1. Wen wuda bee di haadis taim fi mek yoo serv Jehoava?

WEN yu tink wuda bee di haadis taim fi mek yoo serv Jehoava? Wen tingz rof er wen tingz di ron smood? Wen wi ga prablemz, ih eezi fi mek wi chros eena Jehoava. Bot weh wi du wen tingz di goh smood eena wi laif? Yu tink ih pasabl fi mek wi ferget dat wee shuda di serv Jehoava? Wel, dis da di saym ting weh Jehoava mi waan di Izrelait dehn bowt.—Deut. 6:10-12.

2. Weh wi ku laan fahn di egzampl a King Aysa?

² King Aysa da wahn gud egzampl a wahn waiz persn weh pen pahn Jehoava. Hihn mi serv Jehoava wen tingz mi bad ahn wen ih mi ga pees eena ih kingdom. Aysa mi serv Jehoava wid aala ih haat fi aala ih laif. (1 Ki. 15:14, ftn.) Wan way how Aysa mi shoa dat ih mi serv Jehoava wid ih hoal haat da wen ih mi waip owt faals wership fahn Jooda. Di Baibl seh dat “hihn tek dong di alta dehn a di faals gaad dehn ahn di hai plays dehn fi wership; ih mi brok op di hoali poas dehn, an ih kot dong di hoali stachu dehn.” (2 Chron. 14:3, 5) Ih mi eevn tek weh ih grani, Mayaka, pozishan bikaaz shee mi-di inkorij di peepl fi wership aidol.—1 Ki. 15:11-13.

3. Weh wi wahn diskos?

³ Aysa neva jos dischrai di aidol dehn, bot ih mi help di peepl a Jooda fi wership Jehoava agen. Sayka dat, Jehoava mi bles Aysa ahn di peepl a Jooda wid pees fi wahn wail. * Fi ten yaaz wail Aysa mi-di rool, di peepl mi ga pees. (2 Chron. 14:1, 4, 6) Eena dis aatikl, wi wahn diskos how Aysa mi tek advantij a di peesful taim weh di nayshan mi-di injai. Wi wahn aalso diskos di egzampl a di Kristyanz bak eena di dayz a di  apasl dehn hoo mi tek advantij a wahn peesful taim, jos laik Aysa. Den, wi wahn ansa dis kweschan: If yoo liv eena wahn konchri weh gi Jehoava Witnisiz di freedom fi wership, how yoo ku mek gud yoos a da peesful taim?

4. Bays pahn 2 Chronicles 14:2, 6, 7, how Aysa mi yooz di peesful taim weh dehn mi-di injai?

⁴ Reed 2 Chronicles 14:2, 6, 7. * Aysa mi tel di peepl dat da Jehoava mi gi dehn pees. Aysa neva feel dat dis peesful taim da-mi wahn taim fi rilaks. Insteda dat, ih mi staat tu bil sohn siti, sohn waal, sohn towa, ahn sohn gayt. Ih mi tel di peepl a Jooda: “Wi free fi du weh wi waahn wid dis lan.” Weh Aysa mi meen bai dat? Ih mi meen dat di peepl mi free fi moov bowt eena di lan weh Gaad mi gi dehn, ahn dat dehn mi free fi bil eniway eena di lan kaaz no enimi mi dehdeh fi stap dehn. Soh ih inkorij di peepl fi mek gud yoos a dis peesful taim weh dehn mi-di injai.

5. Wai Aysa mi schrentn ih aami?

⁵ Aysa mi yooz da peesful taim fi schrentn ih aami. (2 Chron. 14:8) Yu tink dis meen dat hihn neva chros eena Jehoava? No, af koars hihn mi chros eena Jehoava. Bot bikaaz hihn da-mi king, hihn mi noa dat ih ga di rispansabiliti fi pripyaa di peepl fi eni haad taim weh dehn mi wahn fays. Aysa mi noa dat dehn neva mi wahn injai pees fareva, ahn dat da egzakli weh hapm.

6. Weh di fers Kristyanz mi du wen dehn mi ga pees?

⁶ Eevn doa di Kristyanz eena di dayz a di apasl dehn yoostu aalwayz fays persikyooshan, dehn mi ga taimz wen dehn mi ga pees tu. Weh dehn mi du joorin dehndeh peesful taimz? Dehndeh faytful bradaz ahn sistaz neva mek notn stap dehn fahn preech di gud nyooz. Di Baibl seh eena Aks dat dehn mi “shoa rispek fi Gaad.” Dehn mi kip aan di preech, ahn sayka dat, “dehn staat groa schrang ahn lata peepl jain dehn.” Ih mi klayr fi si dat Jehoava mi bles dehn preechin werk joorin da peesful taim.—Aks 9:26-31.

7-8. Wat da sohn apachooniti weh mi kom op eena di taim a di apasl dehn, ahn weh Paal an adaz mi du?

⁷ Di Kristyanz bak den mi tek advantij a evri apachooniti weh dehn mi geh fi preech di gud nyooz. Fi egzampl, wen di apasl Paal mi si dat ih kuda mi preech tu wahn lata peepl da Efisos, ih tek advantij a da apachooniti ahn stay dehsoh fi preech.—1 Kor. 16:8, 9.

⁸ Wahn nada apachooniti fi preech mi kom op agen fi Paal an ada Kristyanz eena di yaa 49 C.E. Dis da wen di apasl dehn mi setl di ishu a serkomsizhan. Afta Paal ahn di ada eldaz mi tel di kangrigayshan dehn weh dehn mi disaid bowt serkomsizhan, di bradaz dehn mi werk haad fi preech di gud nyooz. (Aks 15:30-35) Wat da-mi di rizolt? Di Baibl seh dat di kangrigayshan dehn “mi groa schranga eena dehn fayt ahn lat moa peepl jain dehn.”—Aks 16:4, 5.

9. How tingz stan eena wahn lata konchri tudeh, ahn weh wi ku aks wiself?

⁹ Eena wahn lata konchri tudeh, wi free fi preech di gud nyooz. Yoo liv eena wahn konchri laik dat? If yu ansa da yes, den aks yuself, ‘How Ai di yooz dis freedom?ʼ Di laas dayz da sohn eksaitin taimz fi Jehoava peepl bikaaz dehn bizi wid di bigis preechin ahn teechin werk weh eva hapm eena di werl. (Maak 13:10) Wi ku du wahn lata tingz fi sopoat dis werk.

10. Weh 2 Timoti 4:2 inkorij wi fi du?

¹⁰ Weh yoo ku du fi shoa dat yu di mek gud yoos a di taimz wen yu ga pees? (Reed 2 Timoti 4:2.) Wai yu noh chek fi si if yoo er wahn famili memba ku mek chaynjiz fi preech moa er fi serv az wahn painyaa? Now da noh di taim fi chrai geh rich ahn geh lata mateeryal tingz, kaaz dehndeh tingz noh wahn servaiv wid wi chroo di grayt chribyulayshan.—Prov. 11:4; Mach. 6:31-33; 1 Jan 2:15-17.

11. Da weh sohn bradaz du fi help az moch peepl az pasabl fi hyaa di gud nyooz?

¹¹ Wahn lata bradaz laan wahn nyoo langwij soh dat dehn ku preech tu adaz ahn teech dehn bowt Jehoava. Jehoava aaganaizayshan projoos wahn lata poblikayshan fi preech eena lata difrent langwij. Fi egzampl, eena 2010, wi poblikayshan dehn mi avaylabl eena bowt 500 langwij. Ahn now, wi poblikayshan dehn deh eena moa dan 1,000 difrent langwij.

12. How peepl benifit wen dehn hyaa di gud nyooz bowt di Kingdom eena dehn oan langwij? Yooz di egzampl eena di paragraaf.

¹² How yu tink peepl feel wen dehn hyaa bowt Jehoava eena dehn oan langwij? Noatis how wahn sista mi feel afta shee gaahn da wahn kanvenshan da Memphis, Tennessee. Di kanvenshan mi deh eena di Kinyarwanda langwij, wahn langwij weh dehn taak da difrent paats a Africa. Afta di kanvenshan, di sista mi seh: “Dis da di fers taim, sins Ah moov tu di Stayts 17 yaaz agoa, dat Ah kuda mi andastan wahn hoal  kanvenshan proagram.” Soh di proagram mi reeli toch fi shee haat bikaaz ih mi deh eena fi shee langwij. If yu kud, yu tink yoo kuda laan wahn nada langwij fi help adaz eena yu teritori? Dis mait bee wahn gud aidyaa, kaaz som peepl eena yu teritori mait feel moa komfatabl fi taak wahn nada langwij. If yu chrai dis, yu wahn geh lata jai fahn yu haad werk.

13. How wi bradaz da Russia mi mek gud yoos a taimz wen dehn mi ga pees?

¹³ Noh aala wi bradaz ga di freedom fi preech di gud nyooz. Eena sohn konchri, di govament ban di preechin werk, ahn soh wi bradaz noh free fi preech how dehn waahn. Fi egzampl, noatis weh mi hapm wid wi bradaz da Russia. Dehn mi fays persikyooshan fi wahn lang taim, bot eena Maach 1991, di govament mi gi dehn di freedom fi wership Jehoava. Joorin da taim deh, dehn mi ga onli bowt 16,000 Witnisiz da Russia. Tweni yaaz layta, di nomba a Witnisiz groa tu moa dan 160,000! Ih klyaa fi si dat wi bradaz mi mek gud yoos a dehn freedom fi preech wen dehn mi gat it. Da peesful taim neva laas lang doh. Eevn doa tingz chaynj fi wi bradaz da Russia, dehn stil di werk haad fi Jehoava. Dehn kantinyu fi du evriting weh dehn kud fi serv ahn.

14-15. How Jehoava mi yooz ih powa fi help Aysa?

¹⁴ Joorin di taim wen Aysa mi-di rool az king, di peesful taim weh dehn mi-di injai mi did kohn tu wahn en. Wahn big big aami wid moa dan wan milyan soalja mi kohn fahn Eetiyopya. Di komanda da-mi wahn man weh mi naym Zeera, ahn hihn mi kanfident dat ih kuda mi kanka Jooda. Bot Aysa mi chros eena Gaad; hihn neva chros eena wahn aami. Eena wahn pryaa, Aysa mi seh: “Help wi, Oa Jehoava wi Gaad,  kaaz wi di pen pahn yoo, ahn da eena fi yoo naym wi di kom op gens dis krowd.”—2 Chron. 14:11.

¹⁵ Aldoa di Eetiyopyan aami da-mi too taimz di saiz a Aysa aami, hihn mi noa dat Jehoava da wahn powaful Gaad weh ku help ih peepl. Dat da egzakli weh mi hapm; wid Jehoava help, Aysa mi kanka di Eetiyopyan aami.—2 Chron. 14:8-13.

16. How wi noa dat wi noh wahn aalwayz ga peesful taimz?

¹⁶ Wi noh noa egzakli weh wahn hapm tu eech wan a wi eena di fyoocha, bot wi doo noa dat di pees weh Jehoava peepl di injai rait now noh wahn laas fareva. In fak, Jeezas mi seh dat eena di laas dayz, ‘aala di nayshan dehn wahn hayt wi.ʼ (Mach. 24:9) Ahn di apasl Paal mi seh dat “enibadi weh bilangz tu Krais Jeezas ahn waahn liv rait wahn haftu put op wid lata persikyooshan fahn ada peepl.” (2 Tim. 3:12) Saytan “beks bad,” ahn wi wuda di fool wiself if wi tink dat wi ku eskayp fi hihn anga.—Rev. 12:12.

17. Wat da sohn tingz weh wahn tes wi fayt?

¹⁷ Soon, aala wi wahn ekspeeryens tingz weh wahn tes wi fayt. Soon, di grayt chribyulayshan wahn staat ahn “di chrobl weh di kom eena dehndeh dayz deh wahn bee moa terabl dahn eniting weh mi eva deh fahn di biginin a di werl til tudeh day.” (Mach. 24:21) Joorin da taim, wi famili membaz mait ton gens wi ahn di govament dehn mait ban wi werk. (Mach. 10:35, 36) Soh den, eech an evri wan a wi need fi aks wiself dis kweschan, ‘Ai wahn bee laik Aysa ahn chros dat Jehoava ku help mi ahn protek mi?ʼ

18. Akaadn tu Heebrooz 10:38, 39, weh wahn help wi fi pripyaa fi wen wi pees kohn tu wahn en?

¹⁸ Eena wahn spirichwal way, Jehoava di pripyaa wi fi weh di kom. Hihn di gaid “di faytful ahn waiz slayv” fi provaid spirichwal “food da di rait taim” fi wi soh dat wi ku ga weh wi need fi stay schrang. (Mach. 24:45, NW) Bot wi haftu du fi wee paat if wi waahn ga schrang fayt eena Jehoava.—Reed Heebrooz 10:38, 39.

19-20. Bays pahn 1 Chronicles 28:9, wat da sohn kweschan wi need fi aks wiself, ahn wai wi need fi du dat?

¹⁹ Wi need fi “saach fi Jehoava” laik King  Aysa. (2 Chron. 14:4; 15:1, 2) Wi staat tu saach fi Jehoava wen wi laan bowt hihn ahn geh baptaiz. Wi du evriting wi kud fi mek wi lov fi Jehoava schrang. Fi si how wi di du wid dis, wi ku aks wiself, ‘Ai chrai mi bes fi goh da aala di meetin dehn?ʼ Wen wi goh da di meetin dehn, wi geh di schrent fi kantinyu serv Jehoava ahn wi get inkorijment fahn wi bradaz ahn sistaz. (Mach. 11:28) Sohn kweschan wi ku aks wiself da: ‘How aafn Ai du mi persnal Baibl stodi? If yu liv wid yu famili, yoo du yu famili wership evri week? Er if yu liv bai yuself, yu stil du yu famili wership? Ahn yoo di du yu bes fi preech tu adaz ahn teech dehn?ʼ

²⁰ Wai wi need fi aks wiself dehnya kweschan? Di Baibl tel wi dat Jehoava egzamin weh deh eena wi haat ahn weh deh eena wi main. Soh if hihn du dat, yu noh tink wee shuda du di saym ting tu? (Reed 1 Chronicles 28:9.) * If wi si dat wi need fi mek sohn chaynjiz eena wi goal dehn, wi tinkin, er wi atichood, wi need fi aks Jehoava fi help wi fi mek dehndeh chaynjiz. Now da di taim fi mek wi pripyaa wiself fi di tes dehn weh wi wahn soon fays. Noh mek notn stap yu fahn mek gud yoos a dis peesful taim weh wi gat rait now!