1. How di apasl Paal mi feel bowt ministeeryal servants?

 MINISTEERYAL servants du veri impoatant werk eena dehn kangrigayshan. Di apasl Paal mi shoa dat ih apreeshiayt di haad werk weh dehndeh faytful bradaz du. Fi egzampl, wen ih mi rait tu di kangrigayshan da Filipai, ih mi greet di ministeeryal servant dehn ahn di eldaz.—Fil. 1:1.

2. How Brada Luis feel fi serv ih bradaz ahn sistaz az wahn ministeeryal servant?

² Noh mata if dehn yong er oal, wahn lata baptaiz bradaz feel hapi wen dehn help dehn kangrigayshan az wahn ministeeryal servant. Fi egzampl, Devan mi 18 yaaz oal wen ih mi geh apointid az wahn ministeeryal servant, ahn Luis mi geh apointid afta ih mi ton 50. Luis mi seh sohnting weh lata bradaz feel. Ih mi seh: “Ah soh hapi fi serv mi bradaz ahn sistaz dis way. Dehn shoa mi soh moch lov, ahn now Ai ku shoa dehn humoch Ah lov dehn!”

3. Weh kweschanz wi wahn diskos eena dis aatikl?

³ If yoo da wahn baptaiz brada ahn yu noh di serv az wahn ministeeryal servant yet, yu tink dat ku bee yu goal? Weh ku help yu fi waahn ga da goal? Ahn weh kwalitiz di Baibl seh wahn ministeeryal servant need fi gat? Dis aatikl wahn help yu fain di ansa fi dehndeh kweschanz. Bot fers, mek wi diskos weh kaina werk wahn ministeeryal servant du.

 WEH AAL WAHN MINISTEERYAL SERVANT DU?

4. Weh aal wahn ministeeryal servant du eena di kangrigayshan? (Koment pahn di picha.)

⁴ Wahn ministeeryal servant da wahn baptaiz brada weh geh apointid bai hoali spirit fi help di eldaz du impoatant werk eena di kangrigayshan. Sohn ministeeryal servant ga di rispansabiliti fi mek shoar di poblishaz ga inof teritori ahn lichricha fi di minischri. Adaz help fi kleen ahn du mantaynans da di Kingdom Haal. Ada ministeeryal servants serv az atendant ahn help ron di aadyo-veedyo sistem joorin di meetin dehn. Yes, dehn ga lata werk fi du eena di kangrigayshan. Bot di moas impoatant ting da dat dehn lov Jehoava ahn dehn liv eena wahn way weh mek hihn hapi. Dehn aalso reeli lov dehn bradaz ahn sistaz. (Mach. 22:​37-39) Soh weh wahn baptaiz brada need fi du fi serv az wahn ministeeryal servant?

5. Weh wahn brada need fi du fi kwalifai fi bee wahn ministeeryal servant?

⁵ Di Baibl tel wi weh kwalitiz wahn brada need fi help ahn kwalifai az wahn ministeeryal servant. (1 Tim. 3:​8-10, 12, 13) If yoo waahn help adaz er help owt az wahn ministeeryal servant, laan az moch az yu kud bowt weh kaina kwalitiz wahn ministeeryal servant need fi ga, ahn chrai liv op tu dehndeh kwalitiz. Bot fers, yu need fi tink bowt wai yu waahn bee wahn ministeeryal servant.

WAI YU WAAHN BEE WAHN MINISTEERYAL SERVANT?

6. Weh shuda bee di reezn wai yu waahn serv yu bradaz ahn sistaz? (Machyu 20:28; koment pahn di picha.)

⁶ Tink bowt Jeezas. Evriting weh hihn mi du da bikaaz ih lov Jehoava an ih lov peepl. Da lov moov ahn fi werk haad fi adaz, an eevn du werk weh adaz luk dong pan. Hihn set di bes egzampl fi wi. (Reed Machyu 20:28; Jan 13:​5, 14, 15) Soh if yoo ga da saym kaina lov, Jehoava wahn bles yu an ih wahn help yu fi kwalifai fi bee wahn ministeeryal servant.—1 Kor. 16:14; 1 Peet. 5:5.

7. Wai wahn brada noh fi du tingz owta praid?

⁷ Eena di werl, peepl wuda luk op tu sohnbadi weh ak laik dehn impoatant.  Bot Jehoava peepl noh goh aan soh. If wahn brada du tingz owta lov, jos laik Jeezas, ih noh wahn rool oava adaz er mek dehn si ahn az impoatant. If sohnbadi laik dat doo geh apointid eena di kangrigayshan, ih mait noh waahn du werk weh adaz luk dong pan, eevn doa dehndeh kaina werk nesiseri. Ih mait tink ih tu impoatant fi du dehndeh kaina werk. (Jan 10:12) Jehoava noh wahn bles enibadi weh du tingz owta praid er bikaaz dehn waahn peepl prayz dehn.—1 Kor. 10:​24, 33; 13:​4, 5.

8. Weh kongsl Jeezas mi giv ih apasl dehn?

⁸ Sohntaim, Jeezas kloas fren dehn mi waahn geh wahn sertn asainment, bot dehn mi waahnt it fi di rang reezn. Fi egzampl, wahn taim Jaymz ahn Jan mi aks Jeezas fi wahn impoatant pozishan eena ih Kingdom. Jeezas mi tel dehn dat dat mi rang, an ih mi tel aala di apasl dehn: “Hooeva waahn bee grayt monks unu fi serv adaz, ahn hooeva waahn bee fers monks unu, mek ih bee wahn slayv tu evribadi.” (Maak 10:​35-37, 43, 44) Bradaz weh waahn kwalifai fi bee wahn ministeeryal servant shuda du it bikaaz dehn waahn serv adaz. Wen dehn du dat, dat wahn bee wahn blesin fi di kangrigayshan.—1 Tes. 2:8.

WEH KU HELP YU WAAHN SERV YU BRADAZ AHN SISTAZ?

9. Weh ku help yu waahn serv adaz?

⁹ Wi noa yu lov Jehoava ahn yu waahn serv adaz. Bot fi bee wahn ministeeryal servant da ekschra werk, ahn sohntaim yu mait noh waahn du di ekschra werk. Weh ku help yu waahn serv yu bradaz ahn sistaz? Wel, wan ting weh ku help da fi tink bowt how hapi yu wahn feel wen yu serv yu bradaz ahn sistaz. Jeezas mi seh: “Wi feel moa hapinis wen wi giv tu adaz dan wen wi get tingz fahn ada peepl.” (Aks 20:35) Jeezas neva jos seh dat; ih mi du it, tu. Hihn mi reeli hapi di serv adaz, ahn yoo ku bee hapi tu.

10. How Jeezas mi shoa dat ih hapi fi serv adaz?

¹⁰ Mek wi luk pahn wahn egzampl a how Jeezas mi shoa dat ih hapi fi serv adaz. (Reed Maak 6:​31-34, 35.) Wahn taim, Jeezas an ih apasl dehn mi-di luk fi wahn kwaiyet plays fi geh sohn res bikaaz dehn mi taiyad. Bot wahn krowd a peepl mi get deh bifoa dehn bikaaz dehn mi waahn Jeezas teech dehn. Jeezas kuda mi tel dehn no, bikaaz hihn an ih apasl dehn “neva ga no taim fi res, noh eevn fi eet wahn meel.” Er Jeezas kuda mi teech dehn wan er too tingz ahn sen dehn hoam. Bot bikaaz ih mi lov peepl, ih mi “staat teech dehn wahn lata tingz.” An ih kantinyu teech dehn til “ih don layt aredi.” (Maak 6:​31-34, 35) Jeezas neva du dis bikaaz ih mi haftu; ih mi du it bikaaz “ih haat gaan owt tu dehn.” Hihn mi waahn teech dehn, bikaaz ih mi lov dehn. Jeezas mi onli hapi fi serv ada peepl.

11. Wat da sohn ada wayz how Jeezas mi help peepl? (Koment pahn di picha.)

¹¹ Jeezas mi du moa dan jos teech peepl bowt Gaad, ih mi help dehn eena ada wayz tu. Fi egzampl, ih provaid food fi dehn an ih mek ih disaipl dehn shayr it owt monks di peepl. (Maak 6:41) Wen hihn du dat, ih mi-di teech ih disaipl dehn how fi serv adaz. Ih mi-di shoa dehn dat dehndeh kaina werk impoatant. Ahn nowadayz, ministeeryal servants du dehndeh saym kaina werk, ahn fi dehn werk impoatant tu. Imajin  how hapi di apasl dehn mi feel fi help Jeezas shayr owt di food soh dat “aala dehn eet til dehn mi geh satisfai”! (Maak 6:42) Dis da jos wan egzampl weh shoa how Jeezas tek kayr a ada peepl fers. Hihn yoostu aalwayz serv peepl wen ih mi deh pahn ert. (Mach. 4:23; 8:16) Jeezas mi hapi fi teech peepl ahn fi tek kayr a dehn needz. Yoo wahn bee hapi tu if yu wilin fi serv adaz az wahn ministeeryal servant.

12. Wai wi shudn feel laik wi kyaahn help di kangrigayshan?

¹² If yu noh ga speshal skilz, noh beet op. Yu praabli stil ga kwalitiz weh yu ku yooz fi help di kangrigayshan. Sohnting weh ku help yu da fi reed weh Paal seh da 1 Korintyanz 12:​12-30. Pray bowt di mata. Paal mek it klyaa dat eech persn da wahn impoatant paat a di kangrigayshan. Soh noh feel no way if yu noh kwalifai rait now. Insted, du weh yu kud fi serv Jehoava ahn help yu bradaz ahn sistaz. Yu ku bee shoar dat di eldaz wahn tink bowt yu ahn gi yu asainments weh yu ku handl bifoa yu geh fi bee wahn ministeeryal servant.—Roam. 12:​4-8.

13. Weh wi fi memba bowt di kwalitiz weh wahn brada need fi bee wahn ministeeryal servant?

¹³ Tink bowt wan moa reezn wai yu shuda waahn serv az wahn ministeeryal servant. Moas a di kwalitiz di Baibl seh wahn ministeeryal servant fi ga da kwalitiz weh evri Kristyan shuda gat. Aal Kristyanz shuda jraa kloas tu Jehoava, bee hapi fi giv tu adaz, ahn liv eena wahn way weh pleez Gaad. Soh yu praabli don ga moas a di kwalitiz weh wahn ministeeryal servant sopoas tu gat. Bot weh spesifik tingz wahn brada need fi werk pan fi kwalifai fi bee wahn ministeeryal servant?

WEH YU NEED FI DU FI BEE WAHN MINISTEERYAL SERVANT?

14. Weh ih meenz fi bee seeryos? (1 Timoti 3:​8-10, 12)

¹⁴ Mek wi si som a di kwalifikayshanz eena 1 Timoti 3:​8-10, 12. (Reed.) Wahn ministeeryal servant fi bee seeryos. Wahn nada way fi seh dat wuda bee “rispansabl,” er “rispektabl.” Dat noh meenz yu kyaahn laaf er ga fon. (Ikl. 3:​1, 4) Bot ih meen dat yu haftu tek evri asainment seeryos ahn werk haad fi du  it. If di bradaz noa dat dehn ku pen pahn yu, den dehn wahn rispek yu.

15. Weh ih meenz fi noh bee too-fays ner greedi fi moni er mateeryal tingz?

¹⁵ Wahn ministeeryal servant noh fi bee too-fays. Dat meenz ih fi bee aanis. Ih fi du weh ih seh ih wahn du, an ih noh tel lai. (Prav. 3:32) Wahn ministeeryal servant noh fi bee greedi fi moni er mateeryal tingz. Dat meenz dat ih aanis wen ih du bizniz wid peepl an eena di way ih handl moni. Ih wuda neva tek advantij a di bradaz fi mek moni.

16. (a) Weh ih meenz fi noh jrink tu moch wain? (b) Weh ih meenz fi ga wahn kleen kanshans?

¹⁶ Wahn ministeeryal servant noh fi jrink tu moch wain. Dat meenz dat dehn noh fi jrink tu moch a eniting weh ga alkahol. Ih noh eevn waahn peepl tink ih jrink tu moch. Wahn ministeeryal servant fi ga wahn kleen kanshans. Dat meenz dat ih fi liv eena wahn way weh pleez Jehoava. Eevn doa ih noh perfek, ih ku ga wahn gud rilayshanship wid Jehoava, ahn dat wahn giv ahn pees.

17. Weh ih meenz fi tes dehn fi si if dehn kwalifai? (1 Timoti 3:10; koment pahn di picha.)

¹⁷ Den Paal seh fi tes dehn fi si if dehn kwalifai. Dat meenz yu haftu shoa dat yu rispansabl. Dat da wai wen di eldaz gi yu wahn asainment, mek shoar yu fala di inschrokshanz weh dehn gi yu ahn di dairekshan weh yu geh fahn di aaganaizayshan. Mek shoar yu andastan egzakli weh yu haftu du ahn wen yu fi finish it. Wen yu shoa yuself wilin ahn werk haad pahn yu asainments, di bradaz wahn si dat yu di laan fi bee wahn rispansabl brada. Eldaz, mek shoar fi chrayn baptaiz bradaz. (Reed 1 Timoti 3:10.) Unu ga baptaiz bradaz eena unu kangrigayshan weh bowt 10 tu 14 yaaz oal? Dehn ga wahn gud persnal stodi skejul ahn dehn pripyaa gud fi di meetin dehn? Dehn tek paat eena di meetin dehn an eena di minischri? Den gi dehn sohn asainment weh dehn ku handl. Da way deh, yu wahn si if dehn kwalifai. Den bai di taim dehn bowt 17 tu 19 yaaz oal, dehn ku kwalifai fi bee wahn ministeeryal servant.

18. Weh Paal mi meen wen ih seh dat nobadi kyaahn fain faalt wid dehn?

¹⁸ Paal mi seh dat nobadi kyaahn fain faalt wid dehn. Dat meenz dat nobadi  shuda ga gud reezn fi akyooz yu dat yu komit wahn seeryos sin. Sohntaim, sohnbadi mait akyooz yu ahn seh yu du sohnting weh yu neva du. Dat mi hapm tu Jeezas, an ih mi prafesai dat ih mi wahn hapm tu ih falowaz tu. (Jan 15:20) Bot if yu kip di du weh rait, jos laik Jeezas, yu wahn ga wahn gud naym eena di kangrigayshan.—Mach. 11:19.

19. Weh Paal mi meen wen ih seh wahn ministeeryal servant onli fi ga wan waif?

¹⁹ Wahn ministeeryal servant onli fi ga wan waif. If yu marid, yu haftu fala di standad weh Jehoava set. Di standad fi marij weh Jehoava set fahn di biginin da wan man ahn wan wuman. Da standad da fi aal Kristyanz. (Mach. 19:​3-9) Wahn Kristyan man shuda neva komit sekshwal imoraliti. (Heeb. 13:4) Dat meenz ih aalwayz laayal tu ih waif, soh ih wuda neva shoa romantik inchres fi wahn neks laydi.—Joab 31:1.

20. How wahn man ku mek shoar evriting goh gud eena ih hows?

²⁰ Wahn ministeeryal servant fi tek di leed ahn mek shoar dat ih chiljren bihayv gud, ahn dat evriting goh gud eena ih hows. If yu ga wahn famili, yoo da di hed ahn yu haftu tek yu rispansabiliti seeryos. Yu haftu du famili wership evri week. Yu haftu werk wid eech persn eena yu famili eena di minischri az aafn az yu kud. Yu haftu help yu chiljren fi jraa kloas tu Jehoava ahn bee ih fren. (Ifee. 6:4) If wahn man ku tek gud kayr a ih famili, den ih shoa dat ih ku tek gud kayr a di kangrigayshan tu.—Kompyaa 1 Tim. 3:5.

21. Weh yu ku du if yu noh di serv az wahn ministeeryal servant?

²¹ Bradaz, if yu da noh wahn ministeeryal servant yet, pleez pray bowt di mata ahn stodi dis aatikl. Stodi weh di skripchaz seh bowt ministeeryal servants ahn werk haad fi kwalifai. Tink bowt humoch yu lov Jehoava ahn yu bradaz ahn sistaz. Laan fi lov yu bradaz ahn sistaz eevn moa ahn tink bowt wai yu waahn serv dehn. (1 Peet. 4:​8, 10) Werk haad fi bee wahn ministeeryal servant ahn yu wahn bee hapi fi serv yu bradaz ahn sistaz eena di kangrigayshan. Wi hoap Jehoava bles yu az yu chrai haad fi kwalifai fi bee wahn ministeeryal servant.—Fil. 2:13.