1-2. Eena weh wayz peepl mait chreet wi bad?

 JEEZAS mi tel wahn stoari bowt wahn wido weh neva stap beg wahn joj fi help ahn bikaaz sohnbadi mi-di chreet ahn bad. Wahn lata Jeezas disaiplz kuda mi andastan how dis laydi mi feel bikaaz lata taim peepl mi chreet dehn bad tu. (Look 18:​1-5) Ahn wee andastan how shee mi feel tu, bikaaz wi noa how ih feel wen peepl chreet wi bad.

² Wi ekspek peepl fahn dis werl fi chreet wi bad bikaaz som peepl greedi, dehn noh kain, er dehn prejudis. (Ikl. 5:8) Sohnting weh wi noh ekspek, da wen wi bradaz ahn sistaz chreet wi bad. Dat ku hapm, doh. Wai? Da noh bikaaz dehn deh gens wi, laik ada peepl. Dehn jos noh perfek. Wi ku laan wahn lat fahn weh Jeezas mi du wen ih enimi dehn mi chreet ahn bad. If wee ku bee payshent wid wi enimi dehn wen dehn chreet wi bad, den yu noh tink wi ku bee eevn moa payshent wid wi bradaz ahn sistaz? How Jehoava feel wen hihn si sohnbadi chreet wi bad, weda da wahn brada er sista er sohnbadi els? Yu tink hihn kay?

3. How wi noa dat Jehoava kay bowt how peepl chreet wi?

³ Jehoava reeli kay bowt how peepl chreet wi. Di Baibl  tel wi dat “Jehoava lov jostis.” (Saa. 37:28) Jeezas mi tel wi dat Jehoava wahn mek shoar dat wi geh jostis wen di rait taim kohn. (Look 18:​7, 8) Ahn soon Jehoava wahn geh rid a eniting weh kaaz wi payn, an ih wahn mek shoar dat nobadi chreet wi bad eva agen.—Saa. 72:​1, 2.

4. How Jehoava help wi tudeh?

⁴ Eevn doa wi haftu wayt fi di taim wen Jehoava wahn geh rid a aala wi prablemz, hihn stil kantinyu fi help wi wen peepl chreet wi bad. (2 Peet. 3:13) Ih teech wi how fi mek gud disizhanz wen ada peepl chreet wi bad, soh dat wi noh mek tingz wers. Fi egzampl, Jehoava yooz ih Son egzampl fi teech wi how wi shuda ak wen peepl chreet wi bad. An ih yooz di Baibl fi gi wi advais weh ku help wi noa weh fi du wen peepl chreet wi bad.

KANCHROAL YU FEELINZ WEN PEEPL CHREET YU BAD

5. Wai wi need fi bee kyaaful wen sohnbadi du wi sohnting bad?

⁵ Wen sohnbadi chreet wi bad, dat mait reeli hert wi. (Ikl. 7:7) Dat da how faytful peepl laik Joab ahn Habakok mi feel wen peepl mi chreet dehn bad. (Joab 6:​2, 3; Hab. 1:​1-3) Ih naamal fi mek wi feel laik dat. Bot if sohnbadi chreet wi bad, wi haftu bee kyaaful weh wee du. Wi noh waahn du sohnting rang jos bikaaz sohnbadi els hert wi.

6. Weh Absalom egzampl teech wi? (Koment pahn di picha.)

⁶ Wen sohnbadi chreet wee er sohnbadi weh wi lov bad, wi mait waahn tek rivenj eevn doa wi noh ga di rait fi du dat. Bot dat mait mek tingz eevn wers. Tink bowt Absalom egzampl. Hihn, Taymar, an Amnon da-mi King Dayvid pikni, bot Amnon mi ga wahn difrent ma. Wahn taim, Amnon mi rayp Taymar, ahn sayka dat Absalom geh beks bad ahn hayt Amnon. Memba, di Laa weh Jehoava gi Moaziz mi seh dat Amnon mi dizerv fi ded fi weh ih du. (Lev. 20:17) Ih mi naamal fi mek Absalom geh beks wid ih breda, bot ih neva ga di rait fi kil ahn.—2 Sam. 13:​20-23, 28, 29.

7. How di saamis mi feel wen ih si wikid peepl di chreet gud peepl bad?

⁷ Sohntaim, wi wahn si peepl di chreet adaz bad, an ih mait luk laik dehn di get weh wid it. Wen wi si tingz laik dat hapm, wi mait staat feel laik ih noh mek sens fi  du weh rait. Dat da how di saamis mi feel. Hihn mi si wikid peepl di chreet gud peepl bad, bot di wikid peepl mi-di injai dehn laif, ahn di gud peepl mi-di sofa. Hihn mi seh: “Wikid peepl aalwayz gat it eezi.” (Saa. 73:12) Hihn mi feel soh diskorij bai aala di tingz weh ih si dat ih mi staat tu tink dat ih neva wert it fi serv Jehoava. Hihn mi seh: “Wen Ah chrai fi andastan wai aala dehnya tingz hapm, ih bada mi wahn lat.” (Saa. 73:​14, 16) Hihn seh: “Ah nayli gaahn dong di rang road; da mi laik if Ah aalmoas slip ahn jrap dong.” (Saa. 73:2) Wahn brada weh naym Alberto gaahn chroo wahn simila sichuwayshan, ahn hihn mi feel di saym way how di saamis mi feel. a

8. Weh mi hapm tu Alberto wen bradaz ahn sistaz mi chreet ahn bad?

⁸ Sohn bradaz mi akyooz Alberto ahn seh dat ih teef moni fahn di kangrigayshan, bot da neva chroo. Sayka weh dehn seh, ih kudn serv az wahn elda nohmoh. Wahn lata bradaz ahn sistaz eena di kangrigayshan mi hyaa dat dehn seh Alberto teef, ahn soh dehn neva rispek ahn agen. Brada Alberto seh: “Ah neva hapi wid dat ataal. Ah mi geh soh beks. Ah mi feel soh  foschraytid kaaz Ah mi feel laik Ah neva dizerv dat.” Hihn mi alow fi hihn payn fi afek ih rilayshanship wid Jehoava, ahn fi faiv yaaz ih neva gaahn da meetin. Alberto ekspeeryens shoa weh ku hapm wen wi noh kanchroal wi feelinz wen adaz chreet wi bad.

KAPI JEEZAS EGZAMPL

9. Wat da sohn tingz weh Jeezas gaahn chroo? (Koment pahn di picha.)

⁹ Jeezas set wahn perfek egzampl fi wi. Ih shoa wi weh fi du wen peepl chreet wi bad. Tink bowt how ada peepl, an eevn ih oan famili, mi chreet ahn. Som a ih famili mi seh dat ih noh karek, di rilijos leedaz mi akyooz ahn dat ih get ih powa fahn di deemonz, ahn di Roaman soalja dehn mak ahn, beet ahn op, an eevn kil ahn. (Maak 3:​21, 22; 14:55; 15:​16-20, 35-37) Eevn doa peepl mi chreet ahn bad, Jeezas bayr op an ih neva chreet dehn di saym way dehn chreet ahn. Weh wi ku laan fahn Jeezas egzampl?

10. Weh Jeezas mi du wen dehn chreet ahn bad? (1 Peeta 2:​21-23)

¹⁰ Reed 1 Peeta 2:​21-23. b Wen wi luk pahn Jeezas egzampl, hihn shoa wi di perfek way how wi fi chreet peepl weh chreet wi bad. Hihn mi noa wen fi taak ahn wen noh fi taak. (Mach. 26:​62-64) Sohntaim, wen adaz mi tel lai bowt ahn, ih neva seh notn. (Mach. 11:19) Bot wen ih mi did taak, ih neva insolt op dehn wan weh mi-di chreet ahn bad an ih neva  chretn dehn needa. Jeezas mi aalwayz chreet peepl di rait way, eevn if dehn persikyoot ahn, bikaaz ih put ih “hoap eena di Wan weh joj wid raichosnis.” Jeezas mi noa dat Jehoava kuda mi si dat dehn mi-di chreet ahn bad, ahn hihn mi chros dat Jehoava mi wahn fiks tingz da di rait taim.

11. How wi ku kapi Jeezas egzampl? (Koment pahn di picha dehn.)

¹¹ Wen sohnbadi chreet wi bad, wi ku kapi Jeezas egzampl ahn bee kyaaful weh wi seh. Sohntaim, wi mait noh need fi seh er du eniting bikaaz da noh sohnting seeryos. Er sohntaim ih bes fi noh seh notn, bikaaz if wi seh sohnting ih ku kaaz moa prablemz. (Ikl. 3:7; Jay. 1:​19, 20) Bot sohntaim, wi mait si peepl di chreet sohnbadi bad, ahn wi need fi taak op fi difen ahn. Ada taimz, wi mait need fi taak op fi difen di chroot. (Aks 6:​1, 2) Bot if wi seh sohnting, wi waahn bee kain ahn shoa rispek.—1 Peet. 3:15. c

12. Wat da wahn nada way wi ku fala Jeezas egzampl?

¹² Wi ku aalso kapi Jeezas wen wi lef tingz tu “di Wan weh joj wid raichosnis.” Wen peepl joj wi rang er chreet wi bad, wi ku chros dat Jehoava noa weh hapm. Sins wi noa dat Jehoava wahn du sohnting bowt it, dat wahn help wi fi bayr op. If wi lef tingz eena Jehoava han, wi noh wahn stay beks er hayt peepl. Dehndeh kaina feelinz ku mek wi du sohnting bad, tek weh wi jai, ahn damij wi rilayshanship wid Jehoava.—Saa. 37:8.

13. Weh ku help wi fi bayr op wen peepl chreet wi bad?

¹³ Wi ku chrai haad fi kapi Jeezas egzampl, bot wi kuda neva bee perfek laik hihn. Sohntaim wi mait seh er du sohnting weh wi rigret. (Jay. 3:2) Ahn sohntaim di way peepl chreet wi kaaz wi payn fi az lang az wi liv eena dis sistem. If yoo di goh chroo sohnting laik dat, memba dat Jehoava andastan how yu feel. Ahn sins peepl mi chreet Jeezas bad, hihn andastan how yoo feel tu. (Heeb. 4:​15, 16) Jehoava gi wi Jeezas egzampl fi fala an ih gi wi gud advais fi help wi wen peepl chreet wi bad. Mek wi luk pahn too vers eena di buk a Roamanz weh ku help wi.

“LEF IT TU GAAD”

14. How wi ku fala Paal advais wen sohnbadi chreet wi bad? (Roamanz 12:19)

¹⁴ Reed Roamanz 12:19. Wen sohnbadi chreet wi bad, wi shuda fala Paal advais. Wi lef it tu Gaad ahn mek hihn disaid wen ahn how fi deel wid di sichuwayshan. Dat da weh wahn brada weh naym John mi du afta wahn brada mi chreet ahn bad. Hihn seh: “Ah mi waahn fiks tingz mi oan way, bot Roamanz 12:19 mi help mi fi fait da dizaiya ahn wayt pahn Jehoava.”

15. Wai ih beta fi wayt mek Jehoava fiks wahn prablem?

¹⁵ Wen wi lef it tu Jehoava fi fiks wi prablem, tingz wahn goh beta fi wi. If wi ga wahn big prablem ahn wi chrai deel wid it wiself, wi yoozhwali en op di feel foschraytid ahn schres owt. Soh Jehoava aafa fi help wi. Da laik if hihn tel wi, ‘Lef it tu mee; Ah wahn tek kayr a it.ʼ Jehoava pramis wi dat hihn wahn “pay dehn bak fi di bad tingz weh dehn du.” If wee chros da pramis, wi noh wahn need fi kantinyu feel beks, bikaaz wi noa dat Jehoava wahn du weh rait. Dat da weh  mi help Brada John. Hihn mi seh, “If Ai wayt fi mek Jehoava fiks mi prablem, hihn wahn handl it eena wahn moch beta way dan how Ai kuda handl it.”

“KIP AAN DI WIN DI VIKCHRI OAVA EEVL BAI DI GUD TINGZ WEH UNU DU”

16-17. How pryaa ku help wi fi “kip aan di win di vikchri oava eevl bai di gud tingz weh [wi] du”? (Roamanz 12:21)

¹⁶ Reed Roamanz 12:21. Paal mi tel Kristyanz fi “kip aan di win di vikchri oava eevl bai di gud tingz weh [dehn] du.” Wen Jeezas mi giv ih Sermon pahn di Mongtin, ih mi seh: “Kantinyu fi lov unu enimi dehn ahn pray fi dehn wan weh di persikyoot unu.” (Mach. 5:44) Jeezas neva jos seh dat; ih du it, tu. Tink bowt humoch ih mi sofa wen di Roaman soalja dehn mi nayl ahn pahn di stayk. Wi kyaahn eevn imajin di shaym ahn di payn weh ih mi-di feel.

¹⁷ Bot Jeezas neva mek dat chaynj ahn. Hihn mi stil kantinyu shoa lov an ih mi stay faytful tu Jehoava. Insteda aks Jehoava fi ponish dehndeh soalja, ih mi pray an aks ahn: “Faada, fergiv dehn, kaaz dehnya peepl noh noa weh dehn di du.” (Look 23:34) Wen wi pray fi peepl weh chreet wi bad, dat help wi fi kip kaam ahn noh stay beks. Ih ku eevn chaynj di way wi feel bowt dehn.

18. How pryaa mi help Alberto ahn John wen peepl mi chreet dehn bad?

¹⁸ Pryaa mi help Alberto ahn John wen peepl mi chreet dehn bad. Alberto seh: “Ah mi pray fi di bradaz weh mi chreet mi bad. Lata taim Ah mi pray an aks Jehoava fi help mi fi stap feel soh beks oava di sichuwayshan.” Wi hapi fi seh dat Alberto di serv Jehoava agen. John seh: “Lata taim, Ah mi pray tu Jehoava fi help di brada weh mi chreet mi bad ahn fi help mi fergiv ahn. Jehoava mi help mi. Ah neva soh beks wid di brada nohmoh, an Ah mi stap joj ahn. An Ah mi feel soh kaam afta Ah pray.”

19. Weh wi haftu du az lang az wi di liv eena dis wikid werl? (1 Peeta 3:​8, 9)

¹⁹ Az lang az wi di liv eena dis wikid werl, peepl wahn chreet wi bad. Bot noh mata wat, mek wi neva stap aks Jehoava fi help. Wen peepl chreet wi bad, mek wi fala Jeezas egzampl. Ahn mek wi kantinyu fi fala di advais weh Jehoava gi wi eena di Baibl. If wi kip aan di du dehndeh tingz, wi ku bee shoar dat Jehoava wahn bles wi.—Reed 1 Peeta 3:​8, 9.