STODI AATIKL 37
“Noh Mek Yu Han Res”
“Plaant yu seed eena di maanin ahn noh mek yu han res til eevnin.”—ECCL. 11:6.
SANG 68 Soa di Seed a di Kingdom
WEH WI WAHN DISKOS? *
1-2. How Ecclesiastes 11:6 help wi wid di preechin werk?
EENA som konchri, lata peepl waahn laan moa wen dehn hyaa di gud nyooz. Da jos weh dehn need! Eena sohn ada plays, di peepl dehn noh waahn hyaa notn bowt Gaad ner di Baibl. How moas peepl rispan tu di gud nyooz eena fi yoo ayrya? Noh mata how dehn rispan, Jehoava waahn mek wi kantinyu fi preech til wen hihn seh di werk don.
2 Jehoava don disaid wen di preechin werk wahn don, ahn den “di en wahn kohn.” (Mach. 24:14, 36) Bot til da taim kom, how wi ku obay di koman fi ‘noh mek wi han resʼ? *—Reed Ecclesiastes 11:6. *
3. Weh wi wahn diskos eena dis aatikl?
3 Eena di laas aatikl, wi mi diskos foa tingz weh wi need fi du soh dat wi ku preech ahn ga gud rizolts. (Mach. 4:19) Eena dis aatikl, wi wahn diskos chree wayz how wi ku stik tu wi disizhan fi preech, noh mata weh prablemz wi fays. Wi wahn laan wai ih impoatant fi (1) put di Kingdom fers eena wi laif, (2) bee payshent, ahn (3) ga schrang fayt.
PUT DI KINGDOM FERS EENA WI LAIF
4. Wai wi need fi mek di preechin werk bee di moas impoatant ting eena wi laif?
4 Jeezas mi prafesai bowt how peepl mi wahn bihayv ahn weh mi wahn hapm joorin di laas dayz. Hihn mi noa dat dehndeh tingz kuda dischrak ih falowaz ahn mek dehn stap preech. Hihn mi tel ih disaiplz fi “kip pahn di lukowt.” (Mach. 24:42) Eena Noawa dayz, dehn mi ga lata tingz weh mi dischrak peepl, ahn sayka dat dehn neva lisn tu di waanin weh Noawa mi giv. Dehndeh saym tingz ku dischrak wee tu. (Mach. 24:37-39; 2 Peet. 2:5) Dat da wai wi need fi mek di preechin werk bee di moas impoatant ting eena wi laif.
5. Bays pahn Aks 1:6-8, how faar di preechin werk wahn reech?
5 Moa dan eva bifoa, wi need fi put di preechin werk fers eena wi laif. Jeezas mi prafesai dat ih falowaz mi wahn kantinyu fi preech eevn afta hihn mi ded, ahn dat dehn mi wahn preech moa dan hihn. (Jan 14:12) Afta Jeezas mi ded, som a ih disaipl dehn gaahn bak tu dehn fishin bizniz. Afta Gaad mi rayz Jeezas op bak fahn di ded, Jeezas mi du wahn mirakl ahn help som a ih disaipl dehn fi kech wahn lata fish. Ih mi yooz da mirakl fi teech ih disaipl dehn dat ih moa impoatant fi preech ahn mek disaipl dan fi du eni ada werk. (Jan 21:15-17) Bifoa Jeezas mi gaahn bak da hevn, ih mi tel ih disaipl dehn dat di preechin werk weh hihn mi staat mi wahn reech tu faar moa plays dan jos Izrel. (Reed Aks 1:6-8.) Yaaz layta, Jeezas mi gi di apasl Jan wahn vizhan bowt weh mi wahn hapm joorin di Laad day. * Wan a di tingz weh Jan mi si da-mi wahn amayzin vizhan a wahn aynjel ‘di preech di gud nyooz tu peepl fahn aal di difrent nayshan dehn, fahn aal di difrent chraib dehn, ahn tu aal di peepl weh taak difrent langwij.ʼ (Rev. 1:10; 14:6) Ih klyaa fi si dat Jehoava waahn wi preech di gud nyooz aal oava di werl til hihn seh di werk don.
6. How wi ku kantinyu fi mek di preechin werk bee di moas impoatant ting eena wi laif?
6 If wi tink bowt aal weh Jehoava di du fi help wi, wi wahn ku mek di preechin werk bee di moas impoatant ting eena wi laif. Fi egzampl, hihn di gi wi lata spirichwal food, laik wi poblikayshan dehn, wi aadyo ahn veedyo rikaadn dehn, ahn wi braadkyaas evri mont. Tink bowt dis: Pahn wi ofishal websait, wi ga infamayshan eena moa dan 1,000 difrent langwij! (Mach. 24:45-47) Peepl eena di werl divaid op bikaaz dehn sopoat difrent politikal paati, bikaaz dehn bilangz tu difrent rilijan, ahn bikaaz som rich an adaz poa. Bot Jehoava peepl yoonaitid laik wan big famili, eevn doa wi da moa dan ayt milyan peepl fahn aal oava di werl. Wahn egzampl a dis yooniti da weh mi hapm pahn Fraideh, Aypril 19, 2019. Jehoava Witnisiz fahn aal oava di werl mi wach wahn veedyo weh mi diskos di skripcha teks fi da day. Den, eena di eevnin pahn da saym day, 20,919,041 peepl mi selibrayt Krais Eevnin Meel. Wen wi tink bowt di privilij wi ga fi si dehndeh wandaful tingz ahn fi tek paat eena dehn, ih mek wi waahn stay bizi eena di preechin werk.
Jeezas neva mek notn dischrak ahn fahn preech di gud nyooz (Paragraaf 7)
7. How Jeezas egzampl ku help wi fi mek di preechin werk bee di moas impoatant ting eena wi laif?
7 Wahn nada way how wi ku mek di preechin werk bee di moas impoatant ting eena wi laif da wen wi fala Jeezas egzampl. Hihn neva mek notn dischrak ahn fahn preech di gud nyooz. (Jan 18:37) Wen Saytan mi-di chrai temp Jeezas wid aala di kingdom a di werl ahn dehn gloari, Jeezas neva giv een tu da temtayshan. Ahn wen adaz mi waahn mek hihn bee fi dehn king, hihn rifyooz dat tu. (Mach. 4:8, 9; Jan 6:15) Mateeryal tingz ahn moni neva ga no powa oava hihn, an ih neva frayd fi persikyooshan needa. (Look 9:58; Jan 8:59) Wen wi fays eniting weh tes wi fayt, wi ku put di preechin werk fers if wi memba di kongsl weh di apasl Paal mi giv. Hihn mi inkorij Kristyanz fi fala Jeezas egzampl soh dat dehn ‘noh geh diskorij ahn giv opʼ!—Heeb. 12:3
BEE PAYSHENT
8. Wat da payshens, ahn wai ih soh impoatant now?
8 Wahn persn weh payshent wahn wayt ahn stay kaam til wahn sichuwayshan chaynj. Wi need fi bee payshent eena lata difrent sichuwayshan. Maybi wi deh eena wahn bad sichuwayshan ahn wi wuda waahn ih en, er maybi wi di wayt fi wahn lang taim fi mek sohnting gud hapm. Di prafit Habakok mi liv rong sohn vailent peepl ahn hihn mi reeli waahn Jehoava bring wahn en tu di wikidnis weh mi deh rong ahn. (Hab. 1:2) Jeezas disaipl dehn mi hoap dat hihn mi wahn set op ih Kingdom ahn free dehn fahn di Roamanz weh mi-di rool oava dehn. (Look 19:11) Wi eega fi si di day wen Gaad Kingdom wahn geh rid a wikidnis ahn mek di ert bee wahn plays wehpaat onli raichos peepl liv. (2 Peet. 3:13) Bot wi haftu bee payshent ahn wayt til wen Jehoava du it, kaaz hihn don ga di taim set. Mek wi diskos sohn wayz how Jehoava teech wi fi bee payshent.
9. Wat da sohn egzampl weh shoa dat Jehoava payshent?
9 Jehoava da di perfek egzampl a payshens. Hihn mi gi Noawa inof taim fi bil di aak ahn fi ‘preech tu di peepl dehn.ʼ (2 Peet. 2:5; 1 Peet. 3:20) Ahn wen Jehoava mi wahn dischrai di wikid peepl weh mi liv da Sadam ahn Gomora, Aybraham mi ga lata kweschan bowt da disizhan, ahn Jehoava mi stap ahn lisn tu ahn. (Gen. 18:20-33) Ahn fi wahn lang taim, Jehoava mi reeli payshent wid di nayshan a Izrel eevn doa dehn neva faytful. (Neh. 9:30, 31) Ahn tudeh, wee ku si Jehoava payshens, bikaaz hihn di gi di peepl weh hihn di jraa tu hihn inof taim fi ‘ton fahn dehn sin dehn.ʼ (2 Peet. 3:9; Jan 6:44; 1 Tim. 2:3, 4) Soh wi si dat di gud egzampl weh Jehoava set help wi fi bee payshent az wi preech ahn teech di gud nyooz. Hihn aalso yooz wahn iloschrayshan eena di Baibl fi teech wi fi bee payshent.
Jos laik wahn payshent faama weh werk haad, wi wahn wayt fi si di rizolts a wi haad werk (Paragraaf 10-11)
10. Weh wi ku laan fahn di faama weh Jaymz 5:7, 8 taak bowt?
10 Reed Jaymz 5:7, 8. Di egzampl a di faama weh di groa sohn plaant teech wi fi bee payshent. Da chroo, som plaants groa faas. Bot moas plaants, espeshali di wan dehn weh projoos food, tek langa fi groa. Di taim fi groa plaants eena Izrel mi laas fi bowt siks monts. Di faama dehn yoostu plaant seed afta di fers rayn tuwaadz di en a di yaa, ahn dehn mi reep di grayn afta di laas rayn rong Maach an Aypril. (Maak 4:28) Wi wuda bee waiz fi kapi di payshens weh di faama shoa. Bot sohntaim, dis noh mait bee eezi.
11. How payshens wahn help wi eena wi minischri?
11 Moas a di taim, wee az hyoomanz waahn si di rizolts a wi werk rait away. Bot if wi waahn wi plaant dehn groa ahn projoos, wi need fi tek kayr a dehn aal di taim. Wi need fi waata dehn ahn root owt di weedz. Jos laik dat, if wi waahn mek disaiplz, wi need fi werk haad. Ih tek taim fi mek wi help wi Baibl styoodents root owt prejudis fahn dehn haat ahn shoa lov. If wi ga payshens, wi noh wahn geh diskorij wen peepl noh lisn tu wi. Ahn wen peepl wilin fi lisn tu wi ahn waahn laan moa bowt Jehoava, wi stil need fi shoa payshens. Wi kyaahn foas wahn Baibl styoodent fi ga fayt. Sohntaim, eevn Jeezas disaipl dehn mi tek wahn wail fi andastan weh hihn mi-di teech dehn. (Jan 14:9) Soh mek wi memba dat eevn doa wee mait plaant di seed dehn ahn waata dehn, da Gaad wahn mek dehn groa.—1 Kor. 3:6.
12. How wi ku shoa payshens wen wi preech tu wi famili membaz weh da noh Witnis?
12 Wan ting weh ku tes wi payshens da wen wi preech tu wi famili membaz weh da noh Witnis. Bot Ecclesiastes 3:1, 7 ku help wi. Ih seh: ‘Fi evriting dehn ga wahn taim, wahn taim fi kip kwaiyet ahn wahn taim fi taak.ʼ Di way wi bihayv ku help wi famili fi waahn lisn tu wi mesij. Bot sayhn taim, wi need fi bee redi fi taak tu dehn bowt Jehoava. (1 Peet. 3:1, 2) Wi need fi werk haad fi preech ahn mek disaiplz, bot wi need fi ga payshens wid evribadi, inkloodin wi famili.
13-14. Hoo da sohn gud egzampl a payshens weh wi ku kapi?
13 Wi ku laan how fi bee payshent fahn Gaad faytful servants eena di paas ahn fahn wi bradaz tudeh day tu. Habakok mi waahn Gaad en aal wikidnis, bot hihn mi shoa payshens wen ih seh: “Ah wahn kip di stan op da mi gyaad stayshan.” (Hab. 2:1) Di apasl Paal mi reeli waahn finish ih minischri, bot ih mi bayr payshens ahn “tel evribadi di Gud Nyooz.”—Aks 20:24.
14 Tink bowt di egzampl a wahn marid kopl weh mi grajuayt fahn Gilyad. Dehn mi geh asain tu wahn konchri weh lee bit a Witnisiz deh ahn weh moas a di peepl da noh Kristyan. Onli wahn lee bit a peepl mi waahn stodi di Baibl. Pahn di ada han, dehn frenz weh mi grajuayt fahn di saym klaas ahn hoo mi-di serv eena ada konchri mi-di ga sohn gud ekspeeryens. Dehn tel dehn bowt aala di peepl weh dehn mi-di stodi di Baibl wid ahn help fi bee Witnisiz. Bot di kopl mi payshent, ahn dehn mi kip aan di preech, eevn doa moas a di peepl eena dehn teritori neva waahn lisn. Afta dehn preech fi ayt yaaz eena wahn teritori wehpaat peepl mi bayli waahn lisn, dehn fainali mi get fi si wan a dehn Baibl styoodents geh baptaiz. Dehn mi onli hapi. Weh wi ku laan fahn di egzampl dehn eena di paas ahn nowadayz? Dehnya faytful servants neva sloa dong eena dehn minischri ner mek dehn han res, ahn Jehoava mi bles dehn fi di payshens weh dehn shoa. Soh mek wi “bee laik dehn wan weh mi ga fayt ahn weh mi payshent til wen dehn geh weh Gaad mi pramis dehn.”—Heeb. 6:10-12.
GA SCHRANG FAYT
15. Wat da wan way how fayt schrentn wi disizhan fi preech?
15 Wee ga fayt eena di mesij weh wi preech, soh wi eega fi shayr it wid az moch peepl az pasabl. Wi chros eena di pramis dehn weh wi fain eena Gaad Werd. (Ps. 119:42; Isa. 40:8) Wi di si how di Baibl prafesi dehn di kohn chroo eena fi wee taim. Wi si how peepl staat tu liv wahn beta laif wen dehn du weh di Baibl seh. Aala dis da proof dat evribadi need fi hyaa di gud nyooz a di Kingdom.
16. Bays pahn Psalm 46:1-3, how fayt eena Jehoava ahn Jeezas wahn help wi fi stik tu wi disizhan fi preech?
16 Aalso, wi ga fayt eena Jehoava, di Wan weh di gud nyooz kohn fram, an eena Jeezas, di wan weh Jehoava chooz fi rool az King a Ih Kingdom. (Jan 14:1) Noh mata weh hapm tu wi, Jehoava wahn aalwayz protek wi ahn gi wi schrent. (Reed Psalm 46:1-3.) * Pahn tap a dat, wi shoar dat Jeezas di dairek di preechin werk fahn hevn, ahn hihn di yooz di powa an atariti weh Jehoava giv ahn.—Mach. 28:18-20.
17. Yooz di ekspeeryens eena di paragraaf fi eksplayn wai wi need fi kip aan di preech.
17 Fayt bil op wi kanfidens dat Jehoava wahn bles wi haad werk, ahn sohntaim eena wayz weh wi noh eevn di ekspek. (Eccl. 11:6) Fi egzampl, evri day towznz a peepl waak paas wi lichricha kyaat ahn lichricha taybl dehn. Yu tink dis da wahn gud way fi preech di gud nyooz? Af koars! Di Novemba 2014 Kingdom Ministry mi ga wahn ekspeeryens bowt wahn yong styoodent weh mi-di goh da yooniversiti weh mi waahn rait wahn ripoat bowt Jehoava Witnisiz. Shee kudn fain wahn Kingdom Haal, bot shee mi fain wan a wi lichricha taybl dehn bai di yooniversiti, ahn shee mi aalso fain di infamayshan weh ih mi need fi rait ih ripoat. Eena di en, shee mi geh baptaiz az wahn Witnis ahn now shee di serv az wahn regyula painyaa. Ekspeeryens laik dehnya inkorij wi fi kip aan di preech, bikaaz dehn shoa dat som peepl stil need fi hyaa di Kingdom mesij.
MEK OP YU MAIN FI NOH MEK YU HAN RES
18. Wai wi ku bee shoar dat di preechin werk wahn hapm di way how Jehoava waahnt?
18 Wi ku bee shoar dat wen dis preechin werk don, ih wahn finish rait pahn taim. Noatis weh mi hapm joorin di dayz a Noawa. Jehoava mi shoa dat hihn noa wen da di bes taim fi du tingz. Bowt 120 yaaz bifoa di Flod mi staat, Jehoava mi disaid wen ih mi wahn hapm. Yaaz layta, Jehoava mi tel Noawa fi bil di aak. Ih pasabl dat Noawa mi werk haad fi bowt 40 er 50 yaaz bifoa di Flod. Eevn doa peepl neva lisn tu ahn, hihn mi kip aan di preech di waanin mesij til di day Jehoava tel ahn fi kehr di animal dehn eena di aak. Den, rait pahn taim, “Jehoava kloaz di doa” a di aak.—Gen. 6:3; 7:1, 2, 16.
19. Weh wi ku luk faawod tu if wi noh mek wi han res?
19 Soon Jehoava wahn mek wi noa dat di preechin werk don, ahn hihn wahn “kloaz di doa” pahn Saytan sistem a tingz. Den ih wahn bring di nyoo werl weh wahn ful a raichos peepl weh obeedyant tu hihn. Til den, mek wi kantinyu fi kapi di egzampl a Noawa, Habakok, an ada faytful servants hoo neva mek dehn han res. Ahn mek wi kantinyu fi foakos pahn wi preechin werk, mek wi kip aan di bee payshent, ahn mek wi kip wi fayt eena Jehoava ahn fi hihn pramis dehn schrang.
SANG 75 “Si Mi Ya! Sen Mee!”
^ párr. 5 Di laas aatikl mi inkorij Baibl styoodents weh di mek proagres fi aksep Jeezas invitayshan fi bee fi hihn disaipl. Dis aatikl wahn diskos chree wayz how poblishaz, weda dehn nyoo er dehn di preech fi wahn lang taim, ku stik tu dehn disizhan fi kantinyu preech di gud nyooz a di Kingdom til wen Jehoava seh di werk don.
^ párr. 2 WEH IH MEEN? Eena dis aatikl, di frayz “noh mek yu han res” meen dat wi haftu stik tu wi disizhan fi preech di gud nyooz til Jehoava seh di werk don.
^ párr. 2 Ecclesiastes 11:6: “Plaant yu seed eena di maanin ahn noh mek yu han res til eevnin; bikaaz yu noh noa wich wan wahn groa, weda da dis wan er da wan, er maybi di too a dehn groa.”
^ párr. 5 Di Laad day bigin eena 1914 wen Jeezas mi staat rool az King, ahn da day wahn kantinyu op tu di en a fi hihn Towzn-Yaa Rool.
^ párr. 16 Psalm 46:1-3: “Da Gaad protek wi ahn gi wi schrent, ahn hihn redi fi help wi wen taimz haad. 2 Dat da wai wi noh wahn frayd, eevn if di ert chaynj, eevn if di mongtin dehn jrap dong tu di batam a di see, 3 eevn if di see geh rof ahn foam op, eevn if di see geh soh rof dat ih mek di mongtin dehn shayk.”
