1-2. (a) Wai Armagedon da gud nyooz fi hyoomanz? (b) Weh kweschanz wi wahn kansida eena dis aatikl?

WEN sohn peepl hyaa di werd “Armagedon,” dehn tink bowt wahn nyooklyaa waar er wahn nachral dizaasta. Bot dis da noh weh di Baibl teech. Insted, di Baibl teech dat Armagedon da wahn waar weh wahn bring gud rizolts. Dis gi wi gud reezn fi bee hapi! (Rev. 1:3) Di waar a Armagedon noh wahn dischrai hyoomanz; ih wahn sayv dehn! How dis wahn hapm?

² Di Baibl shoa dat di waar a Armagedon wahn en aal hyooman govament, ih wahn dischrai di wikid ahn sayv di raichos, an ih wahn protek di ert fahn geh dischrai. (Rev. 11:18) Fi mek wi ku andastan dehnya teechinz beta, mek wi kansida foa kweschanz: Wat da Armagedon? Weh wahn hapm jos bifoa Armagedon? How wee ku bee monks di peepl weh wahn geh sayv joorin Armagedon? How wi ku stay faytful az Armagedon geh kloasa?

3. (a) Weh di werd “Armagedon” meenz? (b) How Revilayshan 16:14, 16 shoa dat Armagedon da noh wahn reel plays pahn ert?

³ Reed Revilayshan 16:14, 16. Di werd “Armagedon” onli apyaa wan taim eena di Baibl, an ih kohn fahn wahn Heebroo werd weh meen “Mongtin a Megido.” (Rev. 16:16; ftn., NW.) Megido da-mi wahn siti bak eena aynshent Izrel. (Josh. 17:11) Bot Armagedon noh di rifaa tu wahn reel plays pahn ert. Ih di rifaa tu di taim wen “di king dehn weh di rool oava aal di ert” gyada tugeda gens Jehoava. (Rev. 16:14) Eena dis aatikl, doh, di werd “Armagedon” aalso di rifaa tu  di waar weh wahn hapm rait afta di king dehn weh di rool oava aal di ert gyada tugeda gens Jehoava. How wi noa dat Armagedon noh di rifaa tu wahn reel plays? Di fos reezn da dat dehn noh ga wahn akchwal mongtin a Megido. Sekant, di ayrya rong di siti a Megido faar tu smaal fi hoal aala “di king dehn weh di rool oava aal di ert” ahn dehn aamiz lang wid dehn wepanz. Ahn terd, laik weh wi wahn si eena dis aatikl, di waar a Armagedon wahn staat wen di “king dehn” a di werl atak Gaad peepl weh liv aal oava di ert.

4. Wai Gaad mi naym ih fainal grayt waar afta di plays weh naym Megido?

⁴ Wai Gaad mi naym ih fainal grayt waar afta di plays weh naym Megido? Eena Baibl taimz, di Izrelaits dehn mi fait lata waar da Megido ahn di Vali a Jezriyel, weh mi deh kloas tu eech ada. Sohntaimz, Jehoava doz help ih peepl fi win dehn waar. Fi egzampl, “bai di waataz a Megido,” Gaad mi help di Izrelait joj weh naym Bayrak fi win di fait gens di Kaynanait aami weh Sisira mi-di leed. Bayrak ahn di prafites Debora mi tank Jehoava fi dehn vikchri. Dehn mi sing: “Fahn hevn di staar dehn mi fait . . . gens Sisira. Di waata a Kishon mi wash dehn weh.”—Judg. 5:19-21.

5. Eena weh impoatant way di waar a Armagedon difrent fahn di waar weh Bayrak mi fait?

⁵ Bayrak ahn Debora mi en dehn sang wid dehnya werdz: “Soh mek aala yu enimi dehn geh dischrai, Oa Jehoava, bot mek di peepl dehn weh lov yoo shain brait laik di son.” (Judg. 5:31) Joorin di waar a Armagedon, Gaad enimi dehn wahn aalso geh dischrai, wail di peepl dehn weh lov Gaad wahn geh sayv. Bot dehn ga wahn nada impoatant ting weh difrent bitween dehnya too waar. Joorin di waar a Armagedon, Gaad peepl noh wahn fait. Dehn nat eevn wahn ga wepanz! Fi dehn “schrent wahn bee fi kip kaam ahn shoa chros” eena Jehoava an ih hevnli aami.—Isa. 30:15; Rev. 19:11-15.

6. How Jehoava mait dischrai ih enimi dehn joorin Armagedon?

⁶ How Jehoava mait dischrai ih enimi dehn joorin Armagedon? Hihn mait yooz wahn lata difrent wayz. Fi egzampl, hihn mait yooz ertkwayk, haylstoan, ahn laitnin. (Job 38:22, 23; Ezek. 38:19-22) Hihn mait mek fi hihn enimi dehn tern gens eech ada. (2 Chron. 20:17, 22, 23) Ahn hihn mait yooz fi hihn aynjel dehn fi kil di wikid. (Isa. 37:36) Noh mata weh Gaad yooz, wi ku bee shoar dat hihn wahn win di waar. Aala fi hihn enimi dehn wahn geh dischrai. An aal raichos peepl wahn geh sayv.—Prov. 3:25, 26.

7-8. (a) Akaadn tu 1 Tesaloanyanz 5:1-6, weh schraynj anonksment di werl leedaz wahn mek? (b) Wai dis anonksment wahn bee wahn daynjaros lai?

⁷ Di anonksment dat ‘evriting fain ahn peesful’ wahn kohn bifoa ‘di Laad kohn bak.ʼ (Reed 1 Tesaloanyanz 5:1-6.) Da 1 Tesaloanyanz 5:2 wehpaat ih seh “di Laad wahn kohn bak,” ih meenz di day a Jehoava, ih di rifaa tu di “grayt chribyulayshan.” (Rev. 7:14) How wi wahn noa wen da chribyulayshan wahn bowt fi staat? Di Baibl seh dat di werl leedaz wahn mek wahn schraynj anonksment. Dehn wahn anonks dat ‘evriting fain ahn peesful.’ Wen dis hapm ih wahn bee di sain dat di grayt chribyulayshan wahn staat.

⁸ Wai di werl leedaz dehn wahn mek da anonksment? Yu tink rilijos leedaz wahn jain dehn? Wee noh noa da wen werl leedaz wahn anonks dat ‘evriting fain ahn  peesful.’ Bot da anonksment wahn bee wahn nada lai weh kohn fahn di deemonz. Dis lai wahn bee reeli daynjaros bikaaz ih wahn mek peepl tink dat dehn sayf, wen akchwali, di graytis chribyulayshan eena hyooman hischri wahn bowt fi staat. Yes, “jos den, wen dehn noh di ekspek it, bad, bad chrobl wahn kohn pahn dehn. . . . Ih wahn bee laik wen bad payn kohn sodn-wan pahn wahn uman wen ih fi baan ih baybi.” Bot weh wahn hapm tu Jehoava laayal servants? Bikaaz dehn noh noa egzakli wen di grayt chribyulayshan wahn staat, dehn mait bee sopraiz wen ih hapm, bot dehn wahn redi far it.

9. Yu tink Jehoava wahn dischrai aala ih enimi dehn wan lik? Pleez eksplayn yu ansa.

⁹ Jehoava noh wahn dischrai di hoal a Saytan werl wan lik, laik how ih mi du eena di taim a Noawa. Insted, hihn wahn dischrai wan paat a it fos ahn den di neks paat a it afta dat. Fos, Jehoava wahn dischrai Babilan di Grayt, weh da aala faals rilijan. Den, joorin di waar a Armagedon, hihn wahn dischrai di res a Saytan werl, inkloodin di politikal, di militeri, ahn di bizniz paats. Now, mek wi kansida sohn deetaylz bowt dehnya too impoatant ivent.

10. Akaadn tu Revilayshan 17:1, 6 ahn 18:24, wai Jehoava wahn dischrai Babilan di Grayt?

¹⁰ Di jojment pahn di “big taim prastichoot.” (Reed Revilayshan 17:1, 6; 18:24.) Babilan di Grayt teech lata lai bowt Gaad ahn kaaz wahn lata peepl fi disrispek Gaad naym. Laik wahn prastichoot, Babilan di Grayt cheet pahn Jehoava; shee sopoat hyooman govaments. Shee yooz ih powa fi abyooz ih membaz ahn tek weh dehn moni. Shee aalso kil wahn lata peepl, inkloodin som a Gaad servants. (Rev. 19:2) How Jehoava wahn dischrai Babilan di Grayt?

11. Wat da di “brait red bees,” ahn how Gaad wahn yooz it gens Babilan di Grayt?

¹¹ Jehoava wahn yooz di “ten haan” a di “brait red bees” fi dischrai di “big taim prastichoot.” Da brait red bees stan fi di United Nations. Di ten haan stan fi aala di govament dehn weh di sopoat da aaganaizayshan.  Gaad don set wahn taim fi mek dehndeh govament atak Babilan di Grayt. Wen da taim kohn, “dehn wahn tayr aaf ih kloaz ahn lef ahn naykid.” (Rev. 17:3, 16) Da dischrokshan wahn hapm soh kwik dat ih wahn luk laik if ih hapm eena wan day. Soh evribadi hoo mi sopoat Babilan di Grayt wahn bee shak, espeshali sins shee doz aalwayz boas ahn seh: “Ai da kween pahn mi chroan! Ai da noh no wido; Ai noh wahn noa weh ih meen fi bee sad.”—Rev. 18:7, 8.

12. Weh Jehoava noh wahn alow di nayshanz fi du, ahn wai?

¹² Gaad noh wahn alow di nayshanz fi dischrai fi hihn peepl. Fi hihn peepl prowd fi mek peepl noa dehn bai fi hihn naym, ahn dehn obay fi hihn koman fi get owta Babilan di Grayt. (Aks 15:16, 17; Rev. 18:4) Dehn aalso werk haad fi help adaz fi get owta Babilan di Grayt. Soh Jehoava servants noh wahn “sofa di sayhn ponishment.” Bot stilyet, dehn wahn haftu fays wahn tes a dehn fayt.

13. (a) Hoo da Gag? (b) Akaadn tu Ezekiel 38:2, 8, 9, weh wahn kaaz Gag fi atak Gaad peepl?

¹³ Di atak a Gag. (Reed Ezekiel 38:2, 8, 9.) * Afta Jehoava don dischrai aala faals rilijan, onli wan rilijan wahn lef pahn ert. Onli Jehoava servants wahn lef. Af koars, dis wahn mek Saytan beks bad. Soh hihn wahn yooz sohn “eevl spirit” fi spred faals infamayshan weh wahn kaaz wahn groop a nayshanz fi atak Jehoava servants. (Rev. 16:13, 14) Da groop a nayshanz naym “Gag a di lan a Maygag.” Wen da groop a nayshanz atak Jehoava peepl, dat wahn bee di biginin a di waar a Armagedon.—Rev. 16:16.

14. Weh Gag wahn riyalaiz?

 ¹⁴ Gag wahn chros eena “man powa,” weh da ih militeri. (2 Chron. 32:8) Wee wahn du sohnting weh wahn luk foolish tu di nayshanz; wee wahn chros eena Jehoava wi Gaad. Wai wi seh dat dis wahn luk foolish? Da bikaaz Babilan di Grayt mi powaful, bot fi shee gaadz neva sayv shee fahn “di bees” an ih “ten haan”! (Rev. 17:16) Soh Gag wahn tink dat ih wahn ku dischrai wi eezi-wan. “Laik klowd weh di kova di lan,” Gag wahn atak Jehoava peepl. (Ezek. 38:16) Bot den Gag wahn riyalaiz dat da wahn chrap; ih noh ga no way fi ron. Laik Fayro da di Red See, Gag wahn laan dat hihn di fait gens Jehoava.—Ex. 14:1-4; Ezek. 38:3, 4, 18, 21-23.

15. Weh Jeezas wahn du joorin di waar a Armagedon?

¹⁵ Jeezas an ih hevnli aami wahn protek Gaad peepl ahn kompleetli dischrai Gag an ih aamiz. (Rev. 19:11, 14, 15) Bot weh wahn hapm tu Jehoava bigis enimi, Saytan, hoo lai tu di nayshan dehn ahn mek dehn atak Gaad peepl da di waar a Armagedon? Jeezas wahn chroa Saytan an ih deemon dehn eena wahn deep deep hoal, wehpaat dehn wahn lak op fi wahn towzn yaaz.—Rev. 20:1-3.

16. (a) How wi shoa dat wi “noa Gaad”? (b) Wat wahn hapm tu peepl da di waar a Armagedon hoo noa Jehoava?

¹⁶ Weda wi deh eena di chroot fi meni yaaz er nat, fi geh sayv joorin Armagedon, wi need fi shoa dat wi “noa Gaad” ahn dat wi ‘obay di gud nyooz bowt wi Laad Jeezas.ʼ (2 Tes. 1:7-9) Wi “noa Gaad” wen wi noa weh hihn laik, weh hihn noh laik, an ih standadz. Wi aalso shoa dat wi noa hihn wen wi lov an obay hihn ahn wen wi wership onli hihn. (1 Jan 2:3-5; 5:3) If wi du dehnya tingz, Gaad wahn aalso noa wi. (1 Kor. 8:3) Bikaaz a dis, Hihn wahn sayv wi joorin di waar a Armagedon!

17. Weh ih meen fi ‘obay di gud nyooz bowt wi Laad Jeezasʼ?

¹⁷ ‘Di gud nyooz bowt wi Laad Jeezasʼ inklood aala di tingz weh wi fain eena di Baibl  weh Jeezas mi teech. Wi obay di gud nyooz wen wi yooz weh wi laan fan it eena wi laif. Da obeedyans meenz dat wi put di Kingdom fos eena wi laif, wi obay Gaad raichos standadz, ahn wi preech bowt Gaad Kingdom. (Mach. 6:33; 24:14) Ih aalso meenz dat wi sopoat Krais anointid bradaz az dehn du dehn impoatant werk.—Mach. 25:31-40.

18. Eena weh way Krais anointid bradaz wahn aybl fi riwaad di ada sheep fi di kainis weh dehn mi shoa tu dehn?

¹⁸ Gaad anointid servants wahn soon riwaad di ada sheep fi aala di help weh dehn mi gi dehn. (Jan 10:16) How dehn wahn du dat? Bifoa di waar a Armagedon staat, eech wan a di 144,000 wahn aredi deh da hevn az wahn imoartal spirit. Den dehn wahn bee paat a di hevnli aami weh wahn dischrai Gag ahn protek wahn “big big krowd” a Jehoava peepl. (Rev. 2:26, 27; 7:9, 10) Dis big big krowd wahn bee hapi dat dehn kuda mi sopoat Jehoava anointid servant dehn wail dehn mi deh pahn ert!

19-20. Noh kay weh wi goh chroo, how wi ku stay faytful az Armagedon geh kloasa?

¹⁹ Wahn lata Jehoava peepl di ekspeeryens chraiyalz joorin dehnya laas dayz. Eevn doa wi fays chraiyalz, wi ku ga jai az wi bayr op. (Jay. 1:2-4) Wan ting weh ku help wi wahn lat da fi neva stap poar owt wi haat tu Jehoava eena pryaa. (Look 21:36) Wi noh onli waahn pray bot wi aalso waahn stodi Gaad Werd evri day. Wi waahn meditayt pahn weh wi reed, inkloodin di prafesi dehn bowt weh wahn soon hapm. (Ps. 77:12) If wi du dehnya tingz ahn du di bes wi kud eena di minischri, wi wahn kip wi fayt ahn wi hoap schrang!

²⁰ Jos tink how hapi yu wahn bee wen Babilan di Grayt geh dischrai ahn wen di waar a Armagedon oava! Beta yet, jos tink how hapi yu wahn bee wen evribadi rispek Gaad naym ahn fi hihn rait fi rool! (Ezek. 38:23) Yes, Armagedon da gud nyooz fi evribadi weh noa Gaad, weh obay ih Son, ahn weh bayr op til di en.—Mach. 24:13.