1-2. Akaadn tu 1 Timoti 6:20, weh Timoti mi haftu du?

WAHN lata taim, wi mait chros peepl wid tingz weh preshos tu wi er weh wert lata moni. Fi egzampl, wi mait put wi moni da bank. Wen wi du dis, wi ekspek dat wi moni wahn bee sayf ahn nobadi wahn teef it. Dat da wai wi ku andastan weh ih meen fi chros sombadi fi main sohnting weh preshos tu wee.

² Reed 1 Timoti 6:20. Di apasl Paal mi rimain Timoti dat hihn mi ga sohnting veri preshos. Hihn mi ga wahn kompleet nalij a Gaad perpos fi hyoomanz. Timoti mi aalso ga di privilij fi ‘preech di werdʼ ahn fi “du di werk a wahn ivanjelis.” (2 Timoti 4:2, 5) Paal mi tel Timoti fi protek weh ih mi gat. Jos laik Timoti, wee ga sohn preshos tingz tu. Wat da som a dehnya tingz? Ahn wai wi haftu protek di chrezha dehn weh Jehoava gi wi?

3-4. Wat da sohn reezn wai di chroot eena di Baibl soh preshos?

³ Jehoava lov wi, soh ih gi wi wahn kompleet nalij a di preshos chroot weh deh eena fi hihn Werd, di Baibl. Di chroot eena di Baibl preshos bikaaz ih teech wi fi ga wahn gud rilayshanship wid Jehoava an ih eksplayn how wi ku bee reeli hapi. Wen wi bileev di chroot ahn mek ih gaid wi laif, wi noh wahn bee slayv tu faals teechinz ahn wi ku liv wahn kleen laif.—1 Kor. 6:9-11.

⁴ Wahn nada reezn wai di chroot eena di Baibl soh preshos da bikaaz Jehoava onli giv it tu hombl peepl hoo ga di rait haat kandishan. (Aks 13:48) Peepl weh hombl aksep dat di faytful ahn waiz slayv da di wan weh Jeezas di yooz fi teech di chroot tudeh. (Mach. 11:25; 24:45, NW) Notn moa preshos  dan di chroot, ahn wi kyaahn andastan it pahn wi oan.—Prov. 3:13, 15.

5. Wat els Jehoava gi wi?

⁵ Jehoava aalso gi wi di privilij fi teech adaz di chroot bowt hihn ahn fi hihn perpos. (Mach. 24:14) Dis mesij soh preshos bikaaz ih help peepl fi bee paat a Jehoava famili an ih gi dehn di apachooniti fi get evalastin laif. (1 Tim. 4:16) Weda wi goh owt pahn servis wahn lat er wahn lee bit, wi stil di sopoat di moas impoatant werk weh di hapm rait now. (1 Tim. 2:3, 4) Da wahn privilij fi werk lang wid Gaad!—1 Kor. 3:9.

6. Weh hapm tu som Kristyanz weh neva hoal aan tu weh Gaad mi gi dehn?

⁶ Bak eena Timoti taim, sohn Kristyanz neva apreeshiayt di privilij fi werk lang wid Gaad. Deemas da-mi wan a dehn. Hihn mi giv op ih privilij fi serv lang wid Paal bikaaz hihn mi lov di werl ahn weh di werl ga fi aafa. (2 Tim. 4:10) Sohn ada Kristyan weh neva apreeshiayt da privilij da-mi Faijelos ahn Hermajeneez. Ih pasabl dat dehn mi stap preech bikaaz dehn mi frayd dat dehn mi haftu fays di saym kaina persikyooshan laik weh Paal mi fays. (2 Tim. 1:15) Haiminayos, Alegzanda, ahn Faileetos mi ton apastayt ahn lef di chroot. (1 Tim. 1:19, 20; 2 Tim. 2:16-18) Aala dehndeh peepl yoostu lov Jehoava, bot di tingz weh Jehoava mi gi dehn neva preshos tu dehn agen.

7. Weh Saytan yooz fi chrai get wi fi du weh hihn waahnt?

⁷ Weh Saytan yooz fi chrai get wi fi giv op di chrezha weh Jehoava gi wi? Ih yooz tingz laik TV, moovi, di Intanet, buk, ahn magazeen. Lee bit bai lee bit, dehnya tingz ku mek wi tink an ak eena wahn way weh ku kaaz wi fi stap lov Jehoava an obay fi hihn laa dehn. Saytan yooz persikyooshan er tingz weh peepl seh bowt wi fi chrai mek wi feel frayd ahn stap preech. An ih chrai temp wi fi lisn tu “teechin weh noh agree wid Gaad, weh sohn peepl kaal ‘nalij.ʼ” Af koars, wi noa dat dis kaina teechin da fahn apastayts, ahn dehn waahn wi lef di chroot.—1 Tim. 6:20, 21.

8. Weh yu laan fahn di ekspeeryens a wahn brada weh naym Daniel?

⁸ If wi noh kyaaful, wi ku lef di chroot lee bit bai lee bit. Noatis weh mi hapm tu wahn brada weh naym Daniel, hoo mi lov fi play veedyo gaym. * Hihn seh: “Ah staat tu play veedyo gaym wen Ah mi bowt ten yaaz oal. Fers, Ah mi play gaym weh mi aarait fi wahn Kristyan. Bot lee bit bai lee bit, Ah staat tu play gaym weh ga fi du wid spiritizm ahn weh vailent.” Bifoa Daniel mi eevn kanshos, ih mi-di play veedyo gaym fi bowt 15 owaz evri day. Daniel seh: “Deep dong  eena mi haat, Ah mi noa dat dehndeh kaina gaym ahn di amonk a taim Ah spen di play dehn mi-di jraa mi weh fahn Jehoava. Bot, Ah mi kanvins miself dat Ah neva reeli haftu du weh di Baibl seh.” Soh if wi noh kyaaful, wi ku blain wiself fahn si how entataynment ku afek wi, ahn bifoa wi noa it, wi let goh a di chroot. If dat eva hapm tu wi, wi ku en op di looz di preshos tingz weh Jehoava gi wi.

9. Akaadn tu 1 Timoti 1:18, 19, weh Paal mi kompyaa Timoti tu?

⁹ Reed 1 Timoti 1:18, 19. Paal mi kompyaa Timoti tu wahn soalja an inkorij ahn fi “fait haad eena dis gud fait.” Timoti mi deh eena wahn waar, bot da neva wahn waar gens hyoomanz, da-mi wahn spirichwal waar. How Kristyanz da laik soaljaz weh di fait eena wahn waar? Weh kaina soalja wi need fi bee? Mek wi diskos faiv tingz weh wi ku laan fahn Paal iloschrayshan. Dehnya faiv tingz ku help wi fi hoal aan tu di chroot.

10. Wai wi need fi bee laayal?

¹⁰ Bee laayal. Wahn gud soalja da wahn laayal soalja. Ih wahn fait haad fi protek enibadi weh ih lov er eniting weh impoatant tu hihn. Paal mi inkorij Timoti fi giv ih laif tu Gaad, kaaz dat wuda mi help ahn fi bee wahn laayal persn. (1 Tim. 4:7) Di moa wi lov Gaad, di taita wi wahn hoal aan tu di chroot.—1 Timoti 4:8-10; 6:6.

11. Wai wi need fi chrayn wiself fi du weh rait?

¹¹ Chrayn yuself fi du weh rait. Wahn soalja need fi disiplin ihself soh dat ih ku aalwayz bee redi fi waar. Timoti kuda mi fait gens Saytan chriks bikaaz ih mi fala Paal advais ahn werk haad fi fait gens rang dizaiyaz. Ih mi aalso werk haad fi koltivayt gud kwalitiz ahn spen taim wid ih Kristyan bradaz ahn sistaz. (2 Tim. 2:22) Timoti mi haftu werk haad fi chrayn ihself da way. Wee need fi chrayn wiself laik dat tu. (Roam. 7:21-25) Pahn tap a dat, if wi disiplin wiself, wi wahn ku geh rid a di oal persn weh wi yoostu bee ahn liv laik wahn nyoo persn fi Gaad. (Ifee. 4:22, 24) Ahn wen wi feel taiyad da di en a wahn lang day, wi mait need fi push wiself fi goh da meetin.—Heeb. 10:24, 25.

12. Weh wi ku du fi laan fi yooz di Baibl beta?

¹² Wahn soalja need fi praktis wid ih wepan dehn. An if ih waahn laan how fi yooz dehn eena di rait way, ih need fi praktis aal di taim. Wee need fi du di saym ting if wi waahn laan how fi yooz di Baibl. (2 Tim. 2:15) Wi laan sohn wayz fi yooz di Baibl da wi meetin dehn. Bot if wi waahn help ada peepl fi bileev dat di chroot weh deh eena di Baibl ku help dehn, wi haftu stodi it aal di taim. Wi need fi yooz di Baibl fi schrentn wi fayt. Dis meenz dat wi need fi du moa dan jos reed di Baibl. Wi waahn tink bowt weh wi reed ahn du risaach eena wi poblikayshanz soh dat wi ku andastan di Skripchaz ahn yooz dehn eena wi laif. (1 Tim. 4:13-15) Den, wi wahn ku yooz di Werd a Gaad fi teech adaz. Dis meenz dat wi noh jos wahn reed wahn vers fahn di Baibl fi dehn. Wi wahn help dehn fi andastan di vers ahn how dehn ku yooz it eena dehn laif. Soh wen wi stodi di Baibl aal di taim, wi ku bee beta teechaz a di Werd a Gaad.—2 Tim. 3:16, 17.

13. Bays pahn Heebrooz 5:14, weh wi need fi du fi bee wahn gud soalja?

¹³ Laan fi tel di difrens bitween gud ahn bad. Wahn soalja haftu noa wen fi ekspek daynja an how fi avoid it. Wee aalso need fi laan fi rekonaiz eni sichuwayshan weh ku haam wi ahn den avoid di daynja. (Prov.  22:3; reed Heebrooz 5:14.) Fi egzampl, wi need fi bee waiz wen wi di chooz entataynment an ada tingz weh wi du fi fon. Moas a di TV shoa ahn moovi dehn ga imoaral seen eena dehn. Jehoava noh laik dehndeh kaina tingz, ahn dehn wahn definaytli haam wi. Wi noa dat Jehoava hayt wen peepl du imoaral tingz, ahn wi aalso noa dat peepl weh du imoaral tingz hert dehnself an adaz tu. Soh wi haftu avoid dehndeh kaina entataynment bikaaz dehn ku mek wi lov fi Jehoava geh week.—Ifee. 5:5, 6.

14. How Daniel mi laan fi tel di difrens bitween gud ahn bad?

¹⁴ Daniel, weh wi mi menshan lee erliya, mi fainali kohn tu ih sensiz ahn riyalaiz dat di kaina veedyo gaymz weh ih mi-di play da-mi wahn prablem fi hihn. Soh weh ih mi du? Ih gaahn du sohn risaach eena Wachtower Library soh dat ih kuda mi geh help fi deel wid ih prablem. How dat mi afek ahn? Ih stap play dehndeh bad veedyo gaym. Ih kyansl ih aada fi di gaym dehn onlain an ih stap play wid di ada playa dehn. Daniel seh: “Insteda play veedyo gaym, Ah staat tu du ada fon tingz wid di bradaz ahn sistaz fahn di kangrigayshan.” Now, Daniel da wahn painyaa ahn wahn elda.

15. Wai ih daynjaros fi lisn tu apastayts?

¹⁵ Paal mi waan Timoti fi avoid apastayts kaaz dehn spred loan lai. Wi aalso need fi memba dat eni infamayshan weh apastayts di spred nowadayz da loan lai. (1 Tim. 4:1, 7; 2 Tim. 2:16) Fi egzampl, dehn mait chrai spred lai bowt wi bradaz er chrai mek wi dowt if wi ku chros Jehoava aaganaizayshan. Dehndeh kaina lai ku mek wi fayt geh week. Wi noh fi bileev dehn. Wai? Bikaaz di peepl weh spred dehndeh kaina lai “noh tink rait ahn dehn noh teech weh chroo bowt Krais nohmoh.” Dehn jos “laik aagyu ahn fait oava werdz.” (1 Tim. 6:4, 5) Apastayts waahn wi bileev fi dehn lai ahn stap chros wi bradaz.

16. Weh ku dischrak wi, ahn wai wi haftu avoid it?

¹⁶ Avoid eniting weh ku dischrak yu. Timoti da-mi wahn “chroo soalja a Krais Jeezas.” Soh ih mi foakos pan ih minischri ahn neva mek mateeryal tingz er ada goalz eena laif dischrak ahn. (2 Timoti 2:3, 4) Jos laik Timoti, wi noh fi mek mateeryal tingz dischrak wi. Som peepl weh rich tink dehn powaful, bot di Baibl seh dat richiz ku chrik  wi ahn mek wi looz wi lov fi Jehoava. Ih ku mek wi looz wi apreeshiayshan fi di Werd a Gaad, ahn bifoa wi noa it, wi noh eevn waahn goh preech tu adaz. (Mach. 13:22) Kip yu laif foakos pahn wan ting—di Kingdom a Gaad. Ahn yooz yu taim an enerji fi put da Kingdom fers eena yu laif.—Mach. 6:22-25, 33.

17-18. Weh wi ku du fi protek wi frenship wid Jehoava?

¹⁷ Bee redi fi protek yuself. Wahn soalja need fi plan heda taim bowt weh ih wahn du fi protek ihself. If wi waahn protek di tingz weh Jehoava gi wi, wi need fi ak faas wen wi si daynja. Weh ku help wi fi du dat? Wi need fi plan heda taim ahn noa weh wi wahn du wen wi si daynja.

¹⁸ Az wahn iloschrayshan, tink bowt dis sichuwayshan: Wen yu deh da wahn ivent, yu yoozhwali wuda hyaa wahn anonksment jos bifoa di proagram bigin weh seh chek wehpaat di kloasis doa deh. Wai? Soh dat wi ku hori get owta di bildin in kays a wahn imerjensi. Jos laik dat, wi ku plan heda taim wich “doa” wi wahn tek if wi si wahn imoaral seen, kruwil vailens, er apastayt mateeryal wail wi di yooz di Intanet er wail wi di wach wahn moovi er TV proagram. If wi redi fi weh ku hapm, wi ku ak rait away fi protek wi frenship wid Jehoava ahn stay kleen eena fi hihn sait.—Ps. 101:3; 1 Tim. 4:12.

19. Wat da sohn blesin wi wahn injai if wi protek di preshos tingz weh Jehoava gi wi?

¹⁹ Wi need fi protek di preshos tingz weh Jehoava gi wi—tingz laik di chroot fahn di Baibl ahn di privilij fi teech dehndeh chroot tu adaz. If wi protek dehnya chroot, wi wahn injai wahn kleen kanshans fronta Gaad, wi wahn ga wahn laif weh ga meenin, ahn wi wahn feel di hapinis weh kohn wen yu help sombadi fi get fi noa Jehoava. Wid fi hihn help, wi wahn ku protek weh ih gi wi.—1 Tim. 6:12, 19.