1. How wi feel wen sohnbadi eena wi famili geh disfeloship?

ENIBADI eena fi yoo famili geh disfeloship fahn di kangrigayshan? If yes, dat da wahn veri sad sichuwayshan, noh chroo? Wahn sista weh naym Hilda seh: “Wen mai hozban mi ded afta wi mi marid fi 41 yaaz, Ai mi tink dat dat da-mi di wers ting weh kuda mi eva hapm tu mi. * Bot wen mi son mi lef di kangrigayshan, ih waif, an ih chiljren, dat mi faar moa wers dan di det a mi hozban.”

2-3. Akaadn tu Psalm 78:40, 41, how Jehoava feel wen ih servants stap serv hihn?

² Jos imajin how sad Jehoava mi feel wen som a di aynjel dehn, weh da-mi paat a fi hihn famili, mi rijek hihn! (Jood 6) Ahn tink bowt how sad hihn mi feel wen di Izrelaits, di peepl weh hihn mi lov, mi rijek hihn oava ahn oava agen. (Reed Psalm 78:40, 41.) * Yoo ku bee shoar dat wi lovin hevnli Faada feel hert wen sohnbadi weh yu lov stap serv hihn. Hihn andastan di payn weh yu di goh chroo. Soh hihn wahn gi yu di inkorijment ahn di sopoat weh yu need.

³ Eena dis aatikl, wi wahn diskos weh wi ku du fi geh Jehoava help if sohnbadi wi lov stap serv hihn. Wi wahn aalso laan how wi ku help adaz eena di kangrigayshan weh di goh chroo dis saym chalenj. Bot fers, mek wi si weh kaina tinkin wi fi avoid.

4. How lata payrents feel wen dehn son er daata stap serv Jehoava?

⁴ Wen wahn preshos son er daata stap serv Jehoava, ih  kaman fi mek payrents tink dat dehn shuda mi du moa fi help dehn kantinyu serv Jehoava. Afta Brada Luke son mi geh disfeloship, hihn mi seh: “Ai mi tink dat da mi mai faalt wai hihn mi geh disfeloship. Ai mi eevn ga naitmyaaz bowt it. Sohntaim Ah wuda krai ahn mi haat wuda payn mi anaal.” Sista Elizabeth, hoo mi aalso ga wahn son weh mi geh disfeloship, yoostu tink: “Ai da ih ma, weh Ai du rang? Ai mi feel laik if Ah neva du inof fi teech mi son fi lov Jehoava.”

5. Da fi hoo faalt wen sohnbadi stap serv Jehoava?

⁵ Wi need fi memba dat Jehoava giv eech wan a wi di freedom fi mek wi oan disizhanz. Dis meenz dat da wee fi chooz if wi waahn obay hihn er nat. Som chiljren neva ga payrents weh set wahn gud egzampl, bot dehn disaid fi serv Jehoava ahn stay faytful tu hihn. An adaz mi ga payrents weh mi du dehn bes fi teech dehn fi lov Jehoava, bot laytaraan dehn mi lef Jehoava wen dehn geh oalda. Soh da eech wan a wi fi disaid if wi wahn serv Jehoava. (Josh. 24:15) If yoo da wahn payrent ahn yu sad bikaaz yu pikni stap serv Jehoava, noh tink dat da fi yoo faalt wai yu pikni stap serv hihn!

6. How wahn yong persn mait feel wen ih ma er ih pa stap serv Jehoava?

⁶ Sohntaim, wahn ma er wahn pa stap serv Jehoava an ih eevn lef ih famili. (Ps. 27:10) Dis ku bee reeli haad fi pikni weh luk op tu dehn payrents az wahn gud egzampl. Sista Esther pa mi geh disfeloship; shee seh: “Ai yoostu krai wahn lat bikaaz Ah mi riyalaiz dat hihn neva jos mi-di jrif weh fahn Jehoava, bot hihn mi don mek op ih main fi stap serv Jehoava. Ai lov mai pa, soh wen hihn mi geh disfeloship, Ai yoostu wori if hihn mi aarait. Ai wuda eevn ga panik ataks.”

7. How Jehoava feel bowt wahn yong persn weh ga ih ma er ih pa disfeloship?

⁷ If yoo da wahn yong persn, bee shoar dat wi feel veri sad dat wan a yu payrents disfeloship! Yu ku aalso bee shoar dat Jehoava noa humoch dis hert yu. Hihn lov yu an ih hapi dat yu stay faytful tu hihn. Ahn wee, yu bradaz ahn sistaz eena di kangrigayshan, lov yu tu. Ahn pleez memba dis: Da noh fi yu faalt wai yu ma er yu pa disfeloship. Laik weh wi menshan erliya, Jehoava giv eech wan a wi di freedom fi mek wi oan disizhanz. Soh, eech persn fi disaid weda ih wahn serv Jehoava er nat. An eech persn weh dedikayt ih laif tu Jehoava rispansabl fi ih akshanz; eech persn wahn “bak ih oan load.”—Gal. 6:5.

8. How famili membaz weh faytful ku stay bizi wail dehn di wayt fi mek di persn weh dehn lov kohn bak tu Jehoava? (Si di baks “ Kohn Bak tu Jehoava.”)

⁸ Wen sohnbadi weh yu lov stap serv Jehoava, ih naamal fi mek yu aalwayz di hoap dat wan day ih wahn kohn bak tu Jehoava. Bot, weh yoo ku du wail yu di wayt fi mek ih kohn bak tu Jehoava? Du evriting yu kud fi kip yu fayt schrang. If yu du dat, yu wahn set wahn gud egzampl fi ada famili membaz an eevn fi di persn weh disfeloship. Yu wahn aalso geh di schrent weh yu need fi koap wid yu sadnis. Soh, weh yoo ku du fi kip yu fayt schrang?

9. Weh yoo ku du fi kip yu fayt schrang? (Si di baks “ Komfertin Skripchaz Weh Ku Help Yu if Sohnbadi Yu Lov Stap Serv Jehoava.”)

⁹ Du aal weh yu kud fi kip yu fayt schrang. Ih veri impoatant fi mek yu du dat ahn fi help yu famili membaz tu. How yu ku du dat? Yu ku mek yu fayt geh schranga if yu kantinyu reed Gaad Werd, meditayt pahn weh yu reed, an kip di goh da di meetin dehn. Sista Joanna pa an ih sista mi lef di chroot; shee seh: “Ai feel moa kaam wen Ah reed bowt Abigayl, Ester, Joab, Joazef, ahn Jeezas. Fi dehn egzampl inkorij mi ahn help mi bee moa pazitiv. Di orijinal sang dehn veri inkorijin tu.”

10. How Psalm 32:6-8 help wi fi noh giv op wen wi feel sad?

¹⁰ Tel Jehoava bowt evriting weh di wori yu. Wen yu feel sad, noh stap pray tu Jehoava. Kip di aks wi lovin Gaad fi help yu si tingz di way hihn see it, ahn fi “gi yu andastandin ahn teech yu di way yu fi goh.” (Reed Psalm 32:6-8.) * Da chroo, ih mait noh eezi fi tel Jehoava how yu reeli feel. Bot memba, Jehoava noa weh yu di goh chroo; hihn noa how yu feel. Hihn lov yu veri moch an ih waahn yu tel ahn bowt evriting weh di wori yu.—Ex. 34:6; Ps. 62:7, 8.

11. Akaadn tu Heebrooz 12:11, wai wi shuda chros eena Jehoava lovin disiplin? (Si di baks “ Wen Sohnbadi Geh Disfeloship Da Wan Way How Jehoava Shoa Ih Lov.”)

¹¹ Werk lang wid di disizhan weh di eldaz mek. Wen sohnbadi geh disfeloship, dat  da wan way how Jehoava shoa ih lov. Dis kaina disiplin help di wan weh stap serv Jehoava an evribadi els. (Reed Heebrooz 12:11.) Som eena di kangrigayshan mait seh dat di eldaz neva mek di rait disizhan fi disfeloship sohnbadi. Bot, memba, di wan dehn eena di kangrigayshan weh seh dehndeh tingz mait noh waahn menshan negitiv tingz bowt di persn weh du rang. Wi need fi andastan dat wi noh ga aala di faks. Soh chros dat di eldaz eena di judishal komiti mi alow di Baibl fi gaid dehn soh dat dehn ku “joj fi Jehoava.”—2 Chron. 19:6.

12. Wat da sohn gud rizolts sohn bradaz get bikaaz dehn werk lang wid Jehoava lovin dairekshan fi noh spen taim wid peepl weh disfeloship?

¹² Wen yu werk lang wid di disizhan weh di eldaz mek, yu ku akchwali help di wan weh geh disfeloship fi kohn bak tu Jehoava. Memba Sista Elizabeth? Shee seh: “Ih mi veri haad fi noh taak tu mi son weh da-mi wahn adolt. Bot afta hihn mi kohn bak tu Jehoava, hihn ihself mi seh dat ih mi gud dat ih mi geh disfeloship. Laytaraan, hihn mi seh dat hihn mi laan wahn lata gud lesn. Ai laan dat Jehoava disiplin aalwayz rait.” Sista Elizabeth hozban, Mark, seh: “Moch layta, wi son mi tel mi dat wahn nada reezn wai hihn mi waahn kohn bak tu Jehoava da bikaaz wi neva spen taim wid hihn ataal. Ai soh hapi dat Jehoava mi help wi fi bee obeedyant.”

13. Weh ku help yu deel wid dis payn?

¹³ Taak tu frenz weh andastan how yu di feel. Spen taim wid spirichwali schrang bradaz ahn sistaz weh ku help yu fi noh giv op. (Prov. 12:25; 17:17) Joanna, weh wi mi menshan erliya, seh: “Ai mi feel laik Ah mi deh aal bai miself. Bot weh mi help mi wahn lat da-mi fi taak tu frenz weh Ah chros.” Bot weh yu ku du if som eena di kangrigayshan seh tingz weh mek yu feel wers?

14. Wai wi need fi “kantinyu fi put op wid wan anada ahn fergiv wan anada wid aala [wi] haat”?

¹⁴ Ga payshens wid aala yu bradaz ahn sistaz. Wi kyaahn ekspek dat evribadi wahn aalwayz seh di rait ting. (Jay. 3:2) Aala wi noh perfek, soh noh bee sopraiz if som peepl noh noa weh fi seh er if dehn seh sohnting weh hert yu bot neva meen it. Memba di apasl Paal kongsl: “Kantinyu fi put op wid wan anada ahn fergiv wan anada wid aala unu haat, eevn if sohnbadi du sohnting fi hert unu.” (Kol. 3:13) Wahn sista weh mi ga wahn relitiv weh disfeloship seh: “Jehoava help mi fi fergiv bradaz weh chrai inkorij mi bot en op di hert mi insted.” Weh di kangrigayshan ku du fi help faytful famili membaz weh sad bikaaz sohnbadi weh dehn lov disfeloship?

15. Weh wee ku du fi help di famili a di persn weh geh disfeloship?

¹⁵ Bee kain ahn frenli wid faytful famili membaz. Wahn sista weh naym Miriam  seh dat shee mi feel nervos fi goh da meetin afta ih breda mi geh disfeloship. Shee seh: “Ai mi frayd fi weh peepl ga fi seh. Bot dehn mi ga wahn lata bradaz ahn sistaz weh mi aalso sad bowt weh mi hapm. Ahn dehn neva seh negitiv tingz bowt mi breda.” Wahn neks sista mi seh: “Afta wi son mi geh disfeloship, sohn lovin frenz mi kohn komfert wi. Som a dehn mi eevn tel wi dat dehn neva noa weh fi seh. Som mi krai wid mi an adaz mi sen mi wahn inkorijin leta! Dat mi inkorij mi wahn lat!”

16. How di kangrigayshan ku kantinyu komfert ahn help bradaz ahn sistaz weh ga wahn famili memba weh disfeloship?

¹⁶ Kantinyu fi sopoat faytful bradaz ahn sistaz weh ga wahn famili memba weh disfeloship. Now moa dan eva dehn need wi lov an inkorijment. (Heeb. 10:24, 25) Sohntaim, famili membaz a peepl weh disfeloship noatis dat sohn bradaz ahn sistaz eena di kangrigayshan noh taak tu dehn nohmoh; dehn chreet dehn laik if dehn tu mi geh disfeloship. Wi noh waahn dehn feel da way! Wi shuda komen an inkorij yong peepl weh ga payrents weh stap serv Jehoava. Sista Maria hozban mi geh disfeloship an ih mi lef di famili. Shee seh: “Som a mi frenz mi kohn da mi hows ahn kuk fi mee ahn mi chiljren. Dehn aalso help mi fi stodi wid mi chiljren. Dehn mi feel mi payn ahn dehn mi krai wid mi. Wen peepl wuda seh faals tingz bowt mee, dehn wuda taak op fi mi. Dehn mi reeli inkorij mi!”—Roam. 12:13, 15.

17. Weh eldaz ku du fi komfert bradaz ahn sistaz weh sad bikaaz dehn ga wahn famili memba weh disfeloship?

¹⁷ If yoo da wahn elda, yooz evri apachooniti weh yu ku fain fi schrentn faytful famili membaz. Yoo ga wahn speshal rispansabiliti fi komfert bradaz ahn sistaz weh ga wahn famili memba weh stap serv Jehoava. (1 Tes. 5:14) Mek it yu goal fi inkorij dehn bifoa an afta di meetin dehn. Vizit dehn da dehn hows ahn pray wid dehn. Preech wid dehn, er invait dehn fi jain yu fi famili wership. Eldaz need fi tek kayr a bradaz ahn sistaz weh sad ahn gi dehn di kompashan, lov, an atenshan weh dehn need.—1 Tes. 2:7, 8.

18. Akaadn tu 2 Peeta 3:9, weh Gaad waahn dehn wan weh stap serv hihn fi du?

¹⁸ Jehoava “noh waahn nobadi geh dischrai, bot ih waahn evribadi geh di chaans fi ripent.” (Reed 2 Peeta 3:9.) Eevn doa wahn persn komit wahn seeryos sin, ih laif stil preshos tu Gaad. Memba, da Jehoava mi pay wahn hai prais fi eech wan a wi, di laif a ih dyaa Son. Owta lov Jehoava chrai help dehn wan weh lef hihn fi kohn bak tu hihn. Hihn hoap dehn kohn bak tu hihn jos laik di prodigal son eena Jeezas iloschrayshan. (Look 15:11-32) Lata peepl weh mi lef di chroot mi kohn bak layta tu dehn lovin hevnli Faada. Ahn di bradaz ahn sistaz mi veri hapi fi welkom dehn bak. Sista Elizabeth, weh wi mi menshan erliya, mi veri hapi wen ih son mi kohn bak tu Jehoava. Shee seh, “Ai veri hapi dat di bradaz ahn sistaz mi inkorij wi fi noh giv op hoap.”

 19. Wai wee ku kantinyu chros eena Jehoava?

¹⁹ Wee ku aalwayz chros eena Jehoava. Fi hihn advais wahn aalwayz help wi; da fi wi oan gud. Hihn da wahn jenaros Faada weh ful a kompashan ahn weh ga deep lov fi evribadi weh lov ahn wership hihn. Bee shoar dat Jehoava noh wahn abandan yu wen yu di sofa. (Heeb. 13:5, 6) Brada Mark, weh wi mi menshan erliya, seh: “Jehoava mi neva abandan wi. Hihn wahn aalwayz help wi wen wi di goh chroo haad taimz.” Jehoava wahn kip di gi yu di “powa weh hyoomanz noh naamali gat.” (2 Kor. 4:7) Yes, yoo kud stay faytful ahn stil ga hoap wen sohnbadi weh yu lov stap serv Jehoava.