1-2. Weh “gud werk” wahn elda du eena di kangrigayshan?

 IF YU da wahn ministeeryal servant, yu praabli don ga som a di kwalitiz weh yu wuda need fi bee wahn elda. Yoo wuda waahn bee wahn elda ahn du moa fi yu bradaz ahn sistaz?—1 Tim. 3:1.

² Wat da di “gud werk” weh wahn elda du? Ih set wahn gud egzampl eena di minischri, ih werk haad fi shepad ahn teech adaz eena di kangrigayshan, an ih du ahn seh tingz weh wahn help di bradaz ahn sistaz fi schrentn dehn fayt eena Jehoava. Dat da wai di Baibl seh dat wahn haad-werkin elda da wahn gif fahn Jehoava.—Ifee. 4:8.

3. How wahn brada ku kwalifai fi bee wahn elda? (1 Timoti 3:​1-7; Taitos 1:​5-9)

³ How yu ku kwalifai fi bee wahn elda? If yoo mi-di chrai fi geh wahn jab, aal yu praabli wuda need da di skilz weh di baas di luk fa. Bot fi bee wahn elda, yu need moa dan jos skilz eena di preechin ahn teechin werk. Yu need fi ga di kwalitiz weh 1 Timoti 3:​1-7 ahn Taitos 1:​5-9 seh wahn elda fi ga. (Reed.) Dis aatikl wahn taak bowt som a dehndeh kwalitiz. Ahn wi wahn si how wahn brada ku ga wahn gud repyutayshan, how ih ku bee wahn gud famili hed, ahn weh ku help ahn fi bee wilin ahn hapi fi serv di kangrigayshan.

GA WAHN GUD REPYUTAYSHAN

4. Weh kaina repyutayshan wahn elda fi ga?

⁴ Wahn elda fi liv eena wahn way weh shoa dat peepl noh ga no reezn fi fain faalt wid ahn. Dat meenz dat if yu waahn kwalifai fi bee wahn elda, nobadi eena di kangrigayshan shuda ga gud reezn fi seh dat yu du sohnting rang. Pahn tap a dat, yu fi ga wahn gud repyutayshan monks peepl owtsaida di kangrigayshan. Sohntaim peepl  owtsaida di kangrigayshan mait fain faalt wid weh yu bileev, bot dehn shudn ga gud reezn fi fain faalt wid yoo ahn seh dat yu noh aanis er dat yu da noh wahn gud persn. (Dan. 6:​4, 5) Soh aks yuself, ‘Ai ga wahn gud repyutayshan eensaid an owtsaid di kangrigayshan?ʼ

5. How yu ku shoa dat yu lov weh gud?

⁵ If yu lov weh gud, yu wahn luk fi di gud eena adaz ahn yu wahn komen dehn fi di gud kwalitiz weh dehn gat. Yu wahn bee hapi fi du gud tingz fi adaz, eevn tingz weh dehn noh ekspek yu fi du. (1 Tes. 2:8; luk op di “lover of goodness” stodi noat pahn Taitos 1:8 eena di Study Bible.) Wai ih soh impoatant fi mek eldaz lov weh gud? Bikaaz den dehn wahn hapi fi spen lata taim di shepad di kangrigayshan ahn tek kayr a difrent asainments. (1 Peet. 5:​1-3) An eevn doa ih tek wahn lata werk, dehn wahn hapi fi serv dehn bradaz ahn sistaz.—Aks 20:35.

6. Weh ih meenz fi lov fi welkom peepl ahn bee kain tu dehn? (Heebrooz 13:​2, 16; koment pahn di picha.)

⁶ Yu ku shoa dat yu lov fi welkom peepl ahn bee kain tu dehn wen yu du gud tingz fi evribadi, inkloodin peepl weh da noh yu kloas frenz. (1 Peet. 4:9) Wahn Baibl dikshineri seh dat wahn haspitabl man wahn bee kain eevn tu peepl weh ih noh noa an ih wahn bee hapi fi invait dehn eena ih hows. Soh aks yuself, ‘Wat da mai repyutayshan? Mi bradaz ahn sistaz noa mi az sohnbadi weh kain tu peepl weh vizit mi kangrigayshan?ʼ (Reed Heebrooz 13:​2, 16.) Wahn haspitabl man wahn shayr wateva ih kud wid peepl weh vizit ih kangrigayshan, inkloodin peepl weh poa, vizitin speekaz, ahn bradaz laik serkit oavaseeyaz weh werk haad fi inkorij di kangrigayshan.—Jen. 18:​2-8; Prav. 3:27; Look 14:​13, 14; Aks 16:15; Roam. 12:13.

7. How wahn elda ku shoa dat ih noh lov moni?

⁷ Ih noh fi lov moni. Dat meenz dat moni ahn mateeryal tingz noh wahn bee di moas impoatant ting eena yu laif. Noh mata if yu rich er poa, yu mek shoar dat di Kingdom kohn fers eena yu laif. (Mach. 6:33) Yu yooz yu taim, enerji, an eniting els weh yu ga fi wership Jehoava, fi tek kayr a yu famili, ahn fi serv di  kangrigayshan. (Mach. 6:24; 1 Jan 2:​15-17) Aks yuself: ‘How impoatant moni tu mee? Ai satisfai wid di baysik tingz weh Ah need fi liv? Er Ai aalwayz waahn moa?ʼ—1 Tim. 6:​6, 17-19.

8. Weh ih meenz fi ga self-kanchroal eena evriting?

⁸ If yu ga self-kanchroal eena evriting, yu wahn set reeznabl limits fi yuself eena aal paats a yu laif. Fi egzampl, yu noh wahn eet ahn jrink tu moch. Yu mek shoar dat yu kloaz ahn yu hyaa stail prapa. Ahn yu mek gud disizhanz wid yu entataynment an ada tingz weh yu du fi fon. Yu noh wahn kapi di way peepl liv eena di werl. (Look 21:34; Jay. 4:4) Yu wahn ku stay kaam eevn wen peepl provoak yu. Yu noh wahn bee wahn jronkad. Yu noh eevn waahn peepl tink dat yu jrink tu moch. Soh aks yuself, ‘Di way Ai liv shoa dat Ah ga self-kanchroal eena evriting?ʼ

9. Weh ih meenz fi bee wahn sensabl man weh wel aaganaiz?

⁹ If yu sensabl, yu wahn tink bowt weh di Baibl seh bowt difrent sichuwayshanz eena laif. Yu wahn tink bowt how yu ku yooz di prinsiplz eena di Baibl eena difrent sichuwayshanz, ahn dat wahn help yu andastan tingz beta ahn yu wahn mek waiz disizhanz. Yu noh wahn mek haysti disizhanz bifoa yu get aala di faks. (Prav. 18:13) Sayka dat, yu wahn ku mek waiz disizhanz weh shoa dat yu di laan fi tink laik Jehoava. If yu wel aaganaiz, yu wahn du tingz tu taim. Peepl wahn ku pen pahn yu ahn dehn wahn chros dat yu fala inschrokshanz. Wen yu shoa kwalitiz laik dehndeh, dat wahn help yu ga wahn gud repyutayshan. Now mek wi taak bowt di kwalitiz weh wahn elda shuda ga soh dat ih set wahn gud egzampl az wahn famili hed.

BEE WAHN GUD FAMILI HED

10. How wahn brada ku tek di leed eena ih hows ahn mek shoar evriting di goh gud?

¹⁰ If yoo da wahn marid brada ahn yu waahn bee wahn elda, yu famili need fi set wahn gud egzampl tu. Soh yu need fi tek di leed eena yu hows ahn mek shoar evriting di goh gud. Yu need fi tek kayr a yu famili eena wahn lovin way ahn mek gud disizhanz fi dehn. Soh dat meenz dat yu wahn du famili wership, mek shoar yu famili deh da meetin, ahn help dehn fi du dehn bes eena di minischri. Wai dat soh impoatant? Di apasl Paal mi seh: “If wahn man noh noa how fi tek di leed eena ih oan hows, den da how ih wahn tek kayr a di kangrigayshan a Gaad?”—1 Tim. 3:5.

11-12. If wahn brada waahn bee wahn elda, wai ih chiljren bihayvya impoatant? (Koment pahn di picha.)

¹¹ If yu ga chiljren di liv hoam weh noh 18 yet, dehn fi bee wilin fi obay ahn bihayv dehnself gud. Yu need fi teech dehn ahn chrayn dehn eena wahn lovin way. Af koars, yu waahn yu chiljren bee hapi ahn ga fon ahn laaf ahn play laik how chiljren naamali bihayv. Bot bikaaz yu chrayn dehn gud, dehn wahn bee obeedyant, dehn wahn chreet peepl wid rispek, ahn dehn wahn bihayv gud. Ahn yu need fi du yu bes fi mek dehn bee Jehoava fren, fi du weh di Baibl seh, ahn fi mek proagres ahn geh baptaiz.

¹² Wahn apointid brada pikni dehn fi bee bileevaz weh nobadi ku mek wahn akyoozayshan gens dat dehn goh aan wail er dat dehn noh lisn tu dehn payrents. Sopoaz wahn brada ga wahn pikni weh di mek proagres er weh don baptaiz ahn di pikni komit wahn seeryos sin. How dat wuda afek di brada? If ih neva  chrayn ih pikni ahn disiplin ahn, ih praabli wudn kwalifai fi bee wahn elda.—Yu ku fain moa infamayshan pahn dis eena paragraaf 6-7 pahn payj 21 eena di Aktoaba 15, 1996, kapi a The Watchtower.

TEK GUD KAYR A DI KANGRIGAYSHAN

13. How yu shoa dat yu noh stobant ahn yu noh aalwayz waahn evriting yu oan way?

¹³ Bradaz weh ga gud Kristyan kwalitiz da wahn blesin fi di kangrigayshan. If yu waahn promoat pees, yu noh fi bee sohnbadi weh aalwayz waahn evriting yu oan way. Yu wahn lisn tu peepl ahn chrai andastan how dehn tink ahn feel. Tink bowt dis: If yu deh eena wahn eldaz meetin ahn di eldaz mek wahn disizhan bays pahn Baibl prinsiplz ahn moas a dehn agree, weh yu wuda du? Yu wuda bee wilin fi sopoat di disizhan eevn if yu prifaa fi du sohnting els? Yu noh wahn bee stobant an insis fi du tingz di way yoo waahn. Dat meenz yu haftu andastan dat ih impoatant fi lisn tu ada peepl aidyaaz. (Jen. 13:​8, 9; Prav. 15:22) Yu noh fi laik kwaaril ahn yu noh fi bee eezi fi geh beks. Dat meenz dat yu noh fi aagyu wid peepl. Insteda dat, yu fi chreet dehn wid rispek ahn bee kain tu dehn. An if yu lov pees, yu wahn werk haad fi mek pees wid adaz eevn wen dat noh eezi fi du. (Jay. 3:​17, 18) If yu taak tu peepl eena wahn kain way, dat wahn help dehn fi kaam dong, eevn if dehn noh reeli agree wid weh wi bileev.—Joj. 8:​1-3; Prav. 20:3; 25:15; Mach. 5:​23, 24.

14. Wai wahn elda noh fi bee wahn nyoo bileeva, ahn how ih ku shoa dat ih laayal?

¹⁴ Wahn brada weh kwalifai fi bee wahn elda noh fi bee wahn nyoo bileeva. Yu noh haftu bee baptaiz fi wahn lang taim, bot yu doo need taim fi schrentn yu rilayshanship wid Jehoava ahn laan how fi yooz di Baibl gud fi mek waiz disizhanz. Bifoa yu ku bee wahn elda, yu haftu laan fi kapi Jeezas egzampl. Yu fi shoa dat yu hombl ahn dat yu wilin fi serv Jehoava eena eni kaina way. Ahn yu wahn bee  payshent ahn wayt fi mek Jehoava gi yu moa asainments eena di kangrigayshan. (Mach. 20:23; Fil. 2:​5-8) Yu ku shoa dat yu laayal wen yu stay faytful tu Jehoava ahn liv di way hihn waahn wi liv, ahn wen yu fala di dairekshan weh ih gi wi chroo ih aaganaizayshan.—1 Tim. 4:15.

15. Weh ih meenz fi noa how fi teech gud?

¹⁵ Di Skripchaz seh dat wahn elda mos noa how fi teech gud. Noh aal eldaz giv amayzin poblik taaks. Bot wen dehn preech ahn du shepadin vizit, eldaz need fi mek gud yoos a di Baibl fi teech an inkorij dehn bradaz ahn sistaz. (Luk op di “qualified to teach” stodi noat pahn 1 Timoti 3:2 eena di Study Bible; kompyaa 1 Korintyanz 12:​28, 29 an Ifeezhanz 4:11.) Stilyet, yu need fi werk haad fi bee wahn beta teecha. How yu ku du dat?

16. How yu ku bee wahn beta teecha? (Koment pahn di picha.)

¹⁶ Hoal aan tait tu di faytful werd. Fi bee wahn beta teecha, yu haftu mek shoar dat evriting weh yu teech an eni kongsl weh yu gi kohn fahn Gaad Werd. Soh stodi di Baibl gud ahn stodi wi poblikayshan dehn tu. (Prav. 15:28; 16:23; luk op di “holding firmly to the faithful word” stodi noat pahn Taitos 1:9 eena di Study Bible.) Wail yu stodi, pay main tu how di poblikayshan dehn eksplayn di Skripchaz soh dat yu ku yooz dehn eena di karek way. Ahn wen yu di teech, chrai haad fi help peepl lov Jehoava moa ahn fi inkorij dehn fi yooz weh dehn laan. Yu ku geh eevn moa help if yu aks fi sojeshanz fahn eldaz weh ga moa ekspeeryens ahn fala dehn sojeshanz. (1 Tim. 5:17) Eldaz need fi bee aybl fi inkorij dehn bradaz ahn sistaz. Bot sohntaim, di eldaz haftu kongsl dehn bradaz ahn sistaz er eevn karek dehn. Eeda way, dehn mos aalwayz bee kain. If yu jentl, lovin, ahn yu bays yu teechin pahn Gaad Werd, yu wahn bee wahn beta teecha bikaaz yu wahn di fala di bes egzampl, Jeezas.—Mach. 11:​28-30; 2 Tim. 2:24.

 KANTINYU CHRAI HAAD FI KWALIFAI

17. (a) Weh ku help ministeeryal servants fi kantinyu chrai haad fi kwalifai? (b) Weh di eldaz need fi memba wen dehn di taak bowt if dehn wahn rekomen wahn brada fi bee wahn elda? (Koment pahn di baks “ Bee Reeznabl Wen Yu Di Taak Bowt Weda er Nat Wahn Brada Ku Bee Wahn Elda.”)

¹⁷ Wen yu luk pahn aala di kwalitiz weh yu need fi werk pahn fi bee wahn elda, sohntaim yu mait feel laik yu kuda neva kwalifai. Bot memba dat needa Jehoava ner ih aaganaizayshan ekspek yu fi shoa dehndeh kwalitiz eena wahn perfek way. (1 Peet. 2:21) Ahn Jehoava wahn gi yu ih hoali spirit fi help yu shoa dehndeh kwalitiz. (Fil. 2:13) If yu waahn werk pahn wan a dehndeh kwalitiz, pray tu Jehoava bowt it, du risaach pan it, an aks wan a di eldaz fi gi yu sojeshanz how yu ku du beta.

18. Weh goal aal ministeeryal servants shuda gat?

¹⁸ Aala wi, inkloodin bradaz weh don di serv az eldaz, waahn kantinyu fi shoa di kwalitiz weh wi diskos eena dis aatikl. (Fil. 3:16) If yu da wahn ministeeryal servant, mek it yu goal fi du eevn moa fi help yu bradaz ahn sistaz. Aks Jehoava fi chrayn yu ahn fi help yu bee eevn moa yoosful tu hihn ahn tu di kangrigayshan. (Isa. 64:8) Jehoava wahn bles aal weh yu du fi kwalifai fi bee wahn elda.