Ecclesiastes 5:8 seh: “If yu si wahn hai ofishal di tek advantij a poa peepl ahn noh gi jostis eena di dischrik dehn ner ih noh inkorij raichosnis, noh bee sopraiz bowt dis. Kaaz da hai ofishal ga sombadi els weh haiya dan hihn weh di wach ahn. Dehn wahn aalwayz ga sombadi weh haiya dan dehn.” Dis da wahn inchrestin vers, noh chroo?

If wi noh kansida Jehoava tinkin pahn dis, wi mait tink dat dis vers di diskraib onli di govament roola dehn. Bot if wi tink moa bowt it, dis vers di tel wi sohnting impoatant bowt Jehoava weh shuda komfert wi.

Ecclesiastes 5:8 di taak bowt wahn roola weh tek advantij a poa peepl ahn noh deel wid dehn eena wahn fyaa way. Da roola need fi memba dat ih pasabl dat sombadi els deh weh ga wahn haiya pozishan dan hihn weh di wach ahn. In fak, dehn mait stil ga ada roolaz weh ga wahn eevn haiya pozishan eena atariti. Ih sad, doh, dat wid hyooman govaments, aala di roola dehn mait bee korop, ahn peepl sofa bikaaz a aala dis koropshan.

Bot eevn wen evriting luk hoaples, wi noa dat Jehoava ‘di wach eevn di hai ofishal dehn.ʼ Dat mek wi feel beta, noh chroo? Wi ku aks Gaad fi help wi ahn wi ku chroa wi woriz pahn hihn. (Ps. 55:22; Fil. 4:6, 7) Wi noa dat Gaad si evriting. Di Baibl seh dat ‘Jehoava di saach chroo di hoal ert fi shoa ih schrent tuwaadz di wan dehn weh serv ahn wid dehn hoal haat.ʼ—2 Chron. 16:9.

Soh, Ecclesiastes 5:8 rimain wi a di reel sichuwayshan weh hyooman govaments deh eena. Dehn aalwayz ga sombadi weh ga haiya atariti dan dehn. Bot di moas impoatant ting dis vers rimain wi a da di fak dat Jehoava ga di haiyis atariti. Az a mata a fak, hihn da di Sopreem Roola. Rait now, hihn di rool chroo ih Son, Jeezas Krais, di King a di Kingdom. Gaad da di Almaiti, ahn hihn di si evriting an evribadi. Hihn rool wid jostis an ih fyaa. Ahn wi noa dat ih Son rool eena di saym way tu.