1-2. Weh di prafit Hagai seh mi wahn hapm eena fi wee taim?

“EENA jos wahn kopl a minits, di shap ahn di oal bildin dehn mi staat tu jrap dong.” “Evribadi mi-di panik . . . Sohn peepl seh dat ih mi laas fi bowt too minits. Bot tu mee, ih mi feel laik ih mi laas way langa dan dat.” Dehndeh da koments fahn sohn peepl hoo mi gaahn chroo wahn ertkwayk da Nepal eena 2015. If yoo wuda ekspeeryens sohnting laik dat, yu wuda neva ferget it.

² Wee akchwali di goh chroo sohnting simila rait now. Bot ih noh jos di hapm da wan siti er konchri. Jehoava di shayk aala di nayshan dehn a dis werl, ahn hihn di du dis fi wahn lata yaaz now. Di prafit Hagai mi prafesai dat dis mi wahn hapm. Hihn mi seh: “Dis da weh Jehoava di Komanda a di hevnli aami seh, ‘Soon Ai wahn shayk op di hevnz ahn di ert ahn di see ahn di jrai lan wan moa taim.ʼ”—Hag. 2:6.

3. How da prafesi fahn Hagai difrent fahn wahn reel ertkwayk?

³ Da prafesi fahn Hagai difrent fahn wahn reel ertkwayk. Wahn reel ertkwayk onli kaaz dischrokshan. Dis prafesi onli kaaz gud tingz fi hapm. Dis da weh Jehoava seh: “Ai wahn shayk aala di nayshan dehn, ahn di preshos tingz fahn owta aala di nayshan dehn wahn kom een; an Ai wahn ful op dis hows wid mai gloari.” (Hag. 2:7) Weh dis prafesi mi meen fi dehn wan weh mi liv joorin Hagai taim? Ahn weh dis meen fi wee tudeh? Wi wahn diskos di ansa tu dehndeh kweschan an wi wahn aalso laan how wee ku tek paat eena di werk weh di shayk aala di nayshan dehn tudeh.

4. Wai Jehoava mi sen di prafit Hagai tu fi Hihn peepl?

⁴ Jehoava mi gi di prafit Hagai wahn impoatant asainment. Bot mek wi kansida weh mi hapm bifoa dat. Eena 537 B.C.E., wahn groop a Jooz gaahn bak da Jeroosalem fahn Babilan. Hagai mi praabli deh rait monks dehn Jooz. Noh lang afta dehn reech Jeroosalem, dehn staat tu bil bak Jehoava templ. (Ezra 3:8, 10) Bot noh tu lang afta dat, sohnting bad mi hapm. Peepl weh mi liv rong dehn mi staat tu persikyoot dehn, ahn dis mi mek dehn feel diskorij ahn stap bil Jehoava templ. (Ezra 4:4; Hag. 1:1, 2) Soh eena 520 B.C.E., Jehoava mi tel Hagai fi inkorij di Jooz soh dat dehn ku get bak op ahn finish bil di templ. *—Ezra 6:14, 15.

5. Wai Hagai mesij mi inkorij Gaad peepl?

⁵ Di Jooz mi feel veri diskorij, soh di mesij weh Jehoava mi tel Hagai fi gi di Jooz da-mi fi inkorij dehn ahn mek dehn fayt geh schranga. Hihn mi tel dehn: “Jehoava seh, ‘Ga korij aala unu peepl a di lan, ahn werk. Bikaaz Ai deh wid unu,ʼ Jehoava di Komanda a di hevnli aami seh.” (Hag. 2:4) Di ekspreshan “Jehoava di Komanda a di hevnli aami” mosi mi reeli inkorij di Jooz. Jehoava ga atariti oava wahn big aami a aynjelz, soh di Jooz mi need fi chros eena Jehoava if dehn mi waahn ga sokses.

6. Weh wuda bee di rizolt a di prafesi fahn Hagai?

⁶ Jehoava mi sen Hagai fi tel di Jooz dat Hihn wahn shayk aala di nayshan dehn. Da mesij mi inkorij di Jooz weh mi feel diskorij ahn weh mi stap bil Jehoava templ. Di mesij mi shoa dat Jehoava mi wahn shayk Perzha, weh da-mi di werl powa bak den. Weh mi wahn hapm bikaaz a dis? Fers, Gaad peepl mi wahn finish bil bak di templ. Den, eevn peepl weh da neva Joo mi wahn kohn wership Jehoava lang wid fi hihn peepl eena da sayhn templ. Wi ku onli imajin how dis mi inkorij Gaad peepl bak den!—Zech. 8:9.

7. Weh speshal werk wee di tek paat eena tudeh? Pleez eksplayn yu ansa.

⁷ Weh Hagai prafesi meen fi wee tudeh? Jehoava di shayk aala di nayshan dehn agen, ahn dis taim wee di help fi get dis werk don! Tink bowt dis: Eena 1914, Jehoava apoint Jeezas fi bee di King a fi Hihn Kingdom da hevn. (Ps. 2:6) Dis da-mi bad nyooz fi aala di werl leedaz. Ih mi meen dat “di set taimz a di nayshanz kohn tu wahn en.” In ada werdz, di taim wen dehn neva ga no roola weh reprizent Jehoava pahn ert mi kohn tu wahn en. (Look 21:24) Bikaaz a dis, espeshali sins 1919, Jehoava peepl di tel evribadi dat Gaad Kingdom da di onli hoap fi aal hyoomanz. Dis werk weh da fi preech di “gud nyooz bowt di Kingdom” don shayk di hoal ert.—Mach. 24:14.

8. Akaadn tu Psalm 2:1-3, how moas nayshanz rispan tu dis mesij?

⁸ How peepl rispan tu dis mesij? Moas a dehn rijek it. (Reed Psalm 2:1-3.) * Di nayshan dehn weh dehnya peepl kohn fram beks ahn noh waahn aksep Jeezas, di  wan hoo Jehoava apoint fi bee Roola. Ih klyaa dat dehnya nayshan noh si di Kingdom mesij weh wi preech az “gud nyooz.” Akchwali, sohn govament eevn ban di preechin werk! Eevn doa wahn lata di roolaz a dehnya nayshan klaym fi serv Gaad, dehn noh waahn giv op dehn powa. Jos laik how di roolaz mi stan bak eena Jeezas day, di roolaz hoo di atak Jeezas faytful falowaz tudeh di akchwali goh gens Jeezas, di wan hoo Jehoava Anoint.—Aks 4:25-28.

9. How Jehoava di chrai help di nayshan dehn weh rijek di Kingdom mesij?

⁹ How Jehoava di chrai help di nayshan dehn weh rijek di Kingdom mesij? Psalm 2:10-12 seh: “Soh now, unu roolaz, unu hoo di joj di ert, shoa wizdom an aksep karekshan. Fyaa Jehoava ahn rijais. Aana di son, if nat Hihn wahn geh beks an unu wahn ded bikaaz a fi Hihn anga. Dehn wan weh luk tu Hihn fi protekshan wahn hapi.” Jehoava kain an ih di gi dehn taim fi chaynj dehn main ahn chooz fi aksep fi Hihn Kingdom. Bot onli lee bit a taim lef. Wi di liv joorin “di laas dayz” a dis sistem a tingz. (2 Tim. 3:1; Isa. 61:2) Now moa dan eva bifoa, peepl need fi noa di chroot ahn chooz fi serv Jehoava.

10. How sohn peepl rispan tu di prafesi weh deh da Haggai 2:7-9?

¹⁰ Sohn peepl rispan eena wahn pazitiv way tu di prafesi fahn Hagai. Hihn seh dat bikaaz Jehoava di shayk aala di nayshan dehn, “di preshos tingz [peepl wid di rait haat kandishan] fahn owta aala di nayshan dehn wahn kom” fi wership Jehoava. * (Reed Haggai 2:7-9.) * Di prafit Aizaiya ahn Maika mi aalso prafesai dat  sohnting laik dis wuda hapm “joorin di laas dayz.”—Isa. 2:2-4, ftn.; Mic. 4:1, 2, ftn.

11. Weh wahn brada mi du wen hihn mi fers hyaa di Kingdom mesij?

¹¹ Tink bowt weh Ken, wahn brada hoo di serv da di werl hedkwaataz, seh wen hihn mi fers hyaa di Kingdom mesij bowt 40 yaaz agoa. Hihn stil memba it klyaa-wan. Ih seh: “Wen Ai mi fers hyaa di chroot fahn Gaad Werd di Baibl, Ai mi soh hapi fi laan dat wi di liv eena di laas dayz a dis sistem a tingz. Ah mi andastan dat if Ai mi waahn pleez Jehoava ahn get evalastin laif, Ah mi need fi mek shoar fi noh bee paat a dis werl an Ah mi need fi deh pahn Jehoava said. Soh Ah mi pray tu Jehoava an Ah mi tek Jehoava said. Ah mi stap sopoat dis werl an Ah mi ron tu di protekshan a Gaad Kingdom, weh nobadi kyaahn shayk.”

12. How Jehoava spirichwal templ geh ful op wid fi hihn gloari joorin dehnya laas dayz?

¹² Ih klyaa fi si dat Jehoava di bles ih peepl. Joorin dehnya laas dayz, moa ahn moa peepl di staat tu serv hihn. Eena 1914 da-mi jos bowt faiv towzn a wi. Now, da oava ayt milyan a wi weh di wership Jehoava, ahn milyanz moa jain wi fi memba di det a Jeezas Krais evri yaa. Soh wi si dat Jehoava spirichwal templ, weh stan fi evriting weh mek it pasabl fi mek wi wership Jehoava di rait way rait ya pahn ert, di geh ful op wid “di preshos tingz fahn owta aala di nayshan dehn.” Wen dehnya peepl mek chaynjiz ahn put aan di nyoo way a laif, dehn gi gloari tu Jehoava.—Ifee. 4:22-24.

13. Wat da sohn ada prafesi weh kohn chroo bikaaz a weh moa ahn moa peepl di staat tu wership Jehoava? (Koment pahn di picha pahn di kova.)

¹³ Sohn ada prafesi laik di wan eena Isaiah chapta 60 di kohn chroo bikaaz a weh moa ahn moa peepl di staat tu wership Jehoava. Vers 22 a da chapta seh: “Di lee wan wahn bee wahn towzn ahn di smaal wan wahn maiti nayshan. Ai Jehoava wahn speed op tingz eena ih oan taim.” Bikaaz lat moa peepl di staat tu wership Jehoava, sohnting wandaful di hapm. Dehnya “preshos tingz,” er peepl, ga di skilz ahn di dizaiya fi preech di “gud nyooz bowt di Kingdom.” Bikaaz a dis, Jehoava peepl ku yooz dehndeh skilz weh Aizaiya diskraib az “di milk a di nayshan  dehn.” (Isa. 60:5, 16) Wid di help a dehnya preshos man ahn uman, wi di preech di gud nyooz eena 240 difrent lan ahn wi di projoos lichricha eena oava 1,000 langwij.

14. Weh disizhan peepl haftu mek rait now?

¹⁴ Eena dis taim a di en, di preechin a di mesij weh di shayk di nayshan dehn di lef peepl di tink. Dehn riyalaiz dat dehn haftu mek wahn disizhan now. Weh dehn wahn du? Dehn wahn sopoat Gaad Kingdom, er dehn wahn kantinyu sopoat di govament dehn a dis werl? Dis da di impoatant disizhan weh evribadi wahn haftu mek. Eevn doa Jehoava peepl obay di laa dehn a di govament wehpaat dehn liv, dehn stay nyoochral ahn noh tek said eena eniting weh ga fi du wid palitiks. (Roam. 13:1-7) Dehn noa dat Gaad Kingdom da di onli solooshan fi aala wi prablemz. Da Kingdom da no paat a dis werl.—Jan 18:36, 37.

15. How di buk a Revilayshan shoa dat di laayalti a Gaad peepl wahn geh tes?

¹⁵ Di buk a Revilayshan tel wi dat di laayalti a Gaad peepl wahn geh tes joorin di laas dayz. Dis tes wahn mek peepl deh gens wi ahn persikyoot wi eevn moa. Di govament dehn a dis werl wahn tel wi fi gi dehn weh bilangz tu Gaad, ahn dehn wahn persikyoot dehn wan weh rifyooz fi sopoat dehn. (Rev. 13:12, 15) Dehn wahn “foas aala di peepl dehn—big ahn smaal, rich ahn poa, di wan dehn weh free ahn di wan dehn weh da slayv—fi geh wahn maak pahn eeda dehn rait han er dehn farid.” (Rev. 13:16) Slayvz eena di paas mi geh wahn permanent maak fi shoa hoo dehn bilangz tu. Sayhn way soh, di govament dehn a dis werl ekspek evribadi tudeh fi ga wahn simbolik maak pahn dehn han er dehn farid fi shoa hoo dehn sopoat. Dehndeh govament waahn mek evribadi shoa bai dehn tinkin ahn bai di tingz weh dehn du dat dehn bilangz tu dehn ahn dat dehn sopoat dehn.

16. Wai ih impoatant fi schrentn wi laayalti tu Jehoava now?

¹⁶ Weh wee wahn du? Wi wahn aksep di simbolik maak ahn sopoat di govament dehn a dis werl? Dehn wan weh rifyooz fi aksep di maak wahn fays haad taim ahn dehn wahn deh eena daynja. Di buk a Revilayshan seh: “Nobadi kuda mi bai er sel eniting anles ih mi ga di maak pan ahn.” (Rev. 13:17) Bot Gaad peepl noa weh Gaad wahn du tu dehn wan weh ga di maak laik weh Revilayshan 14:9, 10 taak bowt. Soh insteda aksep da maak, ih wahn bee laik if dehn rait pahn dehn han, “Ai bilang tu Jehoava.” (Isa. 44:5) Now da di taim fi mek shoar dat wi laayalti tu Jehoava schrang. If dat da di kays, den Jehoava wahn hapi fi seh dat wee bilang tu hihn!

17. Weh wee need fi memba bowt Jehoava payshens?

¹⁷ Jehoava don shoa lata payshens joorin dehnya laas dayz. Hihn noh waahn nobadi geh dischrai. (2 Peet. 3:9) Hihn di giv evribadi di apachooniti fi ripent ahn chooz fi serv hihn. Bot fi hihn payshens noh wahn laas fareva. Dehn wan weh rijek dis apachooniti wahn ekspeeryens di sayhn ting weh Fayro mi gaahn chroo eena Moaziz day. Jehoava mi tel Fayro: “If Ai mi waahnt, Ah kuda mi don schrech owt mai han ahn schraik yoo ahn yu peepl wid wahn reeli bad playg, an unu neva mi wahn deh pahn dis ert nohmoh. Ai mek yu kantinyu liv soh dat di peepl ku si mi powa gens yu, ahn fi mek aala di peepl eena di werl noa bowt mee.” (Ex. 9: 15, 16) Aala di nayshan dehn wahn haftu noa dat Jehoava da di onli chroo Gaad. (Ezek. 38:23) How dis wahn hapm?

18. (a) Weh ada prafesi Haggai 2:6, 20-22 menshan? (b) How wi noa dat da prafesi weh Hagai mi taak bowt wahn hapm eena di fyoocha?

¹⁸ Lata yaaz afta Hagai mi ded, di apasl Paal mi rait tu di Heebroo Kristyanz dat di prafesi da Haggai 2:6, 20-22 wahn kohn chroo eena di fyoocha. (Reed.) * Paal mi seh: “Now hihn pramis seh: ‘Ah noh onli wahn shayk di ert wan moa taim, bot Ah wahn shayk di hevn dehn tu.ʼ Now wen Gaad seh ‘wan moa taim,ʼ dat meenz dat hihn wahn geh rid a eniting weh ku geh shayk, tingz weh hihn neva mek, soh dat di tingz weh noh shayki wahn stay.” (Heeb. 12:26, 27) Dis prafesi difrent fahn di prafesi weh deh da Haggai 2:7. Wen Jehoava shayk di ert fi di laas taim, hooeva rifyooz fi aksep Jehoava rait fi rool wahn geh dischrai fareva jos laik weh mi hapm tu Fayro.

19. Weh noh wahn geh dischrai, ahn how wi noa dis?

¹⁹ Weh noh wahn geh dischrai? Paal kantinyu fi seh: “Soh den, sins wi noa dat wi wahn geh wahn Kingdom weh noh shayki, mek wi kantinyu fi benifit fahn Gaad grayt kainis, soh dat wi wahn ku aafa hihn hoali servis weh wahn pleez ahn, lang wid fyaa a Gaad ahn deep rispek.” (Heeb. 12:28) Soh afta Jehoava shayk di hevnz ahn di ert, onli Gaad Kingdom wahn egzis an ih wahn laas fareva!—Ps. 110:5, 6; Dan. 2:44.

20. Weh disizhan peepl haftu mek, ahn how wee ku help dehn?

²⁰ No taim deh fi ways! Peepl need fi mek wahn disizhan. Dehn eeda sopoat dis werl ahn geh dischrai er serv Jehoava ahn du weh hihn seh ahn liv fareva. (Heeb. 12:25) Wen wi tek paat eena di preechin werk, wi ku help peepl mek dis impoatant disizhan. Mek wi help moa preshos peepl fi disaid fi sopoat Gaad Kingdom. Ahn mek wi aalwayz memba weh wi Laad Jeezas seh: “Mai disaipl dehn wahn preech di gud nyooz bowt di Kingdom aal oava di ert soh dat aala di nayshan dehn ku noa bowt it, ahn den di en wahn kom.”—Mach 24:14.