​9, 10; 12:4.

12. Weh wi ku laan fahn Dayvid advais?

¹² Wat da di lesn fi wee? Wen wi obay Jehoava, hihn wahn bles wi ahn help wi. (Saa. 1:​1-3) Af koars, Jehoava noh pramis fi mek wi rich ahn faymos laik Salaman. Bot if wi obay Ahn, hihn wahn gi wi di wizdom weh wi need fi mek gud disizhanz. (Prav. 2:​6, 7; Jay. 1:5) Fi hihn prinsiplz ku help wi wen wi mek disizhanz bowt werk, skool, moni, ahn weh wi du fi fon. If wi fala Jehoava advais, wi wahn protek wi rilayshanship wid hihn ahn wi wahn ku injai evalastin laif. (Prav. 2:​10, 11) Wi wahn ga gud frenz, ahn wi wahn ga di help weh wi need fi ga wahn hapi famili.

13. Weh mi help Sista Carmen fi mek ih laif beta?

¹³ Sista Carmen, weh liv da Mozambique, yoostu tink dat moa ejukayshan wuda mek ih laif beta. Soh ih gaahn da yooniversiti ahn staat stodi fi bee wahn aakitek. Ih seh: “Ah mi lov weh Ah mi-di laan, bot ih tek soh moch taim an enerji. Ah mi deh da skool fahn maanin til nait. Ih mi haad fi goh da meetin, ahn mi rilayshanship wid Jehoava mi-di sofa. Deep dong eensaida mi, Ah mi noa dat Ah mi-di chrai serv too maasta.” (Mach. 6:24) Ih mi pray bowt di mata ahn du risaach eena wi poblikayshanz. Ih seh: “Di eldaz ahn mi ma gi mi gud advais. Soh Ah mi disaid fi lef yooniversiti fi serv Jehoava ful taim. Ah feel laik Ah mek di bes disizhan—Ah noh rigret it ataal.”

14. Wat da-mi Moaziz ahn Dayvid mayn mesij?

 ¹⁴ Moaziz ahn Dayvid mi lov Jehoava, ahn dehn mi noa dat ih veri impoatant fi obay ahn. Soh bifoa dehn ded, dehn mi inkorij adaz fi kapi dehn egzampl ahn fi stik tu Jehoava. Too a dehn mi aalso waan adaz dat if dehn neva stay laayal tu Jehoava, dehn kyaahn bee ih fren ahn dehn kyaahn geh blesinz fan ahn. Fi dehn advais ku reeli help wee tudeh tu. Honjridz a yaaz layta, wahn nada servant a Jehoava mi aalso eksplayn how impoatant ih impoatant fi mek wi stay faytful tu Gaad.

“NOTN MEK AH FEEL MOA HAPIYA”

15. Weh aal di apasl Jan gaahn chroo eena ih laif?

¹⁵ Di apasl Jan da-mi wahn kloas fren a Jeezas Krais. (Mach. 10:2; Jan 19:26) Jan mi spen lata taim wid Jeezas di preech an ih mi si Jeezas du lata miraklz. Ih mi stay laayal tu Jeezas joorin haad taimz. Ih mi dehdeh wen dehn kil Jeezas, an ih si ahn afta ih geh rezorek. Jan mi liv lang inof fi si di Kristyan kangrigayshan groa ahn fi si di gud nyooz “geh preech aal oava di werl.”—Kol. 1:23.

16. Hoo aal benifit fahn di leta dehn weh Jan mi rait?

¹⁶ Wen Jan mi veri oal, ih mi ga di privilij fi rait di buk a Revilayshan. (Rev. 1:1) Ih mi rait di buk a Jan, an ih mi rait chree letaz tu. Hihn mi rait ih terd leta tu wahn faytful Kristyan weh naym Gaiyos, hoo Jan mi lov laik wahn spirichwal son. (3 Jan 1) Bai da taim deh, Jan mosi mi ga lata spirichwal chiljren weh ih mi lov. Di advais weh Jan mi rait inkorij aala Krais falowaz dong tu dis day.

17. Akaadn tu 3 Jan 4, weh mek wi feel moa hapiya?

¹⁷ Weh Jan mi rait? (Reed 3 Jan 4.) Eena Jan terd leta, ih mi seh dat ih hapi fi si ih bradaz ahn sistaz di obay Gaad. Bai di taim hihn mi rait da leta, sohn peepl mi-di teech tingz weh noh chroo ahn dehn mi-di divaid op di kangrigayshan. Bot adaz mi “kip aan di liv akaadn tu di chroot.” Dehn mi obay Jehoava ahn dehn mi “kantinyu fi liv akaadn tu ih komanment dehn.” (2 Jan 4, 6) Dehndeh faytful Kristyanz mi mek Jehoava ahn Jan hapi.—Prav. 27:11.

18. Weh wi ku laan fahn Jan advais?

¹⁸ Wat da di lesn fi wee? Wen wi stay  faytful tu Jehoava, wi wahn bee hapi ahn wi wahn mek adaz hapi. (1 Jan 5:3) Fi egzampl, wi hapi kaaz wi noa wi mek Jehoava hapi. Jehoava veri hapi wen wi rijek di temtayshanz a dis werl ahn wen wi obay fi hihn komanment dehn. (Prav. 23:15) Di aynjel dehn hapi tu. (Look 15:10) Wi aalso hapi wen wi si wi bradaz ahn sistaz stay faytful tu Jehoava eevn wen dehn di goh chroo persikyooshan er wen dehn fait di temtayshan fi du weh rang. (2 Tes. 1:4) Ahn wen Saytan werl geh dischrai, wi wahn bee hapi dat wi stay faytful tu Jehoava.

19. Weh Sista Rachel seh bowt how ih feel wen ih teech di chroot tu adaz? (Koment pahn di picha.)

¹⁹ Sohnting els weh mek wi feel veri hapi da wen wi teech adaz bowt Jehoava. Sista Rachel, weh liv da di Dominican Republic, feel dat da wahn grayt aana fi teech adaz bowt wi Gaad. Dis da weh shee seh bowt di peepl weh ih help fi staat serv Jehoava: “Ah noh ga werdz fi diskraib how hapi Ah feel wen Ah si mi spirichwal chiljren geh fi lov Jehoava eevn moa, wen dehn laan fi chros eena hihn, ahn wen dehn mek chaynjiz eena dehn laif fi mek hihn hapi. Dis feelin wert aal di sakrifais weh Ah mek fi teech dehn di chroot.”

FALA DEHN WAIZ ADVAIS

20. Eena weh wayz wee da laik Moaziz, Dayvid, ahn Jan?

²⁰ Moaziz, Dayvid, ahn Jan mi liv joorin difrent taimz fahn weh wee di liv eena. Bot wee da laik dehn eena lata wayz. Dehn mi serv di chroo Gaad, pray tu ahn, pen pan ahn, an luk tu ahn fi advais. Ahn dehn mi aalso chros dat hihn wahn bles dehn if dehn obay ahn.

21. How Jehoava wahn bles wi if wi fala Moaziz, Dayvid, ahn Jan advais?

²¹ Mek wi fala di advais fahn dehndeh oalda faytful man an obay Jehoava komanment dehn. Wen wi obay Jehoava, wi wahn ga sokses eena evriting weh wi du. Wi wahn “liv wahn lang taim”—fareva! (Deut. 30:20) Ahn wi wahn bee hapi bikaaz wi noa dat wi di pleez wi hevnli Faada, hoo wahn bles wi moa dan wi kuda eva imajin.—Ifee. 3:20.