1. Akaadn tu Machyu 11:28-30, weh pramis Jeezas mi mek?

JEEZAS mi mek wahn wandaful pramis tu di krowd a peepl weh mi-di lisn tu ahn. Hihn mi tel dehn: “Kohn da mee an Ah wahn mek unu res.” (Reed Machyu 11:28-30.) Jeezas da neva jos mowt. Wai wi seh dat? Tink bowt weh hihn mi du fi wahn uman hoo mi-di sofa fahn wahn terabl siknis.

2. Weh Jeezas mi du fi wahn uman hoo mi-di sofa fahn wahn terabl siknis?

² Di uman mi reeli need help. Shee mi gaahn da wahn lata dakta di hoap fi geh kyoar. Fi 12 yaaz shee mi-di sofa, bot nobadi kuda mi help ahn. Akaadn tu di Laa weh Jehoava mi gi Moaziz, shee neva kleen. (Lev. 15:25) Den shee mi hyaa dat Jeezas kuda mi kyoar peepl weh sik, soh shee gaahn gaahn luk fi ahn. Wen shee mi fain ahn, shee mi toch di ej a Jeezas kloaz, ahn rait away shee mi geh kyoar! Bot Jeezas neva onli heel di uman. Bikaaz a di way hihn mi chreet ahn, shee mi aalso noa dat hihn lov ahn rispek ahn. Fi egzampl, wen hihn mi-di taak tu di uman, hihn mi shoa dat hihn lov ahn rispek shee wen hihn kaal ahn “daata.” Wi ku bee shoar dat shee mi feel rifresh ahn schrentn!—Look 8:43-48.

3. Weh kweschanz wi wahn ansa?

³ Noatis dat di uman mi gaahn gaahn luk fi Jeezas. Shee mi mek di efoat fi goh tu hihn. Sayhn way soh, wee need fi mek di efoat fi goh tu Jeezas. Tudeh day, Jeezas  noh wahn yooz wahn mirakl fi kyoar peepl weh sik weh goh tu hihn. Bot stilyet, hihn invait wi: “Kohn da mee an Ah wahn mek unu res.” Eena dis aatikl, wi wahn ansa faiv kweschan: How wi ku goh tu Jeezas? Weh Jeezas mi meen wen ih mi seh: “Tek mai yoak pahn fi yoo wan”? Weh wi ku laan fahn Jeezas? Wai di werk weh hihn gi wi mek wi feel rifresh? Ahn how wi ku kantinyu fi fain res anda Jeezas yoak?

4-5. Wat da sohn wayz wi ku goh tu Jeezas?

⁴ Wan way fi goh tu Jeezas da fi laan az moch az wi kud bowt aala di tingz weh hihn mi seh ahn du. (Look 1:1-4) Nobadi els ku du dis fi wi—wee need fi stodi bowt dehnya tingz fi wiself. Wi aalso goh tu Jeezas wen wi disaid fi geh baptaiz ahn kohn fi bee wan a fi hihn disaipl.

⁵ Wahn nada way fi goh tu Jeezas da fi goh tu di eldaz eena di kangrigayshan if wi need help. Jeezas yooz dehn “gif,” er man, fi tek kyaa a ih sheep. (Ifee. 4:7, 8, 11; Jan 21:16; 1 Peet. 5:1-3) Wi need fi mek di efoat fi aks di eldaz fi help. Wi kyaahn ekspek di eldaz fi reed wi main ahn noa weh wi need. Kansida di egzampl a wahn brada weh naym Julian. Hihn seh: “Ai mi haftu lef Betel bikaaz Ah mi geh sik, ahn wan a mi fren mi sojes dat Ah aks di eldaz fi vizit mi fi inkorij mi. Fos, Ah neva tink dat Ah mi need di vizit. Bot laytaraan, Ah mi aks fi help, ahn da vizit mi tern owt fi bee wan a di bes gif weh Ah eva geh.” Laayal eldaz, laik di too weh mi vizit Julian, ku help wi fi “tink di sayhn way Jeezas Krais tink,” dat meenz, fi andastan ahn fi kapi fi hihn tinkin an atichood. (1 Kor. 2:16; 1 Peet. 2:21) Wen di eldaz help wi eena dis way, da reeli wan a di bes gif weh dehn ku eva gi wi.

6. Weh Jeezas mi meen wen ih mi seh: “Tek mai yoak pahn fi yoo wan”?

⁶ Wen Jeezas mi seh: “Tek mai yoak pahn fi yoo wan,” hihn maita mi meen “Obay mai atariti.” Hihn kuda mi aalso meen “Get anda mai yoak wid mee, ahn wi wahn werk tugeda fi Jehoava.” Eeda way, ih meenz dat wi haftu werk.

7. Akaadn tu Machyu 28:18-20, weh werk wee geh fi du, ahn weh wee ku bee shoar a?

⁷ Wi aksep Jeezas invitayshan wen wi dedikayt wi laif tu Jehoava ahn geh baptaiz. Jeezas invait evribadi fi goh tu hihn. Hihn wahn neva rijek enibadi weh reeli waahn serv Gaad. (Jan 6:37, 38) Aala Krais falowaz ga di aana fi shayr eena di werk weh Jehoava aks Jeezas fi du. Ahn wi ku bee shoar dat Jeezas wahn aalwayz dehdeh fi help wi du da werk.—Reed Machyu 28:18-20.

8-9. Wai hombl peepl mi waahn deh kloas tu Jeezas, ahn weh kweschanz wi shuda aks wiself?

⁸ Hombl peepl mi waahn deh kloas tu Jeezas. (Mach. 19:13, 14; Look 7:37, 38) Wai? Tink bowt di difrens bitween Jeezas ahn di Farisee dehn. Dehndeh rilijos leedaz neva lovin ahn dehn mi prowd. (Mach. 12:9,-14) Jeezas mi lovin ahn hombl. Di Farisee dehn mi laik fi bee impoatant ahn dehn mi waahn evribadi noa da hoo dehn. Bot Jeezas mi seh dat ih neva gud fi bee laik dat. Hihn mi teech ih disaipl dehn fi bee hombl ahn fi serv adaz. (Mach. 23:2, 6-11) Di Farisee dehn doz baas op di peepl dehn bikaaz  di peepl dehn mi frayd fi weh mi wahn hapm tu dehn if dehn neva obay di Farisee dehn. (Jan 9:13, 22) Jeezas mi mek dehn feel rifresh bai di lovin way hihn mi chreet dehn ahn bai fi hihn kain werdz.

⁹ Yoo di kapi Jeezas egzampl? Aks yuself: ‘Peepl noa mee az wahn kaam ahn hombl persn? Ai wilin fi du werk weh moas peepl wuda luk dong pan soh dat Ai ku serv adaz? Ai kain tu adaz?ʼ

12-14. Wai wi ku fain res eena di werk weh Jeezas gi wi fi du?

¹² Wai wi feel rifresh wen wi du di werk weh Jeezas gi wi fi du? Dehn ga lata reezn, bot mek wi luk pahn jos wahn fyoo a dehn.

¹³ Wi ga di bes oavaseeya dehn. Jehoava, wi Sopreem Oavaseeya, da noh wahn kruwil maasta weh noh shoa ih servants dat ih apreeshiayt dehn. Hihn apreeshiayt di werk weh wi du. (Heeb. 6:10) Ahn hihn gi wi di powa weh wi need fi du di werk weh hihn gi wi fi du. (2 Kor. 4:7; Gal. 6:5) Jeezas, wi King, da wahn perfek egzampl a how fi chreet adaz. (Jan 13:15) Ahn di eldaz hoo shepad wi chrai fi kapi Jeezas, “di grayt shepad.” (Heeb. 13:20; 1 Peet. 5:2) Dehn du dehn bes fi bee kain an inkorijin, ahn fi ga korij az dehn teech ahn protek wi.

¹⁴ Wi ga di bes frenz. No ada set a peepl ga lovin frenz an impoatant werk laik weh wee ga. Jos imajin: Wee werk wid bradaz ahn sistaz hoo ga di haiyis moaral standadz, bot stil, dehn noh tink dat dehn beta dan adaz. Dehn ga wahn lata skilz bot dehn noh boasi bowt it. Dehn noh onli si wi az peepl dehn werk lang wid bot dehn aalso si wi az dehn frenz. Ahn dehn lov fi wi soh schrang dat dehn wilin fi ded fi wi!

15. How wee shuda feel bowt di werk weh wi di du?

¹⁵ Wee ga di bes werk. Wee teech peepl di chroot bowt Jehoava ahn wi ekspoaz Saytan lai dehn. (Jan 8:44) Saytan load op peepl wid prablemz weh dehn kyaahn eevn bak. Fi egzampl, hihn waahn wi bileev dat Jehoava noh wahn fagiv wi fi wi sin dehn ahn dat nobadi kyaahn lov wi. Dat da wahn big lai weh mek peepl feel terabl! Wen wi goh tu Krais, wi geh fagivnis fi wi sinz. Ahn Jehoava lov aala wi wahn lat. (Roam. 8:32, 38, 39) Wi geh wahn lata jai wen wi help peepl laan fi pen pahn Jehoava ahn wen wi si how dehn laif geh beta!

16. How di load weh Jeezas gi wi fi bak difrent fahn di ada load dehn weh wi haftu bak?

¹⁶ Di load weh Jeezas gi wi fi bak difrent fahn di ada load dehn weh wi haftu bak. Fi egzampl, da di en a wahn day a werk, wahn lata peepl noh onli feel taiyad bot dehn aalso feel laik sohnting misn eena dehn laif. Bot afta wi spen taim di serv Jehoava ahn Jeezas, wi feel satisfai. Da chroo, wi mait bee taiyad afta wi kohn hoam fahn werk ahn wi mait haftu foas wiself fi goh da wi kangrigayshan meetin da sayhn nait. Bot wahn lata taim wi kohn bak hoam di feel rifresh ahn ful a enerji. Da di saym way wi feel wen wi preech ahn du wi persnal Baibl stodi. Wen wi mek di efoat fi du it, wi feel rifresh ahn ful a enerji!

17. Weh wi need fi andastan bowt wi sichuwayshan ahn weh wi shuda bee kyaaful bowt?

¹⁷ Wi need fi andastan dat eech wan a wi onli ga wahn sertn amonk a enerji. Soh wi need fi tink kyaafuli bowt weh wi chooz fi du wid wi taim. Fi egzampl, wi ku ways wahn lata enerji di chrai geh mateeryal tingz. Noatis weh Jeezas mi seh tu wahn rich yong man hoo mi aks ahn: “Da weh Ah ku du fi geh fi liv wid Gaad fareva?” Di yong man mi don di obay di Laa. Maybi hihn da-mi wahn gud yong man bikaaz di Gaspl a Maak seh dat Jeezas mi ga “lov eena ih haat far ahn.” Jeezas mi gi di yong man wahn invitayshan. Jeezas mi tel ahn: “Goh goh sel evriting weh yu ga . . . den yu kohn ahn fala mi.” Di yong man mi waahn fala Jeezas, bot ih neva waahn giv op weh ih mi oan “kaa hihn mi doti rich.” (Maak 10:17-22) Bikaaz a dat, hihn mi rijek di yoak weh Jeezas mi aafa ahn an ih mi kantinyu fi yooz aala ih enerji fi mek “moni.” (Mach. 6:24) If da mi yoo, weh chois yoo wuda mi mek?

18. Weh wi shuda du fahn taim tu taim, ahn wai?

¹⁸ Now an agen, ih gud fi mek wi tink bowt weh wi di put fos eena wi laif. Wai? Soh dat wi ku mek shoar dat wi di yooz wi enerji eena di bes way pasabl. Kansida weh wahn yong man weh naym Maak seh: “Fi yaaz, Ah mi tink dat Ah mi-di liv wahn simpl laif. Ah mi-di painyaa, bot Ah aalwayz mi-di yooz mi taim an enerji fi chrai mek moni soh dat Ah kuda mi mek mi laif moa komfatabl. Ah mi-di chrai fi andastan wai mi laif mi-di geh soh haad. Den Ah riyalaiz dat Ah mi-di put miself fos an Ah mi-di gi Jehoava di taim an enerji weh mi lef oava.” Maak mi mek sohn chaynjiz eena ih laif an eena di way ih tink soh dat ih kuda mi du moa eena ih servis tu Jehoava. Maak seh: “Sohntaim Ah wori bowt moni, bot wid Jehoava help ahn Jeezas sopoat, Ah ku foakos pahn mi servis tu Jehoava.”

19. Wai ih soh impoatant fi ga di rait atichood?

¹⁹ Wee ku kantinyu fi fain res anda Jeezas yoak if wi du chree tingz. Fos, kip di rait atichood. Wee di du Jehoava werk, soh ih need fi geh don Jehoava way. Wee da di werkaz, ahn Jehoava da di Maasta. (Look 17:10) If wi chrai fi du fi hihn werk di way wee waahn, wi wahn fain wiself di fait gens di yoak. Eevn wahn powaful bul wahn moa dan laikli hert ihself ahn geh taiyad if ih aalwayz di chrai fi goh ih oan way ahn di fait gens di yoak weh ih maasta di kanchroal. Bot if wi du Jehoava werk di way how Jehoava waahn wi du it, wi wahn ku du tingz weh wi mi tink wi  kuda neva du an oavakom eni sichuwayshan. Memba dat nobadi kyaahn stap fi hihn perpos fahn kohn chroo!—Roam. 8:31; 1 Jan 4:4.

20. Weh shuda bee wi reezn fi get anda Jeezas yoak?

²⁰ Sekant, werk fi di rait reezn. Fi wee goal da fi bring prayz tu wi lovin Faada, Jehoava. Som peepl weh mi-di liv eena di taim a di apasl dehn, mi onli gaahn anda Jeezas yoak bikaaz dehn mi greedi an dehn onli mi-di tink bowt dehnself. Bot soon afta, dehn mi abandan Jeezas yoak bikaaz dehn neva hapi. (Jan 6:25-27, 51, 60, 66; Fil. 3:18, 19) Bot peepl weh mi lov Gaad ahn weh mi lov dehn nayba, mi hapi fi bak di yoak fi az lang az dehn mi liv pahn ert. Bikaaz dehn mi wilin fi bak da yoak, dehn mi ga di hoap fi serv wid Krais da hevn. Jos laik dehn, wee ku kantinyu fi bee hapi if wi bak Jeezas yoak fi di rait reezn.

21. Akaadn tu Machyu 6:31-33, weh wi ku ekspek Jehoava fi du?

²¹ Terd, noa weh fi ekspek. Wee chooz wahn laif a haad werk ahn sakrifais. Jeezas mi waan wi dat peepl wahn persikyoot wi. Bot wee ku ekspek dat Jehoava wahn gi wi di schrent fi bayr op anda eni chalenj. Di moa wi bayr op, di schranga wi rilayshanship wid Jehoava wahn geh. (Jay. 1:2-4) Wi ku aalso ekspek dat Jehoava wahn gi wi weh wi need, dat Jeezas wahn shepad wi, ahn dat wi bradaz ahn sistaz wahn inkorij wi. (Reed Machyu 6:31-33; Jan 10:14; 1 Tes. 5:11) Wi ga evriting wi need fi bayr op anda eni chalenj!

22. Weh wi ku bee tankful fa?

²² Di uman weh Jeezas mi kyoar, mi feel rifresh pahn di sayhn day shee mi geh heel. Bot shee kuda mi feel rifresh fareva onli if ih mi kohn fi bee wahn laayal disaipl a Krais. Weh yu tink shee mi du? If shee mi doo chooz fi get anda Jeezas yoak, imajin ih riwaad; shee wuda di serv wid Jeezas da hevn! Eniting weh shee mi giv op fi fala Krais wuda mi wert it. Soh, noh mata weda wi hoap da fi liv da hevn er fi liv pahn ert, wee ku bee reeli tankful dat wi aksep Jeezas invitayshan: “Kohn da mee!”