1. Weh impoatant sobjek Jeezas mi diskos pahn di laas nait weh ih mi spen wid ih disaipl dehn?

JEEZAS mi menshan lov nayli 30 taimz pahn di laas nait weh ih mi spen wid ih disaipl dehn. Ih mi tel ih disaipl dehn dat dehn mi haftu “lov wan anada.” (Jan 15:12, 17) Fi dehn lov fi wan anada mi fi bee soh schrang dat ada peepl wuda noatis it ahn noa dat dehn da-mi Krais chroo chroo falowaz. (Jan 13:34, 35) Dis lov da neva jos wahn waam feelin eena dehn haat. Jeezas mi-di taak bowt wahn kaina lov weh schranga dan dat. Hihn mi seh: “Di bes way wahn persn ku shoa ih fren dehn dat ih lov dehn da fi gi ih laif fi dehn. Unu da mi chroo chroo fren dehn if unu du weh Ah tel unu fi du.”—Jan 15:13, 14.

2. (a) How yu ku noa hoo da Gaad servants tudeh? (b) Weh kweschanz wi wahn ansa eena dis aatikl?

² Yu ku noa hoo da Gaad servants tudeh bikaaz dehn shoa chroo chroo lov fi wan anada. (1 Jan 3:10, 11) Ih noh mata weh langwij wi taak, weh wi kohn fram, er how dehn rayz wi. Aal rong di werl, Jehoava servants shoa reel lov fi  wan anada. Dat da sohnting reeli speshal! Eena dis aatikl wi wahn ansa dehnya kweschanz: Wai lov soh impoatant eena fi wee taim? How Jehoava ahn Jeezas bil wi op wid lov? How eech wan a wi ku shoa di kaina lov weh wahn bil op adaz?—1 Kor. 8:1.

3. How dehnya “terabl taimz” afek peepl laif?

³ Sayka weh laif “ful op wid chrobl ahn saro,” lata peepl weh di liv eena dehnya “terabl taimz” di sofa soh moch dat dehn feel laik giv op pahn laif. (Ps. 90:10; 2 Tim. 3:1-5) Dehn seh dat moa dan 800,000 peepl kil dehnself evri yaa. Dat da bowt wan persn evri 40 sekants. Sad fi seh, eevn som a wi bradaz ahn sistaz sofa fahn dehnya kaina feelinz ahn tek dehn oan laif.

4. Wich Baibl karaktaz mi feel laik dehn mi waahn ded?

⁴ Bak eena Baibl taimz, som a Gaad faytful servant dehn mi sofa soh moch bikaaz a dehn prablemz dat dehn mi feel laik giv op. Fi egzampl, Joab mi eena soh moch payn dat ih mi seh: “Ah kyaahn stan mi laif; Ah noh waahn kantinyu liv.” (Job 7:16; 14:13) Wen tingz neva gaan di way Joana mi ekspek eena ih asainment, hihn mi feel soh bad dat ih mi seh: “Oa Jehoava, pleez kil mi now, kaa ih beta fi mek Ah ded dan fi Ah liv.” (Jonah 4:3) Wan taim, di faytful prafit Ilaija mi feel soh hoaples dat ih mi seh: “Inof! Now, Oa Jehoava, kil mi now.” (1 Ki. 19:4) Bot, Jehoava mi lov dehn laayal servants an ih mi waahn dehn kantinyu liv. Soh ih neva kandem dehn fi how dehn mi feel. Insteda dat, ih mi help dehn fi get oava weh dehn mi-di goh chroo soh dat dehn kuda mi kip dehn fayt schrang ahn kantinyu serv ahn.

5. Wai wi bradaz ahn sistaz reeli need wi lov now moa dan eva?

⁵ Nowadayz, wahn lata wi bradaz ahn sistaz di deel wid sichuwayshanz weh kaaz lata schres soh dehn need wi lov now moa dan eva. Peepl mak dehn, persikyoot dehn, ahn taak bad bowt dehn er eevn atak dehn da werk. Er maybi dehn jos soh taiyad bikaaz dehn haftu werk lang owaz er dehn ga wahn haad jab. Er maybi dehn di deel wid seeryos famili prablemz. Dehn mait marid tu sohnbadi weh mek it haad fi dehn stay laayal tu Jehoava. Bikaaz a aala di prablemz weh dehn haftu deel wid, wahn lata wi bradaz ahn sistaz jos taiyad ahn feel laik dehn waahn giv op. Hoo ku help dehn?

6. How Jehoava bil op ih servant dehn wid lov?

⁶ Jehoava pramis ih servant dehn dat ih wahn aalwayz lov dehn. Imajin how di Izrelait dehn mosi mi feel wen Jehoava mi tel dehn: “Bikaaz yu preshos tu mee, Ai aana yu, an Ai lov yu. . . . Noh bee frayd, kaa Ai deh wid yu”! (Isa. 43:4, 5) Az Jehoava servants, wee noa dat eech wan a wi preshos tu hihn. * Di Baibl pramis wi: “Hihn wahn sayv unu laik wahn maiti Wan. Hihn wahn rijais oava unu wid lata jai.”—Zeph. 3:16, 17.

7. How Jehoava lov wee laik how wahn ma lov ih baybi? (Koment pahn di picha da di biginin a dis aatikl.)

 ⁷ Jehoava pramis fi sopoat ahn komfert ih peepl noh mata weh kaina prablemz dehn di goh chroo. Di Baibl seh: “Ah wahn mek ih ners yu ahn bak yu pan ih hip, an ih wahn bonks yu pan ih nee. Jos laik how wahn ma komfert ih son, rait soh Ai wahn kip di komfert yoo.” (Isa. 66:12, 13) Imajin how sayf wahn lee baybi feel wen ih ma di bak ahn er play wid ahn! Sayhn way, Jehoava lov yu an ih waahn mek yu feel sayf. Soh neva tink dat yoo noh preshos tu Jehoava!—Jer. 31:3.

8, 9. How Jeezas lov ku schrentn wi?

⁸ Chroo Kristyanz ga wahn nada reezn fi noa dat Jehoava lov dehn. Di Baibl seh: ‘Gaad lov di peepl dehn eena dis werl soh moch dat ih giv op ih wan ahn onli Son fi dehn, soh dat enibadi weh put dehn fayt eena ahn wahn neva ded.ʼ (Jan 3:16) Jeezas sakrifais proov dat ih lov wee, ahn da lov schrentn wi! Di Baibl pramis wi dat nat eevn wen wi “get eena chrobl” er wen “haad taim” kohn pahn wi, “notn kyaahn mek Krais stap lov wee.”—Roam. 8:35, 38, 39.

⁹ Sohntaim wi goh chroo sohn sichuwayshan weh lef wi taiyad, mek wi feel laik wi kyaahn kantinyu, er mek wi looz wi jai eena Jehoava servis. Bot if wi tink bowt humoch Jeezas lov wi, wi dizaiya fi kantinyu liv ahn serv Jehoava wahn geh schranga. (Reed 2 Korintyanz 5:14, 15.) Jeezas lov fi wi soh schrang dat ih help wi noh fi giv op eevn wen tingz noh di werk owt how wi waahn er wen wi sofa fahn dizaasta, persikyooshan, er woriz eena laif.

10, 11. Hoo rispansabl fi schrentn bradaz weh feel diskorij? Pleez eksplayn yu ansa.

¹⁰ Jehoava yooz di kangrigayshan fi bil wi op wid lov. Wen wi lov wi bradaz ahn sistaz, wi proov wi lov fi Jehoava. Wi du evriting wi kud fi help wi bradaz fi memba dat dehn preshos tu Jehoava ahn dat hihn lov dehn. (1 Jan 4:19- 21) Di apasl Paal mi tel Kristyanz: “Unu fi kip aan di inkorij wan anada, ahn help wan anada fi bee schranga eena di Laad, jos laik weh unu mi-di du.” (1 Tes. 5:11) Da noh jos di eldaz ku du dis. Eech wan a wi ku fala di egzampl a Jehoava ahn Jeezas eena dis way. Wi du evriting wi kud fi komfert an inkorij wi bradaz ahn sistaz.—Reed Roamanz 15:1, 2.

¹¹ Som a wi bradaz ahn sistaz eena di kangrigayshan sofa fahn mental er imoashanal helt prablemz. Dehn mait need fi si wahn dakta er tek medikayshan fi help dehn. (Look 5:31) Eldaz an adaz eena di kangrigayshan noa dat dehn da noh dakta, bot dehn ku stil help. Evribadi eena di kangrigayshan ku “inkorij dehn wan weh dipres, sopoat dehn wan weh week, ahn bee payshent wid evribadi.” (1 Tes. 5:14, NW) Aal Kristyanz need fi ga lov, kompashan, ahn payshens wid dehn wan weh diskorij. Wi need fi shoa dehn dat wi andastan dehn ahn dat wi waahn bil dehn op. Yoo di du dat? How yoo kuda inkorij yu bradaz eevn moa?

12. How di lov weh di kangrigayshan shoa mi inkorij wahn sista fahn Europe?

¹² Wahn sista fahn Europe seh: “Sohntaim Ai feel laik Ah waahn kil miself, bot Ah geh lata help fahn di kangrigayshan. Di bradaz ahn sistaz dehn sayv mi laif. Dehn aalwayz di inkorij mi ahn shoa mi dat dehn lov mi. Noh aala dehn noa dat Ah sofa fahn dipreshan, bot dehn aalwayz dehdeh fi mi. Ah soh kloas tu wahn marid kopl eena di kangrigayshan dat dehn da laik mi spirichwal ma ahn pa. Dehn tek gud kayr a mi, ahn dehn dehdeh fi mi 24 owaz a day.” Af koars, noh evribadi ku help eena di sayhn way. Bot eech wan a wi ku du wi shayr fi sopoat wi bradaz ahn sistaz. *

13. Weh wi haftu du fi bil op adaz?

¹³ Bee wilin fi lisn. (Jay. 1:19) Wen wi lisn tu wahn brada ahn chrai fi andastan ahn wen ih feel diskorij, wi shoa humoch wi lov ahn. Chrai fi imajin how yoo wuda feel eena fi hihn sichuwayshan. Bee kain an aks kweschanz weh wahn help yu fi andastan ahn beta. Hihn wahn ku noa dat yu reeli kay bai di ekspreshan pahn yu fays. Bee payshent ahn mek ih taak; noh intarop ahn. Lisn gud, ahn yu wahn ku andastan how ih reeli feel, ahn dat wahn help ahn fi si dat ih ku chros yu. Dat wahn mek it eeziya fi mek hihn lisn tu yoo wen yu di chrai fi help ahn. Wen ada peepl noa dat yu reeli lov dehn ahn dat yu kay bowt how dehn feel, yu wahn ku gi dehn di komfert weh dehn need.

14. Wai wi mos bee kyaaful noh fi kritisaiz wi bradaz?

¹⁴ Chrai noh fi kritisaiz adaz. If wi kritisaiz wahn persn weh dipres, wi onli wahn mek ih feel wos. “Som peepl taak widowt tink ahn da laik dehn di stab yu wid wahn soad, bot wen waiz peepl taak ih heel yu.” (Prov. 12:18) Eevn doa wi noh waahn hert sohnbadi  weh dipres wen wi taak tu dehn, wi ku stil hert dehn feelinz wen wi taak widowt tink. If yu waahn inkorij yu brada, hihn reeli haftu chros dat yu di chrai yu bes fi andastan ih sichuwayshan.—Mach. 7:12.

15. Wat da di bes tool fi yooz wen wi di chrai komfert adaz?

¹⁵ Yooz di Baibl fi komfert adaz. (Reed Roamanz 15:4, 5.) Di Baibl kohn fahn di Gaad “weh inkorij wi ahn gi wi payshens,” soh wi ku fain lata komfert wen wi reed it. Wi aalso ga di Watch Tower Publications Index ahn di Research Guide for Jehovahʼs Witnesses. Dehnya poblikayshan ku help wi fain skripchaz ahn ada poblikayshanz weh wi ku yooz fi komfert an inkorij wi bradaz ahn sistaz.

16. Weh kwalitiz wi need wen wi di inkorij sohnbadi weh dipres?

¹⁶ Bee kain ahn jentl. Jehoava da di Gaad weh “aal mersi kohn fram” ahn hihn “gi wi aal di komfert weh wi need.” Fi hihn “haat saaf” tuwaadz ih servant dehn. (Reed 2 Korintyanz 1:3-6; Look 1:78; Roam. 15:13) Paal mi set wahn gud egzampl eena dis. Hihn mi seh: ‘Wee mi chreet unu saaf-wan, laik wen wahn ma di tek kayr a ih baybi. Da bikaaz a fi wee lov fi unu wai wee mi redi fi shayr noh onli di gud nyooz fahn Gaad, bot wi oan laif.ʼ (1 Tes. 2:7, 8) Wen wi kain ahn jentl laik Jehoava, wi ku gi wi bradaz di komfert weh dehn di pray fa!

17. How di way wi luk pahn adaz wahn help wi fi inkorij dehn?

¹⁷ Noh ekspek yu bradaz fi bee perfek. If yu ekspek yu bradaz fi bee perfek, yu onli wahn disapoint yuself. (Eccl. 7:21, 22) Wi waahn bee laik Jehoava kaa hihn noa weh fi ekspek fan ih servant dehn. Soh wi haftu bee payshent wid wan anada. (Ifee. 4:2, 32) Wi wuda neva waahn kompyaa weh wi bradaz di du tu weh adaz du. Dis wuda mek dehn feel laik dehn noh di du inof. Raada, wi waahn inkorij dehn ahn komen dehn fi di gud tingz weh dehn di du. Dis ku help dehn fi bee hapi di serv Jehoava.—Gal. 6:4.

18. Wai wi waahn inkorij ahn bil op wan anada wid lov?

¹⁸ Evri wan a Jehoava servants reeli preshos tu hihn ahn tu Jeezas. (Gal. 2:20) Wi lov wi dyaa bradaz ahn sistaz wahn lat. Soh wi waahn du wi paat fi tek kayr a dehn eena wahn kain ahn lovin way. Fi mek wi du dat, “wi mos aalwayz chrai ahn du dehn ting weh wahn bring pees ahn weh wahn help wi mek wan anada fayt geh schranga.” (Roam. 14:19) Wi reeli di luk faawod tu laif eena Paradais, wen non a wi noh wahn ga no reezn fi eva feel diskorij! Nohmoh siknis er waar noh wahn deh. Peepl noh wahn ded nohmoh. Wi noh wahn haftu deel wid persikyooshan, famili prablemz, er eniting els eena laif weh disapoint wi. Bai di en a di towzn yaaz, aal hyoomanz wahn bee perfek. Jehoava wahn aksep aal hoo stay faytful joorin di fainal tes az fi hihn chiljren, an dehn wahn injai “di sayhn gloari weh bilangz tu ih pikni dehn.” (Roam. 8:21) Soh mek wi kantinyu fi shoa di kaina lov weh inkorij ahn bil op wan anada, ahn help wan anada fi servaiv chroo di en a dis sistem intu di paradais weh Gaad pramis wi.