1. How Gaad peepl shoa dehn lov fi wan anada?

GAAD peepl aal oava di werl da paat a wahn big spirichwal famili. Dehn lov wan anada laik breda ahn sista. (1 Jan 4:16, 21) Sohntaim dehn mait mek sohn big sakrifais fi wan anada, bot moas a di taim dehn shoa da lov eena lata lee wayz. Fi egzampl, dehn mait seh er du sohnting nais fi dehn bradaz. Wen wi shoa kansidarayshan fi wan anada, wi shoa dat wi di ‘chrai fi bee laik Gaad, bikaaz wi da fi hihn pikni.ʼ—Ifee. 5:1.

2. How Jeezas mi shoa lov laik ih Faada?

² Jeezas mi fala Gaad egzampl kloas-wan an ih aalwayz mi chreet peepl kain. Hihn mi seh: “Aala unu weh taiyad a kehr unu hevi load, kohn da mee an Ah wahn mek unu res.” (Mach. 11:28, 29) Wen wee fala Krais egzampl ahn “shoa kansidarayshan tu di poa persn,” wi Faada eena hevn wahn pleez wid wi ahn wi wahn bee hapi. (Ps. 41:1) Mek wi si how wi ku  shoa kansidarayshan fi adaz eena wi famili, di kangrigayshan, ahn di minischri.

3. How wahn hozban ku shoa kansidarayshan fi ih waif? (Koment pahn di picha da di biginin a dis aatikl.)

³ Wahn hozban haftu set wahn gud egzampl ahn shoa humoch ih kay fi ih famili. (Ifee. 5:25; 6:4) Fi egzampl, di Baibl seh dat ih haftu aana ih waif ahn chreet ahn wid rispek. (1 Peet. 3:7) Wahn hozban haftu andastan dat eevn doa ih waif mait bee veri difrent fahn hihn, dat noh meenz dat hihn beta dan shee. (Gen. 2:18) If hihn wahn aana ih waif, ih wahn shoa kansidarayshan fi how shee feel. Wahn waif fahn Canada mi seh dis bowt ih hozban: “Hihn noh luk dong pahn mi bikaaz a di way how Ah feel, er seh: ‘Yu shudn feel da way.ʼ Insteda dat, hihn wilin fi lisn tu mi. Wen ih help mi fi karek di way Ah tink, ih du it eena wahn kain way.”

4. How wahn hozban ku shoa kansidarayshan fi ih waif feelinz bai di way ih chreet ada uman?

⁴ Wahn hozban weh ga andastandin wahn tink bowt how ih waif feel. Soh ih wuda neva flert wid ada uman er gi dehn atenshan weh onli bilangz tu ih waif. Ih noh mata if da fays tu fays, pahn soashal meedya, er pahn di Intanet. (Job 31:1) Ih wuda stay laayal tu ih waif, noh jos bikaaz ih lov ahn, bot aalso bikaaz ih lov Jehoava an ih hayt weh bad.—Reed Psalm 19:14; * 97:10. *

5. How wahn waif ku shoa kansidarayshan fi ih hozban?

⁵ Wen wahn hozban fala di egzampl a Jeezas Krais, ih wahn bee eeziya fi mek ih waif ga deep rispek far ahn. (Ifee. 5:22-25, 33) Wen wahn waif rispek ih hozban, ih wahn chrai fi andastan ih feelinz ahn chreet ahn kain wen hihn di deel wid kangrigayshan mataz er wen ih di deel wid prablemz. Wahn hozban fahn Britain seh: “Sohntaim mai waif si wahn chaynj eena mi bihayvya an ih noa sohnting di bada mi. Den ih wuda aplai di prinsipl da Proverbs 20:5, eevn wen dat meen dat ih wuda haftu wayt fi di rait taim fi ‘jraa owtʼ weh deh pahn mi main if da sohnting weh Ah kuda diskos wid ahn.”

6. How aala wi ku inkorij chiljren fi tink bowt adaz ahn bee kain, ahn how dat wahn help dehn?

⁶ Wen payrents kain tu wan anada ahn chreet wan anada wid rispek, dehn set wahn gud egzampl fi dehn chiljren. Bot dehn need fi teech dehn chiljren fi bee kain ahn kansidarayt wid ada peepl tu. Fi egzampl, payrents ku teech dehn chiljren noh fi ron eena di Kingdom Haal. Er wen dehn deh da wahn get-tugeda, dehn ku teech dehn fi wayt mek di oalda bradaz ahn sistaz geh dehn food fos. Af koars, evribadi eena di kangrigayshan ku sopoat di payrents. Soh wi shuda komen wahn pikni wen ih du sohnting nais, laik if ih oapm di doa fi wi. Dat wahn mek ih feel gud bowt ihself, an ih wahn laan dat “Gaad bles yu moa wen yu gi dahn wen yu get.”—Aks 20:35.

7. How Jeezas mi shoa kansidarayshan fi wahn def man, ahn weh lesn dat teech wi?

⁷ Wan taim, wen Jeezas mi deh eena di ayrya weh nayhn Dekapolis, di peepl  dehn mi “bring wahn def man tu ahn weh kudn taak gud.” (Maak 7:31-35) Insteda heel ahn rait deh pahn di spat, Jeezas mi “kehr di man wahn lee wayz fahn di krowd.” Wai? Maybi di man neva komfatabl wid di krowd a peepl weh mi dehdeh. Soh Jeezas mi shoa kansidarayshan fi di man ahn kehr ahn wan said fi heel ahn. Af koars, wee kyaahn du miraklz. Bot wi ku stil bee kain tu wi bradaz ahn sistaz ahn tink bowt how dehn feel ahn weh dehn need. Di apasl Paal mi rait: “Mek wi inkorij wan anada fi shoa lov ahn du gud.” (Heeb. 10:24) Jeezas mi andastan how di def man mi feel an ih mi kain tu ahn. Dat da wahn veri gud egzampl fi wee, noh chroo?

8, 9. How wi ku shoa dat wi kay bowt di oalda wanz ahn dehn wan weh ga helt prablemz? Yooz di egzampl dehn fahn di paragraaf.

⁸ Shoa kansidarayshan fi di oalda wanz ahn dehn wan wid helt prablemz. Lov da weh aidentifai di Kristyan kangrigayshan. Evriting els tek sekant plays. (Jan 13:34, 35) Lov moov wi fi du aal weh wi kud fi help wi bradaz ahn sistaz weh oalda er ga helt prablemz fi reech di meetin dehn ahn fi goh pahn feel servis. (Mach. 13:23) Michael, wahn brada weh onli ku get rong eena weelchyaa, reeli apreeshiayt di help weh ih get fahn ih famili ahn fahn di bradaz eena di kangrigayshan. Hihn seh: “Bikaaz a aala di help weh dehn gi mi, Ah ku mek it da moas a di meetin dehn an Ah ku tek paat eena di minischri. Ah reeli laik di poblik witnisin.”

⁹ Lata Betel hoam ga faytful bradaz ahn sistaz weh oalda ahn ga seeryos helt prablemz. Bill, wahn brada weh 86 yaaz oal, preech bai leta tu peepl weh liv eena sohn plays weh haad fi reech wid di gud nyooz. Hihn seh: “Wee apreeshiayt di privilij fi rait letaz.” Nancy, wahn sista weh nayli 90, seh: “Ai noh luk pahn leta raitin laik if ih noh impoatant. Dis da feel servis. Peepl need fi noa di chroot!” Ethel, wahn sista weh baan eena 1921, seh: “Payn da paat a mi laif. Som dayz ih haad eevn jos fi put aan mi kloaz.” Stilyet, shee injai di preech tu peepl oava di foan, an ih ga sohn gud ritern vizit. Barbara, wahn sista weh 85 yaaz oal, seh: “Bikaaz a mi helt, ih reeli haad fi mek Ah goh owt pahn feel servis regyula. Bot Ah ku stil preech tu peepl oava di foan. Tank yu, Jehoava!” Eena les dan wahn yaa, wahn groop a preshos oalda bradaz ahn sistaz mi spen 1,228 owaz eena di minischri, rait 6,265 letaz, mek moa dan 2,000 foan kaal, ahn giv owt 6,315 poblikayshan! Fi shoar aala dehn werk mi mek Jehoava hapi!—Prov. 27:11.

10. How wi ku help wi bradaz ahn sistaz fi geh di moas owta di meetin dehn?

¹⁰ Shoa kansidarayshan da wi Kristyan meetin dehn. Wen wi kansidarayt a wi bradaz ahn sistaz, wi ku help dehn get moa owta di meetinz. Wan way fi du dat da fi reech da di meetin pahn taim soh wi noh dischrak nobadi. Da chroo sohntaim tingz kom op weh mek wi reech layt. Bot if dat da wi habit, wi haftu stap ahn tink weh chaynjiz wi need fi mek soh wi ku shoa wi bradaz dat wi kay bowt dehn. Memba tu, da Jehoava ahn Jeezas mi invait wi tu di meetin dehn. (Mach. 18:20) Dehn dizerv wi rispek fi chroo!

11. Wai dehn wan weh ga paat pahn di meetin shuda aplai di prinsipl eena 1 Korintyanz 14:40?

¹¹ If wi kansidarayt a wi bradaz wi wahn “du evriting eena aada, ahn eena wahn deesent way.” (1 Kor. 14:40) Bradaz hoo ga paat pahn di meetin fala dis  prinsipl wen dehn finish dehn paat pahn taim. Dat shoa kansidarayshan fi di brada weh ga di neks paat ahn fi di hoal kangrigayshan. Tink bowt weh ku hapm if di meetin goh oavataim. Som a wi bradaz haftu chravl faar fi goh bak hoam. Dehn mait haftu kech bos er sohn ada kaina raid. Som a dehn marid tu sohnbadi hoo noh di serv Jehoava ahn dehn haftu reech hoam pahn taim.

12. Wai eldaz hoo di werk haad dizerv “lata rispek ahn lov”? (Si di baks “ Shoa Kansidarayshan fi di Bradaz Weh Di Tek di Leed.”)

¹² Eldaz werk haad eena di kangrigayshan ahn eena di minischri, soh dehn dizerv wi lov ahn rispek. (Reed 1 Tesaloanyanz 5:12, 13.) Yoo apreeshiayt aala di werk weh dehn di du? Wel, yu ku shoa yu apreeshiayshan wen yu wilin fi fala dehn dairekshan ahn sopoat dehn eena dehn werk. Memba, “da dehn di wach oava unu soal, ahn dehn haftu ansa tu Gaad.”—Heeb. 13:7, 17.

13. Weh wi ku laan fahn di way Jeezas mi chreet peepl?

¹³ Aizaiya mi prafesai bowt Jeezas: “Hihn noh wahn step pahn peepl weh week, er goh wid dehn laas lee hoap.” (Isa. 42:3) Bikaaz Jeezas mi lov peepl, ih mi feel fi dehn. Hihn mi andastan how dehn feel wen dehn mi week er diskorij, an hihn mi kain ahn payshent wid dehn. Eevn pikni mi laik deh rong ahn. (Maak 10:14) Af koars, wee kyaahn andastan peepl er teech dehn sayhn laik Jeezas! Bot wi ku stil shoa kansidarayshan fi di peepl eena wi teritori eena chree wayz:  di way wi taak tu dehn, di taim wi taak tu dehn, ahn how lang wi taak tu dehn.

14. Wai wi haftu bee kyaaful how wi taak tu peepl?

¹⁴ How wi shuda taak tu peepl? Milyanz a peepl tudeh ‘kanfyooz ahn noh ga nobadi fi help dehn.ʼ Di peepl hoo sopoas tu tek di leed—di rilijos leedaz, di biznizman dehn, ahn di palitishan dehn—onli chreet dehn bad. (Mach. 9:36) Sayka dat, peepl tudeh noh chros nobadi ahn dehn noh ga no hoap. Dat da wai ih soh impoatant dat wi bee kyaaful how wi taak tu dehn! Di way wi taak ahn di werdz weh wi chooz shuda shoa kainis ahn kansidarayshan. Lata peepl lisn tu wi, noh jos bikaaz wi noa how fi yooz di Baibl, bot bikaaz wi reeli inchrestid eena dehn ahn wi rispek dehn.

15. Wat da sohn wayz wi ku shoa kansidarayshan fi di peepl eena wi teritori?

¹⁵ Lata wayz deh fi shoa kansidarayshan fi di peepl eena wi teritori. Fi egzampl, wi yooz wahn lata kweschanz eena wi teechin. Bot wi shuda mek shoar di kweschan dehn weh wi yooz shoa rispek ahn kainis. Wahn painyaa hoo mi ga wahn teritori weh inklood peepl weh shai ahn laik kip tu dehnself mi laan noh fi aks kweschanz weh mait shaym dehn. Fi egzampl, ih wudn aks kweschanz laik, ‘Yoo noa Gaad naym?ʼ er, ‘Yoo noa wat da Gaad Kingdom?ʼ Insteda dat, ih wuda seh sohnting laik, “Ai mi laan fahn di Baibl dat Gaad ga wahn persnal naym. Ai ku shoa yu how ih naym?” Af koars, dehn ga lata difrent peepl ahn kolcha rong di werl, soh weh werk da wan plays noh aalwayz wahn werk sohnweh els. Bot, wi shuda aalwayz bee kansidarayt ahn shoa rispek, ahn fi du dis wi haftu geh fi noa di peepl eena wi teritori.

16, 17. How wi ku bee kansidarayt wen wi disaid (a) weh taim wi vizit peepl? (b) how lang wi wahn taak tu dehn?

¹⁶ Wen wi shuda vizit wi nayba dehn? Wen wi goh taak tu peepl da dehn hows, wi haftu memba dat dehn neva invait wi. Soh ih veri impoatant dat wi pik di rait taim fi vizit dehn, wen dehn wahn bee moa wilin fi taak! (Mach. 7:12) Fi egzampl, peepl eena fi yoo teritori laik sleep layt pahn di weeken? If dat da di kays, maybi yu ku staat owt di du schreet werk er poblik witnisin pahn dehn dayz. Er yu ku du sohn ritern vizit pahn peepl yu noa wuda bee avaylabl.

¹⁷ How lang wi shuda stay? Peepl bizi nowadayz, soh ih wuda bee gud fi kip yu vizit shaat, espeshali wen yu jos di staat vizit sohnbadi. Ih beta fi mek wahn kwik lee vizit dan fi stay tu lang. (1 Kor. 9:20-23) Wen peepl si dat wi andastan dehn bizi, dehn wahn bee moa wilin fi taak wid wi di neks taim. If wi shoa di kwalitiz weh kohn fahn di hoali spirit, den wi wahn bee “paadna weh di werk tugeda” wid Gaad. Den Jehoava mait eevn yooz wee fi jraa sohnbadi tu di chroot.—1 Kor. 3:6, 7, 9.

18. Wen wi shoa kansidarayshan fi adaz, weh blesinz wi ku hoap fa?

¹⁸ Soh mek wi werk haad fi shoa kansidarayshan fi adaz eena wi famili, di kangrigayshan, ahn di minischri. Wen wi du dat, wi wahn geh lata blesinz, now an eena di fyoocha. Psalm 41:1, 2 seh: “Enibadi hoo shoa kansidarayshan tu di poa persn wahn bee hapi; Jehoava wahn sayv ahn eena di day a dizaasta. . . . Aal oava di ert peepl wahn seh hihn hapi.”