YOO fain it haad fi stodi di Baibl evri week? Yu fain it boarin? Aala wi praabli feel da way sohntaim. Bot tink bowt ada tingz weh wi du regyula. Fi egzampl, how yu feel wen yu don bayd? Eevn doa ih tek taim an enerji, yu feel gud aftawodz, noh chroo? Saym way soh, wen wi “yooz Gaad werd laik waata,” ih mek wi feel gud tu. (Ifee. 5:26) Mek wi luk pahn sohn sojeshan weh ku help yu injai yu persnal Baibl stodi:

• Mek wahn skejul: Az Kristyanz, persnal Baibl stodi da wan a “di moa impoatant tingz” weh wi need fi mek shoar wi du. (Fil. 1:10) If yu waahn stik tu yu skejul, wai yu noh rait it dong pahn wahn pees a paypa ahn stik it pahn yu rifrij er sohnweh els weh yu wahn seeʼt aal di taim. Maybi yu ku eevn set wahn alaam pahn yu foan fi rimain yu lee bit bifoa di taim weh yu set fi stodi.

• Chooz wen ahn how lang yu wahn stodi: Weh yu fain eeziya? Yoo ku stodi fi wahn owa schrayt? Er yu rada stodi fi wahn shaata taim? Onli yoo ku ansa dehndeh kweschan. Soh plan yu stodi bays pahn yu ansaz tu dehndeh kweschan. Wat if di taim kohn ahn yu noh feel laik stodi? Maybi yu ku chrai stodi fi jos ten minits. Eevn if yu onli stodi fi wahn fyoo minits, dat stil beta dan if yu noh stodi non ataal. Ahn wans yu staat stodi, yu mait injai it soh moch dat yu waahn kantinyu stodi.—Fil. 2:13.

• Chooz weh yu wahn stodi heda taim: If yu noh tink bowt weh yu wahn stodi til wen da don taim fi staat stodi, yu noh wahn di “mek di bes yoos a [yu] taim.” (Ifee. 5:16) Chrai kip wahn lis a tapiks weh yu wuda waahn stodi. Enitaim yu tink bowt sohnting weh yu wuda waahn laan moa bowt, rait it dong pahn yu lis. Wen yu di stodi, sohn ada kweschanz mait kom op weh gi yu moa aidyaaz weh yu ku stodi bowt. Yu ku ad dehndeh tu yu lis.

• Chaynj yu skejul if yu haftu: Di moas impoatant ting da fi stodi evri week. Mek dat bee yu goal. Bot fi mek dat hapm, yu mait haftu chaynj wen yu stodi, how lang yu stodi fa, ahn weh yu wahn stodi.

Wi geh lata benifits wen wi stodi evri week. Wi wahn jraa kloasa tu Jehoava, wi wahn mek gud disizhanz, ahn wi wahn feel gud aftawodz.—Jash. 1:8.