Paul: Eena Novemba 1985, wi mi gwehn da wi fers mishineri asainment da Liberia, West Africa. Wi mi soh eksaitid! Wen wi playn stap da Senegal, Anne seh: “Wi wahn reech Liberia eena lee bit moa dan wahn owa!” Den wi hyaa wahn anonksment: “Enibadi weh di goh tu Liberia haftu kom aafa di playn. Sohn rebl di chrai tek oava di govament deh, soh di playn kyaahn goh deh.” Wi mi en op di stay wid mishineriz da Senegal fi di neks ten dayz. Wi mi hyaa pahn di nyooz dat lata peepl mi-di ded, ahn di govament set wahn kerfyoo ahn dehn wuda shoot enibadi pahn di spat if dehn brok di kerfyoo.

Anne: Wi da noh di kaina peepl weh brayv ahn laik chrai nyoo tingz. In fak, fan Ah smaal, peepl yoostu kaal mi Angshos Annie. Imajin, Ah eevn frayd fi kraas wahn schreet! Bot wi mi stil waahn goh da Liberia eevn doa ih kuda mi bee daynjaros.

Paul: Mee an Anne mi baan da England ahn wi groa op eena di saym ayrya. Mai payrents an Anne ma mi inkorij wi wahn lat, soh too a wi staat painyaa afta wi grajuayt fahn hai skool. Dehn mi onli hapi dat wi mi waahn serv Jehoava ful taim. Wen Ah mi 19, Ah mi geh di privilij fi goh serv da Betel, ahn wen wi mi geh marid eena 1982, Anne mi jain mi da Betel.

Anne: Wi mi lov Betel, bot wi mi aalwayz waahn liv ahn preech da wahn konchri weh mi need moa poblishaz. Wen wi mi deh da Betel, wi mi geh fi serv wid bradaz weh yoostu bee mishineriz, ahn fi dehn egzampl an ekspeeryens mek wi waahn bee mishineriz tu. Soh wi mi pray fi dat evri nait fi chree yaaz. Eena 1985, wi mi soh hapi fi geh wahn invitayshan fi aten di 79th klaas a Gilyad. Wi mi geh asain tu Liberia, West Africa.

Paul: Wi mi kech di fers playn weh kuda mi gaahn da Liberia. Peepl mi fraitn ahn dehn mi stil anda kerfyoo. Dehn mi soh fraitn dat if wahn kaar bakfaiya rong di maakit, evribadi wuda panik ahn put fut weh ih mek fa! Evri nait wi wuda reed fahn di buk a Saamz fi help wi stay kaam. Bot eevn doa tingz mi haad, wi mi stil lov wi asainment.  Anne yoostu goh preech evri day, an Ai mi-di serv da Betel lang wid John Charuk. a Ah mi laan soh moch fan ahn bikaaz ih mi liv da Liberia fi wahn lang taim, an ih mi noa weh di bradaz ahn sistaz mi-di goh chroo.

Anne: Wai wi mi geh fi lov wi asainment da Liberia soh faas? Bikaaz wi bradaz ahn sistaz mi soh lovin ahn faytful. Wi mi geh kloas tu dehn laik if dehn da wi famili. Dehn mi gi wi lata gud advais an inkorij wi. Liberia da-mi wahn preechin paradais. Peepl neva laik it wen wi neva stay ahn preech tu dehn az lang az dehn mi waahn! Peepl yoostu taak bowt di Baibl eena dehn evriday kanvasayshan. Yu kuda jos jomp eena dehn kanvasayshan. Wi mi ga soh moch Baibl stodi dat ih mi haad fi fain taim fi stodi wid aala dehn, bot Ah noh di komplayn.

Paul: Wi mi ga pees fi bowt foa yaaz. Bot eena 1989, wahn terabl waar mi staat. Sohn rebl soalja mi tek oava di ayrya rong Betel pahn Joolai 2, 1990. Fi chree monts, wi kudn taak wid nobadi owtsaida di konchri, inkloodin wi famili ahn werl hedkwaataz. Di hoal plays mi owta kanchroal. Dehn mi ga lata vailens, lee bit a food mi deh, ahn dehn mi rayp wahn lata laydi. Dis mi laas fi 14 yaaz ahn di hoal konchri mi sofa.

Anne: Sohn chraib mi-di fait ahn kil wan anada. Di rebl dehn mi jres eena schraynj kloaz ahn dehn mi deh pahn evri schreet. Dehn mi ga lata wepan ahn dehn wuda goh eena evri hows ahn tek wateva dehn waahn. Fi som a dehn, fi kil peepl da-mi jos laik fi kil chikin. Dehn mi ga lata ded peepl pail op da som a di chekpoint dehn ahn kloas tu di branch tu. Lata faytful bradaz mi ded, inkloodin too mishineriz.

Weneva di reblz mi fain peepl weh mi bilangz tu di chraib dehn hayt, dehn wuda kil dehn. Wi bradaz wuda put dehn oan laif eena daynja soh dat dehn ku haid di bradaz ahn sistaz ahn sayv dehn. Di bradaz weh serv da Betel ahn di mishineri dehn mi ris dehn laif fi sayv dehn bradaz tu. Da Betel, sohn Witnisiz weh mi haftu ron weh mi sleep pahn di fers floa wehpaat di haalway ahn di aafis dehn mi deh, ahn som mi liv wid di Betelaits opstayz. Wee mi shayr wi room wid sevn ada peepl.

Paul: Evri day di rebl dehn wuda kohn da Betel fi si if wi di haid peepl. Wi mi ga chree bradaz  ahn wan sista weh mi du sikyoariti evri day. Too bradaz wuda goh da di gayt fi taak tu di rebl dehn, ahn wahn brada ahn wahn sista wuda deh bai wahn windo di wach evriting weh hapm. If di too bradaz bai di gayt wuda put dehn han fronta dehn, dat meenz evriting mi gud. Bot if dehn mi put dehn han bihain dehn bak, dat meenz di rebl dehn mi vailent, soh di brada ahn sista bai di windo wuda ron goh haid di bradaz.

Anne: Wahn taim, di bradaz kudn stap wahn groop a rebl fahn kom een da Betel. Mee ahn wahn sista gaan opstayz fi haid eena di baachroom ahn di rebl dehn mi fala wi, bot wi mi lak wiself een deh. Di baachroom mi ga wahn lee haidin spat baka di kyabinet. Di spat mi smaal, bot di sista mi manij fi skweez ihself een deh. Dehn mi staat tu nak haad pahn wi doa ahn wi mi frayd bikaaz dehn mi beks ahn dehn mi ga masheen gon. Paul mi chrai mek dehn noh kom een, soh ih tel dehn dat Ah mi-di yooz di baachroom. Wen Ah mi-di kloaz op di haidin spat ahn put evriting bak pahn di shelf, ih mek wahn lata naiz. Ah mi shoar di rebl dehn mi-di wanda weh di goh aan, an Ah mi geh soh fraitn dat mi hoal badi staat tu shayk. Ah mi frayd fi oapm di doa, soh Ah mi seh wahn kwik pryaa ahn beg Jehoava fi help mi. Den Ah oapm di doa ahn hayl dehn. Wan a dehn shub mi owta di way ahn gaahn schrayt fi di kyabinet. Ih mi oapm it ahn moov evriting rong pahn di shelf, an ih kudn bileev ih neva fain notn een deh. Hihn ahn di res gaahn saach di ada room dehn ahn di atik. Bot stilyet, dehn neva fain notn.

Paul: Fi monts, wi mi bayli ga eniting fi jrink tee da maanin. Wi maanin wership da-mi laik tee fi wi, an ih gi wi di schrent weh wi mi need.

Wi mi noa dat if wi mi goh owt fi food ahn waata, di rebl dehn wuda fain di bradaz weh wi mi-di haid ahn kil dehn. Sohntaim Jehoava wuda du amayzin tingz fi wi ahn gi wi weh wi need rait wen wi need it! Jehoava mi tek kayr a wi an ih help wi stay kaam.

Tingz mi-di geh wers ahn wers, bot di chroot mi gi wi di schrent fi koap. Wahn lata taim, wi bradaz ahn sistaz mi haftu ron fi dehn laif, bot dehn mi kip dehn fayt schrang ahn stay kaam noh mata how haad tingz mi get. Som a dehn mi seh dat da laik if dehn mi-di “praktis fi di grayt chribyulayshan.” Eldaz ahn yong bradaz mi step op ahn du evriting weh dehn kud fi help dehn bradaz ahn sistaz. Wen bradaz ahn sistaz mi haftu ron weh, dehn mi help eech ada. Noh mata wehpaat dehn goh, dehn wuda preech tu peepl, ahn dehn wuda yooz wateva dehn fain eena di bush fi set op wahn lee Kingdom Haal ahn ga dehn meetin. Di meetin dehn ahn di preechin werk mi schrentn an inkorij dehn wahn lat eevn joorin dehndeh terabl taimz. Wen wi mi-di shayr food, kloaz, an ada tingz weh di bradaz ahn sistaz mi need, dehn  aks wi fi preechin bag insted. Dat mi reeli inkorij wi! Lata di peepl weh mi si ahn gaahn chroo terabl tingz joorin di waar mi waahn hyaa di gud nyooz. Dehn kudn bileev how hapi di Witnisiz mi hapi. Wi bradaz ahn sistaz reeli mi-di shain joorin dehndeh daak taimz! (Mach. 5:​14-16) Bikaaz di bradaz mi soh eega fi shayr di gud nyooz, eevn som a di rebl dehn mi kom eena di chroot.

Paul: Sohntaim wi mi haftu lef di konchri. Wi mi lef chree taimz fi wahn lee wail, ahn too taimz fi wahn hoal yaa. Ah memba weh wahn mishineri sista mi seh, ahn dat da egzakli how wi mi feel; shee seh: “Da Gilyad, dehn teech wi fi put wi haat eena wi asainment, ahn dat da weh wi mi du. Soh wen wi mi lef wi bradaz eena da sichuwayshan, ih mi brok wi haat!” Tanks tu Jehoava, wi kuda mi stil help fahn ada konchriz weh deh kloas tu Liberia.

Anne: Wi mi lef di branch da Liberia eena May 1996. Foa a wi mi deh eena di branch veekl di kehr sohn impoatant dakyuments wid infamayshan bowt how di werk di goh da Liberia. Wi mi waahn jraiv 10 mailz tu wahn sayfa plays pahn di ada said a tong. Wen wi mi lef, wi mi en op eena di midl a wahn raiyat. Di rebl dehn mi-di shoot op dehn gon eena di ayaa. Dehn stap wi, haal chree a wi owta di veekl, ahn jraiv aaf wid Paul. Wi kudn bileev it! Neks ting yu noa, Paul mi-di kohn chroo di krowd wid blod di jrip fan ih farid. Wi mi tink dehn shat ahn, bot wi riyalaiz dat if dehn mi did shat ahn, ih neva mi wahn di waak! Wan a di rebl dehn mi bos ih hed wen ih mi-di shub ahn owta di veekl. Gud ting ih neva geh hert tu bad.

Wahn aami chrok mi dehdeh an ih mi-di luk fi lef. Ih mi don loadid wid peepl, soh wi mi haftu heng aan pahn di owtsaid a di veekl, ahn bayli eniting mi dehdeh fi heng aan tu. Di jraiva mash di agz ahn wi nayli jrap aafa di chrok. Wi mi-di beg ahn fi stap, bot ih mi tu fraitn. Wi manij fi heng aan tu di chrok, bot wen wi reech wi mi soh taiyad ahn fraitn dat wi mi-di shayk anaal.

Paul: Wi neva ga notn bot di doti, tayr op kloaz weh wi mi-di wayr. Wi mi luk pahn wan anada ahn kudn bileev dat wi mi stil alaiv. Wi mi sleep kloas tu wahn helikapta. Di helikapta mi ga lata bulit hoal an ih mi luk laik ih redi fi faal apaat, bot dat da weh mi kehr wi da Sierra Leone di neks day. Wi mi reeli tankful dat wi mi alaiv bot wi mi-di wori wahn lat bowt wi bradaz.

Anne: Wen wi mi reech di Betel da Freetown, Sierra Leone, wi mi feel sayf ahn di bradaz mi tek gud kayr a wi. Bot mi memriz a aala di terabl tingz weh mi hapm da Liberia kohn bak tu mi laik if Ah mi-di seeʼt di hapm aal oava agen. Joorin di day, Ah mi feel frayd dat sohnting terabl mi wahn hapm an Ah kudn tink schrayt. Da laik if Ah mi-di liv eena wahn bad jreem. Da nait, Ah wuda wayk op di chrimbl an Ah mi frayd sohnting bad mi wahn hapm. Ah mi fain it haad fi breed. Paul wuda hog mi ahn pray wid mi. Wi wuda sing Kingdom sangz tugeda til Ah stap shayk. Ah mi feel krayzi anaal, an Ah mi tink Ah wahn haftu stap serv az wahn mishineri.

Ah wahn neva ferget weh mi hapm afta dat. Da saym week wi mi geh too magazeen. Wan a dehn da-mi di Joon 8 Awake! fi 1996. Ih mi gat een wahn aatikl weh naym “Coping With Panic Attacks.” Afta Ah reed it, Ah mi andastan wai Ah mi-di feel soh frayd. Di sekant wan da-mi di May 15 kapi a The Watchtower fi 1996. Ih mi gat een wahn aatikl weh naym “Where Do They Get Their Strength?” Di aatikl mi ga wahn picha a wahn botaflai wid wahn wing weh mi damij. Di aatikl mi seh dat jos laik how di botaflai ku kantinyu eet ahn flai eevn doa ih wing mi damij, wid Jehoava spirit wee ku kantinyu help adaz eevn if terabl tingz hapm tu wi. Jehoava mi yooz dehndeh aatikl fi gi mi di schrent weh Ah mi need rait wen Ah mi need it. (Mach. 24:45) Ah mi luk fi moa aatikl laik dehndeh an Ah mi kalek dehn eena wahn foalda. Dat mi help mi wahn lat. Lee bit bai lee bit, Ah neva sofa az moch wid dehndeh bad memriz.

Paul: Enitaim wi wuda goh bak da Liberia, wi mi soh hapi. Rong di en a 2004 wi mi deh eena wi  asainment fi nayli 20 yaaz. Di waar mi oava. Dehn mi-di plan fi du sohn kanschrokshan da di branch. Bot sodn-wan, dehn aafa wi wahn nyoo asainment.

Dis da-mi wahn haad disizhan fi mek. Wi mi lov wi bradaz ahn sistaz da Liberia. Dehn da-mi laik famili tu wi ahn wi neva waahn lef dehn. Bot wi mi si how Jehoava help wi wen wi lef wi oan famili fi goh da Gilyad, soh wi mi aksep di nyoo asainment. Wi nyoo asainment da-mi Ghana.

Anne: Wi mi krai wahn lat wen wi mi-di lef Liberia. Wahn lee oal brada weh naym Frank mi sopraiz wi wen ih tel wi: “Unu mos ferget bowt wi!” Den ih tel wi: “Wi noa unu noh wahn ferget wi, bot unu mos put unu hoal haat eena unu nyoo asainment. Da Jehoava di sen unu deh, soh tek gud kayr a di bradaz ahn sistaz.” Dat mi gi wi di schrent fi staat oava eena wahn nyoo asainment wehpaat bayli enibadi mi noa wi.

Paul: Bot ih neva tek lang fi lov wi nyoo spirichwal famili da Ghana. Lata Witnisiz mi dehdeh! Wi nyoo frenz mi laayal ahn mi ga schrang fayt, ahn wi mi laan wahn lat fahn dehn. Afta wi serv da Ghana fi 13 yaaz, wi mi geh wahn nada sopraiz. Dehn aks wi fi serv da di East Africa branch da Kenya. Wi mi reeli mis wi frenz da Ghana ahn Liberia, bot wi mi mek nyoo frenz monks di bradaz ahn sistaz da Kenya rait away.

Anne: Ah gaahn chroo lata tof sichuwayshan eena mi laif an Ah mi frayd bad. Wen yu liv eena wahn daynjaros plays er yu goh chroo haad taimz, ih ku mek yu sik ahn frayd. Sohntaim, ih feel laik da jos tu moch. Wi kyaahn ekspek Jehoava fi du wahn mirakl fi protek wi. Enitaim Ah hyaa gonshat, Ah feel sik eena mi stomok ahn mi han goh nom. Bot Ah laan fi pen pahn Jehoava ahn di bradaz ahn sistaz. An Ah laan dat wen wi kip di stodi, pray, goh da meetin, ahn goh preech, Jehoava ku help wi stay eena wi asainment.

Paul: Sohntaim peepl aks wi if wi lov wi asainment. Di konchri weh yu goh serv ku bee byootiful, bot ih ku bee daynjaros fi liv eena. Soh weh wi lov moa dan di konchri? Wi spirichwal famili. Wi bradaz ahn sistaz soh preshos tu wi. Da chroo, wi mait kohn fahn difrent bakgrong ahn famili, bot aala wi lov Jehoava ahn du wi bes fi serv ahn. Wi mi tink wi mi gwehn goh inkorij wi bradaz ahn sistaz, bot da dehn inkorij wee.

Wi werlwaid bradahud da wahn mirakl fahn Jehoava! Noh mata wehpaat wi goh, wi famili dehdeh. Az lang az wi da paat a wahn kangrigayshan, wi ga wahn plays wehpaat wi feel sayf. Wi noa fi shoar dat if wi pen pahn Jehoava, ih wahn gi wi di schrent weh wi need.—Fil. 4:13.