Jehoava Powaful Bot Stilyet Kansidarayt
“[Jehoava] noa gud how wee geh mek, ih memba dat wee da dos.”—PS. 103:14.
1, 2. (a) How Jehoava difrent fahn peepl weh ga powa eena di werl tudeh? (b) Weh wi wahn kansida eena dis aatikl?
LATA taim, peepl weh powaful an impoatant ‘rool oava adaz stif-wan.ʼ (Mach. 20:25; Eccl. 8:9) Bot Jehoava neva eva du dat! Hihn da di Almaiti, di moas powaful Persn eena di yoonivers. Bot stilyet, hihn shoa kansidarayshan tu hyoomanz eevn doa dehn noh perfek. Ih chreet wi kain an ih kay bowt how wi feel ahn weh wi need. “Ih memba dat wee da dos,” an ih neva aks wi fi moa dan weh wi ku giv.—Ps. 103:13, 14.
2 Di Baibl gat een lata egzampl weh shoa wi how Jehoava kansidarayt tuwaadz ih servant dehn. Mek wi luk pahn jos chree a dehn. Fos, di way how Jehoava mi shoa dat ih mi andastan Samwel sichuwayshan wen ih mi giv ahn wahn mesij a jojment fi di Hai Prees Eelai. Sekant, di way how ih mi payshent wid Moaziz wen ih mi sen ahn fi leed di Izrelait dehn, eevn doa Moaziz neva waahn aksep di asainment. Ahn terd, di way Jehoava mi shoa kansidarayshan fi di Izrelait dehn wen ih mi-di leed dehn owta Eejip. Az wi meditayt pahn dehnya egzampl, wi wahn si weh lesn wi ku laan fahn Jehoava ahn how wi ku yooz dehn eena wi laif.
KANDSIDARAYT TU WAHN LEE BWAI
3. Weh mi hapm tu Samwel wan nait wen ih mi gaahn sleep, ahn weh kweschan dis bring op? (Koment pahn di picha da di biginin a dis aatikl.)
3 Samwel mi staat “serv Jehoava” da di tabernakl fahn wen ih da-mi jos wahn lee bwai. (1 Sam. 3:1) Wan nait afta Samwel gaan da bed, sohnting veri schraynj mi hapm. * (1 Samuel 3:2-10) Ih mi hyaa wahn vais di kaal owt ih naym. Hihn mi tink dat da mi di vais a di Hai Prees Eelai, soh ih mi hori ron gaahn ansa ahn seh: “Yu mi-di hayl mi, si mi ya.” Eelai mi tel ahn dat da neva hihn hayl ahn. Wen di sayhn ting mi hapm too moa taim, Eelai mi kech aan dat da Gaad mi-di hayl Samwel. Soh ih mi tel di lee bwai how fi ansa di neks taim ih hapm, ahn Samwel mi obay. Wai Jehoava neva mi tel Samwel rait fahn di staat dat da hihn mi-di hayl ahn? Di Baibl noh tel wi. Bot ih ku bee dat Jehoava mi-di shoa wahn lee ekschra kansidarayshan fi Samwel feelinz. Eena weh way?
4, 5. (a) How Samwel mi rispan tu di asainment weh Gaad mi giv ahn, ahn weh mi hapm di neks maanin? (b) Weh dis akonk teech wi bowt Jehoava?
4 Reed 1 Samuel 3:11-18. * Jehoava laa mi koman pikni fi shoa rispek fi oalda peepl, espeshali dehn wan weh mi-di tek di leed. (Ex. 22:28; Lev. 19:32) Yoo ku imajin Samwel di goh tu Eelai di maanin ahn tel ahn playn ahn schrayt weh Gaad mi seh? Af koars nat! Di Baibl eevn seh dat “Samwel mi frayd fi tel Eelai bowt di vizhan.” Bot Gaad mi mek it klyaa tu Eelai dat da hihn mi-di taak tu Samwel. Bikaaz a dat, Eelai mi tek chaaj a di sichuwayshan ahn tel Samwel fi taak op. Eelai mi koman ahn noh fi haid nat wahn werd a Gaad mesij fan ahn. Samwel mi obeedyant an ih mi “tel ahn evriting.”
5 Di mesij da neva notn nyoo tu Eelai kaaz hihn mi don geh wahn simila mesij fahn wahn “man a Gaad” bifoa. (1 Sam. 2:27-36) Dis akonk teech wi how waiz ahn kansidarayt Jehoava.
6. Wat da sohn lesn weh wi ku laan fahn how Gaad mi help Samwel?
6 If yoo da wahn yong persn, dis akonk shoa dat Jehoava andastan how yu feel ahn di prablem dehn weh yu haftu deel wid. Maybi yu shai an ih noh eezi fi preech tu peepl er fi bee difrent fan ada peepl rong fi yoo ayj. Yu ku bee shoar dat Jehoava waahn help yu. Soh poar owt yu haat wen yu pray tu ahn. (Ps. 62:8) Meditayt pahn di gud egzampl dehn a yong peepl laik Samwel. Ahn taak wid ada Kristyanz weh mi get chroo som a di sayhn prablemz weh yoo haftu deel wid. Dehn ku tel yu bowt how Jehoava mi help dehn, maybi eevn eena wayz weh dehn neva mi ekspek.
KANSIDARAYSHAN FI MOAZIZ
7, 8. How Jehoava mi shoa ekschra kansidarayshan fi Moaziz?
7 Wen Moaziz mi 80 yaaz oal, Jehoava mi giv ahn wahn asainment weh neva eezi ataal. Moaziz mi fi free di Izrelait dehn fahn slayvri da Eejip. (Ex. 3:10) Dis da-mi praabli di laas ting weh Moaziz mi ekspek, kaa hihn mi deh da Midiyan fi 40 yaaz di main sheep. Hihn mi aks Jehoava: “Da hoo mee fi goh da Fayro fi bring owt di Izrelait dehn fahn Eejip?” Gaad mi pramis Moaziz: “Ai wahn deh wid yu.” (Ex. 3:11, 12) Den, ih mi pramis ahn dat di eldaz a Izrel wuda mi lisn tu ahn tu. Stilyet, Moaziz mi aks ahn: “Sopoaz dehn . . . noh lisn?” (Ex. 3:18; 4:1) Imajin, Moaziz mi kweschan Gaad laik if hihn neva noa weh ih mi-di du! Bot Jehoava mi kantinyu fi shoa payshens. Ih mi moa dan payshent, kaa ih mi gi Moaziz di powa fi du miraklz. Moaziz da-mi di fos hyooman weh wi noa bowt weh mi ga da kaina powa.—Ex. 4:2-9, 21.
8 Moaziz mi stil chrai mek ekskyoos fi ihself, di seh dat ih kudn taak gud. Soh Gaad tel ahn: “Ai wahn deh wid yu wail yu taak, an Ah wahn teech yu weh yu shuda seh.” Wid aala dat, yu tink Moaziz mi wilin fi tek aan di asainment? Ih noh luk soh, bikaaz ih mi aks Gaad fi pleez sen sohnbadi els. Dat da wen Jehoava mi geh beks. Bot ih mi stil kay bowt how Moaziz mi feel, soh ih mi sen Ayron fi taak far ahn insted.—Ex. 4:10-16.
9. How Jehoava payshens ahn kansidarayshan mi help Moaziz wid ih asainment?
9 Weh dis akonk teech wi bowt Jehoava? Bikaaz Jehoava da di Almaiti, hihn kuda mi yooz ih powa fi fraitn Moaziz ahn foas ahn fi obay. Bot insteda dat, Jehoava mi payshent ahn kain, an ih mi pramis ih hombl servant dat ih wuda deh wid ahn. Dat reeli mi help Moaziz. Hihn en op di bee wan a di bes leeda di Izrelait dehn mi eva gat! Hihn mi chrai fi chreet di peepl kain ahn shoa kansidarayshan, jos laik how Jehoava mi chreet hihn.—Num. 12:3.
Yoo fala Jehoava egzampl wen yu di deel wid adaz? (Paragraaf 10)
10. Wen wee chrai fi bee kain ahn shoa kansidarayshan laik Jehoava, how wi benifit?
10 Wat da sohn lesn wi ku laan fahn Jehoava egzampl? If yoo da wahn hozban, wahn payrent, er wahn elda, yu ga wahn sertn amonk a atariti oava adaz. Bikaaz a dat, ih veri impoatant dat yu fala Jehoava egzampl ahn bee kain, kansidarayt, ahn payshent wid yu waif, yu pikni, ahn yu bradaz ahn sistaz eena di kangrigayshan! (Kol. 3:19-21; 1 Peet. 5:1-3) If yoo fala di egzampl a Jehoava ahn Jeezas Krais, di Grayta Moaziz, yu wahn mek it eeziya fi adaz kohn taak tu yu, ahn soh yu wahn ku gi dehn di inkorijment weh dehn need. (Mach. 11:28, 29) Pahn tap a dat, yu wahn bee wahn gud egzampl fi dehn fala.—Heeb. 13:7.
WAHN POWAFUL BOT KANSIDARAYT SAYVYA
11, 12. How Jehoava mi mek di Izrelait dehn feel sayf ahn sikyoar wen ih mi leed dehn owta Eejip?
11 Ih kuda mi bee dat moa dan chree milyan Izrelait mi lef Eejip eena 1513 B.C.E. Monks di krowd som peepl mi yong ahn som mi oal, ahn praabli som mi sik er kripl. Wahn big krowd a peepl laik dat wuda mi need sohnbadi kain an andastandin fi leed dehn. Moaziz mi reprizent Jehoava az da Leeda. Soh eevn doa Eejip da-mi di onli hoam weh dehn mi eva noa, di Izrelait dehn mi feel sayf ahn sikyoar wen Moaziz mi leed dehn owt.—Ps. 78:52, 53.
12 How Jehoava mi mek ih peepl feel sayf ahn sikyoar? Ih mi kip dehn wel aaganaiz laik wahn aami wen ih mi bring dehn owt. (Ex. 13:18) Bikaaz dehn mi soh aaganaiz, dehn kuda mi si playn-wan dat Jehoava mi-di kanchroal tingz. Pahn tap a dat, Jehoava mi set op “wahn klowd joorin di day” ahn “di lait a wahn faiya” joorin di nait, mek di peepl dehn mi noa dat hihn mi dehdeh wid dehn. (Ps. 78:14) Da laik Jehoava mi-di tel dehn: “Noh bee frayd. Ai deh rait ya wid unu fi gaid unu ahn protek unu.” Dehn mi need kanfidens eena da pramis bikaaz a weh mi wahn hapm neks!
How Jehoava mi shoa kansidarayshan fi di Izrelait dehn da di Red See? (Paragraaf 13)
13, 14. (a) How Jehoava mi tek kayr a di Izrelait dehn da di Red See? (b) How Jehoava mi shoa dat ih mi ga lat moa powa dan Fayro an ih aami?
13 Reed Exodus 14:19-22. * Imajin yoo mi dehdeh. Yu mi chrap bitween di Eejipshan aami ahn di Red See. Den Jehoava mi step een. Di klowd weh mi deh fronta di krowd mi moov rong tu di bak, bitween yoo ahn di Eejipshan dehn. Now, ih mi daak daak pahn di said a di klowd weh mi-di fays di Eejipshan dehn, bot bai wahn mirakl, di sayhn klowd mi-di lait op di kyamp weh yoo mi deh! Den yu mi si Moaziz schrech owt ih han oava di see, ahn wahn schrang breez mi staat tu bloa fahn di ees, an ih mi oapm op wahn waid road aal di way chroo di see tu di ada said. Soh yoo, yu famili, an aala yu animal dehn kuda mi waak chroo pahn di see batam. Di krowd mi soh aaganaiz dat evribadi kuda mi waak kraas tu di ada said eena aada. Ahn den yu mi noatis dat di grong neva modi ner slipri. Ih mi jrai ahn salid, an ih mi eezi fi waak pan. Sayka dat, eevn dehn wan weh kudn moov faas kuda mi reech di ada said sayf-wan.
14 Reed Exodus 14:23, * 26-30. * Meenwail, sayka praid, Fayro mi du fool. Ih mi chrai chays dong yoo ahn di ada Izrelait dehn. Den Moaziz mi schrech owt ih han oava di see agen, ahn di waata mi kohn bak dong pahn Fayro ahn di Eejipshan dehn. Nat wan a dehn mi servaiv!—Ex. 15:8-10.
15. Weh dis akonk teech yu bowt Jehoava?
15 Dis akonk teech wi dat Jehoava da wahn Gaad weh wel aaganaiz. Dat da wahn kwaliti weh help wi fi feel sayf ahn sikyoar. (1 Kor. 14:33) Jehoava shoa wi tu dat ih tek gud kayr a wi laik how wahn shepad tek kayr a ih sheep. Ih kip wi sayf ahn protek wi fahn wi enimi dehn. Bikaaz wi chros dat ih wahn tek gud kayr a wi, wi ku feel sayf ahn sikyoar eena di laas dayz a dis sistem!—Prov. 1:33.
16. How wi ku benifit wen wi tek di taim fi luk pahn di way Jehoava mi sayv di Izrelait dehn?
16 Nowadayz, Jehoava stil di tek kayr a ih peepl az wahn groop. Ih help dehn fi kip wahn gud, schrang rilayshanship wid hihn, an ih protek dehn fahn dehn enimiz. An ih wahn kantinyu fi du dat joorin di grayt chribyulayshan weh wahn soon kohn. (Rev. 7:9, 10) Soh, ih noh mata if dehn yong er oal, eena gud helt er bad, Jehoava peepl noh wahn panik ner bee frayd joorin di grayt chribyulayshan. * Az a mata a fak, dehn wahn du di opozit. Dehn wahn memba weh Jeezas mi seh: “Stan op, lif op unu hed, kaa di taim deh kloas fi mek Gaad sayv unu.” (Look 21:28) Gag, wahn groop a nayshanz weh way moa powaful dan Fayro an ih aami, wahn atak Gaad peepl eena di fyoocha. Bot eevn wen dehn haftu fays da atak, Gaad peepl wahn bee shoar dat hihn wahn protek dehn. (Ezek. 38:2, 14-16) Wai Gaad peepl wahn bee soh kanfident? Dehn noa dat Jehoava noh chaynj. Hihn wahn shoa lov ahn kansidarayshan fi ih peepl agen, an ih wahn sayv dehn.—Isa. 26:3, 20.
17. (a) How wi ku benifit wen wi stodi di Baibl akonk dehn weh taak bowt how Jehoava tek kyaa a ih peepl? (b) Weh wi wahn kansida eena di neks aatikl?
17 Eena dis aatikl wi diskos sohn egzampl a how Jehoava kansidarayt ahn kain wen ih gaid, sayv, ahn tek kayr a fi hihn peepl. Wen yu meditayt pahn dehnya akonk an adaz, chrai fi laan sohnting nyoo bowt Jehoava. Luk fi points weh yu neva noatis bifoa. Wen yu laan moa bowt Jehoava an ih byootiful kwalitiz, yu lov fi hihn wahn groa ahn yu fayt wahn geh schranga. Eena di neks aatikl, wi wahn laan how wi ku fala Jehoava egzampl ahn bee kansidarayt tu adaz eena wi famili, di kangrigayshan, ahn di minischri.
^ par. 3 Josephus, hoo mi rait Jooish hischri, seh dat Samwel mi 12 yaaz oal wen dis mi hapm.
^ par. 4 1 Samuel 3:11-18: “Jehoava mi tel Samwel: “Luk ya! Ah wahn du sohnting da Izrel weh wahn mek evribadi ayz dehn ring wen dehn hyaa bowt it. Pahn da day Ah wahn mek shoar dat Ah du egzakli weh Ah mi seh Ah mi wahn du tu Eelai an ih famili, fahn di staat tu di finish. Yu fi tel ahn dat Ah wahn bring wahn jojment pan ih famili weh wahn laas fareva kaaz hihn mi noa dat ih son dehn mi-di insolt Gaad an ih neva du notn bowt it. Dat da wai Ai mi sway tu Eelai famili dat no sakrifais er aafrin ku pay fi di sinz weh di famili a Eelai mi komit.” Samwel mi stay di lidong til maanin kohn; den hihn mi oapm di doa a Jehoava hows. Samwel mi frayd fi tel Eelai bowt di vizhan. Bot Eelai mi kaal fi Samwel: “Samwel, mi son!” Soh Samwel ansa ahn: “Si mi ya.” Hihn aks ahn: “Wat da-mi di mesij weh hihn mi gi yu? Pleez noh haid it fahn mi. Kaa if yu haid eni paat a it fahn mi, di sayhn ting wahn hapm tu yoo er eevn wos.” Soh Samwel tel ahn evriting, an ih neva haid notn fan ahn. Eelai mi seh: “Da Jehoava. Mek hihn du wateva hihn waahn du.”
^ par. 13 Exodus 14:19-22: “Den di aynjel a di chroo Gaad, weh mi-di goh heda di kyamp a Izrel mi moov fahn fronta di kyamp ahn gaan da di bak, ahn di pila a klowd weh mi deh fronta dehn mi moov ahn gaahn da baka dehn. Soh ih mi stay bitween di kyamp a di Eejipshan dehn ahn di kyamp a Izrel. Pahn wan said, da-mi wahn daak klowd. Pahn di ada said, ih mi-di lait op di nait. Soh di kyamp pahn di wan said neva kohn kloas tu di kyamp pahn di nada said hoal nait. Den Moaziz mi schrech owt ih han oava di see; ahn Jehoava mi mek wahn schrang breez bloa fahn di ees hoal nait an ih mi jraiv bak di see, ahn di waata mi split apaat, ahn di see batam mi kohn laik jrai grong. Soh di Izrelait dehn mi waak chroo di midl a di see pahn jrai grong, ahn di waata mi deh laik wahn waal pahn dehn rait han said ahn pahn dehn lef han said.”
^ par. 14 Exodus 14:23: “Di Eejipshan dehn mi chays afta dehn, an aala Fayro haas dehn, di waar chariyat dehn, ahn di haasman dehn mi staat tu chays afta dehn eena di midl a di see.”
^ par. 14 Exodus 14:26-30: “Den Jehoava mi tel Moaziz: ‘Schrech owt yu han oava di see mek di waata kohn bak oava di Eejipshan dehn, aala dehn waar chariyat, an aala dehn haasman. Moaziz mi hori schrech owt ih han oava di see, ahn wen maanin mi-di kohn, di see mi kohn bak laik naamal. Az di Eejipshan dehn mi chrai get weh fan it, Jehoava mi chroa dehn dong eena di waata. Di waata mi-di kohn bak an ih mi kova di waar chariyat dehn ahn di haasman dehn an aala Fayro aami hoo mi gaan eena di see afta dehn. Nat wan a dehn mi servaiv. Bot di Izrelait dehn mi waak pahn jrai grong eena di midl a di see, ahn di waata mi luk laik wahn waal pahn dehn rait han said ahn pahn dehn lef han said. Jos laik dat Jehoava mi sayv Izrel pahn da day fahn di han a di Eejipshan dehn, an Izrel mi si di Eejipshan dehn ded bai di seesaid.”
^ par. 16 Ih mek sens dat som a di peepl weh servaiv Armagedon wahn bee kripl. Wen Jeezas mi deh ya pahn di ert, ih mi kyoar peepl wid aal kaina siknis ahn dizeez. Dat shoa wi weh ih wahn du eena di fyoocha, noh fi dehn wan weh geh rezorek, bot fi dehn wan weh wahn servaiv Armagedon. (Mach. 9:35) Di peepl weh geh rezorek wahn kohn bak wid perfek helt.
