1. Weh invitayshan Jeezas mi gi tu foa fishaman, ahn weh dehn mi du?

DI DISAIPLZ Peeta, Anjru, Jaymz, ahn Jan mi ga wahn fishin bizniz. Dehn mosi mi sopraiz fi hyaa Jeezas invitayshan: “Unu kungoh lang wid mi, ahn insteda kech fish, Ah wahn mek unu kech peepl fi Gaad.” Weh dehn mi du? Di Baibl seh: “Sayhn taim . . . dehn jrap dehn net ahn gaahn lang wid Jeezas.” (Mach. 4:18-22) Da disizhan mi wahn chaynj dehn laif fareva. Soh insteda kech fish, dehn mi wahn di “kech peepl.” (Look 5:10) Tudeh, Jeezas di invait sinsyaa peepl hoo lov di chroot fi du di saym ting. (Mach. 28:19, 20) Yoo don aksep Jeezas invitayshan fi bee ih disaipl?

2. Wai da wahn seeryos disizhan fi bee wahn disaipl a Krais, ahn weh wahn help wi fi mek da disizhan?

² Maybi yu di stodi di Baibl fi wahn wail ahn yu don mek sohn chaynjiz eena yu laif. Now, doh, yu need fi disaid if yu waahn goh preech di gud nyooz er nat. If yu di hoal bak fahn aksep Jeezas invitayshan, noh feel diskorij. Yu praabli di hoal bak kaaz yu noa dat dis da wahn reeli impoatant disizhan. Now, wi noa dat Peeta an ih fren dehn mi lef dehn fishin bizniz rait away. Bot Peeta an ih breda neva mek da disizhan widowt tink bowt it fers. Moa dan siks monts erliya, dehn mi don seh dat Jeezas da di Mesaiya. (Jan 1:35-42) Jos laik dehn, yoo praabli don laan wahn lat bowt Jehoava ahn Jeezas, ahn yu mosi waahn kantinyu fi geh kloasa tu Jehoava. Bot bifoa yu disaid fi goh preech wid di  kangrigayshan, yu haftu tink bowt it kyaafuli. Weh mi help Peeta, Anjru, an adaz fi mek da disizhan?

3. Weh wahn help yoo fi preech di gud nyooz?

³ Jeezas fers disaipl dehn neva layzi, ahn dehn mi noa fi du dehn jab gud. Dehn mi ga korij ahn noa how fi disiplin dehnself. Dehndeh saym kwalitiz mi help dehn fi preech di gud nyooz ahn ga gud rizolts. Dis aatikl wahn diskos how dehndeh saym kwalitiz ku help yoo fi preech di gud nyooz ahn ga gud rizolts tu.

4. Wai Peeta mi waahn bee wahn fishaman?

⁴ Peeta mi kech fish fi sopoat ih famili, bot dat da-mi moa dan jos wahn jab fi hihn. Peeta mi lov fi goh fishin. (Jan 21:3, 9-15) Bot ih mi laan fi lov wahn nada kaina fishin, fishin fi peepl. Ahn wid Jehoava help, Peeta mi laan fi du dis preechin werk reeli gud.—Aks 2:14, 41.

5. Bays pahn Look 5:8-11, wai Peeta mi frayd, ahn weh ku help wi fi noh feel da saym way?

⁵ Di moas impoatant reezn wai wi du dis werk da bikaaz wi lov Jehoava. Wi lov fi Jehoava ku help wi fi tel adaz bowt hihn, eevn doa wi mait feel dat wi noh gud inof. Wen Jeezas mi invait Peeta fi bee ih disaipl, ih tel ahn: “Noh frayd.” (Reed Look 5:8-11.) Now, Peeta neva frayd fi weh kuda mi hapm tu hihn if ih mi staat fala Jeezas. Insted, ih mi sopraiz fi si humoch fish Jeezas mi help dehn kech. Hihn mi noa dat Jeezas mi jos du wahn mirakl, an Peeta mi feel dat ih neva gud inof fi werk lang wid Jeezas. Jos laik Peeta, yoo mait feel frayd tu. Maybi yu feel nervos bowt evriting weh yu wahn haftu du fi bee wan a Krais disaipl. If dat da how yu feel, schrentn yu lov fi Jehoava, Jeezas, ahn  yu nayba. Den yu wahn waahn aksep Jeezas invitayshan fi bee ih disaipl.—Mach. 22:37, 39; Jan 14:15.

6. Wat da sohn ada reezn wai wi preech?

⁶ Mek wi taak bowt sohn ada reezn wai wi preech. Wi goh preech bikaaz wi waahn obay Jeezas koman: “Goh ahn chrayn peepl . . . fi bee mi disaipl dehn.” (Mach. 28:19, 20) Wahn nada reezn wai wi preech da bikaaz peepl ‘kanfyooz ahn noh ga nobadi fi help dehnʼ laan di chroot bowt di Kingdom. (Mach. 9:36) Jehoava waahn sayv aal kaina peepl an ih waahn dehn noa di chroot.—1Tim. 2:4.

7. How Roamanz 10:13-15 shoa wi dat ih impoatant fi mek wi goh preech?

⁷ Wen wi tink bowt how di preechin werk ku sayv peepl laif, ih wahn moov wi fi goh preech. Wahn fishaman sel er eet di fish weh ih kech. Bot wee “kech” peepl soh dat wi ku help sayv dehn laif.—Reed Roamanz 10:13-15; 1Tim. 4:16.

8-9. Weh wahn fishaman need fi noa, ahn wai?

⁸ Eena Jeezas taim, wahn Izrelait fishaman mi need fi noa weh kaina fish ih ku kech. (Lev. 11:9-12) Ih mi aalso need fi noa wehpaat ih kuda mi fain di kaina fish weh ih mi waahnt. Fish yoozhwali stay wehpaat di waata soot dehn ahn wehpaat plenti food deh. Yu tink ih mata weh taim wahn fishaman goh fishin? Yes ih mata! Wahn brada weh liv pahn wahn ailan eena di Pacific mi invait wahn mishineri fi goh fishin wid ahn. Di mishineri tel ahn, “Ah wahn meet yu nain aklak da maanin.” Di brada tel ahn, “Noh man. Wee noh goh fishin wen da wahn gud taim fi wee, wee goh fishin wen da wahn gud taim fi kech fish.”

⁹ Jeezas disaipl dehn bak den mi du di saym ting tu. Dehn yoostu goh wehpaat peepl mi deh, da wahn taim wen dehn wuda lisn. Fi egzampl, Jeezas disaipl dehn yoostu preech da di templ, da di sinagag dehn, fahn hows tu hows, ahn da di maakit plays dehn. (Aks 5:42; 17:17; 18:4) Soh wi need fi noa wen peepl eena fi wee ayrya deh hoam er wehpaat els wi ku fain peepl fi preech tu.—1 Kor. 9:19-23.

10. Wat da sohn toolz weh Jehoava aaganaizayshan gi wi?

¹⁰ Wahn fishaman need fi ga di rait fishin lain, huk, ahn bayt. An ih aalso haftu noa how fi yooz dehn. Wee need fi ga di rait ikwipment fi du wi werk tu. Ahn wi need fi noa how fi yooz di tool dehn. Jeezas mi giv ih disaipl dehn klyaa inschrokshanz bowt how fi preech di gud nyooz. Ih mi tel dehn weh dehn fi kehr lang wid dehn, wehpaat fi goh preech, ahn weh fi seh. (Mach. 10:5-7; Look 10:1-11) Tudeh, Jehoava aaganaizayshan gi wi wahn Teechin Toolbaks weh ga lata toolz weh werk reeli gud. * Ahn wi geh chraynin pahn how fi yooz dehndeh toolz. Da chraynin help wi fi bee gud teechaz ahn ga kanfidens wen wi preech.—2Tim. 2:15.

11. Wai wi need fi ga korij?

¹¹ Peepl weh goh fishin fi wahn livin need fi ga korij. Sohntaim, dehn fays bad weda an ada tingz weh dehn noh ekspek owt da see. Ahn lata taim, dehn werk chroo di hoal nait. Soh jos laik dat, wahn disaipl a Krais need fi ga korij. Wen wi staat tu preech ahn tel adaz dat wee da wan a Jehoava Witnisiz, wi famili mait ton gens wi, wi frenz mait mek fon a wi, ahn som peepl mait rifyooz fi lisn tu wi mesij.  Bot dis noh sopraiz wi, kaaz Jeezas mi seh dat peepl mi wahn persikyoot fi hihn falowaz.—Mach. 10:16.

12. Bays pahn Joshua 1:7-9, weh ku help wi fi ga korij?

¹² How yu ku ga korij? Fers, yu mos bileev dat Jeezas stil di gaid di preechin werk fahn hevn. (Jan 16:33; Rev. 14:14-16) Den, schrentn yu fayt eena di pramis dat Jehoava wahn tek kyaa a yu. (Mach. 6:32-34) Di schranga yu fayt get, di moa korij yu wahn gat. Peeta an ih fren dehn mi shoa dat dehn mi ga lata fayt wen dehn mi lef dehn fishin bizniz. Saym way soh, yoo mi shoa lata fayt wen yu tel yu frenz ahn famili dat yu di stodi di Baibl wid Jehoava Witnisiz ahn dat yu di goh da dehn meetinz! Fi shoar, yu don mek sohn big chaynjiz soh dat yu ku liv yu laif akaadn tu Jehoava raichos standadz. Dat tek fayt ahn korij tu. Soh di moa yu bil op yu korij, di moa kanfidens yu wahn gat dat “Jehoava yu Gaad wahn deh wid yu, noh kay wehpaat yu goh.”—Reed Joshua 1:7-9. *

13. Wat da too tingz weh ku help yu fi bil op yu korij?

¹³ Wat els ku help yu fi bil op yu korij?  Yu need fi pray fi korij. (Aks 4:29, 31) Jehoava wahn ansa yu pryaaz an ih wahn neva lef yu. Hihn wahn aalwayz dehdeh fi sopoat yu. Aalso, tink bowt how Jehoava mi sayv ih faytful servants eena di paas. Tink bowt how hihn don help yu fays difrent chalenjiz ahn how ih gi yu di schrent fi mek chaynjiz eena yu laif. If Jehoava mi help fi hihn peepl chroo di Red See, yu noh tink dat hihn ku help yoo fi bee wan a Krais disaipl tu? (Ex. 14:13) Yoo ku ga di saym fayt eena Jehoava laik di saamis weh mi seh: “Jehoava deh pahn mai said; Ah noh wahn frayd fi notn. Da weh enibadi ku du tu mee?”—Ps 118:6.

14. Weh yu laan fahn di ekspeeryens a Masae ahn Tomoyo?

¹⁴ Wahn nada way fi bil op wi korij da fi laan how Jehoava help peepl weh shai er frayd fi taak tu adaz. Mek wi si weh wi ku laan fahn wahn sista weh naym Masae. Shee mi shai an ih mi feel laik ih kuda neva preech tu adaz. Ih mi haad fi mek shee taak tu wahn schraynja. Tu shee, da mi laik if ih mi-di klaim wahn hai hai waal, sohnting weh ih kudn du. Soh shee mi chrai haad fi schrentn ih lov fi Gaad ahn fi ih nayba dehn. Shee mi tink bowt di taimz weh wi di liv eena ahn how ih need fi get owt deh ahn preech; soh ih pray fi ga di dizaiya fi preech. Shee laan fi deel wid ih chalenj, an ih mi eevn staat tu agzilari painyaa. Jehoava ku help nyoo poblishaz fi “ga korij” tu. Mek wi si weh wi ku laan fahn wahn nada sista weh naym Tomoyo. Wen shee mi staat tu preech fahn hows tu hows, di fers persn ih meet hala aata ahn, an tel ahn: “Ah noh waahn ga notn fi du wid Jehoava Witnisiz!” ahn den ih slam di doa. Tomoyo neva frayd, an ih tel di sista weh mi-di werk wid ahn: “Yu hyaa dat? Ah neva eevn haftu seh eniting, ahn shee don noa dat Ai da wan a Jehoava Witnisiz. Ah feel soh hapi!” Tomoyo di regyula painyaa now.

15. Weh ih meen fi disiplin wiself, ahn wai dis impoatant fi wahn Kristyan?

¹⁵ Wahn fishaman weh disiplin ihself wahn ga sokses. Wahn persn weh disiplin ihself da sombadi weh push ihself fi du di tingz weh ih need fi du. Fi egzampl, wahn fishaman weh ga wahn fishin bizniz haftu disiplin ihself fi get op erli ahn stay til di werk don, eevn if di weda bad. Jos laik dat, wee need fi disiplin wiself tu if wi waahn bayr op ahn finish wi werk.—Mach. 10:22.

16. How wi ku laan fi disiplin wiself?

¹⁶ Wi payrents noh perfek, soh wi neva baan di noa how fi disiplin wiself. Az a mata a fak, moas a di taim wen sohnting haad deh fi mek wi du, wi chooz di eeziyes way fi du it. Bot sohntaim, di moas impoatant tingz weh wi need fi du noh eezi. Soh wi need fi laan fi ga self-kanchroal. Soh den, wi need help fi chrayn wiself fi du di tingz weh haad fi mek wi du. Jehoava gi wi di help weh wi need chroo ih hoali spirit.—Gal. 5:22, 23.

17. Bays pahn 1 Korintyanz 9:25-27, weh Paal seh ih mi haftu du fi disiplin ihself?

¹⁷ Di apasl Paal da-mi sombadi weh yoostu disiplin ihself. Bot ih admit dat ih mi haftu ‘chreet ih badi rof,ʼ soh dat ih kuda mi du weh rait. (Reed 1 Korintyanz 9:25-27.) Hihn inkorij adaz fi disiplin dehnself ahn du evriting ‘eena aada, an eena wahn deesent way.ʼ (1 Kor. 14:40) Wi need fi werk haad fi disiplin wiself if wi waahn kip wahn gud spirichwal skejul weh wahn help wi fi preech ahn teech di gud nyooz az moch az wi kud.—Aks 2:46.

18. Weh wi need fi du if wi waahn Jehoava si dat wi di ga sokses eena wi preechin werk?

¹⁸ Wahn fishaman weh ga wahn fishin bizniz noa dat ih ga sokses bays pahn di amonk a fish weh ih kech. Pahn di ada han, fi wee preechin werk difrent. Wi sokses noh bays pahn humoch peepl wi help fi bee Jehoava Witnisiz. (Look 8:11-15) Tu Jehoava, az lang az wi noh giv op eena di preechin werk wi di ga sokses. Wai? Bikaaz wi di obay hihn an ih Son.—Maak 13:10; Aks 5:28, 29.

19-20. Wat da wahn speshal reezn wai wee need fi preech tudeh?

¹⁹ Eena sohn konchri, di fishaman dehn onli ku goh fishin joorin sertn monts. Soh bifoa di seezn en, dehn praabli wuda werk haada fi kech az moch fish az dehn kud. Az wahn disaipl a Krais, wee di “kech peepl,” soh wi ga wahn speshal reezn fi preech az moch az wi kud now: Di en a dis werl deh kloas! Wi noh ga lata taim lef fi preech dis gud nyooz weh ku sayv peepl laif. Noh hoal bak ner wayt fi evriting eena yu laif fi bee perfek soh dat yu ku du dis impoatant werk.—Eccl. 11:4.

²⁰ Now da di taim fi schrentn yu dizaiya fi preech, fi laan moa bowt di mesij weh deh eena di Baibl, fi bil op yu korij, ahn fi disiplin yuself. Moa dan ayt milyan peepl di preech di gud nyooz aal oava di werl. Soh wi invait yu fi werk lang wid wi soh dat yu wahn feel di jai weh onli kohn fahn Jehoava. (Neh. 8:10) Preech az moch az yu kud ahn kantinyu fi du dis til wen Jehoava seh di werk don. Eena di neks aatikl, wi wahn diskos chree wayz how wi ku stik tu wi disizhan fi kantinyu preech di gud nyooz a di Kingdom.