1. How wi ku vyoo Jehoava?

JEHOAVA famili weh wership hihn inklood Jeezas, hoo da “di fersbaan owta evriting weh Gaad mek,” ahn wahn lata aynjelz. (Kol. 1:15; Ps. 103:20) Wen Jeezas mi deh pahn ert, hihn mi mek peepl andastan dat dehn ku vyoo Jehoava az dehn Pa. Dis da weh Jeezas mi seh wen ih mi-di taak tu ih disaiplz: “Mai Faada, weh da fi unu Faada tu.” (Jan 20:17) Ahn wen wi dedikayt wi laif tu Jehoava ahn geh baptaiz, wi geh fi bee paat a wahn lovin famili a bradaz ahn sistaz.—Maak 10:29, 30.

2. Weh wi wahn diskos eena dis aatikl?

² Som peepl fain it haad fi si Jehoava az wahn lovin Pa. Adaz mait noh noa how fi shoa dat dehn lov dehn bradaz ahn sistaz. Eena dis aatikl, wi wahn diskos how Jeezas help wi fi si Jehoava az wahn Pa weh lov wi ahn weh wee ku jraa kloas tu. Wi wahn aalso laan bowt wayz how wi ku kapi Jehoava eena di way wi chreet wi bradaz ahn sistaz.

3. How di way Jeezas teech wi fi pray jraa wi kloasa tu Jehoava?

³ Jehoava da wahn lovin Faada. Jeezas waahn wi si Jehoava di way hihn si ahn, az wahn kain ahn lovin payrent weh wi ku taak tu eni taim, noh laik sombadi weh noh kain ahn weh onli koman wi fi du tingz. Wee si dis eena di way Jeezas mi teech ih disaiplz fi pray. Wen Jeezas mi-di teech  dehn fi pray, hihn mi staat ih pryaa dis way: “Hevnli Faada.” (Mach. 6:9) Jeezas kuda mi tel wi fi rifaa tu Jehoava az “di Almaiti,” “di Kriyayta,” er “di evalastin King weh liv fareva.” Ahn dis neva mi wahn bee rang bikaaz di Baibl yooz aala dehnya werdz fi rifaa tu Jehoava. (Gen. 49:25; Isa. 40:28; 1 Tim. 1:17) Bot, Jeezas mi tel wi fi kaal Jehoava, “Faada.”

4. How wee noa dat Jehoava waahn mek wi jraa kloas tu hihn?

⁴ Yoo fain it haad fi si Jehoava az wahn lovin Pa? Di chroot da dat som a wi kyaahn si hihn laik wahn lovin Pa bikaaz maybi wi oan pa neva kain, soh ih mait noh bee eezi fi tink bowt wahn pa weh lov wi. Bot ih komfertin fi noa dat Jehoava noa egzakli how wi feel ahn wai wi feel da way! Hihn waahn bee kloas tu wi. Dat da wai hihn invait wi fi: “Kohn kloas tu [Hihn], ahn hihn wahn kohn kloas tu [wi].” (Jay. 4:8) Jehoava lov wi, an ih seh dat hihn wahn bee di bes Pa wee kuda eva gat.

5. Akaadn tu Look 10:22, how Jeezas ku help wi fi jraa kloasa tu Jehoava?

⁵ Jeezas ku help wi fi jraa kloasa tu Jehoava. Jeezas noa Jehoava soh gud an ih kapi fi Hihn kwalitiz eena wahn perfek way. Dat da wai Jeezas ku seh: “Hooeva si mee, don si di Faada tu.” (Jan 14:9) Jos laik weh wahn oalda breda wuda du, Jeezas teech wi how fi rispek an obay wi Pa, an ih aalso teech wi weh wee fi du fi mek Hihn hapi. Bot Jeezas aalso help wi fi andastan dat Jehoava veri kain an lovin. (Reed Look 10:22.) Mek wi luk pahn sohn egzampl.

6. Gi sohn egzampl weh shoa dat Jehoava mi lisn tu Jeezas.

⁶ Jehoava lisn tu ih chiljren. Noatis di way how Jehoava mi lisn tu ih preshos Son. Fi shoar, Jehoava mi hyaa lata pryaaz fan ih Son wen ih mi deh pahn ert. (Look 5:16) Hihn mi hyaa Jeezas pray bowt impoatant disizhanz, laik wen ih mi wahn chooz ih 12 apasl. (Look 6:12, 13) Jehoava mi aalso hyaa Jeezas pray wen ih  mi angshos. Jos bifoa Joodas mi bichray ahn, Jeezas mi pray tu ih Pa bowt di tingz weh mi wahn soon hapm tu hihn. Jehoava neva onli hyaa Jeezas pryaa bot ih mi aalso sen wahn aynjel fi schrentn Ih preshos Son.—Look 22:41-44.

7. How ih mek yu feel dat Jehoava lisn tu ih peepl wen dehn pray tu ahn?

⁷ Tudeh, Jehoava kantinyu lisn tu ih peepl wen dehn pray tu ahn, an hihn ansa dehn da di rait taim an eena di bes way pasabl. (Ps. 116:1, 2) Wahn sista da India mi si how Jehoava mi ansa fi shee pryaaz. Shee mi sofa bikaaz ih mi feel veri angshos, ahn shee mi bayg Jehoava ahn tel ahn egzakli how ih mi-di feel. Shee mi seh: “Di May 2019 JW Braadkyaastin weh mi taak bowt weh wi ku du wen wi angshos, mi reeli help mi; da mi egzakli weh Ah mi need. Dat da-mi wahn ansa tu mi pryaaz.”

8. How Jehoava mi shoa dat ih lov Jeezas?

⁸ Jehoava shoa ih lov fi wee eena di sayhn way how ih mi shoa ih lov fi Jeezas wen hihn mi deh pahn ert. (Jan 5:20) Hihn mi help Jeezas fi kip ih fayt schrang, ih mi inkorij ahn wen ih mi feel angshos, an ih mi mek shoar dat Jeezas ga di tingz weh ih mi need fi liv. Ahn Jehoava mi tel ih Son dat ih lov ahn, an dat ih mi pleez wid ahn (Mach. 3:16, 17) Jeezas mi noa dat ih lovin hevnli Faada mi wahn aalwayz deh wid ahn an ih mi wahn help ahn, soh hihn mi neva feel laik ih deh bai ihself.—Jan 8:16.

9. How wee noa dat Jehoava lov wi?

⁹ Jos laik Jeezas, aala wi geh fi feel Jehoava lov eena lata wayz. Jos tink bowt dis: Jehoava alow wee fi bee ih fren an ih gi wi lata lovin bradaz ahn sistaz weh mek wi hapi an weh inkorij wi wen wi feel dong er angshos. (Jan 6:44) Jehoava aalso gi wi evriting weh wi need fi kip wi fayt schrang. Ahn hihn aalso help wi fi get di tingz weh wi need fi liv. (Mach 6:31, 32) Wen wi reeli tink bowt how Jehoava lov wi, ih mek wi lov ahn eevn moa.

10. Weh wi ku laan fahn di way Jehoava chreet wi bradaz ahn sistaz?

¹⁰ Jehoava lov wi bradaz ahn sistaz. Bot ih noh aalwayz eezi fi mek wee lov dehn ahn shoa dehn dat wi lov dehn. Sohntaim ih noh eezi bikaaz a wi kolcha er bikaaz a di way wi groa op. An aala wi mek mistayks weh ku anai adaz er mek dehn feel bad. Bot aala wi ku chrai haad fi ga schranga lov fi wi bradaz ahn sistaz. How? If wi kapi wi Faada eena di way hihn shoa lov tu wi bradaz ahn sistaz. (Ifee. 5:1, 2; 1 Jan 4:19) Mek wi si weh wi ku laan fahn Jehoava egzampl.

11. How Jeezas mi shoa di saym “kompashan” weh Jehoava ga fi peepl?

¹¹ Jehoava shoa “kompashan.” (Look 1:78) Wahn persn weh ga kompashan kansaan fi adaz wen ih si dehn di sofa; ih luk fi wayz how fi help ahn komfert dehn. Di way how Jeezas mi chreet peepl mi shoa how Jehoava ga kompashan fi dehn. (Jan 5:19) Wahn taim wen Jeezas si wahn krowd a peepl, “ih haat gaan owt tu dehn, kaaz dehn da-mi laik sheep weh dehn oana chreet bad ahn dash wan said. Dehn da-mi laik sheep widowt wahn shepad.” (Mach. 9:36) Jeezas mi du moa dan jos feel lov fi dehn; hihn mi du sohnting fi help dehn. Hihn mi kyoar di sik an ih mi help dehn wan weh “taiyad ahn di kehr wahn hevi load.”—Mach. 11:28-30; 14:14.

12. How wee ku shoa kompashan tu wi bradaz ahn sistaz?

 ¹² If wee tink bowt di prablemz weh wi bradaz ahn sistaz gat, wi wahn ku shoa kompashan fi dehn. Fi egzampl, wahn sista mait ga wahn seeryos helt prablem. Shee mait noh taak bowt ih prablem, bot shee wuda praabli bee veri hapi if sohnbadi wuda help ahn. Wee ku aks wiself, ‘Shee ku provaid di tingz weh ih famili need fi liv? Wee ku help ahn kuk wahn lee meel er help ahn kleen ih hows?ʼ Er maybi, wahn brada mi looz ih jab. Wee ku giv ahn wahn lee moni, widowt ih eevn noa dat ih kohn fahn wee, fi help ahn owt til ih fain wahn neks jab?

13-14. How wee ku bee jenaros laik Jehoava?

¹³ Jehoava jenaros. (Mach. 5:45) Wee shuda shoa kompashan fi wi bradaz ahn sistaz bifoa dehn eevn aks fi help. Jos laik Jehoava, wee ku du tingz fi dehn bifoa dehn eevn aks. Hihn mek di son shain pahn wi widowt wi eevn aks ahn far it! An evribadi benifit fahn di son, noh jos dehn wan weh gi hihn tanks far it. Wen Jehoava gi wi di tingz weh wi need, ih shoa wi dat ih lov wi. Wee lov Jehoava soh moch bikaaz hihn veri kain ahn jenaros!

¹⁴ Wi bradaz ahn sistaz kapi Jehoava ahn dehn jenaros tu adaz. Fi egzampl, eena 2013, Taifoon Haiyan mi kaaz lata damij da di Philippines. Wahn lata bradaz ahn sistaz mi looz dehn hows ahn di ting dehn weh dehn mi oan. Bot dehn spirichwal famili rong di werl mi help dehn kwik-wan. Wahn lata dehn mi gi moni er valantyaa fi help fiks er bil aalmoas 750 hows eena les dan wan yaa! Joorin di COVID-19 pandemik, di Witnisiz mi werk haad fi help dehn bradaz ahn sistaz. Wen wi moov kwik fi sopoat wi spirichwal famili, wi shoa dehn dat wi lov dehn.

15-16. Weh Look 6:36 seh wi shuda du fi kapi wi hevnli Faada?

¹⁵ Jehoava shoa mersi an ih redi fi fergiv. (Reed Look 6:36.) Evri day wi hevnli Faada shoa wi mersi. (Ps. 103:10-14) Jeezas falowaz neva perfek, ahn stil hihn  mi shoa dehn mersi an ih mi fergiv dehn. Hihn mi eevn wilin fi sakrifais ih laif soh dat wi geh fergivnis fi wi sin dehn. (1 Jan 2:1, 2) Di fergivnis ahn mersi weh Jehoava ahn Jeezas shoa wi mek wi jraa kloasa tu dehn.

¹⁶ Di lov weh wi ga fi wan anada geh schranga wen wi “fergiv wan anada.” (Ifee. 4:32) Af koars, ih noh aalwayz eezi fi fergiv adaz, soh wi need fi werk haad far it. Wahn sista mi reed wahn aatikl eena Di Wachtowa weh mi taak bowt how fi fagiv adaz ahn dat mi help ahn wahn lat. * Shee seh: “Dis aatikl help mi fi andastan dat wen Ai fergiv adaz, ih help mee fi feel gud. Ih seh dat wen yu fergiv adaz, ih noh meenz dat yu tink dat weh dehn du yu mi rait er dat ih neva hert yu. Bot wen yu fergiv dehn, yu noh beks wid dehn nohmoh ahn yu ku feel kaam.” Wen wi wilin fi fergiv wi bradaz ahn sistaz, wi shoa dat wi lov dehn ahn dat wi di kapi Jehoava.

17. Akaadn tu Machyu 5:16, how wee ku shoa dat wi aana wi hevnli Faada?

¹⁷ Wi soh tankful dat wi ga wahn famili a bradaz ahn sistaz fahn aal oava di werl weh lov wan anada. Wi waahn az moch peepl az pasabl fi jain wi fi wership wi Gaad. Soh wi noh waahn du notn weh ku mek peepl tink bad bowt Jehoava er fi hihn peepl. Wi aalwayz chrai bihayv gud soh dat peepl waahn laan bowt Jehoava ahn serv hihn.—Reed Machyu 5:16.

18. Weh ku help wi fi preech wid korij?

¹⁸ Sohntaim sohn peepl mait kritisaiz wi er deh gens wi bikaaz wi obay wi hevnli Faada. Weh wi ku du if wi feel nervos er frayd wen wi di taak tu adaz bowt weh wi bileev eena? Wi ku bee shoar dat Jehoava an ih Son wahn help wi. Jeezas mi tel ih disaiplz dat dehn noh need fi wori bowt weh fi seh. Wai nat? Jeezas mi seh: “Gaad wahn mek unu noa weh fi seh wen da taim kom; bikaaz da noh jos unu wahn di taak,  bot da di spirit a fi unu Faada wahn di taak fi unu.”—Mach. 10:19, 20.

19. Gi wahn egzampl a sombadi weh mi preech wid korij.

¹⁹ Kansida di egzampl a Brada Robert fahn South Africa. Sohn taim agoa wen hihn jos mi-di staat tu stodi ahn neva ga wahn lata nalij a di Baibl, hihn mi haftu goh da koat an eksplayn tu wahn joj wai hihn kudn jain di aami. Hihn mi ga korij an ih mi eksplayn tu di joj dat hihn mi waahn stay nyoochral bikaaz ih mi lov ih Kristyan bradaz. Hihn mi reeli tankful fi bee paat a Jehoava famili! Di joj mi aks ahn sodn-wan: “Soh, hoo da yu bradaz?” Robert neva mi-di ekspek da kweschan, bot hihn mi memba di skripcha teks fi da day. Da mi Machyu 12:50: “Kaaz enibadi weh du di wil a mai hevnli Faada, da mi breda, mi sista, ahn mi ma.” Eevn doa Robert da-mi wahn nyoo Baibl styoodent, Jehoava hoali spirit mi help ahn ansa da kweschan ahn sevral ada kweschanz weh ih neva mi-di ekspek. Fi shoar Jehoava mi prowd a Robert! Ahn Jehoava aalso prowd a wi wen wi chros eena hihn fi help wi preech wid korij, espeshali wen wi di fays wahn tof sichuwayshan.

20. Weh wi mek op wi main fi du? (Jan 17:11, 15)

²⁰ Wi soh tankful fi bee paat a dis lovin spirichwal famili. Wi ga di bes Pa wi kuda eva gat, ahn wi ga lata bradaz ahn sistaz weh lov wi. Wi fi aalwayz gi Gaad tanks fi dehnya gif. Saytan ahn fi hihn eevl falowaz chrai fi mek wi dowt dat wi hevnli Faada lov wi an ih chrai fi dischrai wi yooniti. Bot, Jeezas mi pray fi wi an ih mi aks wi Faada fi wach oava wi soh dat wi spirichwal famili stay yoonaitid. (Reed Jan 17:11, 15.) Jehoava di ansa da pryaa. Jos laik Jeezas, mek wi aalwayz chros dat wi Faada lov wi an dat ih wahn help wi. Mek wi kantinyu jraa kloasa tu Jehoava ahn wi bradaz ahn sistaz.